ཟླ་7ཚེས་11ཉིན། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་དང་། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུད་ཀྱི་ཀྲུའུ་ཞི་བཅས་ཡིན་པའི་ཞི་ཅིན་ཕིང་གིས་ཁྲའོ་ཞན་ངལ་རྩོལ་ཏང་གི་སྤྱི་ཁྱབ་ཧྲུའུ་ཅི་དང་། རྒྱལ་དོན་ཨུ་ཡོན་ཀྲང་། ཁྲའོ་ཞན་དྲག་ཆས་སྟོབས་ཤུགས་ཀྱི་ཆེས་མཐོའི་སི་ལིང་དམག་དཔོན་བཅས་ཡིན་པའི་ཅིན་ཀྲེང་ཨེན་དང《ཀྲུང་ཁྲའོ་མཛའ་གྲོགས་མཉམ་ལས་རོགས་རེས་ཆིངས་ཡིག》བཞག་ནས་ལོ་ངོ་60འཁོར་བར་རྟེན་འབྲེལ་གློག་འཕྲིན་གཏོང་རེས་གནང་བ་རེད།
         ཞི་ཅིན་ཕིང་གིས་རྟེན་འབྲེལ་གློག་འཕྲིན་ནང་བསྟན་དོན། 1961ལོར་ཀྲུང་ཁྲའོ་རྒྱལ་ཁབ་གཉིས་པོའི་འགོ་ཁྲིད་པ་རྒན་རབས་ཚོས་གཟིགས་རྒྱང་རིང་པོའི་སྒོ་ནས《ཀྲུང་ཁྲའོ་མཛའ་གྲོགས་མཉམ་ལས་རོགས་རེས་ཆིངས་ཡིག》ལ་མིང་རྟགས་འགོད་པའི་འཐབ་ཇུས་ཇུས་གཞི་བཏོན་ཏེ། རྒྱལ་ཁབ་གཉིས་པོའི་མི་དམངས་ཀྱི་ཁྲག་དྲོན་ལས་གྲུབ་པའི་དམག་འཐབ་མཛའ་གྲོགས་སྲ་བརྟན་དུ་གཏོང་བ་དང་རྒྱལ་ཁབ་གཉིས་པོའི་ཡུན་རིང་མཛའ་གྲོགས་མཉམ་ལས་ལ་སྐུལ་འདེད་གཏོང་ཆེད་ཆབ་སྲིད་དང་བཅའ་ཁྲིམས་ཀྱི་རྨང་གཞི་གལ་ཆེན་བཏིང་ཡོད། ལོ་ངོ་60ཡི་རིང་། ཀྲུང་ཁྲའོ་ཕྱོགས་གཉིས་པོས་ཆིངས་ཡིག་གི་དགོངས་དོན་གཞིར་བཟུང་། ཕན་ཚུན་རྒྱབ་སྐྱོར་མཐའ་གཅིག་ཏུ་བྱེད་པ་དང་ལག་གདང་དཔུང་སྦྲེལ་གྱིས་འབད་འཐབ་བྱས་པས་ཏང་གཉིས་དང་རྒྱལ་ཁབ་གཉིས་པོའི་སྤུན་ཟླ་ལྟ་བུའི་སྲོལ་རྒྱུན་མཛའ་གྲོགས་ཟབ་ཏུ་ཕྱིན་པ་དང་། རྒྱལ་ཁབ་སོ་སོའི་སྤྱི་ཚོགས་རིང་ལུགས་ཀྱི་བྱ་གཞག་འཕེལ་རྒྱས་ལ་སྐུལ་འདེད་ཐེབས་པ། ས་ཁུལ་དང་ཐ་ན་འཛམ་གླིང་གི་ཞི་བདེ་བརྟན་ལྷིང་སྲུང་སྐྱོང་ཐུབ་པ་བཅས་བྱུང་ཡོད།
