གནས་མཆོག་ཁ་བ་དཀར་པོའི་རི་རྒྱུད་ནི་ཡུན་ནན་ཞིང་ཆེན་གྱི་གཟི་བརྗིད་ཉམས་ལྡན་པའི་གནས་རི་ཞིག་ཡིན་ལ།  རི་རྒྱུད་དེས་སེམས་ཀྱི་ཉི་ཟླ་(སྔོན་གྱི་བདེ་ཆེན་རྫོང་།)རྫོང་གི་ས་ཆའི་རྒྱ་ཁྱོན་ལས་བརྒྱ་ཆ་34.5ཡན་ཆད་ཟིན་ཡོད་པ་རེད།  དེ་གར་རྒྱ་མཚོའི་ངོས་ལས་མཐོ་ཚད་སྨི་6000ཡན་ཆད་ཡོད་པའི་གངས་རི་བཅུ་གསུམ་ཡོད་པ་དང་།  གནས་ཆེན་ཁ་བ་དཀར་པོའི་གངས་ནི་རྒྱ་མཚོ་ངོས་ལས་མཐོ་ཚད་སྨི་6700ལྷག་ཡོད་པ་རེད།  རི་རྒྱུད་དེར་གངས་ནགས་རྩྭ་གསུམ་འཛོམས་པས་མཛེས་སྡུག་རབ་ཏུ་ལྡན་པ།  བོད་ཁམས་ཀྱི་གནས་མཆོག་བརྒྱད་ཀྱི་ཡ་གྱལ་དུའང་བགྲང་སྲོལ་ཡོད་པ་ཞིག་རེད། ངག་རྒྱུན་དུ་བཤད་པ་ལྟར་ན།  ཁ་བ་དཀར་པོའི་གནས་རི་དེ་དང་ཐོག་བཀའ་བརྒྱུད་པའི་བསྟན་སྲུང་ཞིག་ཡིན་པ་དང་།  ཡོན་རྒྱལ་རབས་ཀྱི་སྐབས་སུ་ཀརྨ་པ་སྐུ་ཕྲེང་གསུམ་པ་རང་བྱུང་རྡོ་རྗེ(སྤྱི་ལོ་1284—1339)དངོས་སུ་གནས་དེར་ཕེབས་ཤིང་ཁ་བ་དཀར་པོར་རབ་གནས་མཛད་པ་ནས་བཟུང་གནད་མཆོག་དེ་བཀའ་བརྒྱུད་པའི་སྒྲུབ་གནས་སུ་གྱུར་པར་བཤད།  ཡང་《གླིང་གེ་སར་རྒྱལ་པོའི་སྒྲུང—རྒྱ་གླིང》དུ་ཁ་བ་དཀར་པོའི་རི་ནི་སྔོན་ཆད་གསང་བདག་གི་གནས་དང་།  སློབ་དཔོན་པདྨ་འབྱུང་གནས་ཀྱི་ཆོས་གཏེར་བདག་གཉེར་བྱེད་མཁན་ཀྱི་ལྷ་ཞིག་ཀྱང་ཡིན་པར་བརྗོད།  གེ་སར་རྒྱལ་པོས་དམ་ལ་བཏགས་ཏེ་དགེ་བསྙེན་གྱི་སྡོམ་པ་བསྐུར་བ་ནས་བཟུང་བསྟན་སྲུང་དུ་གྱུར་ཟེར།  གནས་དེའི་ལྷ་ཁང་ཞིག་ཏུ་སྟོན་པ་ཤཱཀྱ་ཐུབ་པའི་འབག་སྐུའི་གཡོན་ཕྱོགས་སུ་ཁ་བ་དཀར་པོ་བཅིབས་རྟ་དཀར་པོ་ཞིག་ལ་བཅིབས་པ་དང་། ཕག་ཏུ་མདུང་རིང་ཐོགས་པའི་གཞི་བདག་ཅིག་གི་ཚུལ་དུ་བཞེངས་ཡོད། བཤད་
ཚུལ་ལྟར་ན།  ལོ་རེའི་ཟླ་བ་3པའི་ཚེས་15ཉིན།  ཕྱོགས་བཞི་མཚམས་བརྒྱད་ནས་ཡོང་བའི་བོད་རིགས་སྤུན་ཟླས་གནས་དེ་ནས་བསང་མཆོད་ཕུལ་ཏེ་བསྟན་སྲུང་ཁ་བ་དཀར་པོར་མཆོད་འབུལ་བྱེད་པའི་སྲོལ་ཞིག་དར་ཡོད་པ་རེད།  ལུག་གི་ལོ་ནི་བསྟན་སྲུང་ཁ་བ་དཀར་པོའི་རང་ལོ་ཡིན་པས་དད་ལྡན་མང་ཚོགས་དང་ལྗོངས་རྒྱུ་བ་སྔར་བས་མང་པོ་ཞིག་གནས་དེར་ཡོང་ནས་ལྗོངས་རྒྱུ་ལྟད་མོར་རོལ་བཞིན་ཡོད་པ་རེད།