༄༅།། དགེ་རྒན་ཞིག་ལ་ཚང་དགོས་པའི་མཁོ་བ་རྣམ་བཞི།

སྟག་རིག་འབྲུག་ཐར། རྩོམ་སྒྲིག་པ།ཚེ་དཔལ། ཡོང་ཁུངས།མཚོ་སྔོན་བོད་ཡིག་གསར་འགྱུར། སྤེལ་དུས། 09-15


 སྟག་རིག་འབྲུག་ཐར། མཚོ་ལྷོ། 

    སློབ་གྲྭ་ཞིག་གི་སློབ་གསོའི་སྤུས་ཚད་མཐོར་འདེགས་གཏོང་བར་དགེ་རྒན་གྱི་སྤུས་ཚད་ལ་ཐད་ཀར་འབྲེལ་བ་དམ་པོ་ཡོད་ཅིང་། དགེ་རྒན་ཚོའི་རང་སྟེང་གི་འཇོན་ནུས་སྔོག་འདོན་དང་སློབ་གསོའི་སྣང་ཚུལ་ཕུན་ཚོགས་སུ་གཏོང་སླད་སློབ་གྲྭའི་དོ་དམ་པའི་སྒྲིག་གཞི་དང་བཀོད་འདོམས། རྩ་འཛུགས་སོགས་ལ་འབྲེལ་བ་ངེས་ཅན་ཡོད། དེར་བརྟེན། དགེ་རྒན་ཚོའི་དཔུང་སྡེས་གྲུབ་པའི་སློབ་གྲྭའི་ཕྱོགས་ཡོངས་འཕེལ་རྒྱས་སུ་འགྲོ་བར་གཤམ་གསལ་ཕྱོགས་བཞི་ནས་བཤད་པར་འདོད་དེ། 

