ཡུལ་དངོས་སུ་མེ་གསོད་དཔེ་སྟོན་བྱེད་བཞིན་པའི་ཚུལ།

མེ་གསོད་ཡོ་བྱད་བེད་སྤྱོད་བྱེད་ཐབས་སློབ་བཞིན་པའི་ཚུལ།

རྫོང་ཡོངས་ཀྱི་ཡུལ་ཤོག(གྲོང་རྡལ)ཁག་གི་ཡུལ་མི་ཚོའི་ནགས་ཚལ་རྩྭ་ཐང་གི་མེ་གསོད་བདེ་སྲུང་འདུ་ཤེས་ཆེ་རུ་གཏོང་བ་དང་། མེ་འགོག་ནུས་པ་ཆེ་རུ་གཏོང་བ། མེ་འགོག་ཡོ་བྱད་བེད་སྤྱོད་ཡག་པོ་བཅས་བྱ་ཆེད། སྤྱི་ཟླ3ཚེས17ཉིན་དཔལ་ཡུལ་རྫོང་ནགས་ཚལ་མེ་འགོག་བཀོད་འདོམས་གཞུང་དོན་ཁང་དང་རྫོང་ནགས་ཚལ་རྩྭ་ཐང་ཅུས།རྫོང་འཚུབ་བསྟུན་དོ་དམ་ཅུས་བཅས་ཀྱིས་རི་རྒྱབ་ཡུལ་ཤོག་ཏུ་ཉེན་མེད་གསོ་སྦྱོང་དང་ནང་སྦྱོང་བྱས་ཡོད་ཅིང་།ས་གནས་དེ་གའི་ཡུལ་ཤོག་སྲིད་གཞུང་གི་ལས་དོན་མི་སྣ་དང་འཕྲོད་བསྟེན་ཁང་གི་སྨན་དོན་མི་སྣ།གྲོང་སྡེ་ཁག་གི་ལས་བྱེད་པ།ནགས་སྲུང་བ་སོགས་མི300ལྷག་གསོ་སྦྱོང་ནང་ཞུགས་ཡོད།

ནགས་ཚལ་རྩྭ་ཐང་གི་མེ་གསོད་མེ་འགོག་སྐོར་གྱི་སྒྲོག་འགྲེལ་ཁྲོད་རྫོང་ནགས་ཚལ་དང་རྩྭ་ཐང་ཅུས་ཀྱི་འགན་འཁུར་བས་ཇི་ལྟར་བྱས་ནས་གྲོང་སྡེ་རུ་མེ་སྐྱོན་མི་ཐོན་པ་བྱ་རྒྱུ་དང་དེ་བཞིན་ཕྱི་རོལ་དུ་མེ་སྤྱོད་ཚད་ལྡན་དུ་གཏང་དགོས་པ་དང་། གྲོང་སྡེར་བུད་ཤིང་དང་ཐ་མག སྒྲོན་མེ།ཐབ་ཆས།གློག་ཆས།ཁྱིམ་ཚང་གི་གློག་སྐུད་སོགས་ཐད་ཀྱི་མེ་འགོག་དོན་ཚན་ལ་དྲན་སྐུལ་བྱས་པ་དང་ཆབས་ཅིག་ནགས་སྲུང་བའིAPPབེད་སྤྱོད་དང་མེ་ཁུངས་དོ་དམ་ཚོད་འཛིན་སོགས་ཀྱི་ཤེས་བྱར་འགྲེལ་བཤད་བརྒྱབ་ཡོད།

སྒྲོག་འགྲེལ་མཇུག་འགྲིལ་རྗེས་ལས་དོན་མི་སྣས་གསོ་སྦྱོང་ནང་ཞུགས་པའི་མི་སྣ་སྒྲིག་འཛུགས་བྱས་ཏེ་མེ་གསོད་ནང་སྦྱོང་བྱས་པ་དང་ནང་སྦྱོང་མ་བྱས་གོང་མེ་གསོད་ཡོ་བྱད་བེད་སྤྱོད་བྱེད་སྟངས་དང་།མེ་གསོད་བྱ་ཡུལ།དོ་སྣང་བྱ་གཞི་བཅས་ལ་གསལ་བཤད་ཞིབ་ཕྲ་བྱས་པར་མ་ཟད།ཡུལ་དངོས་སུ་མེ་གསོད་ཡོ་བྱད་ཇི་ལྟར་བྱས་ནས་ནུས་ལྡན་ངང་མེ་སྐྱོན་ཐོག་མར་སེལ་བའི་དཔེ་སྟོན་བྱས་ཡོད།

རྫོང་ནགས་ཚལ་དང་རྩྭ་ཐང་ཅུས་ཀྱི་འགན་འཁུར་བས་ད་ཐེངས་ཀྱི་འཚུབ་བསྟུན་ནང་སྦྱོང་དང་གསོ་སྦྱོང་བྱེད་སྒོ་སྤེལ་དོན་གཙོ་བོ་ནི་ད་སྔར་རྫོང་དེས་ཡུལ་ཤོག་དང་གྲོང་རྡལ་ཚང་མར་མེ་གསོད་དངོས་ཟོག་སྤྲད་ཡོད་ཀྱང་། དུས་མཇུག་གྲལ་བཤེར་བྱེད་སྐབས་ཡུལ་ཤོག་དང་གྲོང་རྡལ་ཁ་ཤས་ཀྱིས་ཡོ་བྱད་དེ་དག་བེད་སྤྱོད་མ་ཤེས་པས་རེད། དེར་བརྟེན་ཆེད་ལས་ཀྱི་མེ་གསོད་རུ་མི་སྒྲིག་འཛུགས་བྱས་ནས་ཡུལ་ཤོག་དང་གྲོང་རྡལ་ཁག་གི་མི་སེར་ལ་ཕྱོགས་བསྡུས་རང་བཞིན་གྱི་ནང་སྦྱོང་གསོ་སྦྱོང་བྱས་ཏེ། རིགས་པའི་གཞུང་ལུགས་དང་ལག་ལེན་ཟུང་འབྲེལ་བྱེད་པའི་བྱ་ཐབས་བརྒྱུད་ནགས་ཚལ་དང་རྩྭ་ཐང་གི་མེ་གསོད་བདེ་འཇགས་དྲིལ་བསྒྲགས་གསོ་སྦྱོང་གི་སྤུས་ཚད་མཐོ་རུ་བཏང་ཡོད། ཡུལ་མི་མང་ཚོགས་དང་དེ་བཞིན་ཡུལ་ཤོག་དང་གྲོང་རྡལ་གྱི་ལས་བྱེད་པར་གློ་བུར་དུ་མེ་སྐྱོན་ཐོན་རྗེས་ཀྱི་རང་སྐྱོབ་བྱ་ཐབས་དང་མེ་སྐྱོན་ལ་ཁ་གཏད་གཅོག་པའི་ཐོག་མའི་དུས་མཚམས་ཀྱི་མེ་གསོད་བྱ་ཐབས་ཁོང་དུ་ཆུད་པ་བྱས་ཏེ་ཡུལ་ཤོག་དང་གྲོང་རྡལ་ཁག་གི་མི་སྣའི་བདེ་འཇགས་དོགས་ཟོན་ནུས་པ་ཆེ་རུ་ནུས་ལྡན་གཏང་དགོས་ཞེས་བཤད་པ་རེད།།