རྔ་བ་གོར་མོ་ཟླ་རེད།
སྟོན་མཇུག་དེར་ང་འབར་ཁམས་ནས་རྔ་བར་ཐོན།
རྔ་བ་རྔ་བཞིན་སྒོར།
རྔ་བ་ཟླ་བཞིན་བསིལ།
རྔ་བ་དུང་ཙེ་བཞིན་གོར་བས།
རྔ་བའི་ཚོང་དཔོན་ལག་ཏུ་དངུལ་ལོ་མང་།
རྔ་བ་རྫ་རི་ལས་ཀྱང་མཐོ།
རྔ་བ་ཁ་བ་ལས་ཀྱང་འཁྱག
རྔ་བའི་དབྱར་གཞུང་ལ་མུན་པ་སྟུག་པས།
རྔ་བའི་གྲྭ་བཙུན་ཚོའི་དཔུང་ཤ་གཅེར་བུར་ཕུད་ཡོད།
རྔ་བ་རྫོང་བཞིན་ཆགས་ཡོད།
རྔ་བ་ཁྲོམ་བཞིན་འདུས་ཡོད།
རྔ་བའི་སྲང་བར་ན་དྲི་ཟ་ཆ་མེད་མང་བས།
རྔ་བའི་གཞི་མདོར་ཚ་བསུར་གྱི་དྲི་མ་མཆེད།
རྔ་བ་སྒར་གྱིས་བཟུང་ཡོད།
རྔ་བ་དགོན་གྱིས་བསྐོར་ཡོད།
རྔ་བའི་གནམ་ངོ་ཤིན་ཏུ་འཁྲིགས་ཀྱང་།
རྔ་བའི་གྲུབ་མཐའ་ཕྱོགས་སུ་ལྷུང་མེད། རིས་སུ་ཆད་མེད།
རྔ་བ་གོར་མོ་ཟླ་རེད།
རྔ་བ་སྲ་མོ་ལྕགས་རེད།
རྔ་བའི་སྙིང་སྟོབས་སྨུག་པོ་རྫ་ལ་བཅོལ་ཡོད།
རྔ་བའི་ལ་རྒྱ་གངས་རིའི་མདངས་དང་འདྲེས་ཡོད།
གནམ་མགོ་ལོག ས་མགོ་ལོག
ཉིན་འདི་ཚོར། ངས་རླངས་འཁོར་གླས་མ་ཞིག་ལ་ཁ་ལོ་བསྒྱུར་ཏེ།
སེར་ཤུལ་ནས་རྫ་ཆུ། འཛམ་ཐང་ནས་རྟ་བོར་བརྒྱུད་དུས།
མགོ་ལོག གྱད་མི་སྟོབས་ཆེན་ཞིག་གི་དཔའ་ཉམས་མ་འཆོལ་བར།
མཛངས་མི་རྟུལ་ཕོད་ཅན་གྱི་སྒམ་ཚུགས་མ་ཤོར་བར།
ཐབས་ཤེས་རྣོ་དབལ་ཅན་གྱི་རང་གཤིས་མ་བོར་བར།
ཨ་མྱེས་ཕྱིང་དཀར་ཅན་གྱི་འཁོར་དུ་གནག་རྫི་བཞིན་སྐྱིད་ཅིང་།
དཔའ་རྒོད་བཞིན་ཆས་ཏེ། སོ་སྲུང་བཞིན་ལུས་ཡོད་ཀྱང་།
མགོ་ལོག མཐོན་པོ་དགུ་སྒྲིག་གི་དབུ་རྩེ་ན་ཉི་མ་དང་འགྲོགས་ཡོད།
མགོ་ལོག རྩེ་ལྷ་བཅུ་གསུམ་གྱི་མཐའ་འཁོར་ན་སྐར་ཚོགས་བཞིན་བཞད་ཡོད།
ཉིན་འདི་ཚོར། ངས་པར་ལེན་འཕྲུལ་ཆས་གཡར་མ་ཞིག་ཕྲག་ཏུ་འཁུར་ནས།
སྨར་ཁོག་ནས་དར་ལག དགའ་བདེ་ནས་རྨ་ཆེན་དུ་ལོག་སྐབས།