དང་པོ། དགེ་རྒན་ཕན་ཚུན་བར་མཐུན་སྒྲིལ་མཁོ། 

        སློབ་གསོའི་བྱ་བ་ནི་ཡུན་ཐུང་གི་འབད་པས་ལེགས་ལམ་དུ་གཏོང་དཀའ་ཞིང་། མི་གཅིག་གཉིས་ཤིག་གི་ནུས་པས་ཀྱང་སྒྲུབ་དཀའ། དེ་ནི་ཡུན་རིང་གི་འབད་བརྟུན་དང་ཐུན་མོང་ཆིག་སྒྲིལ་གྱི་སྟོབས་ཤུགས་ལ་བརྟེན་དགོས་པ་ཡིན། མཛུབ་གུ་ལྔ་བཅིངས་ཁུ་ཚུར་གྱི་དཔེ་ལྟར། དགེ་རྒན་ཚོགས་སྤྱིའི་མཐུན་སྒྲིལ་དང་སྟོབས་ཤུགས་ཀྱིས་འཛིན་གྲྭ་སྤྱིའི་མཐུན་སྒྲིལ་ཡར་སྐུལ་ལ་རོགས་འདེགས་ཐོབ་པར་མ་ཟད་སློབ་མ་ཚོའི་སྦྱངས་འབྲས་ཇེ་མཐོར་གཏོང་བར་ཡང་མཐུན་རྐྱེན་བསྐྲུན་ཐུབ།ཡིན་ཡང་།སློབ་གྲྭའི་དགེ་རྒན་ལ་ཤས་ཀྱི་ནུས་སྟོབས་དང་འཇོན་ཐང་། ཆུ་ཚད་སོགས་ཧ་ལས་པ་ཡོད་ཀྱང་། སྨྲ་བའི་སེང་ཆེན་ཁྲི་ལ་བཞུགས་འདྲའི་སྟེགས་བུ་མཐོ་ས་ཞིག་ནས་ཡིན་མདོག་ཁ་པོས་དགེ་རྒན་གཞན་དག་ལ་མཐོང་ཆུང་དང་དམའ་འབེབས། ཉམ་ཆུང་གི་ཚུལ་བཟུང་སྟེ་ཁོ་ཚོ་དང་འགྲོགས་འདྲིས། རོགས་རེས། མཐུན་སྒྲིལ་གྱི་བློ་ཁ་གཅིག་ལ་ཕྱོགས་པ་ལྟ་ཅི། ཉོན་མོངས་དུག་གསུམ་གྱི་དབང་གིས་དགེ་རྒན་ཕན་ཚུན་བར་བླ་བཙག་པ་དང་། ཕྲག་དོག་གི་དབང་གིས་སྐྱོན་ཆ་སྣ་ཚོགས་བགྲང་བའི་རིགས་ནི་མཐུན་སྒྲིལ་ལ་གནོད་པའི་རྒྱུ་རུ་འགྲོའོ། ། མ་ཟད་ལོ་རིམ་ཁག་གམ་ཚན་ཁག་ཅིག་གིས་ཐུན་མོང་གི་བྱེད་སྒོ་གང་རུང་ཞིག་སྤེལ་བར་བྱ་བའི་མགོ་མཇུག་ལ་ཚེགས་བརྩོན་འགྲུས་ཕུད་པ་ཕར་ཞོག བྱ་འགུལ་ལ་ཕྱི་བཤོལ་སྒོས་འབྲེལ་མེད་དོན་གཞན་དུ་བརྩི་བའི་སྣང་ཚུལ་ཡོད་ལ། ཐ་ན་རྒྱུགས་གཞི་བླངས་ཏེ་རྒྱུགས་སྐར་བརྩི་སྐབས་རྒྱུགས་ཤོག་ཁྲོད་ཀྱི་གནད་དོན་ཆུང་ངུ་ལའང་སྣོག་བརྒྱབ་སྟེ་མཐུན་སྒྲིལ་ལ་གཏོར་བརླག་སྒོས་དགེ་རྒན་ཕན་ཚུན་བར་འགལ་བ་སློང་བའི་སྣང་ཚུལ་ཡང་གདའ། དེར་བརྟེན། དུས་རྒྱུན་སློབ་ཁྲིད་ཁྲོད་འཕྲད་པའི་དཀའ་གནད་དང་དོགས་གནད་རྣམས་ཕན་ཚུན་ལ་རོགས་རམ་གྱི་ཚུལ་དུ་དཔྱད་བསྡུར་བྱས་ནས།མཐུན་སྒྲིལ་གོང་བུ་གཅིག་གྱུར་གྱིས་འབད་པ་གལ་ཆེ།

