ཟླ7པའི་ཚེས26ཉིན་གྱི་སྔ་དྲོར། 2021ལོའི“ཀྲུང་གོ་བོད་རིགས་རྟ་རྒྱུག་རིག་གནས་ཀྱི་ཕ་ས·ལི་ཐང་”གི་རྟ་རྒྱུག་འགྲན་ཚོགས་དེ“རྟ་པའི་རུ་ཁག་གི་སྐོར་སྐྱོད”བྱེད་སྒོའི་ཁྲོད་ནས་མགོ་ཚུགས་པ་རེད།

        ས་གནས་ཁག་ནས་སྐད་གྲགས་ཆོད་པའི་རྟ་མཆོག130ལྷག་ཙམ་ལ་གཟབ་མཆོར་ལེགས་པར་སྤྲས་ནས་ཁྲོམ་གཞུང་དུ་སྐོར་སྐྱོད་ཀྱི་བྱེད་སྒོ་སྤེལ་བ་དང་། ལི་ཐང་རྫོང་གི་ཡུལ་སྐོར་གཟུགས་བརྙན་ཕོ་ཉ་བསྟན་འཛིན་བརྩོན་འགྲུས་ཀྱིས་ལག་ཏུ་དར་དམར་འཁྱེར་ཏེ་རྟ་པ་རུ་ཁག་གི་སྣེ་ཁྲིད་ནས་སྐོར་སྐྱོད་བྱེད་སྒོའི་ནང་ཞུགས་པ་རེད། རྟ་མཆོག་གི་སྒལ་གཞུང་ན་འགྱིང་བའི་བསྟན་འཛིན་བརྩོན་འགྲུས་ཀྱིས་ལམ་འགྲམ་གྱི་ཡུལ་སྐོར་བ་དང་གྲོང་མི་ཚོར་འཛུམ་པའི་མདངས་དང་བཅས་ཏེ་འཚམས་འདྲི་ཞུས། རྟ་རྩལ་བ་རྣམས་ཀྱིས་ལག་གཡོན་མས་རྟ་ཁའི་སྲབ་ལ་འཐེན་པ་དང་། ལག་གཡས་པས་དར་དམར་དགུང་ལ་གཡོ་བཞིན་གཅིག་རྗེས་གཉིས་མཐུད་ངང་ཁྲོམ་ལམ་དུ་སྐོར་སྐྱོད་བྱས་ཤིང་། ལོ་ན8ལས་ཟིན་མེད་པའི་རྟ་རྩལ་བ་ཆུང་ཆུང་བཀྲ་ཤིས་བསམ་འགྲུབ་ཀྱང་རྟ་པའི་རུ་ཁག་གི་སྐོར་སྐྱོད་ནང་ཞུགས་ཡོད་པ་རེད།

   དེ་རྗེས་ཀྱི་ཉིན་འགའི་ནང་ཁམས་པའི་ཕོ་གསར་འདེམས་སྒྲུག་གི་འགྲན་བསྡུར་སྤེལ་ཞིང་། ཡུལ་སྐོར་བ་དང་ལྟད་མ་བ་ཚོ་ལ་མིག་དབང་གི་སྟོན་མོ་རྒྱ་ཆེན་ཞིག་གཤོམ་རྒྱུར་མ་ཟད། མཁའ་དབྱིངས་མཐོ་གྲོང་གི་གླུ་གར་དང་སྙན་ངག་ཟློས་གར། སྐོར་བྲོ་འགྲན་བསྡུར། དེ་བཞིན2021ལོའི་ལི་ཐང་གི་སྐབས་དང་པོའིG318གཞུང་ལམ་རོལ་དབྱངས་འདུ་ཚོགས་སོགས་ཀྱི་སྟོན་མོ་རྒྱ་ཆེན་གཤོམ་རྒྱུ་རེད།