སྤྱི་ཚེས་27ཉིན་གྱི་ཕྱི་དྲོ། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་བརྙན་ལམ་ཐོག་ནས་ཤང་ཀང་དམིགས་བསལ་སྲིད་འཛིན་ཁུལ་གྱི་སྲིད་འཛིན་དཔོན་ལིན་ཀྲེང་ཡུའེ་ཨེ་ཡིས་སྤྱི་ལོ་2020ལོའི་ལོ་འཁོར་གྱི་འགན་བསྒྲུབས་སྙན་ཞུ་གནང་བར་གསན་ཡོད།

        ལིན་ཀྲེང་ཡུའེ་ཨེ་ཡིས་ཤང་ཀང་དམིགས་བསལ་སྲིད་འཛིན་ཁུལ་སྲིད་གཞུང་གི་འདས་ཟིན་པའི་ལོ་གཅིག་རིང་གི་ལས་དོན་དང་ཏོག་གསར་གློ་ཚད་རིམས་ནད་སྔོན་འགོག་ཚོད་འཛིན་སོགས་ཀྱི་ལས་དོན་སྙན་སེང་ཞུས་ཡོད་པ་རེད།

        ཞི་ཅིན་ཕིང་གིས། རིམས་ནད་སྔོན་འགོག་ཚོད་འཛིན་གྱི་དགོས་མཁོའི་དབང་གིས་ད་ཐེངས་བརྙན་ལམ་ཐོག་ནས་ཁྱེད་རང་གི་སྤྱི་ལོ་2020ལོའི་ལས་དོན་གྱི་འགན་བསྒྲུབས་སྙན་ཞུར་ཉན་པ་ཡིན། ང་རང་ནས་དང་ཐོག་ཤང་ཀང་དམིགས་བསལ་སྲིད་འཛིན་ཁུལ་གྱི་གྲོང་མི་ཡོངས་ལ་ལྷག་བསམ་དག་པའི་འཚམས་འདྲི་ཞུ་རྒྱུ་ཡིན། ཏོག་གསར་གློ་ཚད་རིམས་ནད་ཐོན་ནས་ལོ་གཅིག་ལྷག་ཙམ་འགྲོ་གི་ཡོད་པ་དང་། འཛམ་གླིང་ལ་བརྡབ་གསིག་ཆེན་པོ་བཟོས་ཡོད། ཤང་ཀང་ནི་ཚད་མཐོའི་སྒོ་དབྱེའི་རྒྱལ་སྤྱིའི་རང་བཞིན་གྱི་གྲོང་ཁྱེར་ཞིག་ཡིན་པས་རིམས་ནད་ཀྱི་ཤུགས་རྐྱེན་ཐེབས་ཚད་ཀྱང་བལྟོས་བཅས་ཀྱིས་ཆེ་བ་ཡོད། དེའི་གོང་ཙམ་ལ། ཤང་ཀང་དུ་རིམས་ནད་ཐེངས་བཞི་པ་ཐོན་ནས་གྲོང་མིའི་ཚེ་སྲོག་བདེ་འཇགས་དང་གཟུགས་གཞིའི་བདེ་ཐང་ལ་ཉེན་ཁ་ཚབས་ཆེན་བཟོས་ཁར། ཚང་མའི་ལས་ཀ་དང་འཚོ་བར་ཡང་དཀའ་ངལ་མང་པོ་བཟོས་ཡོད། ང་རང་ནས་དོན་དེར་དོ་ཁུར་དང་སེམས་ཁྲལ་ཆེན་པོ་བྱེད་བཞིན་ཡོད། ཀྲུང་དབྱང་སྲིད་གཞུང་གིས་དགོས་ངེས་ཀྱི་བྱ་ཐབས་མཐའ་དག་བཟུང་སྟེ་ཤང་ཀང་དམིགས་བསལ་སྲིད་འཛིན་ཁུལ་གྱི་རིམས་འགོག་ལས་དོན་ལ་ནུས་ཤུགས་ཡོད་རྒུས་རྒྱབ་སྐྱོར་བྱ་རྒྱུ་ཡིན། ཚང་མས་ཆོད་སེམས་བརྟན་གཏོང་དང་མཐུན་སྒྲིལ་རིམས་འགོག་བྱེད་དགོས། མེས་རྒྱལ་ནི་ནམ་ཡང་ཤང་ཀང་གི་སྲ་བརྟན་རྒྱབ་རྟེན་ཡིན་པས་མིག་སྔའི་དཀའ་ངལ་ལས་རྣམ་པར་རྒྱལ་ངེས་རེད་ཅེས་གསུངས་ཡོད།

