ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཀྲུའུ་ཞིའི་བཀའ།

ཨང་ཞེ་ལྔ་པ།

《 ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་དམངས་དོན་ཁྲིམས་གཞུང》ནི་སྤྱི་ལོ་2020ལོའི་ཟླ་5པའི་ཚེས་28ཉིན་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྒྱལ་ཡོངས་མི་དམངས་འཐུས་མིའི་ཚོགས་ཆེན་སྐབས་བཅུ་གསུམ་པའི་གྲོས་ཚོགས་ཐེངས་གསུམ་པའི་ཐོག་གྲོས་འཆམ་བྱུང་། ད་ལྟ་སྤྱི་བསྒྲགས་བྱས་ཏེ་2021ལོའི་ཟླ་1ཚེས་1ཉིན་ནས་བཟུང་ལག་བསྟར་བྱ་རྒྱུ་ཡིན།

ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཀྲུའུ་ཞི།

ཞི་ཅིན་ཕིང་གིས།

2020ལོའི་ཟླ་5ཚེས་28ཉིན།

ལེ་ཚན་དང་པོ། སྤྱིའི་རྩ་དོན།

ལེའུ་དང་པོ། གཞི་རྩའི་གཏན་འབེབས།

དོན་ཚན་དང་པོ། དམངས་དོན་བྱེད་པོའི་ཁྲིམས་མཐུན་ཁེ་དབང་སྲུང་སྐྱོབ་དང་། དམངས་དོན་འབྲེལ་བ་སྙོམས་སྒྲིག །སྤྱི་ཚོགས་དང་དཔལ་འབྱོར་གྱི་སྒྲིག་ལམ་སྲུང་སྐྱོང་། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་གོང་དུ་འཕེལ་བའི་བླང་བྱ་དང་མཐུན་པ། སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་དར་སྤེལ་བཅས་བྱེད་པའི་ཆེད་དུ་རྩ་ཁྲིམས་གཞིར་བཟུང་ནས་བཅའ་ཁྲིམས་འདི་གཏན་འབེབས་བཟོས་པ་ཡིན།

དོན་ཚན་གཉིས་པ། དམངས་ཁྲིམས་ཀྱིས་འདྲ་མཉམ་བྱེད་པོ་ཡིན་པའི་རང་བྱུང་མི་དང་། ཁྲིམས་མི། ཁྲིམས་མི་མིན་པའི་རྩ་འཛུགས་བཅས་བར་གྱི་མི་ལུས་ཀྱི་འབྲེལ་བ་དང་རྒྱུ་ནོར་གྱི་འབྲེལ་བ་སྙོམས་སྒྲིག་བྱེད་པ་དེ་ཡིན།

དོན་ཚན་གསུམ་པ། དམངས་དོན་བྱེད་པོའི་མི་ལུས་ཀྱི་ཁེ་དབང་དང་རྒྱུ་ནོར་གྱི་ཁེ་དབང་། དེ་བཞིན་ཁྲིམས་མཐུན་ཁེ་དབང་གཞན་དག་བཅས་ལ་བཅའ་ཁྲིམས་ཀྱིས་སྲུང་སྐྱོབ་བྱེད་པ་ཡིན། རྩ་འཛུགས་དང་མི་སྒེར་གང་ཡང་རུང་བས་བཙན་གནོན་བྱས་མི་ཆོག

དོན་ཚན་བཞི་པ། དམངས་དོན་བྱེད་སྒོའི་ནང་དུ་དམངས་དོན་བྱེད་པོའི་བཅའ་ཁྲིམས་ཀྱི་གོ་གནས་མཐའ་གཅིག་ཏུ་འདྲ་མཉམ་ཡིན།

དོན་ཚན་ལྔ་པ། དམངས་དོན་བྱེད་པོས་དམངས་དོན་བྱེད་སྒོ་སྤེལ་བར་རང་མོས་ཀྱི་རྩ་དོན་བརྩི་སྲུང་ཞུ་དགོས་པ་དང་། རང་ཉིད་ཀྱི་འདོད་བློ་ལྟར་དམངས་དོན་བཅའ་ཁྲིམས་འབྲེལ་བ་འཛུགས་པ་དང་། སྒྱུར་བ། མཇུག་སྒྲིལ་བ་བཅས་བྱེད་དགོས།