 གཉིས་པ། དགེ་རྒན་ཕན་ཚུན་བར་ཤན་ཤུགས་གཙོ། 

    ང་ཚོ་མི་སུ་དང་གང་ཞིག་ཡིན་ཡང་གཞན་དཔེ་རང་སྟོན་སྒོས་ཕ་རོལ་པའི་མཆོག་གྱུར་ཡོན་ཏན་མིག་དཔེ་རུ་བཟུང་སྟེ་རང་གི་ཞན་ཆ་དང་མི་འདང་བའི་ཆ་ཁ་གསབ་དང་བཅོས་བསྒྱུར་བྱས་ཏེ་རང་གི་ཆུ་ཚད་དང་ཡོན་ཏན་མཐོ་རུ་གཏོང་དགོས་ཤིང་། སོ་སོའི་ཐུན་མོང་མ་ཡིན་པའི་ཁྱད་ཆོས་ལ་ཕན་ཚུན་སློབ་སྦྱོང་བྱས་ཏེ་བཟང་ཐོག་བཟང་བརྩེགས་སྒོས་རང་ནུས་སྐྱེད་སྲིང་ལ་དམིགས་དགོས། དེ་བས་དགེ་རྒན་ཚོའི་ཁྲོད་དུ་གཞན་ལ་རོགས་རམ་བྱེད་པར་དགའ་བ། དཔེ་ཆ་ཀློག་པར་སྤྲོ་བ། རྩོམ་ཡིག་འབྲི་རྒྱུར་མོས་པ། ཟིན་བྲིས་གཟབ་ནན་དུ་འབྲི་བའི་གོམས་གཤིས། ལས་བྱར་ནན་ཏན་དུ་ལྟ་བའི་སྲོལ་བཟང་། ད་དུང་གཏམ་བཤད་ལ་མཁས་པ། འཁྲབ་སྟོན་ལ་བྱང་བ་སོགས་ནུས་ལྡན་འཇོན་ཐང་ཅན་གྱི་དགེ་རྒན་ཇི་སྙེད་ཅིག་ཡོད་དགོས། མཆོག་གྱུར་ཡོན་ཏན་འདི་དག་གི་སྔོན་འགྲོའི་འོག རྣམ་ཀུན་དགེ་རྒན་འདིའི་རིགས་ལ་འབྲེལ་འདྲིས་དང་། འགྲོགས་བདེ་གཤིབ་བདེ་བྱས་ན་ཉི་མ་མེ་གྲོགས་དང་ཆར་བ་ཆུ་གྲོགས་ཀྱི་དཔེ་བཞིན་རང་དབང་མེད་པར་ཤོག་བུར་སྣུམ་གྱིས་སིམ་པ་ལྟར་དཔེ་ལེགས་སྤྱོད་བཟང་གི་ཡོན་ཏན་ཆ་ཤས་རེ་རེ་རང་ཉིད་ཀྱི་རྒྱུད་ལ་ཤན་ཤུགས་ངང་གིས་ཐེབས་པ་གོར་མ་ཆག དེ་ལས་ལྡོག་སྟེ། སློབ་མའི་འབྱུང་འགྱུར་མི་བསམ་པར་ཟིན་བྲིས་འབྲི་ཐབས་ཙམ་གྱིས་ཉི་མ་འཁྱོལ་བ། ལས་བྱ་ཞིབ་བཤེར་བྱེད་ཁུལ་ཙམ་གྱིས་ཐེངས་གྲངས་ཕུད་པ། སློབ་མས་གོ་ཚོད་ཤེས་ཚོད་ལ་མི་གཞིགས་པར་སྐར་མ་ཞེ་ལྔའི་སློབ་ཁྲིད་ཀྱང་ཁྲལ་འཕུད་ཐབས་ཙམ་བྱེད་ལ། དེ་བས་ཀྱང་ཤོ་རྒྱག་རྒྱལ་འཇོག དུ་འཐེན་ཆང་འཐུང་། རྣམ་གཡེང་རྩེད་མོའི་རིགས་ཁོ་ནར་སེམས་འཁོར་བའི་ནག་ནོག་སྤྱོད་ངན་ཅན་གྱི་དགེ་རྒན་སྐོར་ཞིག་ཀྱང་སློབ་གྲྭ་སོ་སོ་རུ་རེ་ཟུང་ཡོད་སྲིད་པས། དགེ་རྒན་འདིའི་རིགས་དང་བར་ཐག་ཇེ་ཉེར་བཏང་ཚེ་ར་རོའི་དྲི་མའི་སྤྱོད་པ་འཆལ་བོ་ཤེས་མེད་ཚོར་མེད་དུ་རྒྱུད་ལ་གོམས་ཏེ་ཁྱེད་ལ་ཤན་ཤུགས་ངན་པ་མི་ཐེབས་རང་ཐེབས་ཡིན། དེ་བས། ཡ་རབས་དམ་པའི་ལུགས་བཟང་རྒྱུད་དུ་འཆང་བ། བླ་མེད་སྤྱོད་བཟང་དང་མཆོག་གྱུར་ཡོན་ཏན་མངའ་བའི་དགེ་རྒན་ཡ་རབས་དག་ལ་འགྲོགས་འདྲིས་དང་འབྲེལ་ཟམ་བཙུགས་ཏེ་ཤན་ཤུགས་བཟང་པོ་རང་རྒྱུད་ལ་ཐེབས་པར་བརྩོན་པ་ཤ་ཐང་བགྱིད་རྒྱུ་མ་བརྗེད་ཅིག 