         ཞི་ཅིན་ཕིང་གིས་ནན་བཤད་གནང་དོན། ཉེ་བའི་ལོ་ཤས་རིང་། ང་དང་བློ་མཐུན་སྤྱི་ཁྱབ་ཧྲུའུ་ཅི་ཞལ་འཛོམས་ཐེངས་མང་བྱས་ནས་ཏང་གཉིས་དང་རྒྱལ་ཁབ་གཉིས་པོའི་འབྲེལ་བ་འཕེལ་རྒྱས་ཀྱི་འཆར་གཞི་བཀོད་པ་དང་ཀྲུང་ཁྲའོ་རྒྱལ་ཁབ་གཉིས་པོའི་མཛའ་གྲོགས་ཀྱི་དུས་རབས་ཀྱི་ནང་དོན་བསྣན་པས། ཐུན་མོང་གི་ངོས་འཛིན་གལ་ཆེན་རབ་དང་རིམ་པ་གྲུབ་ཡོད། དེང་སྐབས་འཛམ་གླིང་ལ་ལོ་བརྒྱའི་ནང་འཕྲད་མ་མྱོང་བའི་འགྱུར་ལྡོག་ཆེན་པོ་མགྱོགས་མྱུར་འབྱུང་བཞིན་ཡོད། ངས་བློ་མཐུན་སྤྱི་ཁྱབ་ཧྲུའུ་ཅི་དང་འཐབ་ཇུས་འབྲེལ་གཏུག་ལ་ཤུགས་སྣོན་རྒྱག་པ་དང་། ཀྲུང་ཁྲའོ་རྒྱལ་ཁབ་གཉིས་པོའི་འབྲེལ་བའི་མདུན་སྐྱོད་ཀྱི་ཁ་ཕྱོགས་སྟངས་འཛིན་ཡག་པོ་བྱེད་པ། རྒྱལ་ཁབ་གཉིས་པོའི་མཛའ་གྲོགས་མཉམ་ལས་ཟམ་མི་ཆད་པར་སྐས་རིམ་གསར་པ་ཞིག་ཏུ་སླེབས་རྒྱུར་ཁྲིད་སྟོན་བཅས་བྱས་ནས། རྒྱལ་ཁབ་གཉིས་པོ་དང་རྒྱལ་ཁབ་གཉིས་པོའི་མི་དམངས་ལ་དེ་བས་ལེགས་པའི་སྒོ་ནས་བདེ་སྐྱིད་སྐྲུན་འདོད་ཡོད།
         ཞི་ཅིན་ཕིང་གིས་ནན་བཤད་གནང་དོན། མི་རིང་བའི་གོང་ང་ཚོས་ཀྲུང་གོའི་གུང་ཁྲན་ཏང་གི་ལོ་ངོ་བརྒྱའི་འཁྲུངས་སྐར་ལ་རྟེན་འབྲེལ་གཟབ་རྒྱས་ཞུས་ཡོད། མིག་སྔར་ཁྲའོ་ཞན་མི་དམངས་ཀྱིས་མཐུན་སྒྲིལ་རྡོག་རྩ་གཅིག་སྒྲིལ་དང་ནུས་ཤུགས་ཡོད་རྒུས་ཁྲའོ་ཞན་ངལ་རྩོལ་ཏང་གི་ཐབས་ཇུས་བཀོད་སྒྲིག་ཆེན་པོ་བརྒྱད་ལག་བསྟར་བྱེད་བཞིན་ཡོད། ཁྲའོ་ཞན་ཕྱོགས་ཀྱིས་དཔལ་འབྱོར་དང་དམངས་འཚོ་འཕེལ་རྒྱས་གཏོང་བ་དང་སྤྱི་ཚོགས་རིང་ལུགས་འཛུགས་སྐྲུན་གྱི་བྱ་གཞག་ལ་སྐུལ་འདེད་ནུས་ལྡན་གཏོང་བར་ཀྲུང་གོ་ཕྱོགས་ཀྱིས་རྒྱབ་སྐྱོར་མཐའ་གཅིག་ཏུ་བྱ་རྒྱུ་ཡིན། བློ་མཐུན་སྤྱི་ཁྱབ་ཧྲུའུ་ཅིའི་སྣེ་ཁྲིད་འོག་ཁྲའོ་ཞན་ཏང་དང་མི་དམངས་ལ་གྲུབ་འབྲས་གསར་པ་དེ་བས་ཆེ་བ་ཐོབ་ངེས་ཡིན་པའི་ཡིད་ཆེས་ཡོད།
