ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། དབྱི་ལིང་གི་ཙུང་ཐུང་ལུའུ་ཧཱ་ནེ་ཡིས་ཚེས་བཅོ་ལྔ་ཉིན་བཤད་རྒྱུར། ཨ་མེ་རི་ཁའི་ཐི་ལིང་ཕུའུ་སྲིད་གཞུང་གིས་དབྱི་ལིང་ལ་གནོན་ཤུགས་སྟེར་བ་དང་བཀག་སྡོམ་བྱེད་པའི་སྲིད་ཇུས་ལ་ཕམ་ཉེས་བྱུང་ཡོད་ཟེར། ཁོས་བྱེད་ཐབས་དེ་འདྲར་བརྟེན་ནས་དབྱི་ལིང་ཕམ་པར་བྱེད་པར་བརྩོན་པའི་མི་ཚང་མས་ནོར་འཆུག་གི་ཕམ་ཁའི་སྲིད་ཇུས་དེ་བསྐྱུར་དགོས་པའི་འབོད་སྐུལ་བཏང་།
ལུའུ་ཧཱ་ནེ་ཡིས་ཉིན་དེར་སྤེལ་བའི་སྲིད་གཞུང་གི་ནང་སྲིད་གྲོས་ཚོགས་སྟེང་བཤད་རྒྱུར། ཐི་ལིང་ཕུའུ་སྲིད་གཞུང་གིས་སྤེལ་བའི་དཔལ་འབྱོར་འཐབ་འཁྲུག་ལས་དབྱི་ལིང་ལ་གྱོང་གུད་ཆེན་པོ་བཟོས་ཡོད་ཀྱང་། དབྱི་ལིང་མི་དམངས་ཀྱིས་རྒྱལ་ཁ་བླངས་ཡོད། དབྱི་ལིང་དུས་ཡུན་ཐུང་ངུའི་ནང་ཕམ་ཉེས་སུ་འགྲོ་སྲིད་པར་རློམ་པའི་མི་རྣམས་ཕོ་བྲང་དཀར་པོ་དང་འབྲལ་རྒྱུ་རེད། དབྱི་ལིང་སྔོན་ཆད་ཀྱི་དུས་སྐབས་གང་རུང་ཀྱང་སྟོབས་ལྡན་དང་འགོག་ནུས་ལྡན་པར་འགྱུར་སྲིད་ཟེར། །