གསུམ་པ། དགེ་རྒན་གྱི་སྡེ་ལ་གསོན་ཤུགས་བརྟས་པའི་སྣང་ཚུལ་མཁོ། 

        སློབ་གྲྭའི་དགེ་རྒན་གྱི་དཔུང་སྡེར་སྣང་ཚུལ་གསར་པ་བསྐྲུན་པ་ནི་མྱུ་གུར་ཆུ་ལུད་དྲོད་གསུམ་སྦྱིན་ཏེ་སྐྱེ་སྟོབས་ཀྱི་དཔལ་འབར་དུ་འཇུག་པ་དང་འདྲ། དཔེ་དེ་བཞིན་དུ་སྙན་ངག་གྱེར་འདོན་འགྲན་སྡུར་དང་། དཔེ་ཀློག་མྱོང་ཚོར་བཤད་པའི་འགྲན་སྡུར། རྩོམ་ཡིག་འགྲན་སྡུར། སློབ་ཁྲིད་འགྲན་སྡུར། རིག་རྩལ་དང་ལུས་རྩལ་ཕྱོགས་ཀྱི་འགྲན་སྡུར་ཅི་རིགས་ཀྱི་བྱ་འགུལ་རབ་དང་རིམ་པ་སྤེལ་བ་ནི་དགེ་རྒན་གྱི་དཔུང་སྡེས་གྲུབ་པའི་སློབ་གྲྭ་ཞིག་ལ་མཚོན་ན་གསོན་ཤུགས་ཀྱིས་བརྟས་པའི་སློབ་གསོའི་སྣང་ཚུལ་གསོ་བའི་རྟིང་མ་ཡིན་ཞིང་། གཞན་དུ་ན་བྱེད་སྒོ་སྣ་ཚོགས་སྤེལ་བ་ཡིས་སློབ་མ་ཚོའི་སློབ་སྦྱོང་གི་གནོན་ཤུགས་ཇེ་ཡང་དུ་གཏོང་ཐུབ་པ་དང་། ཤེས་བྱ་སྣ་གཅིག་མ་ཡིན་པར་རིག་གནས་སྣ་མང་དང་སྒྱུ་རྩལ་བྱེ་བྲག་ལ་འཇུག་པའི་རྨང་རྐང་འདིང་བར་ཕན། གོང་གསལ་བྱ་འགུལ་འདི་དག་གི་ཁྲོད་དུ་དགེ་རྒན་ཚོ་ཡང་ཟབ་ཞུགས་བྱས་ཚེ་གཅིག་ཏུ་ན་བྱ་འགུལ་དང་འབྲེལ་བའི་ཤེས་བྱ་ཅི་རིགས་ལ་དང་དོད་དང་འཚོལ་སྡུད་ཞིབ་འཇུག་བྱེད་པར་ཁ་ཕྱོགས་བསྟན་པ་དང་། གཉིས་སུ་ན་སློབ་མར་མིག་དཔེ་ལེགས་པོ་སྟོན་པའི་སྣེ་ཁྲིད་ཀྱི་ནུས་པ་ལྡན་ཁར་དགེ་སློབ་ཟུང་འབྲེལ་འདྲིས་དང་རོགས་རེས་ཀྱི་བྱེད་ནུས་ཐོན་པས་མི་ཚད། སློབ་བུར་སྐུལ་འདེད་དང་མཐུན་སྒྲིལ་མཉམ་སྐྱོད་ཀྱི་སྣང་ཚུལ་ལེགས་པོ་ཞིག་ཀྱང་ཞར་དུ་བསྐྲུན་ཐུབ། 

