སྤྱི་ཟླ་1པོའི་ཚེས་25ཉིན་གྱི་ཕྱི་དྲོར། དཀར་མཛེས་བོད་རིགས་རང་སྐྱོང་ཁུལ་གྱི་སྐབས་བཅུ་གཅིག་པའི་མི་དམངས་འཐུས་མིའི་ཚོགས་ཆེན་གྱི་གྲོས་ཚོགས་ཐེངས་བཞི་པ་བདེ་བླག་ངང་འགྲུབ་ནས་དར་མདོའི་ཟློས་གར་ཁང་དུ་མཇུག་བསྒྲིལ་པ་རེད། ཚོགས་ཆེན་དུ་ཞུགས་དགོས་པའི་འཐུས་མི་284ཡོད་པ་དང་། དངོས་སུ་ཞུགས་པའི་འཐུས་མི་243ཡོད་པས་ཁྲིམས་བཀོད་མི་གྲངས་དང་མཐུན་པ་རེད། ལི་ཁང་གིས་ཚོགས་ཆེན་གྱི་གཙོ་འགན་བཞེས་ཤིང་། ཚོགས་ཆེན་གྱི་ལག་བསྟར་ཀྲུའུ་ཞི་ཧུའུ་ཁྲང་ཧྲེང་། ལི་ཁང་། ཀྲང་ཕིང་ཧྲེང་སོགས་ཀྲུའུ་ཞི་སྟེགས་བུའི་མདུན་གྲལ་དུ་བཞུགས་པ་རེད།

             ཁུལ་མི་དམངས་སྲིད་གཞུང་དང་། སྲིད་གྲོས་དཀར་མཛེས་ཁུལ་ཨུ་ཡོན་ལྷན་ཁང་། དཀར་མཛེས་ཡན་ལག་དམག་ཁུལ། ཁུལ་འབྲིང་རིམ་མི་དམངས་ཁྲིམས་ཁང་དང་ཁུལ་མི་དམངས་ཞིབ་དཔྱོད་ཁང་གི་འགོ་ཁྲིད་དག་ཚོགས་ཆེན་དུ་ཞུགས་ཤིང་ཀྲུའུ་ཞིའི་སྟེགས་བུར་བཞུགས་ཡོད།

            ཚོགས་ཆེན་ཐོག་དཀར་མཛེས་ཁུལ་མི་དམངས་སྲིད་གཞུང་གི་སྙན་སེང་སྐོར་གྱི་གྲོས་ཆོད་དང་། དཀར་མཛེས་བོད་རིགས་རང་སྐྱོང་ཁུལ་སྐབས་བཅུ་གཅིག་པའི་དམངས་ཆེན་རྒྱུན་ལས་ཨུ་ལྷན་གྱི་ལས་ཀའི་སྙན་སེང་སྐོར་གྱི་གྲོས་ཆོད། དཀར་མཛེས་ཁུལ་2014ལོའི་རྒྱལ་དམངས་དཔལ་འབྱོར་དང་སྤྱི་ཚོགས་འཕེལ་རྒྱས་འཆར་གཞི་ལག་བསྟར་བྱས་ཚུལ་དང་། 2015ལོའི་རྒྱལ་དམངས་དཔལ་འབྱོར་དང་སྤྱི་ཚོགས་འཕེལ་རྒྱས་འཆར་གཞིའི་སྐོར་གྱི་གྲོས་ཆོད། དཀར་མཛེས་ཁུལ་2014ལོའི་ནོར་སྲིད་སྔོན་རྩིས་ལག་བསྟར་བྱས་ཚུལ་དང་། 2015ལོའི་ནོར་སྲིད་སྔོན་རྩིས་བྱ་བའི་སྐོར་གྱི་གྲོས་ཆོད་སོགས་ལ་གྲོས་འཆམ་བྱུང་ཡོད། །