སྔར་ནས་བཟུང་གངས་དཀར་རི་བོ་ནི་དཀར་མཛེས་ཁུལ་གྱི་རྐང་ཐང་དུ་ཡུལ་སྐོར་འགྲོ་མཁན་མང་ཤོས་ཀྱི་གདམ་ག་བྱེད་ས་དེ་ཡིན་པ་རེད། རྒྱང་སྐོར་དང་ཉེ་སྐོར་བྱས་ནས་འགྲོ་ཆོག་པས་མ་ཚད། ཟུར་ཕྱོགས་མི་འདྲ་ས་མང་པོ་ནས་གངས་དཀར་རི་བོའི་བརྗིད་ཉམས་ལ་ལྟད་མོ་ལྟ་ཆོག་ཅིང་། དཔེར་ན་ཚེ་མ་ལ་དང་ཞག་ཧ། རྫ་སྨུག་རི་ཁྲོད། ནེས་འགག་མཚེའུ།རི་སྔོན་མཚེའུ་སོགས་བརྒྱུད་ནས་འགྲོ་ནའང་མཛེས་ལྗོངས་མི་འདྲ་བ་མང་པོ་ཞིག་རང་གི་མིག་ལམ་དུ་དྲངས་ཆོག་ཆོག་ཡིན་པ་རེད།
ད་ཐེངས་ངོ་སྤྲོད་བྱ་རྒྱུའི་ལམ་ཐིག་དང་པོ་ནི་གངས་དཀར་རི་བོར་ངོ་མཚར་ཆེ་བའི་ངང་ནས་ལྟད་མོ་བལྟ་ཆོག་པའི་ལམ་ཐིག་ཅིག་ཡིན་ཞིང་དུས་ཚོད་ཉིན་གཉིས་ཙམ་འགོར་བ་རེད། ཉིན་དང་པོར་རླངས་འཁོར་ལ་བསྡད་ནས་ཞག་ཧ་ལ་མགོ་ལ་སོང་བ། ལ་མགོར་ཐོན་དུས་གངས་དཀར་རི་བོ་མཐོང་ཐུབ། ལོ་གོང་མ་ནང་ཨ་རི་རྒྱལ་ཁབ་ས་ཁམས་དུས་དེབ་རང་བྱུང་རིགས་ཀྱི་གསེར་གྱི་བྱ་དགའི་པར་རིས་ནི་འདི་ནས་བྱུང་བ་རེད། ལ་ཁར་རྐང་ཐང་དུ་འགྲོ་མགོ་ཚུགས་ན་འགྲོ་བའི་དཀའ་ཚད་ཆུང་དུ་གཏོང་བ་རེད།
དེ་ནས་རི་ཟུར་བརྒྱུད་ནས་ཡིད་ལྷུང་ཤུལ་གྲོང་སྡེ་ལ་སླེབས་དུས་ཆུ་ཚོད་ལྔ་ཙམ་འགོར་བ་རེད། དེར་ཞག་གཅིག་བསྡད་ནས་ཕྱི་ཉིན་ནེས་འགག་མཚེའུ་ཡོད་སར་སླེབས། ནེས་འགག་མཚེའུ་ནི་ཉིན་འདི་ཁ་ཤས་ནང་གངས་དཀར་རི་བོར་ལྟད་མོ་ལྟ་ས་ཧ་ཅང་སྐད་གྲགས་ཆེ་བའི་གནས་ཤིག་ཏུ་གྱུར་ཡོད། ནེས་འགག་མཚེའུ་ནང་གངས་དཀར་རི་བོའི་གཟུགས་བརྙན་གསལ་ཞིང་ཡིད་དབང་འཕྲོག་པ་མཇལ་རྒྱུ་ཡོད་པས། རྐང་ཐང་དུ་ཡུལ་སྐོར་འགྲོ་མཁན་མང་པོས་ནེས་འགག་མཚེའུ་ཡི་ནང་གངས་དཀར་རི་བོའི་གཟུགས་བརྙན་ལ་ལྟ་སར་ཡོང་གི་ཡོད། ནེས་འགག་མཚེའུ་ནང་གངས་དཀར་རི་བོར་བལྟས་རྗེས་རྐང་ལམ་ཆུང་ཆུང་བརྒྱུད་དེ་མུ་མཐུད་ནས་མར་བབ། མར་བབ་དུས་རྫིང་བུ་མི་འདྲ་བ་མང་པོར་འཕྲོད་ངེས་ཡིན་པ། རྫིང་བུ་རེ་རེ་ནང་མཛེས་ལྗོངས་མི་འདྲ་བ་རེ་རེ་མཐོང་རྒྱུ་ཡོད། དེ་ནས་གཞུང་ལམ་ལ་སླེབས་ཚེ་ཐེངས་འདིའི་རྐང་ཐང་ཡུལ་སྐོར་འགྲོ་བའི་ལམ་བུ་མཇུག་འགྲིལ་བ་རེད།
རྐང་ཐང་དུ་འགྲོ་བའི་ལམ་ཐིག་དེ་ནི་གངས་དཀར་རི་བོའི་ནུབ་རྒྱུད་ཀྱི་ལམ་ཐིག་རྩེ་གྲའི་གྲས་ཤིག་ཡིན་པ།དུས་ཚོད་དང་དཀའ་ཚད། རྐང་ཐང་འགྲོ་བའི་ཉམས་ལེན་བཅས་ཀྱི་ཐད་ནས་བརྗོད་ན་སྤྱི་དམངས་ཀྱི་གདམ་ག་དང་དེ་བས་འཚམ་པ་ཞིག་རེད། །