བཞི་པ། དགེ་རྒན་ལ་བྱོལ་མེད་ཀྱི་འགན་འཁྲི་མཁོ། 

        བརྡ་འཕྲིན་དུས་རབས་དང་སློབ་གསོ་གྲོང་ཁྱེར་ཅན་དུ་འགྱུར་བའི་དུས་འདིར། སློབ་བུའི་མི་གཞི་ཉག་ཕྲན་གྱི་མདའ་ལྟ་བུ། སློབ་བུའི་བསམ་པ་བལ་དཀར་གྱི་མདངས་ལྟ་བུ། ཁ་བ་རི་བའི་ཚེ་ནོམ་སྟེ། སྐད་དང་ཡི་གེ་དཔྲལ་བའི་མིག་ལྟ་བུར་བདག་སྐྱོང་དང་དར་སྤེལ་གཏོང་རྒྱུ་ནི་ང་ཚོ་དགེ་རྒན་རེ་རེའི་ཕྲག་ལ་བབས་པའི་བྱོལ་མེད་ཀྱི་འགན་འཁྲི་ཡིན། བསླད་མ་འདྲེས་པའི་སྐད་ཆ་དག་མོ་ཞིག་ཤོད་པ་དང་ཕྱོགས་སུ་མ་ལྷུང་བའི་དམིགས་ཡུལ་གཙང་མ་ཞིག་བསྣམས་ཏེ་སྐད་ཡིག་ལ་འབད་པ་བྱེད་རྒྱུའང་གཟུར་མེད་ཀྱི་འགན་འཁྲི་ཡིན་ལ། ལྷག་པར་དུ་སྐེ་གཅིག་གིས་མགོ་བོ་མང་པོ་ཐེག་དགོས་པའི་སྐད་ཡིག་དགེ་རྒན་ཞིག་ཡིན་ན། རིག་ཚན་དང་རྩིས་ཚན། ལོ་རྒྱུས། ས་ཁམས། ཆབ་སྲིད། དམངས་སྲོལ། སྐྱེ་དངོས། གསོ་བ་རིག་པ་སོགས་རིག་གནས་སྣ་མང་གི་རྨང་གཞིའི་ཤེས་བྱ་ངེས་ཅན་ཞིག་རྟོགས་དགོས་ཏེ། སློབ་གྲྭའི་དགེ་རྒན་ཞིག་ཡིན་ཚེ། ཟས་རིགས་ཀྱི་ཚ་འཁྱག་མ་འགྲིག་པར་འབྱུང་གཞིའི་འཕེལ་ཟད་འཁྲུགས་ཏེ་མགོ་ན་ཕོ་གཟེར་གྱི་ན་ཚ་བྱུང་དུས་གོས་དཀར་གྱོན་པའི་ལྷ་རྗེའི་འགན་འཁྲི་ཐེག་དགོས། དོན་ཆུང་ཙག་ཙིག་གི་བྱ་བས་ཁ་འཛིང་འཁོན་འཛིང་གི་སྦྱོར་བ་རྩོམ་དུས་གཅིག་གཅིག་ཐིག་གི་སྤྱི་བདེ་མི་སྣའི་འགན་འཁྲི་ཐེག་དགོས། ཟང་ཟིང་བྱ་བས་ཀུན་ཡིད་སྡུག་ལ་སྦྱོར་དུས་ནང་སེམས་གསོ་བའི་གཉེན་པོ་སྟེ་སེམས་ཁམས་དགེ་རྒན་གྱི་འགན་འཁྲི་ཐེག་དགོས། སློབ་གྲྭར་འདུག་ཡུན་རིང་ནས་རྒྱང་རིང་ཕ་ཡུལ་དང་ཕ་མ་དྲན་སྐབས། ཁ་ཏ་སློབ་གསོའི་བྱེད་ཐབས་མང་བའི་ཕ་མའི་འགན་འཁྲི་ཡང་ཐེག་དགོས། མདོར་ན། སློབ་གསོའི་རྨང་གཞི་ནི་བྱམས་བརྩེ་ཡིན་ལ། བྱམས་བརྩེ་དང་བྲལ་བའི་སློབ་གསོ་ནི་ནང་སྙིང་སྟོང་བའི་འབྲས་བུ་དང་འདྲ་སྟབས།སློབ་བུ་འདི་དག་གི་མ་འོངས་འབྱུང་འགྱུར་བསམས་ནས་ཤ་ཐང་ཐང་དུ་གཅེས་པས་སྐྱོང་བའི་འགན་འཁྲི་ཐེག་དགོས་སོ། །


དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1