བསྭོ་བསྭོ།སྟེང་མ་ལྷ་ཡི་ལྷ་ཆེན་བསྭོ། ལྷ་ཆེན་ཚངས་པ་དཀར་པོ་བསྭོ། བར་མ་གཉན་གྱི་གཉན་ཆེན་བསྭོ། གཉན་ཆེན་ཨ་བོ་གེ་འཛོ་བསྭོ། འོག་མ་ཀླུ་ཡི་ཀླུ་རྒྱལ་བསྭོ། ཀླུ་རྒྱལ་གཙུག་ན་རིན་ཆེན་བསྭོ། ང་འབྲས་དཀར་བསམ་པའི་དོན་འགྲུབ་ཀྱིས།ས་བཟང་པོ་སྨོན་ལམ་ལ་ཁ་ནས།ཇ་སྔ་ཇ་དང་པོ་ཁ་ལ་བཞག།ཕྱི་ཇ་གཉིས་པ་ཐབ་ལ་བཏབ། འདོ་བ་ཁམ་ཆུང་དུང་རྨིག་ཞབས་ལ་ཞོན།སྟག་སྒམ་རྣམ་སྲས་བང་མཛོད་རྒྱབ་ལ་ཁུར།ས་ཡ་ད་ལྕི་ལ་མ་ད་སོས།ས་ལྕི་སོས་ཡག་གི་ཁ་མདོ་ནས།གེ་སར་སྐྱེས་བུ་དོན་འགྲུབ་ཀྱིས།རྟགས་རྟེན་འབྲེལ་ཅན་གྱི་འབྲས་དཀར་སླེབས་འདུག་ཟེར།ལས་དབང་ཐང་ཅན་གྱི་འབྲས་དཀར་སླེབས་འདུག་ཟེར།ཡ་རྟེན་འབྲེལ་ལན་གསུམ་སྒྲིག་བཟླས་ནས་གསེར་སྲང་བཅུ།དངུལ་སྲང་བཞི་བཅུ་ཞེ་ལྔ་བྱིན་ནས་དར་ཉིན་མོ་བདེ་ལེགས་ཤིག་ཉོས་པ་ཕུལ་ནས།ངས་ཉིན་ནས་སྤེན་དཀར་བཏུས།སྲིབ་ནས་སུར་དཀར་བཏུས།ཉིན་སྲིབ་བར་ནས་ཉ་བྲིད་བཏུས་ཏེ་ལྷ་བསང་དཀར་པོ་དགུང་ལ་འཕྱུར་བ་ཞིག་བྱས།ཇ་མི་གཅིག་ཇ་སྣ་བཅོ་བརྒྱད་དེེ།ཇ་ཤར་ཇ་འབོལ་ཇ་བཙོས་ཇ་གསུམ།ཇ་ཤོག་སེར་ཤོག་དམར་ཤོག་དཀར་གསུམ།མེ་ཏོག་གཡང་འཛིན་སྤྲ་ག་གསུམ་ལ་སོགས་པ་བཏབ་ནས་ཁྲ་མོ་གླིང་གི་ཕྱོགས་ལ།ཨ་མྱེ་རྨ་ཆེན་སྤོམ་ར།རྫ་ཡག་ཉེས་ཉི་ཟླ་ཁ་སྤྲོད།ཁྲ་ཕུ་འཛམ་གླིང་ལ་ཁ།གེ་སར་སྐྱེས་བུ་དོན་འགྲུབ།འདོ་རྗེ་རྐྱང་རྒོད་འཕེར་པོ་ལ་སོགས་པ་ལ་མཆོད་དེ།སྔ་དྲོ་གསུམ་ལ་རྟེན་འབྲེལ་བསྒྲིགས་ནས་འོང་།ལྷ་བླ་མ་གསེར་ཞྭ་ཅན་གྱི་རྟེན་འབྲེལ་འགྲིག།ཉིན་གུང་གསུམ་ལ་རྟེན་འབྲེལ་བསྒྲིགས་ནས་འོང་།རྔ་དང་རོལ་མོའི་རྟེན་འབྲེལ་འགྲིག།ཕྱི་དྲོ་གསུམ་ལ་རྟེན་འབྲེལ་བསྒྲིགས་ནས་འོང་།དུང་དང་རྒྱ་གླིང་གི་རྟེན་འབྲེལ་འགྲིག།ན་བ་ནང་གི་མེ་ཏོག་འདྲ་