         ཅིན་ཀྲེང་ཨེན་གྱིས་རྟེན་འབྲེལ་གློག་འཕྲིན་ནང་གསུངས་དོན། 《ཁྲའོ་ཀྲུང་མཛའ་གྲོགས་མཉམ་ལས་རོགས་རེས་ཆིངས་ཡིག》བཞག་པ་དེས་འཛམ་གླིང་ཡོངས་ལ་ཁྲའོ་ཀྲུང་ཏང་གཉིས་དང་རྒྱལ་ཁབ་གཉིས་པོའི་སྲིད་གཞུང་དང་མི་དམངས་ཀྱིས་བཅའ་ཁྲིམས་ཀྱི་རྨང་གཞི་བརྟན་པོའི་ཐོག་ཁྲག་དྲོན་ལས་གྲུབ་པའི་ཁྲའོ་ཀྲུང་མཛའ་གྲོགས་ཡུན་རིང་འཕེལ་རྒྱས་གཏོང་བའི་འགྱུར་མེད་ཀྱི་བློ་སྟོབས་མངོན་པར་བྱས་ཡོད། ལོ་ངོ་60ཡི་རིང་ཁྲའོ་ཀྲུང་རྒྱལ་ཁབ་གཉིས་པོས་ཕན་ཚུན་རྒྱབ་སྐྱོར་དང་རོགས་རམ་བྱས་ཏེ་སྤོབས་པ་སྐྱེ་འོས་པའི་མཛའ་གྲོགས་ཀྱི་ལོ་རྒྱུས་བརྩམས་ཡོད། ཉེ་བའི་ལོ་ཤས་རིང་། རྙོག་འཛིང་ཆེ་ལ་འགྱུར་ལྡོག་མང་བའི་རྒྱལ་སྤྱིའི་དུས་བབ་ཀྱི་མདུན་དུ་ཁྲའོ་ཀྲུང་རྒྱལ་ཁབ་གཉིས་པོའི་བློ་མཐུན་ལྟ་བུའི་ཡིད་ཆེས་དང་དམག་འཐབ་མཛའ་གྲོགས་ཉིན་བཞིན་ཟབ་ཏུ་ཕྱིན་ནས་ཕྱོགས་གཉིས་པོའི་འབྲེལ་བ་དེ་བས་མཐོ་བའི་དུས་མཚམས་སུ་འཕེལ་རྒྱས་ཕྱིན་ཡོད།
         ཅིན་ཀྲེང་ཨེན་གྱིས། ཁྲའོ་ཀྲུང་མཛའ་གྲོགས་མཉམ་ལས་འབྲེལ་བར་ཟམ་མི་ཆད་པར་ཤུགས་སྣོན་རྒྱག་པ་དང་འཕེལ་རྒྱས་གཏོང་རྒྱུ་ནི་ཁྲའོ་ཞན་ཏང་དང་སྲིད་གཞུང་གི་བློ་བརྟན་འགྱུར་མེད་ཀྱི་ལངས་ཕྱོགས་ཤིག་ཡིན། ཁྲའོ་ཞན་ཏང་དང་། སྲིད་གཞུང་། མི་དམངས་བཅས་ཀྱིས་ཕྱོགས་གཉིས་པོའི་ཐུན་མོང་གི་རྩ་ཆེའི་རྒྱུ་ནོར་ཡིན་པའི་ཁྲའོ་ཀྲུང་གི་མཛའ་གྲོགས་ལ་དེ་བས་བརྩི་མཐོང་བྱས་ཏེ། སྤྱི་ཚོགས་རིང་ལུགས་དང་གུང་ཁྲན་རིང་ལུགས་འཛུགས་སྐྲུན་བྱེད་པའི་བླ་ན་མེད་པའི་རྒྱང་སྐྱོད་ཀྱི་ལམ་བུའི་ཐོག་བློ་བརྟན་འགྱུར་མེད་ངང་ཀྲུང་གོའི་གུང་ཁྲན་ཏང་དང་། ཀྲུང་གོ་སྲིད་གཞུང་། ཀྲུང་གོ་མི་དམངས་བཅས་དང་ལག་གདང་སྦྲེལ་ནས་མདུན་སྐྱོད་བྱ་རྒྱུ་ཡིན། ཀྲུང་གོའི་གུང་ཁྲན་ཏང་དབུ་བརྙེས་ནས་ལོ་ངོ་100འཁོར་བར་སླར་ཡང་རྟེན་འབྲེལ་ཞུ་རྒྱུ་མ་ཟད། སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་ཕྱོགས་ཡོངས་ནས་འཛུགས་སྐྲུན་དང་ཀྲུང་ཧྭ་མི་རིགས་རླབས་ཆེན་བསྐྱར་དར་མངོན་འགྱུར་བྱེད་པའི་བྱ་གཞག་ཁྲོད་ཀྲུང་གོའི་ཏང་དང་མི་དམངས་ལ་རྒྱལ་ཁ་དེ་བས་ཆེ་བ་ཐོབ་པའི་སྨོན་འདུན་ཡང་ཞུ་རྒྱུ་ཡིན་ཞེས་གསུངས་པ་རེད།