རྒྱལ་ཡོངས་ཀྱི་དབུལ་བྲལ་གནད་སྒྲོལ་གྱི་སྔོན་ཐོན་སྡེ་ཁག་ཀྲུང་གུང་གཟི་རྩ་སྡེ་དགུ་རྫོང་ཨུའི་གནས་ཚུལ་རགས་བཀོད།

    དཔྱིད་འགོ་མའི་དུས་འདིར། ཀྲུང་གུང་གཟི་རྩ་སྡེ་དགུ་རྫོང་ཨུས་ཡང་དག་པའི་འགོ་ཁྲིད་དང་རྒྱ་ཆེའི་མང་ཚོགས་ཀྱི་མཐུན་སྒྲིལ་སྟོབས་ཤུགས་ལ་བརྟེན་ནས། དབུལ་བྲལ་གནད་སྒྲོལ་ལ་གྲུབ་འབྲས་གཟེངས་སུ་ཐོན་པ་བླངས་ཡོད་དེ། 2021ལོར་རྒྱལ་ཡོངས་ཀྱི་དབུལ་བྲལ་གནད་སྒྲོལ་གྱི་སྔོན་ཐོན་སྡེ་ཁག་གི་མཚན་སྙན་ཐོབ་ཡོད།

ནུས་པ་ཡོད་དགུས་དབུལ་ཞྭ་འབུད་པར་བརྩོན།

    1991ལོར་གཟི་རྩ་སྡེ་དགུ་རྫོང་ནི་ཞིང་ཆེན་གྱིས་དབུལ་ཕོངས་རྫོང་དུ་གཏན་འཁེལ་བྱས་པ་དང་། 2012ལོར་རྒྱལ་ཁབ་ཀྱི་ཡུག་སྦྲེལ་དབུལ་སྐྱོར་གསར་སྤེལ་ལས་དོན་གསར་བའི་རྫོང་དུ་བཅུག་པ་དེ་ནི། སི་ཁྲོན་གྱི་དབུལ་ཕོངས་རྫོང་88གྲས་དང་ཀྲུང་དབྱང་གིས་ཁ་གསལ་བྱས་པའི“ཁོངས་གསུམ་ཁུལ་གསུམ”གྱི་ཤིན་ཏུ་དབུལ་བའི་རྫོང་དུ་གཏན་འཁེལ་བྱས་པ་རེད།

    དཀའ་ངལ་དངོས་ལ་དམིགས་ཏེ། གཟི་རྩ་སྡེ་དགུ་རྫོང་ཨུས་དབུལ་བྲལ་གནད་སྒྲོལ་གྱི་ལས་དོན་དེ་ཆབ་སྲིད་ཀྱི་འགན་འཁྲི་ཆེ་ཤོས་དང་།དམངས་འཚོའི་འདུ་འགོད་ཆེ་ཤོས། འཕེལ་རྒྱས་ཀྱི་གོ་སྐབས་ཆེ་ཤོས་བཅས་སུ་བརྩི་རྒྱུ་མཐའ་འཁྱོངས་བྱས་ནས། “2+4+5+9”ཡི་ལས་ཀའི་ལམ་སྲོལ་གསར་དུ་བཙུགས་ཏེ་རྒྱ་ཆེའི་ལས་བྱེད་པ་དང་མང་ཚོགས་ལ་དབུལ་བྲལ་གནད་སྒྲོལ་གྱི་འཐབ་ཕྱོགས་དང་པོར་འབད་འཐབ་བྱས་ཏེ་གོམ་སྟབས་བརྟན་པོའི་ངང་ས་ཆ་རེ་རེ་བཞིན་འབྱོར་འབྲིང་གི་ཕྱོགས་སུ་སྐྱོད་པའི་བདེ་སྐྱིད་ཀྱི་ལམ་བུ་གཏོད་དགོས་པའི་འབོད་སྐུལ་དང་རྩ་འཛུགས་བྱས།

