ནམ་རྒྱུན་དར་མདོ་ནས་བྲག་འགོའི་ཕྱོགས་སུ་སྐྱོད་སྐབས། ཕྱིའི་ཁོར་ཡུག་གིས་མི་མང་པོའི་ཡིད་སེམས་དབང་མེད་དུ་འཕྲོག་བཞིན་ཡོད་པ་མ་ཟད། གཞུང་ལམ་གཡས་གཡོན་གྱི་ཚར་དུ་དངར་ཞིང་བཟོ་བཀོད་ལེགས་པའི་བོད་ཁང་དག་གིས་ཀྱང་ཡུལ་སྐོར་བ་མང་པོ་མགྲོན་དུ་བསུ་བཞིན་ཡོད་ཅིང་། ཡུལ་སྐོར་བ་ཚོས་ཕྱིའི་ཁོར་ཡུག་གི་མཛེས་སྡུག་ལོངས་སུ་སྤྱོད་པ་ཙམ་མིན་པར་བོད་ཁང་དུ་ཞག་སྡོད་བྱས་ནས། ས་གནས་དེ་གའི་ཡུལ་སྲོལ་གོམས་གཤིས་ལ་རོལ་མྱོང་བྱེད་འདོད་བཞིན་ཡོད་པ་སྨོས་མ་དགོས།
རྒྱུས་ལོན་བྱུང་བ་ལྟར་ན། བྲག་འགོ་རྫོང་ཨུ་དང་རྫོང་སྲིད་གཞུང་གིས་ཞིང་ལས་ཐོན་ལས་ཅན་གྱི་འཕེལ་རྒྱས་ལ་སྐུལ་འདེད་བཏང་བ་དང་བསྟུན་ཏེ། རྦ་དག་གྲོང་པའི་མང་ཚོགས་ཚོས་ཚོགས་འདུ་འཚོགས་ནས་“རྦ་དག་ཡུལ་སྐོར་གྲོང་པ་གསར་པའི་དམངས་སྡོད་སྣེ་ལེན་”ཐོན་ལས་གཙོ་བོ་ཡིན་པའི་དམངས་སྡོད་སྣེ་ལེན་དེ་གྲོང་པའི་ཐུན་མོང་གི་དཔལ་འབྱོར་ཡོང་སྒོ་རུ་བྱ་རྒྱུའི་ཐད་བློ་བབ་ནས་ཐག་བཅད་པ་དང་། དེས་རྦ་དག་གྲོང་པའི་དཔལ་འབྱོར་སྤྱི་ཚོགས་འཕེལ་རྒྱས་དང་སྐྱེ་ཁམས་དཔལ་ཡོན་འཛུགས་སྐྲུན། མི་རིགས་མཐུན་སྒྲིལ་བཅས་ལ་སྐུལ་འདེད་ནུས་ལྡན་ཐེབས་ཡོད། །