བའི་རྟེན་འབྲེལ་འགྲིག།དགུང་སྔོན་དབྱིངས་ཀྱི་གཡུ་འབྲུག་འདྲ་བའི་རྟེན་འབྲེལ་འགྲིག།རྒྱ་མཚོའི་ནང་གི་གསེར་ཉ་འདྲ་བའི་རྟེན་འབྲེལ་འགྲིག། འོ་ལགས་སོ་སེང་ཆེན་རིན་པོ་ཆེས། འབྲས་དཀར་གང་དུ་སོང་ཡིན་ཟེར། འབྲས་དཀར་སྟོད་ལ་སོང་ཡིན་བཟླས།འབྲས་དཀར་རྒྱ་གར་ཡུལ་ལ་སོང་། རྒྱ་གར་རྒྱལ་པོའི་ཆོས་སྒོ་ཕྱེས།ཆོས་ཀྱི་བསྟན་པ་དེ་ནས་དར།འབྲས་དཀར་གང་དུ་སོང་ཡིན་ཟེར།འབྲས་དཀར་བར་ལ་སོང་ཡིན་བཟླས།འབྲས་དཀར་བལ་པོའི་ཡུལ་ལ་སོང་།བལ་པོ་རྒྱལ་པོའི་རྒྱུ་སྒོ་ཕྱེས། རྒྱུ་ཡི་བསྟན་པ་དེ་ནས་དར། འབྲས་དཀར་གང་དུ་སོང་ཡིན་ཟེར། འབྲས་དཀར་སྨད་ལ་སོང་ཡིན་བཟླས། འབྲས་དཀར་རྒྱ་ནག་ཡུལ་ལ་སོང་།རྒྱ་ནག་རྒྱལ་པོའི་ཇ་སྒོ་ཕྱེས།ཇ་ཡི་བསྟན་པ་དེ་ནས་དར། འོ་ལགས་སོ་སེང་ཆེན་རིན་པོ་ཆེས། ད་འབྲས་དཀར་ག་ན་འགྲོ་ཡིན་ཟེར། འབྲས་དཀར་ལུང་པ་ཆུ་མེད་ཡུལ་དུ་འགྲོ་ཡིན་བཟླས། ལུང་པ་ཆུ་མེད་ཡུལ་ལ་སོང་། ཆུ་སྣ་རེ་རེ་ཁྲིད་ནས་ཡོང་། ཆུ་བོ་ཡར་ལུང་གཙང་པོ་ཁྲིད། ལུང་པ་རྩྭ་མེད་ཡུལ་ལ་སོང་།རྩྭ་སྣ་རེ་རེ་ཁྲིད་ནས་ཡོང་། སྟོད་རྒྱ་གར་གྱི་རྩྭ་མཆོག་གོང་མ་ཁྲིད། ལུང་པ་རྡོ་མེད་ཡུལ་ལ་སོང་། རྡོ་སྣ་རེ་རེ་ཁྲིད་ནས་ཡོང་། ལྷ་སའི་རྡོ་ར་ཁྲ་མོ་ཁྲིད། འོ་ལགས་སོ་སེང་ཆེན་རིན་པོ་ཆེ། ངས་འཇིག་རྟེན་ཆགས་པ་རྣམ་གསུམ་བཤད། བླ་མ་མ་ཆགས་བླ་མ་ཆགས། །བླ་མ་ཨོ་རྒྱན་པདྨ་ཆགས། །དཔོན་པོ་མ་ཆགས་དཔོན་པོ་ཆགས། །དཔོན་པོ་གླིང་རྗེ་གེ་སར་ཆགས། །མནའ་མ་མ་ཆགས་མནའ་མ་ཆགས། །མནའ་མ་སེང་ལྕམ་འབྲུག་མོ་ཆགས། །དེ་འཇིག་རྟེན་ཆགས་པ་རྣམ་གསུམ་ཡིན།། འོ་ལགས་སོ་སེང་ཆེན་རིན་པོ་ཆེ།ངས་འཇིག་རྟེན་ཆགས་པ་རྣམ་བཞི་བཤད། ལྷ་ས་མ་ཆགས་ལྷ་ས་ཆགས། །ལྷ་ས་རྒྱ་མཚོའི་སྟེང་ལ་