ཁྲུང་ཁྲུང་སྐེ་ནག་ལ་བོད་བྱ་ཁྲུང་ཁྲུང་དང་ལྷ་བྱ་ཁྲུང་ཁྲུང་ཟེར་ཞིང་། དམངས་ཁྲོད་དུ་གེ་སར་རྟ་རྫི་ཞེས་ཀྱང་འབོད་ལ། མདོ་དབུས་མཐོ་སྒང་དུ་མ་གཏོགས་མེད་པའི་ཁྲུང་ཁྲུང་གི་རིགས་ཧ་ཅང་དཀོན་པོ་ཞིག་ཡིན་པས། རང་རྒྱལ་གྱི་གལ་གནད་སྲུང་སྐྱོབ་བྱ་བའི་རི་སྐྱེས་སྲོག་ཆགས་ཨང་རིམ་དང་པོར་གྱུར་ཡོད།
ཁྲུང་ཁྲུང་སྐེ་ནག་གི་མགྲིན་པ་དང་རྐང་པ་རིང་ཞིང་། གཟུགས་ཆེ་ལ་མཆུ་ནག་ཅིང་ལེབ་པ། ཐོད་པ་དང་མགྲིན་པའི་སྤུ་ཐུང་ལ་འཇམ་ཞིང་མདོག་ཕལ་ཆེར་ནག་པོ་ཡིན། རྒྱུན་དུ་འཚོ་གནས་བྱེད་ཡུལ་ནི་ཡངས་ཤིང་རྒྱ་ཆེ་བའི་རྩྭ་ཐང་དང་ན་འདམ། མཚེའུ་སོགས་སུ་ཡིན་ཞིང་། ཟས་སུ་རྩྭ་ལྡུམ་དང་། རྩྭའི་མྱུ་གུ། ཉ་རིགས། ལྕོང་མོ། ཆ་ག་པ་སོགས་ཟ་བཞིན་ཡོད། །
འབྲུག་སྐྱབས་ལགས་ནི་1970ལོར་མཚོ་སྔོན་ཞིང་ཆེན་མགོ་ལོག་གཅིག་སྒྲིལ་དུ་སྐྱེས་ཤིང་། ཉེ་བའི་ལོ་བཅུ་ཕྲག་གི་རིང་ཕ་ཡུལ་གྱི་རི་སྐྱེས་སྲོག་ཆགས་གང་མང་པར་མིག་བརྒྱུད་དེ་བརྙན་དང་པར་རིས་ཀྱི་གཟུགས་སུ་བླངས་ཤིང་། ཐེངས་མང་པོར་BBCཡི་དངོས་བཤུས་བརྙན་ལེན་དང་ཀྲུང་དབྱང་བརྙན་འཕྲིན་ཁང་གི་དངོས་བཤུས་བརྙན་ལེན་ཚན་ཆུང་སོགས་སུ་ཞུགས་ཤིང་རིན་བྲལ་གྱི་རྒྱུ་ཆ་མཁོ་འདོན་བྱས་མྱོང། དེ་ཡང་ཁོང་གི་བརྩམས་ཆོས་མང་པོར་རྒྱལ་ཕྱི་ནང་གི་བྱ་དགའ་དང་གཟེགས་རྟགས་ཐོབ་ཡོད།
2005ལོ་ནས་ལྕགས་རྟ་ལ་བཅིབས་ནས་སྨར་ཁོག་གི་ས་ཆ་སྟོད་སྨད་ཀྱི་རི་ལུང་ནགས་ཚལ་ཀུན་ཏུ་ཉུལ་ཞིང་ལོ་རྒྱུས་ཅན་གྱི་ས་ཆ་དང་གནའ་ཤུལ་དུ་མར་ཞིབ་དཔྱོད་བགྱིས་ཤིང་། དེ་དག་གི་ལོ་རྒྱུས་དང་ལོ་ན་བདུན་ཅུ་ཡན་ལ་ཟིན་པའི་བགྲེས་པོ་བརྒྱ་ཕྲག་ལྷག་ལ་ཆེད་དུ་དྲིས་པ་ལས་བྱུང་བའི་ས་དེའི་ལོ་རྒྱུས་ཀྱི་ངག་སྒྲོས་མང་པོ་ཟིན་བྲིས་སུ་བཏབ། 2008ལོར་ཀྲུང་གོ་དང་ཡོ་རོབ་མནའ་འབྲེལ་སྣ་མང་སྐྱེ་དངོས་སྲུང་སྐྱོང་ལས་གཞིའི་ཁོངས་གཏོགས་ཀྱི་ལས་གནས་སུ་ཞུགས་ནས་གཡུ་རྩེའི་ཉེ་འདབས་ཀྱི་རི་ལུང་དུ་མར་དབྱར་དུས་ཟླ་བ་ཕྱེད་དང་གཉིས་ཀྱི་ཡུན་ལ་རི་ཁར་བསྡད་ཅིང་གཟི་བྱིའུ་ལ་ཞིབ་འཇུག་བགྱིས་ཏེ་དེའི་པར་དང་ཟིན་ཐོ་བྲིས་པས་དེའི་ཐད་ལ་སྔར་ན་མེད་པའི་མཛད་རྗེས་བསྐྲུན། 2009ལོར་རི་ཆུ་ཚོགས་པ་དང་མཚོ་སྔོན་ཞིང་ཆེན་ནགས་ལས་ཁང་གིས་མཉམ་བསྒྲུབས་ཀྱི་གློག་བརྙན་ཟབ་སྦྱོང་ལ་ཞུགས་ཏེ་《གཟི་བྱིའུ་དང་གཟི་བྱིའུ།》ཞེས་པ་དང་།
《ངའི་བྱ་རྒོད།》ཅེས་པའི་དངོས་ཟིན་གློག་བརྙན་ཕབ་པ་དང་། སྨར་ཁོག་དང་སྨར་རོང་ཕྱོགས་སུ་བྱ་ཝང་དཀར་པོར་ཞིབ་འཇུག་དང་དེའི་གློག་བརྙན་ཕབ་ཅིང་དེ་སྲུང་སྐྱོབ་དགོས་པའི་གཞན་སྐུལ་གནང་བས་དེ་ནས་བཟུང་ད་བར་དུ་བྱ་ཝང་དཀར་པོ་གསོད་མཁན་མི་གཅིག་ཀྱང་མ་བྱུང་བས་དེའི་ཕྱོགས་ལའང་ཕྱག་རྗེས་བཟང་པོ་བཞག ཡང་ལོ་དེར་གཉན་པོ་གཡུ་རྩེ་དང་ཨ་མྱེ་རྨ་རྒྱལ་སྤོམ་རའི་གངས་རི་ཞུ་བའི་ཐད་ལ་པར་བཏབ་ཚད་འཇལ་སོགས་ཀྱིས་ཞིབ་འཇུག་ལེགས་པོ་མཛད། །
