རྒྱལ་སྲིད་སྤྱི་ཁྱབ་ཁང་གསར་འགྱུར་གཞུང་ལས་ཁང་གིས《ཀྲུང་གོའི་སྐྱེ་དངོས་སྣ་མང་རང་བཞིན་སྲུང་སྐྱོབ》ཅེས་པའི་རྒྱབ་ཤ་དཀར་པོའི་དཔེ་དེབ་བཀྲམ།
རྩོམ་སྒྲིག་པ།ཚེ་དཔལ། ཡོང་ཁུངས། ཞིན་ཧྭ་དྲ་བ། སྤེལ་དུས། 10-09
ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཚེས8ཉིན། རྒྱལ་སྲིད་སྤྱི་ཁྱབ་ཁང་གསར་འགྱུར་གཞུང་ལས་ཁང་གིས《ཀྲུང་གོའི་སྐྱེ་དངོས་སྣ་མང་རང་བཞིན་སྲུང་སྐྱོབ》ཅེས་པའི་རྒྱབ་ཤ་དཀར་པོའི་དཔེ་དེབ་བཀྲམ།
རྒྱབ་ཤ་དཀར་པོའི་དཔེ་དེབ་ནང་ངོ་སྤྲོད་བྱས་པར། ཀྲུང་གོའི་ས་རྒྱ་ཆེ་ཞིང་སྐམ་མཚོ་གཉིས་ལྡན་ཡིན་ལ། ས་དབྱིབས་དང་གནམ་གཤིས་སྣ་མང་རྙོག་འཛིང་ཆེ་བས། ཕུན་སུམ་ཚོགས་ལ་ཐུན་མིན་ཁྱད་ཆོས་ལྡན་པའི་སྐྱེ་ཁམས་མ་ལག་དང་། སྐྱེ་དངོས། རྒྱུད་འཛིན་གྱི་སྣ་མང་རང་བཞིན་སྐྱེད་སྲིང་བྱས་ཡོད་པས། འཛམ་གླིང་ཐོག་སྐྱེ་དངོས་སྣ་མང་རང་བཞིན་ཕུན་སུམ་ཚོགས་ཤོས་ཀྱི་རྒྱལ་ཁབ་ཅིག་ཡིན། 《སྐྱེ་དངོས་སྣ་མང་རང་བཞིན་གྱི་སྤྱི་ཆིངས》ལ་མིང་རྟགས་དང་ཆོག་མཆན་འགོད་སྔ་ཤོས་ཀྱི་ཆིངས་ཡིག་འཇོག་མཁན་གྱི་གྲས་ཡིན་པས། ཀྲུང་གོས་ཐོག་མཐའ་བར་གསུམ་དུ་སྐྱེ་དངོས་སྣ་མང་རང་བཞིན་གྱི་སྲུང་སྐྱོབ་ལ་ཚད་མཐོའི་མཐོང་ཆེན་བྱས་ནས། སྐྱེ་དངོས་སྣ་མང་རང་བཞིན་སྲུང་སྐྱོབ་བྱེད་པའི་དུས་བསྟུན་འཕེལ་རྒྱས་དང་གསར་གཏོད་འཕེལ་རྒྱས་ལ་ཟམ་མི་ཆད་པར་སྐུལ་འདེད་བཏང་བས་ཕན་འབྲས་མངོན་གསལ་དོད་པོ་ཐོན་ཞིང་། ཀྲུང་གོའི་ཁྱད་ཆོས་ལྡན་པའི་སྐྱེ་དངོས་སྣ་མང་རང་བཞིན་སྲུང་སྐྱོབ་ཀྱི་ལམ་བུའི་ཐོག་བསྐྱོད་ཡོད།