        ཞི་ཅིན་ཕིང་གིས། འདས་ཟིན་པའི་ལོ་གཅིག་རིང་། ཁྱེད་རང་དང་དམིགས་བསལ་སྲིད་འཛིན་ཁུལ་སྲིད་གཞུང་གིས་སྲོལ་ཡིག་བཟོ་བཅོས་ཀྱི་ཟིང་ཆ་དང་ཏོག་གསར་གློ་ཚད་ཀྱི་རིམས་ནད། ཕྱི་ཕྱོགས་ཁོར་ཡུག་གི་འགྱུར་ལྡོག་ངན་པ་བཅས་ལས་བྱུང་བའི་ཤུགས་རྐྱེན་ངན་པར་བབ་བརླིང་ངང་ཁ་གཏད་གཅོག་པ་དང་། ཐབས་ཤེས་ཡོད་རྒུས་སྒྲིག་ལམ་སྲུང་སྐྱོབ་དང་། རིམས་ནད་སྔོན་འགོག་ཚོད་འཛིན། དམངས་ཀྱི་དཀའ་ངལ་སེལ་བ། དཔལ་འབྱོར་སླར་གསོ་བྱེད་པ་བཅས་བྱས་པས་གྲུབ་འབྲས་ངེས་ཅན་ཐོབ་ཡོད། ལྷག་པར་དུ་གླེང་དགོས་པ་ཞིག་ནི་རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གིས་ཤང་ཀང་གི་རྒྱལ་ཁབ་བདེ་འཇགས་བཅའ་ཁྲིམས་གཏན་འབེབས་ཁྱབ་བསྒྲགས་བྱས་རྗེས། ཁྱེད་རང་ནས་དམིགས་བསལ་སྲིད་འཛིན་ཁུལ་སྲིད་གཞུང་གི་སྣེ་ཁྲིད་དེ་ལག་བསྟར་མཐའ་གཅིག་ཏུ་བྱས་པ་དང་ཁྲིམས་ལྟར་ཟིང་ཆ་གཏན་འགོག་གིས་འབད་བརྩོན་ཆེན་པོས་ཤང་ཀང་རྒྱུན་གཏན་གྱི་འཁོར་ལམ་ཐོག་ལོག་རྒྱུར་སྐུལ་འདེད་བཏང་ཡོད། རྒྱལ་ཁབ་ཀྱི་བདེ་འཇགས་སོགས་དང་འབྲེལ་བ་ཡོད་པའི་གནད་དོན་ཆེན་པོའི་མདུན་དུ་ཁྱེད་རང་གི་ལངས་ཕྱོགས་བརྟན་ཞིང་། འགན་འཁྲི་འཁུར་ཕོད་པས་དེའི་ཐོག་ནས་རྒྱལ་གཅེས་ཀང་གཅེས་ཀྱི་བརྩེ་སེམས་དང་རྒྱལ་ཁབ་དང་ཤང་ཀང་ལ་འཛིན་པའི་ཚད་མཐོའི་འགན་ཁུར་སྙིང་སྟོབས་མངོན་ཡོད། ཀྲུང་དབྱང་ནས་ཁྱེད་རང་དང་དམིགས་བསལ་སྲིད་འཛིན་ཁུལ་སྲིད་གཞུང་གི་ལས་བསྒྲུབས་འགན་ཁུར་ལ་ཁས་ལེན་གང་ལེགས་བྱས་ཡོད་ཅེས་གསུངས་ཡོད།