མགོ་ལོག སྨུག་སྤྲིན་ཡོ་ལང་སྟུག་པོས་ཀུན་ནས་གཡོགས་ཤིང་།
གྲང་ངར་འཁྱག་རླུང་རྩུབ་མོས་ཡོངས་སུ་གཅུན་ཏེ།
ས་ནག་བྱེ་རྡུལ་ཕྲ་མོས་མཐའ་ནས་བསྐོར་ཏེ།
རྨ་རྒྱལ་སྦོམ་རའི་ཆེས་མཐའ་མཇུག་གི་མཛེས་སྡུག་ཧུབ་ཀྱིས་བཏུང་བཞིན།
འཇིགས་སྣང་དང་བྲེད་ཤ སེམས་ཁྲལ་དང་གཞིགས་འདང་ཅི་ཡང་མེད་པར།
བག་ཕེབས་ངང་འཚོ་ཞིང་། རུལ་སུངས་སུ་ལུས་ཡོད་པས།
མགོ་ལོག དབྱར་རྩྭ་དགུན་འབུའི་བསླུ་བྲིད་ཀྱི་ཀློང་ན་བྲན་གཡོགས་བཞིན་འཁུམས་ཡོད།
མགོ་ལོག ཚེ་ཐར་དུ་བཏང་བའི་ནོར་ཁྱུ་ཞིག་གི་རྗེས་ན་ཨ་མཆོད་བཞིན་བཞུགས་ཡོད།
ཉིན་འདི་ཚོར། ངས་དྲིན་ཆེན་མ་ལོ་ཁྲིད་དེ་བླ་རུང་སྒར་དུ་གནས་མཇལ་དུ་ཕྱིན་ཏེ།
གསེར་རྟ་ནས་ཁྲོ་སྐྱབས། དཔལ་ཡུལ་ནས་གྲུབ་ཆེན་དུ་འབྱོར་བས།
མགོ་ལོག ཨོ་རྒྱན་ཡུལ་གྱི་ཞིང་བཀོད་ལྟར་གངས་རིའི་རྒྱན་དུ་མཛེས་ཤིང་།
གསང་སྔགས་རྙིང་མའི་བསྟན་པ་ཁོ་ཚོའི་བསོད་ནམས་ཀྱི་གཏེར་དུ་སྨིན་པས།
རིག་པའི་དཔའ་རྒོད་ཁྲི་ཕྲག་ནམ་མཁའི་འབྲུག་ལྟར་ལྡིར་ཞིང་།
གྲུབ་ཆེན་དང་གཏེར་སྟོན་མང་པོ་སེང་གེ་སྟོབས་ཀྱིས་བཞུགས་ཡོད།
གཉན་པོ་གཡུ་རྩེའི་གསང་གསུམ་གྱི་ཡོན་ཏན་རྨ་ཡུལ་འདིར་རིས་མེད་དུ་གཏོར་བ་ཡང་།
ལོ་ཆེན་དམ་པའི་གཟུངས་ཀྱིས་ཕྱུག་ཅིང་། མཁན་ཆེན་གང་གི་དྲིན་གྱིས་བསྐྱངས་པའི།
རྫ་སྒང་ཧྲིལ་བོ་ཐོས་བསམ་དང་སྒྲུབ་སྦྱང་། ཤེས་རིག་དང་ལ་རྒྱ་ཡིས་ཁེངས་ཡོད།
མགོ་ལོག འཇིག་ལ་ཉེ་བའི་མི་རབས་ཤིག་གི་ཤུལ་ན་བྲག་རི་བཞིན་བརྟན་ཡོད།
མགོ་ལོག འཐོར་ལ་རེམ་པའི་ཆོལ་གསུམ་གྱི་ཞིང་ན་གླིང་ཆེན་བཞིན་འགྱིང་ཡོད།
ཉིན་འདི་ཚོར། ངས་ཆུང་མ་དང་བྱིས་པ་གཉིས་ཁྲིད་དེ་རྨ་ཡུལ་ལ་ལྗོངས་རྒྱུ་རུ་ཕྱིན།
