མཚོ་སྔོན་མགོ་ལོག་བོད་རིགས་རང་སྐྱོང་ཁུལ་པད་མ་རྫོང་ནི་ས་མཐོར་ཆགས་ཤིང་། རི་བོ་མཐོ་ཞིང་གྲོག་རོང་ཟབ། མང་ཚོགས་རྣམས་ཐར་ཐོར་དུ་སྡོད་ཡོད། ཉེ་བའི་ལོ་འགའི་རིང་། པད་མ་རྫོང་མི་དམངས་ཁྲིམས་ཁང་ཞང་དང་གྲོང་རྡལ་ཁག་ཏུ་བསྐྱོད་དེ་སྐོར་སྐྱོད་ཁྲིམས་ར་ནགས་ཚལ་དང་རྩྭ་ཐང་དུ་སྤོས་ནས། འབྲོག་ཁྱིམ་གྱི་སྒོ་ཁ་ནས་གཞུང་གཏུག་ཞབས་ཞུ་མཁོ་འདོན་བྱས་པ་དང་། ད་དུང་གྱོད་གཞི་དཔེ་བླངས་ནས་བཅའ་ཁྲིམས་སྒྲོག་འགྲེལ་དང་། ལད་ཟློས་ཁྲིམས་ར་སོགས་ཀྱི་རྣམ་པའི་ཐོག་ནས་ཁྲིམས་ལུགས་ཐད་ཀྱི་འདྲི་ཞིབ་དང་ཁྲིམས་སྐྱོང་དྲིལ་བསྒྲགས་སོགས་སྤེལ་བ་རེད།
