ཤེས་རྟོགས་བྱུང་བར་གཞིགས་ན། “གུར་གྱི་རྒྱུགས་ར”ཁྱོན་བསྡོམས་31དང་ལོགས་བཀར་རྒྱུགས་ར་4གྲ་སྒྲིག་བྱས་འདུག་པས། ཁྱོན་བསྡོམས་རྒྱུགས་ར་35ཡོད་པ་དང་། སྒུག་སྡོད་བྱེད་ས་དང་། རྒྱུགས་ར། ལས་སྒྲུབ་ཁུལ་བཅས་དབྱེ་འདུག “གུར་གྱི་རྒྱུགས་ར”རེ་རེ་ནི་གནོད་སེལ་གུར་གསུམ་ལས་གྲུབ་ཅིང་། རྒྱུགས་ཞུགས་སློབ་མ་30ཤོང་འདུག གཞན་ཡང་། རྒྱུགས་ར་རེ་ལ་རྒྱུགས་ཞིབ་པ་2ཀྱི་རྨང་གཞིའི་ཐོག་ད་དུང་རྒྱུགས་ཞིབ་པ་1བསྣན་འདུག་པས། ཁྱོན་བསྡོམས་རྒྱུགས་ཞིབ་དགེ་རྒན་105ཡོད་ཅིང་། རྒྱུགས་ཞིབ་དགེ་རྒན་ཚང་མར་ཏོག་གསར་ནད་དུག་འགོག་ཁབ་བརྒྱབ་ཡོད།
ལོ་18ཡིན་པའི་བོད་ཀྱི་བུ་མོ་གཡང་ཕྱུག་མཚོ་ནི་རྒྱུགས་ཞུགས་སློབ་མ་891ནང་གི་གཅིག་རེད། མོ་རང་ནི་རྨ་ཆེན་རྫོང་འབྲོག་ཁྱིམ་ཕལ་བ་ཞིག་ཏུ་སྐྱེས་པ་རེད། སྦྱངས་འབྲས་ལེགས་པའི་གཡང་ཕྱུག་མཚོས་རང་ཉིད་ཀྱིས་ཡིད་སྨོན་བྱེད་པའི་སློབ་ཆེན་དུ་རྒྱུགས་འཕྲོད་པའི་རེ་བ་བྱེད་བཞིན་འདུག་ཅིང་སློབ་མཐར་ཕྱིན་རྗེས་སླར་ཕ་ཡུལ་དུ་ལོག་ནས་རང་ཡུལ་འཛུགས་སྐྲུན་བྱེད་འདོད་ཟེར། “ས་ཡོམ་བྱུང་རྗེས། ང་ཚོས་མཐོ་རྒྱུགས་ལ་གྲ་སྒྲིག་བྱེད་པའི་ཐད་ཤུགས་རྐྱེན་ཆེན་པོ་ཐེབས་མ་སོང་། ‘རྒྱུགས་ར་སྔོན་པོ’ཕུབ་པ་དང་། གུར་ནང་གི་སྒྲོག་ཙེ་དང་རྐུབ་སྟེགས་སྟར་འགྲིག་པོ་སྒྲིག་ཡོད་པ་མཐོང་དུས། ང་རང་བློ་བདེ་པོ་བྱུང”ཞེས་གཡང་ཕྱུག་མཚོས་བཤད།