ཆགས། །བསམ་ཡས་མ་ཆགས་བསམ་ཡས་ཆགས། །བསམ་ཡས་བྱེ་མའི་གླིང་ལ་ཆགས། །དགའ་ལྡན་མ་ཆགས་དགའ་ལྡན་ཆགས། །དགའ་ལྡན་རི་བོའི་རྩེ་ལ་ཆགས། །སྡེ་དགེ་མ་ཆགས་སྡེ་དགེ་ཆགས། །སྡེ་དགེ་སྡེ་གཉིས་བར་ལ་ཆགས། །འཇིག་རྟེན་ཆགས་པ་རྣམ་བཞི་ཡིན། འོ་ལགས་སོ་སེང་ཆེན་རིན་པོ་ཆེས། ངའི་མགོ་ཡི་ར་ལྤགས་དཀར་པོ་ལ། བཤད་པ་དང་བསྟོད་པ་ཨེ་ཡོད་ཟེར། བཤད་པ་དང་བསྟོད་པ་ལོས་ཡོད་བཟླས། ན་ཉིན་ར་གཡག་བཤས་ལ་ཕབ། ད་ལོར་ར་ལྤགས་མགོ་ལ་གྱོན། ཁ་བ་བབ་དུས་ཁ་ཁེབས་བཟོས། ཉི་མ་དྲོ་དུས་ཉི་ཁེབས་བཟོས། བསེར་བུ་ཡོང་དུས་རླུང་ཁེབས་བཟོས། ཆར་པ་བབ་དུས་ཆར་ཁེབས་བཟོས། དར་ཚོན་སེར་པོ་ལྡན་རྒྱུ་དེ། ལྷ་བླ་མ་དར་བའི་དར་ཚོན་ཟེར། དར་ཚོན་ཁ་ཞིང་ཆེ་རྒྱུ་དེ། གསལ་ཉི་ཟླ་འདྲ་བའི་སྤྲུལ་སྐུ་ལ། བསྟན་པ་རྒྱས་པའི་རྟེན་འབྲེལ་ཡོད། དར་ཚོན་དཀར་པོ་ལྡན་རྒྱུ་དེ། གོང་དཔོན་ལུ་དར་བའི་དར་ཚོན་ཟེར། དར་ཚོན་ཁ་ཞིང་ཆེ་རྒྱུ་དེ། འོག་སྡེ་དར་བའི་དར་ཚོན་རེད། དར་ཚོན་སྔོན་པོ་ལྡན་རྒྱུ་དེ། མ་སྲུ་དར་བའི་དར་ཚོན་ཟེར། དར་ཚོན་ཁ་ཞིང་ཆེ་རྒྱུ་དེ། དགའ་སྐྱིད་འཛོམ་པའི་དར་ཚོན་རེད། ཐོད་དཀྱིལ་མེ་ལོང་ལྡན་རྒྱུ་དེ། སྐུ་སེང་ཆེན་རྒྱལ་པོའི་ཆ་ལུགས་རེད། ཁ་སྤུ་མིག་སྤུ་རིང་རྒྱུ་དེ། ཨ་ཙ་ར་ཡི་ཆ་ལུགས་རེད། སྣ་མགོ་མགྲོན་བུ་བཏགས་རྒྱུ་འདི། ཁ་ཆེ་བལ་པོའི་ཆ་ལུགས་རེད། མ་ནེ་ཨག་ཚོམ་རིང་རྒྱུ་དེ། ར་མ་རྒྱ་མོའི་ཆ་ལུགས་རེད། གཡས་ལ་རྒྱ་གཅིག་བྱུག་རྒྱུ་འདི། རྒྱ་གར་རྒྱལ་པོའི་ཆ་ལུགས་རེད། གཡོན་ལ་རྒྱ་གཅིག་བྱུག་རྒྱུ་འདི། རྒྱ་ནག་རྒྱལ་པོའི་ཆ་ལུགས་རེད། ཆ་ལུགས་མི་གཅིག་ཁ་ཁ་རེད། ཆོས་ལུགས་མི་གཅིག་སོ་སོ་རེད།
