སྔོ་ལྗང་ལྗང་སྤང་ཐང་སྟེང་ལ། ཁྲ་ཆེམ་ཆེམ་མེ་ཏོག་བཞད་པའི་ནམ་དུས་ཏེ། འདི་ལོའི་སྤྱི་ཟླ་བརྒྱད་པའི་ནང་། ང་རང་སླར་ཡང་དཀར་མཛེས་ཁུལ་གྱི་སེར་ཤུལ་ནས་དཔལ་ཡུལ་དང་། སྡེ་དགེ དཀར་མཛེས། བྲག་འགོ རྟའུ། ཉག་ཆུ། ལི་ཐང་། འབའ་ཐང་བཅས་རྫོང་ཁག་དགུ་བརྒྱུད་དེ་ཡུལ་སྐོར་ལ་ཕྱིན་པ་ཡིན། རྟ་རྒྱུ་ཞོར་མེ་ཏོག་འཐུ་ཞོར་ཞེས་པའི་དཔེ་ལྟར་ངས་འགྲོ་ཞོར་འདུག་ཞོར་ལ་དཀར་མཛེས་ཁུལ་གྱི་རྫོང་ཁག་དེ་དག་གི་འཕེལ་རྒྱས་ལ་ངམ་ངམ་ཤུགས་ཤུགས་ཀྱིས་དོ་སྣང་ཞིག་བྱུང་ལ། ང་ལ་བག་ཆགས་ཀྱང་ཟབ་མོ་ཞིག་བཞག་བྱུང་།
གཅིག གྲོང་ཁྱེར་དང་གྲོང་རྡལ་གྱི་རྣམ་པར་འགྱུར་ལྡོག་ཆེ་བ།
༢༠༡༥ལོ་དང་། ༢༠༡༩ལོར། ང་རང་སྔ་རྗེས་སུ་སེར་ཤུལ་དང་། སྡེ་དགེ། དཀར་མཛེས། བྲག་འགོ། ཉག་རོང་། ལི་ཐང་། འབའ་ཐང་སོགས་ལ་ཐེངས་གཅིག་འགྲོ་མྱོང་བས། སྐབས་དེར་རྫོང་དེ་དག་གི་གྲོང་ཁྱེར་དང་གྲོང་རྡལ་གྱི་འཛུགས་སྐྲུན་དང་། རྨང་གཞི་སྒྲིག་བཀོད་སོགས་བོད་ལྗོངས་ཀྱི་གྲོང་ཁྱེར་དང་གྲོང་རྡལ་ལ་བསྡུར་ན་ཅུང་ཞན་པོ་རེད་འདུག །རྒྱུ་མཚན་ནི་སྔོན་མ་བོད་ལྗོངས་ལ་མེས་རྒྱལ་ནང་ཁུལ་གྱི་ཞིང་ཆེན་ཁག་གི་ཁ་གཏད་རོགས་སྐྱོར་ཡོད་པ་དང་། དཀར་མཛེས་ཁུལ་ལ་དེ་འདྲ་མེད་པའི་དབང་གིས་ཡིན་པར་ངེས། ཐེངས་འདིར་ང་རང་སླར་ཡང་དཀར་མཛེས་ཁུལ་གྱི་རྫོང་ཁག་དགུ་ལ་འགྲོ་སྐབས། རྫོང་ཁག་དེ་དག་གི་གྲོང་ཁྱེར་དང་གྲོང་རྡལ་གྱི་གཞི་ཁྱོན་དང་། འཛུགས་སྐྲུན་གྱི་སྤུས་ཚད། གྲོང་ཁྱེར་གྱི་དོ་དམ་ལ་སོགས་བོད་ལྗོངས་ཀྱི་རྫོང་ཁག་གི་རྗེས་ཟིན་ཚར་བ་མ་ཟད། ལ་ལ་ནི་བོད་ལྗོངས་ལས་བརྒལ་ཟིན་འདུག་ཅེས་ཤོད་ཆོག་པར་སྣང་། ལྷག་པར་དུ་འཛུགས་སྐྲུན་གྱི་རྣམ་པའི་ཐད་མི་རིགས་དང་ས་གནས་ཀྱི་ཁྱད་ཆོས་འབུར་དུ་ཐོན་པ་དང་། འཛུགས་སྐྲུན་གྱི་བཀོད་པ་རྣམས་ས་གནས་ཀྱི་ཡུལ་བབ་དང་མཐུན་ཞིང་། ཨར་སྐྲུན་སྤུས་ཚད་ལྡན་པ། དོ་དམ་གྱིས་རྗེས་ཟིན་པ། གཙང་སྦྲ་དང་ཁོར་ཡུག་མཛེས་བཟོ་སོགས་དངོས་གནས་གནམ་ས་བླ་འོག་བརྗེ་བའི་དཔེ་ལྟར་བསམ་ཡུལ་ལས་འདས་པའི་འགྱུར་ལྡོག་ཆེན་པོ་ཕྱིན་འདུག་ལ། དེས་མི་རིགས་ས་ཁུལ་གྱི་ཁྱད་ཆོས་འབུར་དུ་ཐོན་ཞིང་། ཡུལ་སྐོར་བྱ་གཞག་གོང་དུ་སྤེལ་བར་ཤ་ཐོག་མར་བརྩེགས་ལྟ་བུའི་ཡིད་དུ་འོང་བའི་མཛེས་ལྗོངས་ཆེན་པོ་ཞིག་ཁ་སྣོན་ཡང་བྱུང་འདུག །
གཉིས། མང་ཚོགས་ཀྱི་སྡོད་ཁང་སྔར་བས་མཛེས་ཉམས་ལྡན་པ།
དེ་སྔ་ང་རང་དཀར་མཛེས་ཁུལ་ལ་འགྲོ་སྐབས། བག་ཆགས་ཟབ་ཤོས་དང་ཡིད་སྨོན་ཆེ་ཤོས་ནི་མང་ཚོགས་ཀྱི་སྡོད་ཁང་གི་བཟོ་བཀོད་དང་། ཚོན་རྩི་སོགས་ཁྱད་ཆོས་འབུར་དུ་ཐོན་པ་དེ་ཡིན་པ་དང་། སྐབས་དེ་དུས་ནས་མང་ཚོགས་ཀྱི་སྡོད་ཁང་གི་སྤྱིའི་བཀོད་པ་དང་། ཨར་སྐྲུན་གྱི་ཁྱད་ཆོས། ཨར་སྐྲུན་གྱི་གྲུབ་ཆ། ཚོན་རྩི་སྤེལ་སྟངས་སོགས་རང་བྱུང་ཁམས་དང་ཡོངས་སུ་མཐུན་ཞིང་། བརྗིད་ཉམས་ལྡན་ལ། མཛེས་སྡུག་ཡིད་དབང་འཕྲོག་པ་ཞིག་ཏུ་མཐོང་བྱུང་། ཐེངས་འདིར་རྫོང་ཁག་དང་ས་གནས་གང་ཞིག་ལ་བསྐྱོད་ཀྱང་མང་ཚོགས་ཀྱི་སྡོད་ཁང་སྔར་བས་མཛེས་ཉམས་ལྡན་པ་ཞིག་ཏུ་གྱུར་འདུག་ལ། ས་གནས་རེ་རེ་བཞིན་དུ་ས་གནས་དེ་གའི་རང་བྱུང་ཁོར་ཡུག་དང་ཡོངས་སུ་མཐུན་ཞིང་། ས་གནས་ཀྱི་ཁྱད་ཆོས་འབུར་དུ་ཐོན་པ། ཨར་སྐྲུན་གྱི་གྲུབ་ཆ་དང་། བཟོ་བཀོད། ཚོན་རྩི་སོགས་ས་གནས་རེ་རེ་བཞིན་སྤྱིར་ན་གཅིག་གྱུར་ཡིན་ཞིང་། དོ་མཉམ་ལ་ཉམས་དགའ་བ་དང་། མིག་ལ་མཛེས་ཤིང་ཡིད་དབང་འཕྲོག་པ། དངོས་གནས་ཡུལ་ལུང་གི་མཛེས་རྒྱན་དང་། བོད་ཀྱི་སྡོད་ཁང་ཨར་སྐྲུན་གྱི་དངོས་མང་བཤམས་སྟོན་ཁང་ཆེན་པོ། ཡུལ་སྐོར་འགྲོ་སའི་མཛེས་ལྗོངས་བླ་ན་མེད་པ་བཅས་ལ་མངོན་བཞིན་འདུག