ཉེ་ཆར། མང་ཚོགས་ཀྱིས་དོ་སྣང་བྱེད་བཞིན་པའི་ཕྱོགས་གསུམ་པ་ཡིས་སི་ཁྲོན་ཞིང་ཆེན་གྱི་སློབ་གསོའི་གནས་ཚུལ་ལ་དཔྱད་འཇོག་བྱས་པའི་མཇུག་འབྲས་དེ་ཁྲེན་ཏུའུ་རུ་ཕྱིར་བསྒྲགས་བྱས་ཡོད་དེ། ལྷོ་ནུབ་དཔལ་འབྱོར་སློབ་ཆེན་གྱི་དཔལ་འབྱོར་སྤྱི་ཚོགས་འཕེལ་རྒྱས་རྟོག་ཞིབ་ཚད་ལེན་ཞིབ་འཇུག་ཁང་གིས། 《2013ལོའི་སི་ཁྲོན་ཞིང་ཆེན་གྱི་སློབ་གསོའི་འཕེལ་རྒྱས་སྙན་ཞུ།》ཞེས་པ་ཁྱབ་བསྒྲགས་བྱས་ཤིང་། དེ་ཡང་སློབ་གྲྭར་འགྲོ་ཚད་དང་འདྲ་མཉམ་གྱིས་སློབ་གསོའི་ལམ་བུར་ཞུགས་ཚད། གསོ་སྦྱོང་བྱས་པའི་སྤུས་ཚད། སྤྱི་ཚོགས་ཞབས་ཞུའི་ནུས་པ། སློབ་གསོའི་འགན་ལེན་དང་། ཆ་རྐྱེན་འཛུགས་སྐྲུན་བྱེད་ཚད་སོགས་ཀྱི་ཕྱོགས་6ནས་དམིགས་ཚད་28ཀྱི་གཞི་གྲངས་དབྱེ་ཞིབ་བྱས་ཏེ། ཐོག་དང་པོར་ཕྱོགས་གསུམ་པའི་ངོས་ནས་སི་ཁྲོན་གྱི་སློབ་གསོ་འཕེལ་རྒྱས་ཀྱི་རྣམ་པར་དབྱེ་ཞིབ་དང་ཕྱོགས་བསྡོམས་བྱས་ཡོད།

             ཕྱོགས་གསུམ་པས་གནས་ཚུལ་ཕྱོགས་བསྡོམས་དང་ཞིབ་འཇུག་བྱས་པ་ལྟར་ན། 2013ལོར་སི་ཁྲོན་ཞིང་ཆེན་ཡོངས་ཀྱི་སློབ་གསོ་འཕེལ་རྒྱས་ཀྱི་སྤྱིའི་སྐར་གྲངས་79.33ཡིན་པ་དང་། 2013ལོའི་སློབ་གསོ་འཕེལ་རྒྱས་ཀྱི་མགྱོགས་ཚད་ལ་གཞིགས་ན། ལོ་6ལྷག་འགོར་རྗེས་སྤྱིའི་སྐར་གྲངས་100ལ་སླེབས་རྒྱུ་ཡིན་པ་དང་། 2020ལོར་སླེབས་དུས་འཆར་གཞིའི་དམིགས་འབེན་མངོན་འགྱུར་བྱ་ཐུབ་རྒྱུ་རེད།  ཞིང་ཆེན་ཡོངས་ཀྱི་ཁུལ་དང་གྲོང་ཁྱེར་21གི་སློབ་གསོའི་འཕེལ་རྒྱས་དཔྱད་འཇོག་བྱས་དུས། ཁྲེན་ཏུའུ་གྲོང་ཁྱེར་གྱི་སྤྱིའི་སྐར་གྲངས་94ཡིན་ལ། དེ་ནི་སྐར་གྲངས་མཐོ་ཤོས་ཆགས་ཡོད། དཀར་མཛེས་ཀྱི་སྤྱིའི་སྐར་གྲངས་61ཡིན་ལ། དེ་ནི་ཆེས་དམའ་ཤོས་ཡིན། །