ཉིན་གསུམ་གྱི་རིང་ལ་ཨ་མྱེས་རྨ་ཆེན་སྦོམ་ར་ལ་གངས་སྐོར་ཐེངས་གཅིག་བྱས་རྗེས། ཞོགས་པ་སྔ་མོ་ནས་མགོ་ལོག་ཁུལ་རྟ་བོར་གྲོང་རྡལ་ནས་ཆུ་ཚོད་གསུམ་ལྷག་ཙམ་སོང་བ་ན་རྨ་སྟོད་རྫོང་ནང་སླེབས། རྫོང་གི་ཉེ་ས་ན་འགག་སྒོ་ཞིག་ཡོད་ཀྱང་ང་ཚོས་སྐོར་ལམ་ཞིག་བསྐོར་ཏེ་རྨ་ཆུ་འོངས་སའི་ཕྱོགས་དེ་ནས་སྤྱི་ལེ་བཞི་བཅུ་ཙམ་སོང་རྗེས། སྒོ་ཆེན་ཞིག་བཞེངས་འདུག་མོད་སྒོ་སྲུང་མི་འདུག དེ་ནས་ཅུང་ཙམ་སོང་བ་ན་མཚོ་སྔོ་རེངས་ཞེས་བརྐོས་ཡོད་པའི་རྡོ་ཕ་བོང་ཞིག་མཐོང་མ་ཐག་རླངས་འཁོར་ལས་བབ་སྟེ་མཚོའི་འགྲམ་ལ་འགྲོ་དུས། མཚོའི་དཀྱིལ་ནས་གཅིག་རྗེས་གཉིས་མཐུད་དུ་འཕྱུར་བའི་མཚོ་རླབས་ཀྱི་ཤག་སྒྲ་རྒྱུན་ཆད་མེད་པར་རྣ་ལམ་དུ་གྲགས་ཤིང་། དེ་ནས་མུ་མཐུད་དེ་མཚོ་སྐྱ་རེངས་དང་གྲོ་རེངས་ཀྱི་ཕྱོགས་སུ་སོང་། ལམ་བར་དུ་ལྡེམ་ལྡེམ་དུ་གཡོ་བའི་རྩྭ་སྔོན་པོ་དང་། ལྷུང་ལྷུང་དུ་བཞུར་བའི་རྨ་ཆུ་དལ་བ་རིང་མོ། བར་སྣང་དུ་འཕར་ལྡིང་བྱེད་པའི་བྱ་བྱིའུ་སྣ་ཚོགས། རི་སྒང་ལ་བག་ཕེབས་ཀྱིས་རྒྱུ་བའི་རྟ་ནོར་ལུག་གསུམ་བཅས་ཀྱིས། ས་རྒྱ་ཆེ་ཡང་མི་གྲངས་ཉུང་བའི་རྨ་སྟོད་ཀྱི་ཡུལ་ལ་གསོན་ཉམས་ཤིག་བསྣན་འདུག
མཚོ་སྔོ་རེངས་ཀྱི་རྒྱུད་དེད་ནས་སྐྱ་རེངས་གྲོང་ཚོ་ལ་སླེབས་དུས། གྲོང་པའི་ཐོག་ལ་མཚོ་བར་དཀར་རྩེ་ཞེས་པའི་རི་མགོར་སོང་། རི་མགོ་དེ་ན་རྨ་ཆུའི་ཆུ་འགོ་ཞེས་པའི་དྲན་རྟེན་རྡོ་རིང་ཞིག་བཞེངས་འདུག་པ་དང་། རྡོ་རིང་ངོས་སུ་པན་ཆེན་སྐུ་ཕྲེང་བཅུ་པ་དང་ཧུའུ་ཡའོ་པང་གཉིས་ཀྱི། རྨ་ཆུའི་ཆུ་འགོ་ཞེས་བོད་རྒྱ་ཡིག་རིགས་གཉིས་ཀྱི་ཕྱག་དྲིས་འདུག