ང་རང་གི་མཐོང་སྣང་དུ་ཡུལ་ལུང་རེ་རེ་བཞིན་ལ་ཁང་པའི་རྒྱག་ལུགས་ཐད་ཡིག་ཐོག་ཏུ་མ་འཁོད་པའི་གཅིག་གྱུར་གྱི་གཏན་འབེབས་ཤིག་ཡོད་པ་ལྟ་བུར་མཐོང་ལ། དེ་བཞིན་ཁང་པའི་ཚོན་རྩི་རྣམས་ཀྱང་ཧ་ལམ་ལོ་གཉིས་གསུམ་རེའི་མཚམས་སུ་གཅིག་གྱུར་གྱིས་ཉམས་གསོ་རེ་བྱེད་བཞིན་ཡོད་པ་ལྟ་བུར་སྣང་། གང་ལགས་ཞེ་ན། ང་རང་ས་གནས་དེ་དག་ཏུ་ག་དུས་ཕྱིན་ཀྱང་ཁང་པའི་ཚོན་རྩི་རྣམས་ད་ལྟ་རང་གསར་དུ་བཏང་བ་ལྟ་བུར་མངོན་པ་ལས། ཉི་འོད་དང་ཆར་རླུང་གིས་གཙེས་ཏེ་མདོག་ཡལ་བ་དང་། ཚོན་རྩི་དོ་མི་མཉམ་པར་གྱུར་པའི་མངོན་ཚུལ་གཏན་ནས་མཐོང་མ་བྱུང་། དངོས་འབྲེལ་མང་ཚོགས་ཀྱི་སྡོད་ཁང་དེ་དག་ནི་ནང་ལ་སྡོད་མཁན་སྣང་བ་སྐྱིད་ཅིང་། ཕྱི་ནས་བལྟས་ན་ཡིད་དབང་འཕྲོག་པ་འབའ་ཞིག་འདུག །
གསུམ། ས་གནས་རང་ཉིད་ཀྱི་མིས་ཚོང་རའི་འགྲན་བརྩོན་ནང་ཞུགས་ཚད་མཐོ་བ།
རྫོང་དེ་དག་གི་གྲོང་ཁྱེར་དང་གྲོང་རྡལ་གང་དུ་བསྐྱོད་ཀྱང་དེ་དག་ཏུ་ཡོད་པའི་མགྲོན་ཁང་དང་། ཚོང་ཁང་། ཟས་ཁང་ཕལ་ཆེ་བའི་སྦྱིན་བདག་དང་། གཉེར་སྐྱོང་བ་ནི་ས་གནས་དེ་ག་རང་གི་མི་ཡིན་འདུག་པས། དེ་ནི་ཁམས་ཁུལ་གྱི་མི་རྣམས་ལ་ཚོང་གཉེར་ལ་ཞུགས་པའི་སྐྱེས་ཐོབ་ཀྱི་འཇོན་ཐང་ཞིག་ཡོད་པ་ཡིན་ནམ། ཡང་ན་ས་གནས་དེ་དག་གི་ཏང་སྲིད་ལས་ཁུངས་ཁག་གིས་ས་གནས་རང་ཉིད་ཀྱི་མི་རྣམས་ལ་ཚོང་རར་འགྲན་ཞུགས་བྱེད་པའི་འབོད་སྐུལ་དང་། རོགས་སྐྱོར་གྱི་དམིགས་བསལ་སྲིད་ཇུས་ཡོད་པ་རྒྱུ་རྐྱེན་གང་ཞིག་གིས་བྱུང་བ་ཡིན་པ་ཆ་མ་འཚལ་ཡང་། གང་ལྟར་ས་གནས་རང་ཉིད་ཀྱི་མིས་ཚོང་རའི་འགྲན་བརྩོན་ནང་ཞུགས་ཚད་ཧ་ཅང་མཐོ་པོ་ཡོད་པར་ང་རང་ཡིད་སྨོན་ཆེན་པོ་སྐྱེས་བྱུང་། དེ་ནི་རྒྱའི་ཁ་དཔེར་དཔོན་གནས་གཅིག་གིས་ཡུལ་དེར་བདེ་སྐྱིད་སྐྲུན་