བློ་མཐུན་རྩོམ་སྒྲིག་པ་ལགས།

བྱིས་དུས་སུ་ཉིན་གང་པོར་རྩེད་མོར་གཡེངས་ཀྱང་ཆད་སྣང་ཨེན་ཙམ་མེད་ལ་ད་དུང་ཡར་མར་ལྡིང་བྱས་ནས་དགོད་སྒྲ་ལྷང་ལྷིང་བསྒྲོགས་ཤིང་། ཅོག་ཙེ་སྡེ་པའི་སྲང་ལམ་དུ་བྱིས་པ་པྲ་ཆལ་འགའ་ལན་རེར་རྡུལ་འཚུབ་སེ་རྩེ་ལ་ལན་རེར་འཁོན་འཛིང་བྱས་ཏེ་ངུ་སྐད་ཀྱང་ཐོས་ཡོང་བའི་སྣང་ཚུལ་རྟག་ཏུ་འབྱུང་བཞིན་གདའ། ཉིན་ཞིག་གི་ཕྱི་དྲོའི་ཉི་མ་སེར་ལམ་མེར་རི་བོའི་ཕག་ཏུ་མ་ཡལ་གོང་། ཉི་མར་ལྡེ་ནས་ཡོད་པའི་ཨ་མ་སྒྲོལ་མ་དང་མཚོ་མོ་གཉིས་ཀྱིས་རྩེད་མོར་གཡེངས་ནས་བསྡད་ཡོད་པའི་རང་རང་གི་ཚ་བོ་གཉིས་ཀ་བོས་ཏེ། ཁྱིམ་དུ་ལོག་དགོས་པའི་འབོད་བརྡ་གཏོང་ལ་ཁད་ཡོད་དུས། བྱིས་པ་གཉིས་ཀ་རྩེད་མོ་རྩེ་བའི་གོ་རིམ་ཁྲོད་དུ་ཨ་མ་སྒྲོལ་མའི་ཚ་བོས་མཚོ་མོའི་ཚ་བོའི་མགོ་ལ་དབྱུག་པ་ཞིག་གིས་བརྒྱབ་སྟེ་ངུ་སྐད་ལྷང་སེ་བཏང་། ཨ་མ་མཚོ་མོ་འཕྲལ་དུ་ཚ་བོའི་མདུན་དུ་བརྒྱུགས་སོང་སྟེ་མགོ་ལ་བལྟས་པ་ན་རྨས་སྐྱོན་ཡང་མོ་ཞིག་བཟོས་འདུག །དེས་ན་འདིར་ཁྱེད་བཅའ་ཁྲིམས་བློ་སྟོན་ཁང་ལ་འདྲི་རྒྱུ་ཞིག་ཡོད་པ་ནི་འདི་ལྟ་བུའི་གནས་ཚུལ་འོག་ཏུ། ཨ་མ་སྒྲོལ་མའི་ཚ་བོ་ཕ་མས་མཚོ་མོའི་ཚ་བོར་རྨས་སྐྱོན་བཟོས་པར་འགན་འཁུར་དགོས་སམ། ཞེས་འབུམ་རྒྱལ་གྱིས།

བློ་མཐུན་འབུམ་རྒྱལ་ལགས།

རང་རྒྱལ་གྱི《 དམངས་དོན་ཁྲིམས་གཞུང་།》གི་དོན་ཚན་1188པའི་གཏན་འཁེལ་ལྟར་ན།“དམངས་དོན་བྱ་སྤྱོད་སྤེལ་ནུས་མེད་པའི་མི་དང་དམངས་དོན་བྱ་སྤྱོད་སྤེལ་ནུས་ཚད་བཀག་ཡོད་པའི་མི་ལ་མི་གཞན་གྱིས་གནོད་འཚེ་བཟོས་ན། དེའི་ལྟ་སྐྱོང་མཁན་གྱིས་དབང་གནོད་འགན་འཁྲི་འཁུར་དགོས། ལྟ་སྐྱོང་མཁན་གྱིས་ལྟ་སྐྱོང་གི་འགན་འཁྲི་ཐེག་ཡོད་ན། དབང་གནོད་འགན་འཁྲི་ཇེ་ཡང་དུ་བཏང་ཆོག །རྒྱུ་ནོར་ཡོད་པའི་དམངས་དོན་བྱ་སྤྱོད་སྤེལ་ནུས་མེད་པའི་མི་དང་དམངས་དོན་བྱ་སྤྱོད་སྤེལ་ནུས་ཚད་བཀག་ཡོད་པའི་མིས་མི་གཞན་ལ་གནོད་འཚེ་བཟོས་ན། དེ་ཡི་རྒྱུ་ནོར་ལས་སྐྱིན་ཚབ་གྲོན་དངུལ་གཞལ་དགོས། སྐྱིན་ཚབ་གཞལ་བར་མི་འདང་བའི་ཆ་ཤས་དེ་ལྟ་སྐྱོང་མཁན་གྱིས་གཞལ་དགོས”ཞེས་བཀོད་ཡོད། དེར་བརྟེན། ཨ་མ་སྒྲོལ་མའི་ཚ་བོའི་ཕ་མ་གཉིས་ནི་ལྟ་སྐྱོང་མཁན་ཡིན་པའི་ཆ་ནས་དབང་གནོད་འགན་འཁྲི་འཁུར་དགོས། ཞེས་འདི་གའི་བཅའ་ཁྲིམས་བློ་སྟོན་ཁང་གིས།