འདི་ག་ལས་ཁུངས་ནས་སྤེལ་བའི་གནས་ཚུལ། རྒྱལ་ཡོངས་སྲིད་གྲོས་ཀྱི་ཀྲུའུ་ཞི་ཝང་དབྱང་གིས་སྤྱི་ཚེས་22ཉིན་པེ་ཅིང་དུ་བརྙན་མཐོང་ཐོག་ནས་ཕོ་ལན་གྱི་གྲོས་ཚོགས་སྟོད་པའི་གྲོས་དཔོན་ཀེ་ལུའོ་ཙི་ཅི་དང་མཇལ་འཛོམས་གནང་ཡོད་པ་རེད།

        ཝང་དབྱང་གིས། འདི་ལོའི་ཟླ་གཉིས་པར་ཀྲུའུ་ཞི་ཞི་ཅིན་ཕིང་གིས་པེ་ཅིང་དུ་བརྙན་མཐོང་ཐོག་ནས་ཀྲུང་གོ་དང་ཡོ་རོབ་དབུས་ཤར་རྒྱལ་ཁབ་ཀྱི་འགོ་ཁྲིད་པའི་དབུ་ཚོགས་གཙོ་སྐྱོང་གནང་བ་མ་ཟད་བརྗོད་དོན་གཙོ་བོའི་གསུང་བཤད་ཀྱང་གནང་བ་དང་། ཙུང་ཐུང་ཏུའུ་ཏ་སོགས་ཚོགས་ཞུགས་ཡོ་རོབ་དབུས་ཤར་རྒྱལ་ཁབ་ཁག་གི་འགོ་ཁྲིད་མི་སྣ་དང་མཉམ་ལས་གོང་འཕེལ་གྱི་ཇུས་ཆེན་ལ་ཐུན་མོང་ཐོག་གྲོས་བསྡུར་གནང་ནས། དུས་བབ་གསར་པའི་འོག་མཉམ་ལས་ལ་ཤུགས་སྣོན་རྒྱག་ཆེད་ཐུན་མོང་ངོས་འཛིན་གཅིག་སྡུད་དང་སྒུལ་ཤུགས་གསར་པ་མཁོ་འདོན་གནང་ཡོད། ཀྲུང་གོའི་ཕྱོགས་ཀྱིས་ཐོག་མཐའ་བར་གསུམ་དུ་ཀྲུང་གོ་དང་ཕོ་ལན་གྱི་འབྲེལ་བར་ཚད་མཐོའི་མཐོང་ཆེན་བྱས་ཏེ་ཡོ་རོབ་དང་མཉམ་ལས་བྱ་རྒྱུ་དེ་སྔོན་ལ་བསམ་བློ་གཏོང་བའི་ཁ་ཕྱོགས་སུ་འཇོག་རྒྱུ་ཡིན། ང་ཚོས་རྒྱལ་ཁབ་གཉིས་པོའི་གཙོ་བདག་གིས་ཀྲུང་གོ་དང་ཕོ་ལན་གྱི་འབྲེལ་བ་དང་རིམས་འགོག་མཉམ་ལས་སོགས་ཀྱི་གནད་དོན་ཐད་བྱུང་བའི་ཐུན་མོང་ངོས་འཛིན་དང་འཐབ་ཇུས་ཀྱི་སྣེ་ཁྲིད་གལ་ཆེན་དོན་འཁྱོལ་ནན་ཏན་བྱེད་པ་དང་། མཛའ་གྲོགས་འགྲོ་འོང་ལ་ཤུགས་སྣོན་རྒྱག་པ། སྤེལ་རེས་དང་ཕན་ཚུན་དཔྱད་གཞིར་འཛིན་ཤུགས་གཏིང་ཟབ་ཏུ་གཏོང་བ། ཐུན་མོང་ཐོག་གོང་འཕེལ་འགྲོ་རྒྱུར་སྐུལ་འདེད་གཏོང་བ་བཅས་བྱེད་དགོས། ཀྲུང་གོའི་རྒྱལ་ཡོངས་སྲིད་གྲོས་ཀྱིས་ཕོ་ལན་གྲོས་ཚོགས་སྟོད་པ་དང་ཕོ་ལན་སྤྱི་ཚོགས་ལས་རིགས་ཁག་དང་འགྲོ་འོང་བྱ་ཤུགས་ཆེ་རུ་བཏང་ནས། ཀྲུང་གོ་དང་ཕོ་ལན་གྱི་ཁྱོན་ཡོངས་འཐབ་ཇུས་རོགས་ཟླའི་འབྲེལ་བ་ཆུ་ཚད་སྔར་བས་མཐོ་བའི་ཕྱོགས་སུ་གོང་འཕེལ་འགྲོ་རྒྱུར་སྐུལ་འདེད་གཏོང་འདོད་ཡོད་ཅེས་གསུངས་ཡོད་པ་རེད།

        ཀེ་ལུའོ་ཙི་ཅིས། ཀྲུང་གོའི་ཕྱོགས་དང་ཐུན་མོང་ཐོག་འབད་བརྩོན་བྱས་ནས་ཁྱབ་ཁོངས་ཁག་གི་དངོས་གཉེར་མཉམ་ལས་མུ་མཐུད་གཏིང་ཟབ་ཏུ་བཏང་སྟེ་ཕོ་ལན་དང་ཀྲུང་གོའི་བར་གྱི་འབྲེལ་བར་འཕེལ་རིམ་གསར་པ་ཐོན་རྒྱུར་སྐུལ་འདེད་གཏོང་འདོད་ཡོད། ཕོ་ལན་ཕྱོགས་ཀྱིས་ཡོ་རོབ་དབུས་ཤར་རྒྱལ་ཁབ་དང་ཀྲུང་གོའི་བར་གྱི་མཉམ་ལས་སྐྱོན་བྲལ་དང་བརྟན་པོའི་ངང་གོང་འཕེལ་འགྲོ་རྒྱུར་སྐུལ་འདེད་གཏོང་བ་དང་ཡོ་རོབ་དང་ཀྲུང་གོའི་བར་གྱི་འབྲེལ་བར་སྔར་བས་ཤུགས་སྣོན་རྒྱག་ཆེད་དགེ་མཚན་ལྡན་པའི་ནུས་པ་འདོན་འདོད་ཡོད་ཅེས་གསུངས་པ་རེད།