སྡོང་འཛུགས་ཡུལ་དངོས་སུ། ལ་ལས་ལྕགས་ཁེམ་བཟུང་ནས་ས་བརྐོ་བ་དང་ལ་ལས་སྡོང་ཕྲུག་བརྟན་པོར་འཛུགས་པ། ལ་ལས་ཆུ་ལྡུག་པ་སོགས་སོ་སོ་བྲེལ་འཚུབ་ཀྱིས་ཁེངས་ཡོད་པ་དང་། མཐོ་སྒང་གི་ས་གཤིས་དང་དྲོད་གྲང་གི་དབང་གིས་ཤུག་སྡོང་དང་ཆུ་ལྕང་། གསོམ་ཕྲུག་མ་གཏོགས་སྐྱེ་འཕེལ་ཐུབ་པའི་སྐྱེ་དངོས་གཞན་མང་པོ་མེད་ལ། གསར་འཛུགས་སྡོང་ཕྲུག་ཡིན་ཚེ། མྱུ་གུ་ཡོད་ཚད་ཀྱི་རྩ་བ་སོས་ཐུབ་པའི་གདེང་ཚོད་ནི་སུ་ལའང་ཡོད་མི་ཐུབ། ཡིན་ནའང་། ལོ་ངོ་འདི་དག་གི་རིང་། འབྱུང་གཞིའི་གནོད་འཚེ་ཚད་དམའ་རུ་འགྲོ་བ་དང་རང་བྱུང་ཁོར་ཡུག་སླར་གསོ་ལེགས་བཅོས་གཏོང་ཆེད། རྒྱལ་ཡོངས་སམ་འཛམ་གླིང་ཀུན་ནས་ང་ཚོ་འཚོ་ཞིང་གནས་པའི་གོ་ལ་ཟླུམ་པོ་འདིར་སྲུང་སྐྱོབ་བདག་དམ་ལེགས་པོ་བྱས་དང་བྱེད་བཞིན་ཡོད་ལ། མངའ་ཁོངས་གང་སར་མཁའ་དབུགས་གཙང་ཞིང་ནམ་མཁའ་གཡའ་དག་པ། ས་གཞི་སྔོ་ལ་ཆུ་བོ་དྭངས་ཤིང་གཙང་བའི་ཐབས་ལམ་གལ་ཆེན་མངོན་འགྱུར་ཐུབ་པར་འབད་པ་ཧུར་ལེན་བྱེད་བཞིན་ཡོད་པའི་ཁར། སྐྱེ་ཁམས་ནགས་སྐྲུན་གྱི་ཆེད་ལས་དོ་དམ་རུ་ཁག་གསར་འཛུགས་བྱས་ཤིང་། ས་གནས་རང་བཞིན་གྱི་སྐྱེ་ཁམས་ལྗང་བསྒྱུར་ལས་ཀར་ཞིབ་མཇུག་རྒྱུས་ལོན་བྱས་ནས། རྒྱུན་ཆད་མེད་པར་རི་ཆུའི་ཐོན་ཁུངས་དང་ས་གཞིའི་བདག་དམ། རང་བྱུང་སྲུང་སྐྱོབ་བྱ་བ་བཅས་སྔར་ལས་རྒྱུན་སྐྱོང་དམ་འཛིན་བྱས་པས། རི་སྟོང་ལུང་སྟོང་དང་ཐང་རྒོད་དུ་གྱུར་པའི་ས་གཞིའི་གདོང་ཡོངས་ལ་ཡང་བསྐྱར་ལྗང་མདོག་གིས་བཀླུབས་པར་སོ་སོར་འོས་འགན་ཡོད་པའི་འདུ་ཤེས་མཐོར་འདེགས་སུ་བཏང་ཡོད་པ་དང་། ས་གནས་རིམ་པ་སོ་སོའི་འགོ་ཁྲིད་ལས་བྱེད་ཀྱི་སྣེ་ཁྲིད་འོག རིགས་སོ་སོའི་མི་དམངས་ཡོངས་ཀྱི་སེམས་སུ་སྐྱེ་ཁམས་དཔལ་ཡོན་འདུ་ཤེས་དང་ལྗང་མདོག་འཕེལ་རྒྱས་འདུ་ཤེས། སྣོད་བཅུད་སྲུང་སྐྱོབ་འདུ་ཤེས་མངོན་གསལ་དུ་གྲུབ་པར་བྱས་ཏེ། འཆམ་མཐུན་ཞོད་འཇགས་ཀྱི་རང་བྱུང་འཚོ་སྡོད་ཁོར་ཡུག་ལེགས་པོ་འཕེལ་རྒྱས་ཡར་སྐུལ་བྱ་བའི་རྨང་རྡོ་བརྟན་པོ་ཞིག་ཀྱང་ཡིན་འདུག