རྒྱབ་ཤ་དཀར་པོའི་དཔེ་དེབ་ནང་བསྟན་དོན། ཀྲུང་གོས་འཕེལ་རྒྱས་ཁྲོད་སྲུང་སྐྱོབ་དང་སྲུང་སྐྱོབ་བྱེད་རིང་འཕེལ་རྒྱས་གཏོང་རྒྱུ་མཐའ་འཁྱོངས་བྱས་ནས། རྒྱལ་ཁབ་སྤྱི་གླིང་གི་སྒྲིག་གཞི་འཛུགས་སྐྱོང་དང་སྐྱེ་ཁམས་སྲུང་སྐྱོང་གི་དམར་ཐིག་དབྱེ་མཚམས་འབྱེད་པ་སོགས་ཀྱི་བྱེད་ཐབས་གལ་ཆེན་འདོན་པ་དང་ལག་ལེན་དུ་བསྟར་ནས། རང་ས་དང་གནས་སྤོར་སྲུང་སྐྱོབ་བྱེད་ཤུགས་རྒྱུན་ཆད་མེད་པར་ཆེ་རུ་གཏོང་བ་དང་། སྐྱེ་དངོས་ཀྱི་བདེ་འཇགས་དོ་དམ་ལ་ཤུགས་སྣོན་པ། སྐྱེ་ཁམས་ཁོར་ཡུག་གི་སྤུས་ཚད་རྒྱུན་མཐུད་ངང་ཇེ་ལེགས་སུ་གཏོང་བ། སྐྱེ་དངོས་སྣ་མང་རང་བཞིན་ལ་སྲུང་སྐྱོབ་དང་ལྗང་མདོག་འཕེལ་རྒྱས་མཐུན་སྦྱོར་ངང་སྐུལ་འདེད་གཏོང་བ་བཅས་བྱས་ནས། སྐྱེ་དངོས་སྣ་མང་རང་བཞིན་གྱི་སྲུང་སྐྱོང་ལ་གྲུབ་འབྲས་མངོན་གསལ་དོད་པོ་ཐོབ་ཡོད།
རྒྱབ་ཤ་དཀར་པོའི་དཔེ་དེབ་ནང་ཀྲུང་གོས་སྐྱེ་དངོས་སྣ་མང་རང་བཞིན་ལ་སྲུང་སྐྱོབ་བྱ་རྒྱུ་དེ་རྒྱལ་ཁབ་ཀྱི་འཐབ་ཇུས་སུ་བསྒྱུར་བ་དང་། སྐྱེ་དངོས་སྣ་མང་རང་བཞིན་ལ་སྲུང་སྐྱོང་བྱ་རྒྱུ་དེ་ས་ཁུལ་སོ་སོ་དང་ཁྱབ་ཁོངས་སོ་སོའི་དུས་ཡུན་འབྲིང་རིང་གི་འཆར་འགོད་ནང་བཅུག་སྟེ། སྲིད་ཇུས་ཁྲིམས་སྲོལ་གྱི་མ་ལག་འཐུས་ཚང་དུ་གཏོང་བ་དང་། ལག་རྩལ་འགན་ལེན་དང་ཤེས་ལྡན་མི་སྣའི་དཔུང་ཁག་འཛུགས་སྐྱོང་ལ་ཤུགས་སྣོན་པ། ཁྲིམས་འཛིན་ལྟ་སྐུལ་བྱེད་ཤུགས་ཆེ་རུ་གཏོང་བ་བཅས་བྱས་ནས་སྤྱི་དམངས་ཚོ་རང་རྟོགས་ངང་སྐྱེ་དངོས་སྣ་མང་རང་བཞིན་གྱི་སྲུང་སྐྱོབ་ནང་ཞུགས་པར་ཁྲིད་སྟོན་བྱས་ཏེ། སྐྱེ་དངོས་སྣ་མང་རང་བཞིན་བཅོས་སྐྱོང་གི་ནུས་པ་རྒྱུན་ཆད་མེད་པར་ཆེ་རུ་གཏོང་དགོས་པར་བསྟན་ཡོད།
