འདི་ག་ལས་ཁུངས་ནས་སྤེལ་བའི་གནས་ཚུལ། འདི་ལོའི་སྤྱི་ཟླ་12པའི་ཚེས་1ཉིནནི་འཛམ་གླིང་གི་ཨེ་ཙེའི་ནད་ཀྱི་ཉིན་མོ་སུམ་ཅུ་སོ་གསུམ་པ་དེ་ཡིན། ཀྲུང་གུང་ཀྲུང་དབྱང་ཆབ་སྲིད་ཅུད་ཀྱི་རྒྱུན་ལས་ཨུ་ཡོན། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཁེ་ཆང་གིས་ཉིན་ཤས་གོང་ཨེ་ཙེའི་ནད་འགོག་བཅོས་ལས་དོན་ཐད་མཆན་བཀོད་མཛུབ་སྟོན་གལ་ཆེན་གནང་ཡོད་པ་རེད།
        མཆན་བཀོད་མཛུབ་སྟོན་ནང་། ས་གནས་ཁག་དང་ཚན་པ་ཁག སྤྱི་ཚོགས་ཡོངས་བཅས་ཀྱིས་ཐུན་མོང་ཐོག་འབད་བརྩོན་བྱས་པ་བརྒྱུད། ལོ་ལྔ་ཚན་གྱི་འཆར་འགོད་བཅུ་གསུམ་པའི་རིང་། རང་རྒྱལ་གྱི་ཨེ་ཙེའི་ནད་འགོག་བཅོས་ཐད་གྲུབ་འབྲས་མངོན་གསལ་དོད་པོ་ཐོབ་ཡོད་པས། མུ་མཐུད་ལྷོད་གཡེང་མེད་པར་ཨེ་ཙེའི་ནད་འགོག་བཅོས་ལས་དོན་ཡག་པོ་བསྒྲུབ་དགོས་པ་དང་། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པས་མཛུབ་ཁྲིད་བྱ་རྒྱུ་རྒྱུན་འཁྱོངས་བྱེད་པ་དང་། ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཐབས་ཇུས་བཀོད་སྒྲིག་ཁག་དོན་འཁྱོལ་ནན་ཏན་བྱས་ཐོག ནད་ཡམས་སྔོན་འགོག་ཚོད་འཛིན་མ་ལག་བསྒྱུར་བཅོས་བྱ་རྒྱུ་དང་ཟུང་འབྲེལ་བྱས་ནས། འགོག་བཅོས་མ་ལག་དང་འབྲེལ་ཡོད་ལམ་སྲོལ་འཐུས་སྒོ་ཚང་དུ་གཏོང་བ་དང་། སྲིད་གཞུང་དང་ཚན་པ། སྤྱི་ཚོགས། མི་སྒེར་བཅས་ཕྱོགས་བཞིའི་འགན་འཁྲི་ཆེ་རུ་གཏོང་བ། མངོན་གསལ་དོད་པའི་དཀའ་གནད་དང་འགྲན་རྩོད་ལ་དོ་ཁུར་བྱེད་པ། འགོག་བཅོས་ལས་དོན་སྤེལ་ཤུགས་ཆེ་རུ་གཏོང་བ་བཅས་བྱས་ནས། ཉེན་ཁ་ཡོད་པའི་བྱ་སྤྱོད་དང་ནད་ཡམས་འགོས་ཁྱབ་འགྲོ་ཚད་སྔར་བས་ཉུང་དུ་གཏོང་བ་དང་། ཚན་ཞིབ་འགག་གཏོར་དང་སྨན་རྫས་མཁོ་སྤྲོད་འགན་སྲུང་ལ་ཤུགས་སྣོན་རྒྱག་པ། ནད་དུག་འགོས་མཁན་གྱི་དཀའ་ངལ་སེལ་རོགས་དང་མི་ཆོས་ཐུགས་ཁུར་བྱེད་པ། སྤྱི་ཚོགས་སྟོབས་ཤུགས་ཀྱི་ཨེ་འགོག་ནུས་པ་འདོན་སྤེལ་གང་ལེགས་བྱེད་པ་བཅས་བྱས་ནས། མི་དམངས་མང་ཚོགས་ཀྱི་གཟུགས་གཞི་བདེ་ཐང་དང་ཚེ་སྲོག་བདེ་འཇགས་ལ་འགན་སྲུང་དང་། བདེ་ཐང་གི་ཀྲུང་གོ་འཛུགས་སྐྱོང་བྱ་ཆེད་ལེགས་སྐྱེས་དེ་བས་ཆེ་བ་འབུལ་དགོས་ཞེས་བསྟན་ཡོད་པ་རེད།