གླིང་སྒྲུང་ལས། རྨ་སྟོད་རྩེ་ལྷ་བཅུ་གསུམ། རྨ་སྨད་མཐོན་པོ་དགུ་སྒྲིལ། ཞེས་པ་ལྟར་མཚོ་བར་དཀར་རྩེ་ནས་ཡག་རྭ་སྟག་རྩེ་དང་། བྱུ་རུ་སྟག་རྩེ། དམར་ལ་མཚལ་རྩེ། གཡག་རྔ་ལབ་རྩེ། དཀར་ལིའི་ལྷ་རྩེ། བང་ཚང་གཡུ་རྩེ། ཧུ་ལ་སྟག་རྩེ་བཅས་ལས་འགའ་ཤས་གསལ་པོར་མཇལ་ཐུབ་པས། དམངས་ཁྲོད་དུ་རི་བརྒྱད་ཀྱིས་མཚོ་གསུམ་བསྐོར། མཚོ་གསུམ་གྱིས་མཚོ་བར་དཀར་རྩེ་བསྐོར་ཞེས་པ་ལྟར། མཚོ་བར་དཀར་རྩེ་ནས་ལྟ་དུས། མདུན་ན་མཚོ་སྔོ་རེངས་དང་། རྒྱབ་ན་མཚོ་སྐྱ་རེངས། མཚོ་སྐྱ་རེངས་ཀྱི་སྣེ་ལ་མཚོ་གྲོ་རེངས་མཐུད་ཡོད་པ་གསལ་པོར་མཐོང་ཐུབ།
ལ་ལས་ཚོ་སྐྱ་རེངས་ནི་རྨ་ཆུའི་འགོ་ཁུངས་ཡིན་ཞེས་བཤད་ལ། འགའ་ཞིག་གིས་མཚོ་སྐྱ་རེངས་ཀྱི་མགོ་ན་ཡུལ་ཤུལ་མངའ་ཁོངས་ཀྱི་ཡག་རྭ་སྟག་རྩེ་ཞེས་པ་ནས། མཁར་ཆུ་ཞེས་པའི་ཆུ་ཞིག་མཚོ་སྐྱ་རེངས་ན་བབ་པས། རྨ་ཆུའི་ཆུ་འགོ་ནི་ཡུལ་ཤུལ་གྱི་ས་ཆ་ན་ཡོད་ཅེས་བཤད་ཀྱང་། གང་ལྟར་མདོ་རྩ་གཅིག་པ་རེད། མཚོ་བར་དཀར་རྩེ་ནས་བལྟས་པ་ན། མཚོ་སྐྱ་རེངས་ལས་འོངས་པའི་རྨ་ཆུ་ནི་མཚོ་སྔོ་རེངས་ཀྱི་སྒལ་ཚིགས་ལྟར། དཀྱིལ་ནས་ཤགས་སེར་རྒྱུགས་པས་མཚོ་རྨ་ལ་མི་འདྲེས། རྨ་མཚོ་ལ་མི་འདྲེས་ཞེས་པའི་བཤད་རྒྱུན་འདུག་ལ། མཚོ་སྔོ་རེངས་ནང་རྡོ་ཞིག་ཡོད་པ་དེ་ལ་དམངས་ཁྲོད་དུ་འབྲུག་མོའི་ར་མས་གྲུ་ཁྲིད་ཅེས་ཟེར་སྲོལ་སྣང་།
གླིང་སྒྲུང་ནང་ཡང་ཡང་མཐོང་བའི་མཚོ་སྐྱ་རེངས་དང་སྔོ་རེངས། གྲོ་རེངས་གསུམ་ནི་མཚོའི་མདོག་ཁ་ལ་བརྟེན་ནས་མིང་བཏགས་པ་ཡིན་ངེས། མཚོ་སྐྱ་རེངས་ཁ་ནས་སྐྱ་ལོ་བསྡད། །མཚོ་སྔོ་རེངས་ཁ་ནས་སྔོ་ལོ་བསྡད། །མཚོ་གྲོ་རེངས་ཁ་ནས་གྲོ་ལོ་བསྡད། །ཅེས་པ་ལྟར་བོད་ཀྱི་རིགས་རྒྱུད་སྒ་ཞེས་པས་ས་བཟུང་བ་འདྲ་ལ། མཚོ་གྲོ་སྔོ་གཉིས་ཀྱི་འགྲམ་ལ་སྔོ་ལོ་སྤུན་མཆེད་གཉིས་ཀྱི་མཁར་ཤུལ་དང་། མཚོ་སྐྱ་རེངས་འགྲམ་ལ་སྐྱ་ལོ་ཚང་གི་མཁར་ཤུལ་ཡོད་པར་གྲགས་པས། མཚོ་བར་དཀར་རྩེ་ལས་བབ་སྟེ་མཚོ་སྐྱ་རེངས་དངོས་སུ་མཇལ་དུ་སོང་།
མཚོ་སྐྱ་རེངས།
མཚོ་གྲོ་རེངས།