ཞེས་སུ་གྲགས་པ་དེ་དོན་ལ་བབ་པ་ཞིག་ཀྱང་རེད་འདུག་ཅིང་། སྲིད་གཞུང་གི་ལས་ཁུངས་གང་ཞིག་ཡིན་རུང་དེ་དག་གིས་རང་ཉིད་ཀྱི་འོག་སྡེར་བདེ་སྐྱིད་བསྐྲུན་རྒྱུ་ཨང་དང་པོར་འཇོག་པ་ནི་འོས་པ་ཞིག་རེད་ལ་དགོས་ངེས་ཤིག་ཀྱང་རེད། དེ་བཞིན་ས་གནས་གང་ཞིག་ཡིན་རུང་ས་གནས་དེ་གའི་མིས་གཞན་ལ་སྒུག་རྟེན་སློང་ གསུམ་མི་བྱེད་པར། དཀའ་སྤྱད་ལས་བརྩོན་དང་། རང་སྟོབས་རང་སྤེལ་བྱས་ཏེ། རང་ཚུགས་ཀྱིས་དཔའ་ངར་ཆེན་པོས་ཕྱུག་འགྱུར་ལམ་དུ་བསྐྱོད་པ་དེ་ནི་ལས་ལ་བརྩོན་པའི་མཚོན་རྟགས་ཤིག་ཡིན་ལ། ཀྲུང་ཧྭ་མི་རིགས་ལ་མངའ་པའི་སྲོལ་རྒྱུན་བཟང་པོ་ཞིག་ཀྱང་རེད།
བཞི། སེམས་པ་བཟང་ལ་བག་ཆགས་ལྡན་པའི་མི་སེར།
སྔོན་མ་དབུས་གཙང་ཕྱོགས་ཀྱི་མི་རྣམས་ཀྱིས་ཁམས་ཕྱོགས་ཀྱི་མི་ཕལ་ཆེ་བ་ནི་གཤིས་རོ་གྱོང་ལ་རྒྱུ་མཚན་ཤོད་ས་མེད་པ་ཞིག་ཡིན་པར་ངོས་འཛིན་བྱེད་སྲོལ་ཡོད། དེ་ནི་ཕལ་ཆེར་དུས་རབས་དང་ལོ་རྒྱུས་ཀྱི་རྒྱབ་ལྗོངས་མི་འདྲ་བའི་དབང་གིས་ཡིན་ངེས་རེད། ཉེ་ལམ་ང་རང་ཁམས་ཕྱོགས་སུ་སྔ་རྟིང་ཐེངས་འགའ་སོང་བའི་སྐབས་སུ། དེ་གའི་མི་རྣམས་ནི་སེམས་པ་བཟང་ཞིང་བག་ཆགས་ལྡན་པ་ཞིག་ཡིན་པའི་བག་ཆགས་ཟབ་མོ་ཞིག་བཞག་བྱུང་། དཔེར་ན་ཡུལ་ལུང་དང་། འགྲོ་ལམ། ཅ་དངོས་སོགས་བཀའ་འདྲི་ཞུ་སྐབས། དེར་མཛུབ་མོ་རི་སྟོན་གྱིས་ངོ་སྤྲོད་བྱེད་པ་ཙམ་མ་ཡིན་པར། ཞིབ་ཅིང་ཕྲ་བའི་སྒོ་ནས་ངོ་སྤྲོད་ཁ་གསལ་བྱེད་པ་མ་ཟད། ཐ་ན་ཐད་ཀར་དེའི་མདུན་དུ་ཁྲིད་རོགས་ཀྱང་བྱེད་མཁན་མང་པོ་ཐུག་བྱུང་། དེས་ན་ས་ཕྱོགས་དེར་སྤྱི་ཚོགས་ཡར་ཐོན་དང་། མི་རྣམས་ཀྱི་སེམས་སུ་ཡ་རབས་ཀྱི་དཔལ་ཡོན་རབ་ཏུ་བཞད་ཡོད་པ། དེ་གའི་མི་སེར་རྣམས་ནི་སེམས་པ་བཟང་ལ་བག་ཆགས་ཚུལ་ལྡན་འབའ་ཞིག་ཡིན་པའི་ཚོར་སྣང་གཏིང་ཟབ་བྱུང་། །