        ཞི་ཅིན་ཕིང་གིས། ཤང་ཀང་ཟང་ཟིང་དུ་གྱུར་བ་ནས་བཅོས་སྐྱོང་ཐུབ་པའི་བར་འགྱུར་ལྡོག་ཆེན་པོ་བྱུང་བ་དེ་དག་ལས་གནས་ལུགས་ཤིག་བསྐྱར་དུ་གསལ་བཤད་ཐུབ་ཡོད། དེ་ནི་རྒྱལ་ཁབ་གཅིག་ལ་ལམ་ལུགས་གཉིས་ཀྱི་ལག་ལེན་བརྟན་ཐོག་རྒྱང་བགྲོད་ཐུབ་རྒྱུར་འགན་སྲུང་བྱེད་དགོས་ན། ངེས་པར་དུ་རྒྱལ་ཁབ་ལ་གཅེས་མཁན་གྱིས་ཤང་ཀང་སྐྱོང་རྒྱུ་རྒྱུན་འཁྱོངས་བྱེད་དགོས། འདི་ནི་རྒྱལ་ཁབ་ཀྱི་བདག་དབང་དང་། བདེ་འཇགས། གོང་འཕེལ་གྱི་ཁེ་ཕན་བཅས་དང་འབྲེལ་བ་ཡོད་པ་ཞིག་རེད་ལ། ཤང་ཀང་ཡུན་རིང་དར་རྒྱས་བརྟན་ལྷིང་ཡོང་བའི་གཞི་རྩའི་རྩ་དོན་ཡང་རེད། རྒྱལ་གཅེས་མཁན་གྱིས་ཤང་ཀང་སྐྱོང་རྒྱུ་རྒྱུན་འཁྱོངས་ཐུབ་ན་ཀྲུང་དབྱང་གིས་དམིགས་བསལ་སྲིད་འཛིན་ཁུལ་སྒོ་ཀུན་དོ་དམ་བཅོས་སྐྱོང་བྱེད་པའི་དབང་ཆ་གཞི་ནས་དོན་འཁྱོལ་ནུས་ལྡན་བྱེད་ཐུབ་པ་དང་། རྩ་ཁྲིམས་དང་གཞི་རྩའི་བཅའ་ཁྲིམས་སུ་གཏན་འཁེལ་བའི་རྩ་ཁྲིམས་ལམ་ལུགས་ཀྱི་སྒྲིག་ལམ་ལ་གཞི་ནས་སྲུང་སྐྱོབ་ནུས་ལྡན་བྱེད་ཐུབ་པ། བང་རིམ་ཟབ་པའི་གནད་དོན་མང་པོ་གཞི་ནས་ཐག་གཅོད་ནུས་ལྡན་བྱེད་ཐུབ་པ། ཤང་ཀང་གཞི་ནས་ཡུན་རིང་བདེ་འཁོད་ཡོང་ཐུབ་པ་མ་ཟད་ཀྲུང་ཧྭ་མི་རིགས་ཀྱི་རླབས་ཆེན་བསྐྱར་དར་མངོན་འགྱུར་ཆེད་འབུལ་དགོས་པའི་ལེགས་སྐྱེས་འབུལ་ཐུབ་ཅེས་གསུངས་ཡོད།

        ཞི་ཅིན་ཕིང་གིས་ད་དུང་ལིན་ཀྲེང་ཡུའེ་ཨེ་ལ་ཁོང་ནས་ཨ་རིའི་དོན་མེད་བཀག་སྡོམ་ཁེལ་བའི་ཤང་ཀང་དམིགས་བསལ་སྲིད་འཛིན་ཁུལ་སྲིད་གཞུང་གི་འབྲེལ་ཡོད་དཔོན་རིགས་ལ་མཛའ་བརྩེའི་འཚམས་འདྲི་བརྒྱུད་ཞུ་གནང་རོགས་ཞུས་ཡོད།

        ལིན་ཀྲེང་ཡུའེ་ཨེ་ཡིས། ཀྲུང་དབྱང་ནས་ཤང་ཀང་ལ་དོ་ཁུར་དང་རྒྱབ་སྐྱོར་གནང་བར་ཐུགས་རྗེ་ཆེ་ཞུ་རྒྱུ་ཡིན། ང་རང་ནས་ཤང་ཀང་དམིགས་གསལ་སྲིད་འཛིན་ཁུལ་གྱི་དོ་དམ་བཅོས་སྐྱོང་རུ་ཁག་གི་སྣེ་ཁྲིད་དེ་ནུས་ཤུགས་གང་ཡོད་འདོན་རྒྱུ་དང་། འབད་པ་ཆེར་སྐྱེད་ཀྱི་ལས་དོན་བསྒྲུབ་པ་དང་འཇིགས་སྣང་སྤུ་ཙམ་མེད་པར་དཀའ་ངལ་ཁྱད་བསད་བྱས་ཏེ་ཤང་ཀང་ཉིད་སླར་ཡང་མདུན་ཕྱོགས་སུ་རྡོག་ཐོན་ཐུབ་པ་བྱ་རྒྱུ་ཡིན་ཞེས་གསུངས་ཡོད།

        ཧན་ཀྲེང་དང་། ཏིང་ཞུའེ་ཞང་། ཀུའོ་ཧྲེང་ཁུན། ཡིའུ་ཆོན། ཞ་པའོ་ལུང་སོགས་གོང་གསལ་བྱེད་སྒོར་ཞུགས་ཡོད།