གངས་རི་དང་མཚེའུ། གཙང་ཆབ་དང་ནགས་ཚལ་འདོམ་གྱིས་གཞལ་དུས།
མགོ་ལོག རྣོ་གཅོད་སྟ་རེ་རྫོབ་པོའི་མཆེ་བར་ན་དངངས་འཚུབ་ཀྱིས་ལུས་ཡོད།
མི་པགས་གཤེད་མ་འབུམ་གྱི་རྡོ་འོག་ན་མནར་གཅོད་ཀྱིས་གཟིར་ཡོད།
གད་སྙིགས་རྔམ་ཀ་སྟུག་པོའི་གདན་འོག་ན་ལྗན་ལྗིན་དུ་འཁོད་ཡོད།
རིན་ཆེན་གཏེར་ཁ་སྔོགས་པའི་འདྲེ་ལག་ན་ངུ་ཤུམ་གྱིས་འཚོ་བས།
ཨ་མྱེས་རྨ་ཆེན་གྱི་གངས་རིའི་དབུ་དཀར་ས་རུ་ཟགས་པའི་གངས་ཆབ་ཀྱི་ཀློང་ན།
ཨ་སྐྱོང་ཁག་གསུམ་ད་དུང་དུ་ནག་གིས་མྱོས་པའི་ཚོང་དཔོན་བཞིན།
དབྱར་རྩྭ་དགུན་འབུའི་གོང་ཚོད་ལྒིང་བཞིན། གནས་རི་ཞིག་གི་རིན་གོང་གཏམ་ཀྱིན།
མགོ་ལོག ས་སྒོར་བུད་མ་མྱོང་བའི་ཚོང་བ་ཆུང་ཆུང་ཞིག་དང་འདྲ་བར་སེམས་པ་ཧེབ་ཀྱིས་ཁེངས་ཡོད།
མགོ་ལོག བུ་རབས་ཚ་རྒྱུད་མི་མཁོ་བའི་ཕ་གཡར་རྫུན་མ་ཞིག་དང་འདྲ་བར་ཡ་ཆུང་འབུ་ལ་བརྗེ་ཡོད།
རྐྱང་ཐང་མཚོ།
གནའ་སྔ་མོར། གླིང་རྗེ་གེ་སེར་གེ་ནས་སར་དུས།
རྐྱང་རྒོད་གཡེར་བ་རྐྱང་ལས་འཁྲིད་སྐབས།
ཁྱོད་ཀྱི་མཚོ་མཐའ་ན་རྐྱང་ཁྱུ་སྟོང་གི་རྨིག་སྒྲ་རྒོད་ཅིང་།
སེང་ལྕམ་འབྲུག་མོའི་བླ་བྱ་བཞིན་འཁོར་བའི།
ཁྲུང་ཁྲུང་དཀར་མོའི་གཤོག་ཡག་གི་སྡེ།
མཚོ་མོའི་རླབས་ཕྲེང་བཞིན་རྒོད་ཅིང་སྐྱི་སེར་རླུང་གི་བང་ཁ་ན་འཕྱོ།
དུས་ཁ་སང་། གླིང་དཀར་སྟོད་ཀྱི་ཁ་བ་ཇེ་མཐུག་ཏུ་ཕྱིན་ཉིན།
རྐྱང་ཐང་མཚོ་མོའི་འགྲམ་དར་ཆུ་ལ་ཟགས་སོང་།
རྨ་ཁུགས་དང་པོའི་འཚེར་སྐད་རི་ལ་ཤོར་སོང་།
ཀླུ་ཆུ་སྔོན་མོའི་བཞུར་རྒྱུན་གངས་དང་འདྲེས་སོང་།
ད་དུང་། མཚེའུ་འགྲམ་དུ་ལུས་པའི་སྦྲ་ནག་ཐར་འཐོར་དེ་ཚོའང་།
སྐར་མདའ་བཞིན། འུར་རྡོ་བཞིན། འཇའ་ཚོན་བཞིན་གར་སོང་ཆ་མེད་དུ་གྱུར།
དུས་དེ་རིང་། སྟག་ཚང་ལྷ་མོའི་མཛེས་སྡུག་བཀུམ་མཁན་གྱི།