དོན་ཚན་དྲུག་པ། དམངས་དོན་བྱེད་པོས་དམངས་དོན་བྱེད་སྒོ་སྤེལ་བར་དྲང་སྙོམས་ཀྱི་རྩ་དོན་བརྩི་སྲུང་ཞུ་དགོས་པ་དང་ཕྱོགས་སོ་སོའི་ཁེ་དབང་དང་འོས་འགན་གཏན་འཁེལ་ལུགས་མཐུན་བྱེད་དགོས།

དོན་ཚན་བདུན་པ། དམངས་དོན་བྱེད་པོས་དམངས་དོན་བྱེད་སྒོ་སྤེལ་བར་ཡིད་རྟོན་འཕེར་བའི་རྩ་དོན་བརྩི་སྲུང་ཞུ་དགོས་པ་དང་། བདེན་པ་བདེན་ཐུབ་དང་ཁ་དན་ཚིག་གནས་བྱེད་དགོས།

དོན་ཚན་དགུ་པ། དམངས་དོན་བྱེད་པོས་དམངས་དོན་བྱེད་སྒོ་སྤེལ་བར་ཐོན་ཁུངས་གྲོན་ཆུང་དང་སྐྱེ་ཁམས་ཁོར་ཡུག་སྲུང་སྐྱོབ་ལ་ཕན་ཐོགས་ཡོད་པར་བྱེད་དགོས།

དོན་ཚན་བཅུ་པ། དམངས་དོན་རྩོད་གཞི་ཐག་གཅོད་བྱེད་པར་བཅའ་ཁྲིམས་གཞིར་འཛིན་དགོས། བཅའ་ཁྲིམས་ཀྱིས་གཏན་འབེབས་བྱས་མེད་ན་གོམས་སྲོལ་སྤྱད་འཐུས། ཡིན་ན་ཡང་སྤྱི་སྒྲིགས་སྲོལ་བཟང་དང་འགལ་མི་ཆོག །

དོན་ཚན་བཅུ་གཅིག་པ། དམངས་དོན་འབྲེལ་བའི་ཐད་ལ་བཅའ་ཁྲིམས་གཞན་དག་ལས་དམིགས་བསལ་གྱི་གཏན་འབེབས་བྱས་ཡོད་པ་ཡིན་ན། དེའི་གཏན་འབེབས་གཞིར་འཛིན་དགོས།

དོན་ཚན་བཅུ་གཉིས་པ། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མངའ་ཁོངས་སུ་སྤེལ་བའི་དམངས་དོན་བྱེད་སྒོ་ལ་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་བཅའ་ཁྲིམས་སྤྱད་འཐུས། བཅའ་ཁྲིམས་ཀྱིས་གཏན་འབེབས་གཞན་དག་བྱས་ཡོད་པ་ཡིན་ན། དེའི་གཏན་འབེབས་གཞིར་འཛིན་དགོས།

ལེའུ་གཉིས་པ། རང་བྱུང་གི་མི།

ས་བཅད་དང་པོ། དམངས་དོན་ཁེ་དབང་སྤྱོད་ནུས་དང་དམངས་དོན་བྱ་སྤྱོད་སྤེལ་ནུས།

དོན་ཚན་བཅུ་གསུམ་པ། རང་བྱུང་མི་ལ་སྐྱེས་པ་ནས་ཤི་བའི་བར་དུ་དམངས་དོན་ཁེ་དབང་སྤྱོད་ནུས་ཡོད་པ་དང་། ཁྲིམས་ལྟར་དམངས་དོན་ཁེ་དབང་སྤྱོད་རྒྱུ་ཡོད་ཅིང་དམངས་དོན་འོས་འགན་འཁུར་དགོས།

