ཧུང་ཡོན་རྫོང་གིས་ཏོག་གསར་གློ་ཚད་སྔོན་འགོག་བྱ་བར་ཕྱིར་འོང་མི་སྣར་བརྟག་དཔྱད་དང་ཟས་རིགས་བདེ་འཇགས་སྐོར་ལ་ཞིབ་བཤེར་བྱས།
ཉེ་ལམ། མཚོ་སྔོན་ཞིང་ཆེན་དང་ཀན་ལྷོ་ཁུལ་དུ་ནང་ལོག་ཧྲང་ཧེ་གྲོང་ཁྱེར་ཨའོ་མེས་ཐུ་ཟས་རིགས་ཚད་ཡོད་ཀུང་སི་ནས་ནང་འདྲེན་བྱས་པའི་ཨ་ཀེན་ཐིན་འཁྱགས་ཤའི་ཤོག་ཐུམ་ཁག་ཅིག་ལ་ཉིང་སྐྱུར་བརྟག་དཔྱད་ཚད་ལེན་བྱས་པར་ནད་དཔེ་ཞིབ་དཔྱད་མཇུག་འབྲས་གདགས་གཤིས་མངོན་པ་དང་། ཧུང་ཡོན་རྫོང་གིས་གནས་ཚུལ་འདིར་གཞིགས་ནས་དཔྱིད་གསར་སྔོན་གྱི་དངོས་ཟོག་སྐྱེལ་འདྲེན་གནད་དུ་བཟུང་སྟེ། རྫོང་ཡོངས་ཀྱི་ཡུལ་གྲོང་རུ་སྡེ་སོ་སོ་རུ་ཏོག་གསར་གློ་ཚད་རིམས་འགོག་སྐོར་ནས་བརྟག་དཔྱད་ཞིབ་བཤེར་བྱེད་པའི་ལས་སྒོ་རྒྱ་ཆེར་སྤེལ་བ་དང་། དེར་རྫོང་འཕྲོད་བསྟེན་སྡེ་ཁག་དང་རིམས་འགོག་ལྟེ་གནས། ཁྲོམ་རའི་ལྟ་སྐུལ་དོ་དམ་སྡེ་ཁག་སོགས་མཉམ་འབྲེལ་བརྒྱུད། རྨེ་བ་ཡུལ་ཚོ་དང་གསེར་དེའུ་གྲོང་རྡལ། སྦྲ་ཆེན་གྲོང་རྡལ། ཨ་མོ་ཡུལ་ཚོ། ཨ་མཆོག་གྲོང་རྡལ། ཁྱུང་མཆུ་གྲོང་རྡལ་བཅས་སུ་ཟོག་ཤ་དང་ལུག་ཤའི་འཁྱགས་ཟས་རིགས་དང་ཚོང་བདག་རྣམས་གཙོ་བྱས་པའི་འབྲེལ་གཏུག་མི་སྣ་ཚང་མར་ཡུལ་དངོས་ནས་ཉིང་སྐྱུར་བརྟག་དཔྱད་བྱས་པར་མ་ཟད། ནད་དཔེ་མ་རྒྱུ་བསྡུ་ལེན་ནན་མོ་བྱས།
ཐེངས་འདིར་ཧུང་ཡོན་རྫོང་ཡོངས་ཡུལ་གྲོང་6གི་སྐམ་ཤ་དང་ལུག་ཤ འཁྱག་སྒམ། ཤོག་སྒམ། རུས་གཏུབ་འཕྲུལ་ཆས་སོགས་རྒྱུ་ཆ་37དང་མི་སྣ་19ལ་ཉིང་སྐྱུར་བརྟག་དཔྱད་ཞིབ་བཤེར་བྱས་པས། ཞིབ་དཔྱད་མཇུག་འབྲས་ཚང་མ་སྲིབས་གཤིས་ཡིན་པ་དང་། ད་རུང་ཡང་མུ་མཐུད་དུ་2021ལོའི་དགུན་དཔྱིད་དངོས་ཟོག་སྐྱེལ་འདྲེན་སྐབས་ཀྱི་གློ་ནད་སྔོན་འགོག་སྤྱིའི་རེ་འདུན་ལྟར། སྤྱི་དམངས་ཡོངས་ཀྱི་ཚེ་སྲོག་བདེ་འཇགས་ཆེད་ཕྱི་ནང་འགྲོ་འོང་མི་སྣའི་བདེ་ཐང་ཞིབ་བཤེར་དང་ནང་འདྲེན་འཁྱགས་ཟས་བཀག་འགོག་ལས་ཀ་ལག་བསྟར་གཟབ་ནན་བྱེད་ངེས་ཡིན་པའི་འཆར་གཞི་དང་བསམ་ཚུལ་བཤད།