བཟོ་བལྟ་རྫུན་མ་མང་པོ་ཁྱོད་ཀྱི་བྲང་གཞུང་དུ་འཚིང་སྟེ།
འོ་ཞོ་དཀར་ཡོལ་གང་གི་སྙིགས་རོ་ཁྱོད་ཀྱི་དྭངས་གཙང་དུ་ལུད་པས།
ཁྱོད་ལ་འཆམ་སྐད་ན་བའི་ན་ཟུག་གི་འཁུན་སྒྲ་ཇི་འདྲ་ཆེ་ཡང་།
ངོ་མི་ཤེས་པའི་ལྗོངས་རྒྱུ་པ་ཆ་མེད་དེ་ཚོའི་ཁྲོད་དུ།
ཁྱོད་ཀྱི་དྭངས་ཤ་ལ་སེམས་ཁྲལ་དང་ཞིབ་རྩིས་མཁན་ཅི་ཙམ་སྣང་ངམ།
གཉན་པོ་གཡུ་རྩེ།
ངས་ཐང་གི་འགྱིག་ཤོག་དེ་འཐུ་སྐབས་ཁྱོད་ཧ་ཅང་རྒས་འདུག
རྒས་གཉེར་དེའི་ཁྲོད་དུ་ཁྱོད་ཀྱི་མིག་འབྲས་འདམ་དུ་བརྫིས་སོང་།
དོ་དགོང་། སྐོར་བྲོའི་མེ་ཕུང་གི་དུག་ཞགས་མཁའ་རུ་ལུད་པས།
གཉན་པོ་གཡུ་རྩེའི་དར་དཀར་གྱི་དབུ་ཞྭ་ཐང་ལ་ལྷུང་།
སྔོ་བསངས་བུ་མོའི་དྭངས་གཙང་གི་ལྟོ་བ་ཀུན་ནས་རལ།
ལྗོངས་རྒྱུ་པ་ཚོའི་ངོ་དགོང་སྣུམ་གྱིས་གསོས་ཡོད་ནའང་།
ཁོ་ཚོའི་རྡོག་འོག་ན་ངུ་ཤུམ་གྱི་མིག་ཆུ་མོད་པའི།
ཚེ་སྲོག་དང་འབྱུང་གཞི་གཉོམ་པོའི་ཉམ་ཆུང་གི་ལས་དབང་ལ།
སྙིང་རྗེ་དང་ངུ་ཁ་འགོག་མཁན་གཅིག་ཀྱང་མི་སྣང་།
དེ་རིང་། ཆེས་དྭངས་གཙང་གི་ཕ་ཡུལ་དུད་སྤྲིན་གྱི་རྦ་རླབས་ཁྲོད་ན།
དེ་རིང་། ཆེས་ལྷིང་འཇགས་ཀྱི་རྩྭ་ཐང་མི་ཚོགས་ཀྱི་འདུ་འགོད་ཀློང་ན།
ཁྱོད་ཀྱི་རང་དབང་དང་བག་ཕེབས་ཀྱི་བདེ་བ་གཤེད་ཀྱིས་བཅོམས་སོང་།
ཁྱོད་ཀྱི་འཇིགས་སྣང་དང་ཡི་མིག་གི་རྨ་ཁ་གཅོང་གིས་འགམས་སོང་།
གཉན་པོ་གཡུ་རྩེ། ཁྱོད་ཀྱིས་གཟབ་ངོ་མ།
རང་བྱུང་ཆག་འཇིག་གིས་འཚེ་བའི་འཇིགས་རུང་གི་ཧབ་ཐོབ་མིན་ལ།
གནག་ཕྱུགས་རོ་བཅུད་ལ་རྔམ་པའི་རྣོ་གཅོད་ཀྱི་མཆེ་བ་དེ་མིན་པར།
མི་ལྤགས་གྱོན་པའི་དུས་ཀྱི་བདུད་དཔུང་དེར་ཁྱོད་ཀྱིས་ནམ་ཡང་།
གཟབ་པར་བྱས། སྒྲིམ་པར་གྱིས། སྐྲོད་གྱུར་ཅིག