འོ་ལགས་སོ་སེང་ཆེན་རིན་པོ་ཆེས། ངའི་ལག་གི་བེར་ཀ་ཁྲ་ཆུང་ལ། བཤད་པ་དང་བསྟོད་པ་ཨེ་ཡོད་ཟེར། བཤད་པ་དང་བསྟོད་པ་ལོས་ཡོད་བཟླས། ངའི་ལག་གི་བེར་ཀ་ཁྲ་ཆུང་འདི། ཉིན་ནས་བཏུས་པའི་ཤུག་པ་མིན། སྲིབ་ནས་བཏུས་པའི་འབོ་ལོ་མིན། ཕ་ཤིང་ལྷ་ཤིང་དཀར་པོ་ཡིན། མ་ཤིང་ཙནྡན་སྨུག་པོ་ཡིན། ཚ་བ་རོང་གི་ཚ་སྨྱུག་ཡིན། ལྷ་ཨོ་རྒྱན་པདྨའི་སྒྲུབ་ཤིང་ཡིན། མི་ལ་རས་པའི་ཕྱག་བརྟེན་ཡིན། ཡར་གཡུགས་རྒྱ་གར་ཡུལ་ལ་གཡུགས། རྒྱ་གར་རྒྱལ་པོའི་ཆོས་སྒོ་ཕྱེས།ཆོས་ཀྱི་བསྟན་པ་དེ་ནས་དར། ཕར་གཡུགས་བལ་པོའི་ཡུལ་དུ་གཡུགས།བལ་པོ་རྒྱལ་པོའི་རྒྱུ་སྒོ་ཕྱེས། རྒྱུ་ཡི་བསྟན་པ་དེ་ནས་དར། མར་གཡུགས་རྒྱ་ནག་ཡུལ་དུ་གཡུགས། རྒྱ་ནག་རྒྱལ་པོའི་ཇ་སྒོ་ཕྱེས། ཇ་ཡི་བསྟན་པ་དེ་ནས་དར། ལག་གི་བེར་ཀ་ཁྲ་ཆུང་འདི།རྒྱབ་ལ་ཁུར་ན་ཁྲ་རིང་བོའུ། ཁྲ་རིང་བོའུ་ལས་གཟི་འདུག་ཟེར། མདའ་རྫས་མི་དགོས་ངོ་མཚར་ཆེ། སྐེད་ལ་དྲངས་ན་སྐེད་གྲི་ཟེར། རྣོན་པོ་ཡ་ཟི་སྐར་ཕྲན་ཟེར། གྲི་གྲི་ཤུབས་མི་དགོས་ངོ་མཚར་ཆེ། ཞབས་ལ་བཅིབས་ན་འདོ་བ་རྟ།འདོ་བ་རྟ་ཡིས་མགྱོགས་འདུག་ཟེར། ཆས་སྒ་སྲབ་མི་དགོས་ངོ་མཚར་ཆེ། ལག་གི་བེར་ཀ་ཁྲ་ཆུང་འདི། ང་ཆུ་ལ་སོང་ན་ཟམ་པ་ཡིན། བྲག་ལ་སོང་ན་ཕུར་པ་ཡིན། ཁྱི་རྒོད་ཀྱི་མཆེ་བ་ཕུད་སྤྱད་ཡིན། མི་རྒོད་ཀྱི་དཔུང་པ་གཅོག་སྤྱད་ཡིན། རྟ་རྒོད་ཀྱི་སྲབ་མདའ་འཐེན་སྤྱད་ཡིན།
འོ་ལགས་སོ་སེང་ཆེན་རིན་པོ་ཆེས། ཁྱོད་རང་ལུས་རྒྱལ་བའི་དཀྱིལ་འཁོར་ལ། བཤད་པ་དང་བསྟོད་པ་ཨེ་ཡོད་ཟེར། ངས་རང་ལུས་རྒྱལ་བའི་དཀྱིལ་འཁོར་ལ། བཤད་པ་དང་བསྟོད་པ་བྱས་ན་ནི། དབུ་སྐྲ་རྒྱ་ལྕང་ལོ་མ་འདྲ། ཞལ་ངོ་བཅོ་ལྔའི་དུང་ཟླ་འདྲ། སྤྱན་གཉིས་ཐོ་རེངས་སྐར་ཆེན་འདྲ། ཕྱག་གཡས་པ་གསེར་གྱི་རྡོ་རྗེ་འདྲ། །གཡོན་པ་དངུལ་གྱི་