ཏོག་གསར་འགོག་ཁབ་རྒྱག་པའི་མྱུར་ཚད་མགྱོགས་སུ་བཏང་ནས། རྒྱ་ཆེའི་མང་ཚོགས་ཀྱིས་སྒོ་ཁ་ནས་འགོག་ཁབ་རྒྱག་ཐུབ་ཆེད། ཟླ་5ཚེས་25ཉིན། མཛོད་དགེ་རྫོང་གིས་རྫོང་མཁར་གྱི་གཅིག་བསྡུས་འགོག་ཁབ་རྒྱག་ས་ལས་གཞན། བཞག་ལྡོམ་གྲོང་རྡལ་དང་ཐང་སྐོར་གྲོང་རྡལ་དུ་ཏོག་གསར་འགོག་ཁབ་བརྒྱག་ས་གཉིས་གསར་དུ་བསྣན་པ་དང་། མང་ཚོགས་ཀྱིས་རང་ས་རང་ཡུལ་ནས་འགོག་ཁབ་རྒྱག་ཐུབ་པར་དགེ་མཚན་ཆེན་པོ་ལྡན།

    ཉིན་དེའི་སྔ་དྲོར་གསར་འགོད་པས་མཐོང་བ་ལྟར་ན། འགོག་ཁབ་རྒྱག་སར་མང་ཚོགས་རྒྱུན་མི་ཆད་པ་དང་། ལས་དོན་མི་སྣའི་སློབ་སྟོན་འོག་འགོག་ཁབ་རྒྱག་མཁན་ཚང་མས་བདེ་ཐང་སྔོན་བཤེར་དང་། ཆ་འཕྲིན་ཐོ་འགོད། འགོག་ཁབ་རྒྱག་པ། ངལ་གསོ་བྱེད་པ་བཅས་ཀྱི་ཚད་ལྡན་བརྒྱུད་རིམ་ལྟར། འགོག་ཁབ་གོ་རིམ་ལྡན་པར་རྒྱག་བཞིན་ཡོད།

    རྒྱུས་ལོན་པ་ལྟར་ན། མིག་སྔའི་བར་མཛོད་དགེ་རྫོང་གིས་མི་10523ལ་ཏོག་གསར་འགོག་ཁབ་བརྒྱབ་ཟིན། དེའི་ནང་འགོག་ཁབ་དང་པོ་མི་7680ལ་བརྒྱབ་པ་དང་། འགོག་ཁབ་གཉིས་པ་མི་2843ལ་བརྒྱབ་ཟིན། རྗེས་སོར་མཛོད་དགེ་རྫོང་གིས་འགོག་ཁབ་རྒྱག་པའི་བརྒྱུད་རིམ་སྔར་ལས་ཇེ་ནན་དུ་བཏང་སྟེ། མང་ཚོགས་སྔར་ལས་མང་བོས་ཏོག་གསར་འགོག་ཁབ་རྒྱག་པར་སྐུལ་སློང་བྱས་ཏེ། རིམས་འགོག་བཙན་རྫོང་བརྟན་པོ་བསྐྲུན་རྒྱུ་རེད།