མཚོ་སྐྱ་རེངས་ཀྱི་འགྲམ་ལ་སླེབས་དུས། མཚོ་ཁ་ལས་རྟ་རྒོད་སྲབ་ལས་ཤོར་བ་ལྟར། རྦ་རླབས་འཕྱུར་ཞིང་མདུན་དུ་བཞུར་བ་དེ་ནི་རྨ་ཀླུང་སྒེག་མོའི་ཆུ་འགོ་རེད་འདུག དེའི་ཐོག་ལ་ཟམ་པ་ཞིག་ཡོད་པ་དེ་ནི་རྨ་ཆུའི་ཟམ་པ་དང་པོ་རེད་ཟེར། དེ་ནས་ལྟ་དུས། མཚོའི་འགྲམ་ལ་རི་འབུར་འབུར་ཞིག་ཡོད་པ་དེ་ནི། སྒ་སྐྱ་ལོ་ཚང་གི་མཁར་ཤུལ་ཡོད་ས་རེད་འདུག རྨ་ཆུའི་ཆུ་འགོ་དང་འབྲུག་མོའི་ཕ་གཞིས་མཐོང་དུས། སེམས་རྩ་དྲོས་ཏེ་མགྱོགས་པོར་རི་བོའི་ཉ་ག་བརྒྱུད་དེ་རི་འབུར་འབུར་དེ་ན་སོང་། རི་འབུར་འབུར་དེའི་རྩེ་མོར་ལ་བཙས་ཤིག་དང་། དེའི་འགྲམ་ལ་མཚོ་སྐྱ་རེངས་ལ་ཁ་འཁོར་བའི་སྒ་སྐྱ་ལོ་སེང་ལྕམ་འབྲུག་མོའི་སྐུ་འདྲ་ཞིག་བཞེངས་འདུག སྐུ་འདྲའི་ཞབས་ལ་མཁར་ཤུལ་གྲུ་བཞི་མ་ཞིག་གི་རྩིག་རྨིང་གི་ཤུལ་གསལ་པོར་མཐོང་། མཁར་ཤུལ་གྱི་དཀྱིལ་ལ་རྡོ་ཡི་མཎྜལ་གྱི་མཆོད་པ་དང་། འགྲམ་ལ་བསང་སྒང་ཞིག་འདུག མཁར་ཤུལ་ནས་མཚོ་སྐྱ་རེངས་ཀྱི་འགྲམ་བར་ལ་འབྲུག་མོའི་ཆུ་ལེན་སའི་ཆུ་ལམ་ཞིག་ཡོད་ཅེས་གོ་མྱོང་བས་ཞིབ་ཀྱིས་བཙལ་ཡང་། རྡོ་འགའ་རེ་གཅིག་རྗེས་གཉིས་མཐུད་ཀྱིས་བསྒྲིགས་ཡོད་པའི་སྐྱ་ལམ་རབ་རིབ་ཙམ་ལས། ཆུ་ལམ་ཡིན་ཐག་ཆོད་པ་གསལ་པོ་ཞིག་མ་མཐོང་།
རྨ་ཆུའི་ཟམ་པ་དང་པོ།
སྒ་སྐྱ་ལོའི་མཁར་ཤུལ།
འབྲུག་མོའི་ཆུ་ལམ།
འདི་ནི་མཚོ་སྐྱ་རེངས་ཁ་ལ་བསྡད་པའི་སྒ་སྐྱ་ལོ་ཚང་གི་མཁར་ཤུལ། སྒ་སྐྱ་ལོ་སེང་ལྕམ་འབྲུག་མོའི་གསས་མཁར་རེད་ཅེས་ཀུན་གྱི་ངག་ལ་རླུང་ལྟར་གྲགས། 《ཧོར་གླིང་གཡུལ་འགྱེད》ལས། སྐྱ་ལོའི་སྟོན་པ་རྒྱལ་མཚན་ལ། །ཕོ་བྲང་སྟག་རྩེ་ཟེར་བ་གདའ། །ཞེས་པ་ལྟར་ན། འདི་ནི་ཕོ་བྲང་སྟག་རྩེའི་མཁར་ཤུལ་ཡིན་དགོས། གླིང་སྒྲུང་ནང་སྔོ་རེངས་གད་པ་དང་སྐྱ་རེངས་གད་པ་ཞེས་ཡང་ཡང་བཀོད་ཡོད་པ་ལྟར། ཕོ་བྲང་གི་ཤུལ་ཡང་མཚོ་སྐྱ་རེངས་འགྲམ་གྱི་རི་འབུར་འབུར་གྱི་ངོས་ལ་ཆགས་ཡོད་པས་གཏམ་དེ་བདེན་པ་ཞིག་རེད་འདུག