    མ་དངུལ་སྒོར་དུང་ཕྱུར་32.4བཏང་ནས་དབུལ་སྐྱོར་རྣམ་གྲངས་1050ལག་བསྟར་བྱས། ཁྱིམ་དུད་119ཡི་མི་440ཡུལ་གཞན་དུ་གནས་སྤོར་དབུལ་སྐྱོར་ལས་དོན་ལེགས་གྲུབ་བྱུང་བ་དང་། བསྐྱར་སྐྲུན་རྣམ་གྲངས་ལ་བརྟེན་ནས་ས་གནས་མང་ཚོགས་ཁྲི་1.5ལས་ཞུགས་བྱས། ཁྲེང་ཏུའུ་དང་ཀྲེ་ཅང་ཅ་ཞིང་སོགས་ས་ཁུལ་གྱི་བཟོ་བ་བཀོལ་སྤྱོད་ཁེ་ལས་དང་འབྲེལ་ནས་མི་ཁྲི་3ལྷག་གནས་སྤོར་ལས་ཞུགས་བྱས། སྤྱི་ཕན་རང་བཞིན་གྱི་ལས་གནས་4745གསར་སྤེལ་བྱས་ནས་མང་ཚོགས་ཀྱི་ལས་ཞུགས་བརྟན་འཇགས་བྱས། བརྒྱ་ཆ་97ཡན་གྱི་ས་ཡོམ་རྗེས་ཀྱི་ལས་ཤོར་མི་སྣ་བསྐྱར་དུ་ལས་ཞུགས་ཐུབ་པ་དང་། སློབ་གསོ་དང་སྨན་བཅོས། ལས་ཞུགས། སྤྱི་ཚོགས་འགན་ལེན་སོགས་ཀྱི་དབུལ་སྐྱོར་སྲིད་ཇུས་དོན་འཁྱོལ་ནན་པོ་བྱས་པ། དུད་ཚང་1608ཀྱི་དབུལ་བོ་5688དབུལ་བྲལ་ཐུབ་པ་སོགས་ལོ་འགའི་རིང་གཟི་རྩ་སྡེ་དགུ་རྫོང་ཨུས་མང་ཚོགས་ཀྱི་རེ་འདུན་ལེགས་པར་བསྐངས།

ཁོངས་ཡོངས་ལྗོངས་སྐོར་སྤེལ་ནས་མང་ཚོགས་ཕྱུག་པོར་བཏང་།

    ཉེ་བའི་ལོ་འགར། གཟི་རྩ་སྡེ་དགུ་རྫོང་ཨུས་ཕྱོགས་ཡོངས་ནས་གྲོང་ཁྱེར་དང་གྲོང་རྡལ། གྲོང་སྡེ་མཉམ་འབྲེལ་གོང་འཕེལ་བྱས་ཏེ། ཁོངས་ཡོངས་ལྗོངས་སྐོར་གྱི་དཔེ་རིས་གསར་བ་གཏོད་པ་དང་། ལྗོངས་ཁུལ་13བསྐྲུན་པ་དང་། རྒྱལ་ཁབ་A3རིམ་པ་དང་A4རིམ་པའི་ལྗོངས་ཁུལ་གཉིས་རེ་བཏོད། ལྗོངས་སྐོར་ལམ་ཐིག་རྩེ་གྲ་7བཏོད། ས་གནས་ཀྱི་ཁྱད་ཆོས་ལྡན་པའི་ཐོན་རྫས་500ལྷག་གསར་སྤེལ་བྱས་པ་སོགས་རིག་གནས་ལྗོངས་སྐོར་འཕེལ་རྒྱས་མནའ་འབྲེལ་བཙུགས་ནས་གཟི་རྩ་སྡེ་དགུ་རང་ཉིད་ཀྱི་ཁོངས་ཡོངས་ལྗོངས་སྐོར་རྣམ་པ་ཞིག་ཆགས།