དོན་ཚན་བཅུ་བཞི་པ། རང་བྱུང་མིའི་དམངས་དོན་ཁེ་དབང་སྤྱོད་ནུས་མཐའ་གཅིག་ཏུ་འདྲ་མཉམ་ཡིན།

དོན་ཚན་བཅོ་ལྔ་པ། རང་བྱུང་མིའི་སྐྱེས་པའི་དུས་ཚོད་དང་ཤི་བའི་དུས་ཚོད་ནི་སྐྱེས་པའི་དཔང་ཡིག་དང་ཤི་བའི་དཔང་ཡིག་ཏུ་བཀོད་པའི་དུས་ཚོད་གཞིར་འཛིན་དགོས། སྐྱེས་པའི་དཔང་ཡིག་དང་ཤི་བའི་དཔང་ཡིག་མེད་ན་ཐེམ་ཐོའི་ཟིན་ཐོའམ་རྩིས་འགྲོ་ཡོད་པའི་ཐོབ་ཐང་ཟིན་ཐོ་གཞན་དག་ཏུ་བཀོད་པའི་དུས་ཚོད་ཚད་གཞིར་འཛིན་དགོས། གོང་གསལ་ཟིན་ཐོའི་དུས་ཚོད་དགག་གཞག་བྱེད་ཐུབ་ངེས་ཀྱི་དཔང་རྟགས་གཞན་དག་ཡོད་ན། དཔང་རྟགས་དེས་བདེན་དཔང་བྱས་པའི་དུས་ཚོད་ཚད་གཞིར་འཛིན་དགོས།

དོན་ཚན་བཅུ་དྲུག་པ། ཤུལ་ནོར་ཤུལ་འཛིན་དང་སྦྱིན་ནོར་དང་ལེན་སོགས་མངལ་གནས་ཕྲུ་གུའི་ཁེ་ཕན་སྲུང་སྐྱོབ་བྱེད་རྒྱུ་དང་འབྲེལ་བ་ཡོད་ན། མངལ་གནས་སུ་ཕྲུ་གུ་དེར་དམངས་དོན་ཁེ་དབང་སྤྱོད་ནུས་ཡོད་པར་རྩི་དགོས། ཡིན་ནཡང་མངལ་གནས་སུ་ཕྲུ་གུ་སྐྱེ་དུས་ཤི་རོ་ཡིན་ན་དེར་དམངས་དོན་ཁེ་དབང་སྤྱོད་ནུས་ཡེ་ནས་མེད་པ་ཡིན།

དོན་ཚན་བཅུ་བདུན་པ། རང་ལོ་བཅོ་བརྒྱད་ཡན་ལ་སོན་པའི་རང་བྱུང་མི་ནི་ནར་སོན་པའི་མི་ཡིན། རང་ལོ་བཅོ་བརྒྱད་ལ་མ་སོན་པའི་རང་བྱུང་མི་ནི་ནར་མ་སོན་པའི་མི་ཡིན།

དོན་ཚན་བཅོ་བརྒྱད་པ། ནར་སོན་པའི་མི་ནི་དམངས་དོན་བྱ་སྤྱོད་སྤེལ་ནུས་ཆ་ཚང་ཡོད་པའི་མི་ཡིན་ལ། དམངས་དོན་བཅའ་ཁྲིམས་བྱ་སྤྱོད་རང་ཚུགས་ཀྱིས་སྤེལ་ཆོག་པ་ཡིན། རང་ཉིད་ཀྱི་ངལ་རྩོལ་ཡོང་འབབ་དེ་འཚོ་བའི་འབྱུང་ཁུངས་གཙོ་བོ་བྱེད་པའི་རང་ལོ་བཅུ་དྲུག་ཡན་ལ་སོན་པའི་ནར་མ་སོན་པའི་མི་ནི་དམངས་དོན་བྱ་སྤྱོད་སྤེལ་ནུས་ཆ་ཚང་ཡོད་པའི་མི་ལ་རྩི་དགོས། ༼ མུ་འགོད། ༽