རྒྱུད་བཞི་ཞེས་པ་ནི་རྩ་བའི་རྒྱུད་དང་། བཤད་པའི་རྒྱུད། མན་ངག་རྒྱུད། ཕྱི་མ་རྒྱུད་བཅས་ལ་བྱ་ཞིང་། དེ་ཡང་རྩ་བའི་རྒྱུད་ཅེས་པ་གང་ཟག་བློ་རབ་ཀྱི་དོན་དུ་གསོ་བ་རིག་པ་ཐམས་ཅད་ཀྱི་དོན་ས་བོན་གྱི་ཚུལ་དུ་སྨོས་པ་ཚིག་ཉུང་ངུའི་སྒོ་ནས་གསོ་རིག་གི་དོན་རྒྱ་ཆེན་པོ་མདོར་བསྡུས་ཏེ་སྟོན་པས་ན་རྩ་བའི་རྒྱུད་ཅེས་སོ།།

        བཤད་པའི་རྒྱུད་ཅེས་པ་གང་ཟག་བློ་འབྲིང་གི་དོན་དུ་གསོ་བ་རིག་པའི་དོན་ཐམས་ཅད་གནས་བཅུ་གཅིག་ཏུ་བསྡུས་ནས་རྩ་བའི་རྒྱུད་དུ་རྒྱས་པར་མི་གསལ་བ་རྣམས་གསལ་བར་བཤད་པ་དང་། གསལ་བ་རྣམས་སུ་མ་ཚང་བ་ཁ་བསྐངས་ཏེ་བཤད་པ། ཆ་མཐུན་པ་རྣམས་ཀྱང་དོན་ངེས་ཤེས་བསྐྱེད་དེ་བཤད་པ། ཚིག་དོན་འགའ་ཞིག་འཐོར་བ་རྣམས་བསྡུས་ཏེ་བཤད་པ། བསྡུས་པ་རྣམས་རྣམ་པར་ཕྱེ་ནས་བཤད་པ་སྟེ། འཐོར་བ་སྡུད། འཁྲུགས་པ་བསྡེབས། གབ་པ་མངོན་དུ་ཕྱུངས་ནས་གསོ་དཔྱད་ཀྱི་དོན་ཐམས་ཅད་བཤད་ཐབས་ཀྱི་སྒོ་ནས་གཏན་ལ་འབེབས་པ་བཤད་པའི་རྒྱུད་ཅེས་སོ།།

       མན་ངག་རྒྱུད་ཅེས་པ་བློ་ཐ་མའི་དོན་དུ་བརྗོད་བྱ་གསོ་ཡུལ་ཡན་ལག་བརྒྱད་ལ། རྗོད་བྱེད་གསོ་ཐབས་སྐབས་བཅོ་ལྔའི་ལག་ལེན་མཛུབ་ཚུགས་སུ་ནད་རེ་ལ་རྒྱུ་རྐྱེན་དབྱེ་བ་རྟགས་དང་བཅོས་ཐབས་སྤྱི་དང་བྱེ་བྲག་རྣམས་ཕྲ་ཞིབ་རྒྱུ་མཚན་དང་བཅས་ཏེ་མན་ངག་ལག་ལེན་དམར་ཁྲིད་ཀྱི་སྒོ་ནས་གསལ་རྒྱས་རྫོགས་པར་གཏན་ལ་འབེབས་པ་མན་ངག་རྒྱུད་ཅེས་སོ།།

        ཕྱི་མ་རྒྱུད་ཅེས་པ་བློ་ཤིན་ཏུ་དམན་པ་རྣམས་ཀྱི་དོན་དུ་མདོ་བཞི་རུ་གྱེས་ནས་ཚིག་དོན་གཉིས་ཀ་རྒྱས་བསྡུས་འཚམ་ཞིང་རྟོགས་སླ་བ་དང་། ལག་ལེན་རྣམས་ཀྱང་ཤིན་ཏུ་འཁྱེར་བདེ་ཞིང་དོན་གསལ་ལ་གནད་དུ་དྲིལ་བའི་ཚུལ་དུ་གཏན་ལ་འབེབས་པ་ཕྱི་མའི་རྒྱུད་ཅེས་བྱ་བ་དང་། དེ་ལྟ་བུའི་རྒྱུད་བཞི་འདིར་གསོ་དཔྱད་ཀྱི་དོན་ཐམས་ཅད་བསྡུས་ཏེ་ཚང་བར་བསྟན་པའོ།།