    ན་ནིང་གི་ཟླ་9ཚེས་27ཉིན་གཟི་རྩ་སྡེ་དགུའི་མཛེས་ལྗོངས་ཁུལ་སྒོ་ཕྱེ་ཚུན།རྫོང་ཡོངས་སུ་ལྗོངས་སྐོར་བ་སྐོར་ཐེངས་ཁྲི་368ལ་སྣེ་ལེན་བྱས་པ་དང་ལྗོངས་སྐོར་གྱི་སྤྱིའི་ཡོང་འབབ་སྒོར་དུང་ཕྱུར་51ལྷག་ཡོད། རྫོང་ཡོངས་སུ་ལྗོངས་སྐོར་མགྲོན་ཁང་དང་སྤྲོ་སྐྱིད་ཁང་།ཟ་ཁང་3000ལྷག་ཕྱེས་པས་མི་ཁྲི་ཕྲག་མང་པོའི་ལས་ཞུགས་ལས་གཏོད་ལ་སྐུལ་ཁྲིད་བྱས།

ཐོན་ལས་མཉམ་འདྲེས་སྤེལ་ནས་ལྗང་མདོག་ཐོན་ལས་ཕྱོགས་ཡོངས་ནས་རྒྱ་སྐྱེད་བཏང་།

    གནད་འཁེལ་དབུལ་སྐྱོར་དང་གནད་འཁེལ་དབུལ་བྲལ་ལ་སྐུལ་འདེད་གཏོང་བར་དམིགས་ནས། 《གཟི་རྩ་སྡེ་དགུ་རྫོང་གི་གྲོང་གསེབ་དར་རྒྱས་གཏོང་བའི་འཆར་འགོད（2018ལོ་ནས་2025ལོའི་བར། ）》བཟོས་པ་དང་། ཁྱད་ཆོས་ལྡན་པའི་ཞིང་ལས་ཀྱི་ཕན་ནུས་ས་ཁོངས་བཀོད་སྒྲིག་བྱས་པ། ཐོན་ལས་དབུལ་སྐྱོར་བྱ་རྒྱུ་དེ་དབུལ་ཕོངས་གྲོང་སྡེའི་རང་ངོས་སྒུལ་ཤུགས་ཆེ་རུ་གཏོང་བ་དང་དབུལ་ཕོངས་དུད་ཚང་གི་རང་བརྟེན་ནུས་པ་ཆེ་རུ་གཏོང་བའི་གཞི་རྩ་གལ་ཆེན་དུ་བརྩིས།

    གཟི་རྩ་སྡེ་དགུ་རྫོང་གི་ལྗང་མདོག་ཐོན་ལས་གང་སར་ཁྱབ་ཅིང་། དབུལ་སྐྱོར་ཐོན་ལས་དག་ལ་གཡུར་དུ་ཟ་བའི་གྲུབ་འབྲས་ཐོབ་ཡོད་པ་དང་། ས་ཞིང་གིས་ཁྱིམ་ཚང་དག་གི་དགོས་འདོད་སྐོང་བཞིན་ཡོད་པ་དང་། གྲོང་སྡེ་དག་གིས་དབུལ་ཞྭ་ཕུད་ཡོད་པས་སྡེ་དགུ་བདེ་སྐྱིད་ཀྱི་དཔལ་ལ་རོལ་བཞིན་ཡོད།

    ལོ་བརྒྱ་གཉིས་ཀྱི་འབད་འཐབ་དམིགས་འབེན་མངོན་འགྱུར་བྱེད་གྲབས་ཡོད་པའི་སྐབས་འདིར། གཟི་རྩ་སྡེ་དགུ་རྫོང་ཨུས་དབུལ་བྲལ་གནད་སྒྲོལ་གྱི་གྲུབ་འབྲས་རྒྱུན་མཐུད་ངང་བརྟན་དུ་བཏང་སྟེ་ཆོད་སེམས་སྔར་བས་བརྟན་པ་དང་། བློ་སྟོབས་སྔར་བས་བརྟན་པ། བྱ་ཐབས་སྔར་བས་ནུས་ལྡན་བཅས་ཀྱི་སྒོ་ནས་ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་བྱེད་པའི་བགྲོད་ལམ་གསར་བར་འབད་འབུངས་ལྷོད་མེད་བྱ་རྒྱུ་རེད་དོ།།