རྒྱབ་ཤ་དཀར་པོའི་དཔེ་དེབ་ནང་སྐྱེ་དངོས་སྣ་མང་རང་བཞིན་མེད་བརླག་ཏུ་འགྲོ་བའི་གོ་ལ་ཧྲིལ་པོའི་རང་བཞིན་གྱི་འགྲན་སློང་གི་མདུན་དུ། རྒྱལ་ཁབ་སོ་སོ་ནི་སྐྱིད་སྡུག་མཉམ་མྱོང་གི་ལས་དབང་གཅིག་མཐུན་ཚོགས་པ་ཞིག་ཡིན། ཀྲུང་གོས་བློ་བརྟན་འགྱུར་མེད་ངང་ཕྱོགས་མང་རིང་ལུགས་ལག་བསྟར་དང་། ཧུར་ཐག་གིས་སྐྱེ་དངོས་སྣ་མང་རང་བཞིན་ལ་སྲུང་སྐྱོབ་ཀྱི་རྒྱལ་སྤྱིའི་མཉམ་ལས་བྱེད་པ། རྒྱ་ཁྱབ་ངང་གྲོས་མོལ་དང་ཐུན་མོང་གི་ངོས་འཛིན་གཅིག་ཏུ་སྒྲིལ་བ་བཅས་བྱས་ཏེ། གོ་ལ་ཧྲིལ་པོའི་སྐྱེ་དངོས་སྣ་མང་རང་བཞིན་གྱི་སྲུང་སྐྱོང་ལ་སྐུལ་འདེད་གཏོང་ཆེད་ཀྲུང་གོའི་བློ་གྲོས་སྐྱེས་སུ་འབུལ་བ་དང་། རྒྱལ་སྤྱིའི་སྤྱི་ཚོགས་དང་མཉམ་དུ་མི་དང་རང་བྱུང་ཁམས་ཀྱི་ཚེ་སྲོག་གཅིག་མཐུན་ཚོགས་པ་བསྐྲུན་དགོས་པར་བསྟན་ཡོད།
རྒྱབ་ཤ་དཀར་པོའི་དཔེ་དེབ་ནང་ཀྲུང་གོ་ནི་ཐོག་མཐའ་བར་གསུམ་དུ་སྐྱེ་རྒུའི་འཆམ་མཐུན་མཛེས་སྡུག་གི་ཁྱིམ་གཞིའི་སྲུང་སྐྱོང་མཁན་དང་། འཛུགས་སྐྲུན་མཁན། བྱས་རྗེས་འཇོག་མཁན་བཅས་ཡིན་པས། རྒྱལ་སྤྱིའི་སྤྱི་ཚོགས་དང་ལག་གདང་སྦྲེལ་ནས་མཉམ་དུ་འབད་བརྩོན་བྱས་ཏེ། སྔར་བས་གཞུང་དྲང་ལུགས་མཐུན་དང་གང་ནུས་དེ་སྒྲུབ་ཀྱི་གོ་ལ་ཧྲིལ་པོའི་སྐྱེ་དངོས་སྣ་མང་རང་བཞིན་བཅོས་སྐྱོང་གི་འཕེལ་རིམ་གསར་པ་གཏོད་པ་དང་། མི་དང་རང་བྱུང་ཁམས་འཆམ་མཐུན་མཉམ་གནས་ཀྱི་མཛེས་སྡུག་ལྡན་པའི་ཕུགས་འདུན་མངོན་འགྱུར་བྱེད་པ། མིའི་རིགས་ཀྱི་ལས་དབང་གཅིག་མཐུན་ཚོགས་པ་འཛུགས་པར་སྐུལ་འདེད་གཏོང་བ་བཅས་བྱས་ཏེ། སྔར་བས་མཛེས་སྡུག་ལྡན་པའི་འཛམ་གླིང་ཐུན་མོང་གིས་བསྐྲུན་དགོས་པར་བསྟན་ཡོད། །