དེ་ཡང་སྒ་སྐྱ་ལོ་སེང་ལྕམ་འབྲུག་མོ་ཞེས་མཚན་ཐོགས་དོན་ནི། སྒ་ཞེས་པ་ནི་བོད་ཀྱི་རུས་མཛོད་ནང་སྒ། ལྡོང་། འབྲི། དབྲ། བསེ། ཞེས་པ་ལྟར་བོད་ཀྱི་རུས་རྒྱུད་ཅིག་ཡིན་ལ། དཔའ་རྩལ་ཆེན་པོ་སྒ་དང་། བློ་ཁོག་ཆེན་པོ་ལྡོང་། གདུག་རྩུབ་ཆེན་པོ་རྨུ། ངང་རྒྱུད་རིང་པོ་དབྲ་ཞེས་གྲགས་པ་དང་། སྐྱ་ལོ་ཞེས་པ་ནི་སྒ་སྐྱ་ལོ་སྟོན་པའི་རྒྱལ་མཚན་གནའ་སྔོན་མར་དབུས་གཙང་ཕྱོགས་ལ་བསྡད་ཡོད་ཀྱང་། རྗེས་མར་ཨ་མདོ་ཕྱོགས་ལ་ཡོང་དུས་སློབ་དཔོན་པད་མ་འབྱུང་གནས་ཀྱི་ལུང་བསྟན་ལྟར། མཚོ་སྐྱ་རེངས་ཀྱི་ཁ་ལ་གཞིས་ཆགས་པས་མཚན་དེ་ལྟར་ཐོགས་པ་དང་། སེང་ལྕམ་འབྲུག་མོ་ཞེས་པ་ནི་གླིང་སྒྲུང་ནང་བཤད་ཚུལ་ཅུང་མི་འདྲ་བ་གཉིས་ཡོད་དེ། གཅིག་ནི《གངས་རི་ཤེལ་རྫོང》ལས། ང་སེང་ལྕམ་སྐུ་དེ་འཁྲུངས་ཉིན་ལ། །ཨ་སྔོན་དགུང་ནས་འབྲུག་གཅིག་གྲགས། །ན་དམར་གཞུང་ནས་རྐྱང་གཅིག་འཚེར། །དཀར་ཡག་གངས་ནས་སེང་གེ་འགྱིང་། །སེང་ལྕམ་འབྲུག་མོ་དེ་ནས་ཐོགས། །ཞེས་པ་དང་། གཉིས་ནི་སྒྲུང་པ་གྲགས་པས་བཤད་པའི《འཁྲུངས་གླིང》ལས། ང་དབྱར་ལ་མ་འཁྲུངས་དགུན་ལ་འཁྲུངས། །དགུན་ལོ་གསར་ཚེས་པ་གཅིག་ལ་འཁྲུངས། །མཐོ་དགུང་སྔོན་དབྱིངས་ནས་གཡུ་འབྲུག་གྲགས། །དཀར་ཡག་གངས་ལ་དུང་སེང་འགྱིངས། །དོག་མོའི་ས་ནས་ལྕམ་ཞིག་འཁྲུངས། །སེང་ལྕམ་འབྲུག་མོ་དེ་ནས་བཏགས། །ཞེས་པ་གཉིས་ལས་མི་འདྲ་ས་ནི་རྐྱང་ཞིག་འཚེར་བ་དང་། ལྕམ་ཞིག་འཁྲུངས་པ་གཉིས་ལས་དེ་མིན་འདྲ་མོ་རེད་མོད། ཞིབ་ཏུ་བསམས་ན་དེ་ནི་ཡིག་འབྲུ་ལ་བལྟས་ནས་ཆེ་བསྟོད་ཀྱི་ཚིག་རྒྱན་བཞག་པ་ཙམ་ལས། དོན་ངོ་མར་མོ་ལ་ཆུང་དུས་ནས་འབྲུག་མོ་ཟེར་ལ། གླིང་གི་རྟ་རྒྱུག་རྒྱན་འཇོག་ཐོག་ལ་འབྲུག་མོ་དང་སྐྱ་ལོ་ཚང་གི་རྒྱུ་ནོར་མང