རྡོ་རྗེ་འདྲ། །མཛུབ་གུ་རྒྱལ་བ་རིགས་ལྔ་འདྲ། སེན་མོ་ཉི་ཟླ་ཁ་སྤྲོད་འདྲ། ཨོལ་ཀྲོང་དུང་གི་མཆོད་རྟེན་འདྲ། མཆིན་པ་རྫ་རི་སྨུག་པོ་འདྲ། མཁལ་ཚིལ་མར་དཀར་སྤུ་ལུ་འདྲ། རྒྱུ་མ་གནོད་སྦྱིན་ཞགས་པ་འདྲ། །པུས་མོ་ཆོས་ཀྱི་འཁོར་ལོ་འདྲ། ཉྭ་ཡུ་ཙནྡན་སྡོང་པོ་འདྲ། བཤད་པ་བྱས་ན་དེ་འདྲ་ཡིན། བསྟོད་པ་བྱས་ན་དེ་འདྲ་ཡིན།
འོ་ལགས་སོ་སེང་ཆེན་རིན་པོ་ཆེས། ཁ་ལ་བཟའ་རྒྱུ་ཅི་དགོས་ཟེར། ཁ་ལ་བཟའ་རྒྱུ་འདི་དགོས་བཟླས། གཡང་དཀར་ལུག་གི་སྟོད་ལྡེབ་དགོས། སྟོད་ལྡེབ་གཉའ་བ་འབྱར་མ་དགོས། ར་མ་རྒྱ་མོའི་ཚང་ར་དགོས། ཚང་ར་རྔ་འབོག་འབྱར་མ་དགོས། རྒྱབ་ལ་གྱོན་རྒྱུ་ཅི་དགོས་ཟེར། སྟག་གཟིག་པགས་པ་སུམ་སྒྲིག་དགོས། གཅན་གཟན་པགས་པ་སྣེ་གསུམ་དགོས། དྲོ་འཇམ་ལུ་གུའི་ཚར་ཆུང་དགོས། སོག་ལྷམ་རྡོག་པ་སུམ་བརྩེགས་དགོས། དེ་འདྲ་ཡོད་ན་ཆོག་འདུག་བཟླས། དེ་མིན་མེད་ན་འདྲ་འདུག་བཟླས། ཡ། དེ་རིང་གི་ཉི་མ་བཟང་པོ། སྐར་མ་བཟང་པོ། འབྲས་དཀར་ཡིད་བཞིན་ནོར་བུ་ངས། བཤད་པ་དེ་འདྲ་ཞིག་མི་རྒྱག་ཅི་རྒྱག། བསྟོད་པ་དེ་འདྲ་ཞིག་མི་འབུལ་ཅི་འབུལ་བཟླས་པས། རྟགས་རྟེན་འབྲེལ་ཅན་གྱི་འབྲས་དཀར་རེད་འདུག། ལས་དབང་ཐང་ཅན་གྱི་འབྲས་དཀར་རེད་འདུག་ཟེར། དེ་ནས་ཕོར་པ་ལ་ཨ་འཇའ་བཀྲ་ཤིས། ལྟོ་བ་ལ་ཡང་འཇའ་བཀྲ་ཤིས་བཟླས་ནས། འབྲས་དཀར་ང་ཡིས་ལོ་ལ་བསྙལ་བའི་ལོ་ཆང་། ཟླ་ལ་བསྙལ་བའི་ཟླ་ཆང་། ཞག་ལ་བསྙལ་བའི་ཞག་ཆང་དེ་ལང་དགོས་བཟླས་ནས་གཅིག་བལྟས་པས། ཕྱི་ལ་བལྟས་ན་རི་བོ་འདྲ་བ། རི་བོ་ལ་རི་དྭགས་འཁོར་ས། ནང་ལ་བལྟས་ན་རྒྱ་མཚོ་འདྲ་བ། རྒྱ་མཚོ་ལ་ཁ་ཞབས་མེད་པ། རྒྱ་མཚོ་ལ་ཉ་སྲམ་འཁོར་ས།འབྲས་དཀར་ང་ཡིས་གང་འཐུང་ན་ནི་ཞིམ་ལ་ལ། དོ་འཐུང་ན་ནི་མངར་ལ་ལ། གསུམ་འཐུང་ན་ནི་ཅི་ཡིན་དང་འདི་ཡིན་མེད། ཡར་འཁྱོར་དེ་ཡར་ལ་འཁྱོར། སྟོད་རྒྱ་གར་གྱི་ཡུལ་ལ་འཁྱོར། མར་འཁོར་དེ་མར་ལ་འཁྱོར། སྨད་རྒྱ་ནག་གི་ཡུལ་ལ་འཁྱོར། ཕར་འཁྱོར་དེ་ཕར་ལ་འཁྱོར། བལ་པོའི་ཡུལ་ལ་འཁྱོར། དེ་ནས་བྱེ་རུའི་རྒྱལ་མོའི་ལག་ཡ་མ་གཅིག་ཉོ་དགོས་འདུག་བསམ་ནས་གསེར་ཕྱེ་སྒྲོ་བ་དགུ་བརྒྱ་བྱིན། དངུལ་ཕྱེ་སྒྲོ་བ་དགུ་བརྒྱ་བྱིན། གྲོང་སྟོད་ཨ་ཕ་རྒན་པོ་ལ་གཅིག་བསྟན།ཁེ་འདུག་ཁེ་འདུག་ཟེར། གྲོང་སྨད་ཨ་མ་རྒན་མོ་ལ་གཅིག་བསྟན། ཕམ་འདུག་ཕམ་འདུག་ཟེར། ཁེ་ཕམ་མེད་པའི་ཚོང་གཅིག་བརྒྱབ། ཡག་ཉེས་མེད་པའི་རྟ་གཅིག་རྒྱུག། དང་པོ་ཚེ་ཚེ་ར་ལ་བཀལ། ཚེ་ཚེ་ར་ཡིས་མི་ཁྱོག་འདུག། དེ་ནས་གཡང་དཀར་ལུག་ལ་བཀལ།གཡང་དཀར་ལུག་གིས་མི་ཁྱོག་འདུག།དེ་ནས་འདོ་བ་རྟ་ལ་བཀལ།འདོ་བ་རྟ་ཡིས་མི་ཁྱོག་འདུག།དེ་ནས་སྨུག་ཆུང་དྲེལ་ལ་བཀལ།སྨུག་ཆུང་དྲེལ་གྱིས་མི་ཁྱོག་འདུག།དེ་ནས་ཁྱུང་དཀར་མཛོ་ལ་བཀལ།ཁྱུང་དཀར་མཛོ་ཡིས་མི་ཁྱོག་འདུག། དེ་ནས་འབྲས་དཀར་ང་ཡིས་ཤོ་དོ་དང་ཡང་དོ་བཟླས་ནས་ཕྲག་པ་གཡས་པའི་ཐོག་ལ་བཞག་ནས་དར་ཉིན་མོ་བདེ་ལེགས་ཤིག་དང་ལྷན་དུ་སེང་ཆེན་ཡིད་བཞིན་ནོར་བུའི་མདུན་དུ་བཞག་ནས། བྱེ་རུའི་རྒྱལ་མོའི་ལག་ཡ་མ་དེ་མཎྜལ་གསོལ་སྤྱད་བྱས་ཏེ། ཁྱོད་ཡོན་བདག་ཚང་གི་མི་ལ་ན་ཚ་འོང་མི་ཉན། ཕྱུགས་ལ་གོད་ཀ་འོང་མི་ཉན། ཞིང་ལ་བཙའ་སད་སེར་གསུམ་འོང་མི་ཉན། བཀྲ་ཤིས་པས་ནམ་མཁའ་གང་དགོས། བྱིན་རླབས་ཀྱི་གཏེར་ཁ་བརྡོལ་དགོས། ཀི་ཀི་བསྭོ་བསྭོ་ལྷ་རྒྱལ་ལོ།། ཞེས་པད་སྙིང་བློ་བཟང་གིས་བཤད་པ་ལ་གཞིར་བྱས་ཏེ་རབ་བརྟན་དགེ་ལེགས་ཕུན་ཚོགས་པས་ཆུ་འབྲུག་དབྱུག་པ་ཟླ་བའི་ཚེས་ཉེར་ལྔ་ལ་ས་སྐྱིད་ལྕི་སོས་ཡག་གི་ཁ་མདོ་ནས་བྲིས་པའོ།།