་པོ་རྒྱན་དུ་བཞག་སྟེ། ཇོ་རུ་རྟ་རྒྱུག་རྒྱན་འཇོག་ལས་གེ་སར་ཏེ་སེང་ཆེན་ནོར་བུ་དགྲ་འདུལ་ཞེས་མཚན་ཐོགས་རྗེས། འབྲུག་མོ་ཁོའི་བཙུན་མོའམ་ལྕམ་ལ་གྱུར་པ་ནས་བཟུང་། སེང་ཆེན་ནོར་བུ་དགྲ་འདུལ་གྱི་ལྕམ་འབྲུག་མོ་ཞེས་པའི་བསྡུས་མིང་ཡིན་པ་འདྲ། གླིང་དཀར་དྭངས་སྨན་མཆེད་བརྒྱད་ཀྱི་གཙོ་མོ་འབྲུག་མོའི་ཆུང་མེ་ཏོག་འཐུ་རོགས་དང་། ཆེ་ལུ་གུ་འཚོ་རོགས་སྔོ་ལོའི་བུ་མོ་ལྡེམ་འགྱུར་དང་ནེའུ་ཆུང་། གྲོ་ལོའི་བུ་མོ་དར་བཟང་ལྷ་མོ་དང་པད་དཀར་མཛེས་ལྡན་སོགས་ལས། འབྲུག་མོ་ནི་བུད་མེད་ཀྱི་དྭངས་རྩེ་ཡིན་པས། གླིང་སྒྲུང་ནང་མོའི་ལུས་ངག་ཡིད་གསུམ་གྱི་ཡོན་ཏན་ཧ་ཅང་གསོན་ཉམས་དོད་པོས་ཞིབ་འབྲི་བྱས་ཡོད་པ་ཚང་མས་དེར་གཟིགས་ཆོག་པས་བསྐྱར་འབྲི་མི་བྱེད།
དེའི་ཕྱི་ཉིན། ཞོགས་པར་སྐྱ་མདའ་བཏང་མ་ཐག་མགྲོན་ཁང་ལས་བུད་དེ། རྨ་སྟོད་རྫོང་ནང་བཞེངས་ཡོད་པའི་གླིང་གེ་སར་གྱི་སྐུ་འདྲ་དེ་མཇལ་དུ་སོང་། བོད་ཁུལ་གྱི་ས་ཆ་གཞན་དག་གི་གེ་སར་ཐང་ཆེན་ན་ཡོད་པའི་གེ་སར་གྱི་སྐུ་འདྲ་ཕལ་ཆེར་ནི། ལྷ་རྟ་ལ་བཞོན་པའི་རྣམ་པ་ཡིན་མོད། རྨ་སྟོད་རྫོང་ན་མདུན་དུ་ཇོ་རུས་ལྷ་རྟ་བཞོན་པ་ཞིག་དང་། དེའི་རྒྱབ་ལ་གེ་སར་གསེར་ཁྲིར་བཞུགས་པའི་སྐུ་འདྲ་ཞིག་བཞེངས་འདུག དེ་ལྟར་བཞེངས་པའི་རྒྱུ་མཚན་ནི། གེ་སར་འཁྲུངས་ནས་ཡུན་མ་རིང་བར། ཨ་ཁུ་ཁྲོ་ཐུང་གིས་མ་བུ་གཉིས་རྨ་ཡུལ་ལ་བསྐྲད་པ་ནས་བཟུང་། ཡུལ་དེར་གཞིས་ཆགས་ཏེ་ཕྱོགས་བཞིའི་དགྲ་བཞི་འདུལ་བའི་འཕྲིན་ལས་རྒྱས་པ་ཡིན་པས་རེད་ཟེར། སྒྱུ་རྩལ་ནི་སྨྲ་བརྗོད་མི་དགོས་པའི་སྐད་ཆ་ཞིག་སྟེ། སྐུ་འདྲ་དེ་གཉིས་ལས་གེ་སར་གྱི་སྐུ་ཚེ་གཅིག་གི་སྣེ་གཉིས་གསལ་པོར་མཐོང་བས། བློ་གྲོས་རིག་པ་ལས་འཁྲུངས་པའི་ཐབས་ཤེས་དེ་ལ་ཡིད་སྨོན་འཆོར་བཞིན་ཡུལ་ཤུལ་གྱི་ཕྱོགས་སུ་སོང་།།
