སྤྱི་ཟླ་10པའི་ཚེས་22ཉིན་མཚོ་ལའི་རང་བྱུང་སྲུང་སྐྱོབ་ཁུལ་དོ་དམ་ཨུ་ལྷན་གྱིས་གནས་ཚུལ་སྤེལ་གསལ། ཉེ་ཆར། མཚོ་ལའི་རང་བྱུང་སྲུང་སྐྱོབ་ཁུལ་དོ་དམ་ཨུ་ལྷན་གྱི་སྐོར་ཞིབ་སྲུང་སྐྱོབ་མི་སྣས་སྐོར་ཞིབ་བྱེད་སྐབས། བྲག་སྲུབས་ཀྱི་ལྡེབས་ངོས་སུ་ཡིབ་པའི་ཚོན་ལྡན་བྲག་རིས་ཁག་ཅིག་རྙེད་པ་དང་། བྲག་རིས་དེ་ནི་སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་ལི་ཐང་རྫོང་དབྲ་ཁོག་ཡུལ་ཚོའི་དགེ་བསྙེན་རི་བོའི་རང་བྱུང་སྲུང་སྐྱོབ་ཁུལ་གྱི་གཡང་གཟར་ཞིག་གི་ལྡེབས་ངོས་སུ་འདུག །ཚོན་ལྡན་གྱི་བྲག་རིས་འདི་དང་སྔོན་མདོ་དབུས་མཐོ་སྒང་གི་དབུས་རྒྱུད་མངའ་རིའི་ས་ཁུལ་དང་། ཤར་རྒྱུད་ཡུལ་ཤུལདང་དཀར་མཛེས་ས་གནས་སོགས་ནས་གསར་རྙེད་བྱུང་བའི་བྲག་རིས་ཀྱི་བཟོ་ལྟ་དང་ནང་དོན། དེ་མིན་རྣམ་པ་བཅས་དང་དེ་ཙམ་མི་འདྲ་ཞིང་། རྦད་དེ་དེ་དག་ལས་གནའ་ཉམས་ལྡན་པ་འདུག །ནང་དོན་གྱི་ཐད་ནས་བལྟས་ན། ཤྭ་བ་ཞིག་དང་ཕག་དང་རིགས་འདྲ་བ་ཞིག །ལངས་གཟུགས་ཀྱི་མི་ཞིག་དང་མིའུ་ཞིག །དེ་མིན་ད་དུང་ཅི་ཡིན་ཆ་མ་འཚལ་བའི་རི་མོ་ཁ་ཤས་འདུག །ཤྭ་བ་ནི་བྲག་རིས་ཁྲོད་རྒྱུན་དུ་མཐོང་རྒྱུ་ཡོད་ལ། རྡོ་ཆས་རྙིང་མ་ནས་རྡོ་ཆས་གསར་མའི་བར་དང་། ཡོབ་གླིང་ནས་ཡ་གླིང་ཤར་མའི་བར། དུས་ཚོད་ནས་ས་ཁུལ་བར་སོགས་ཚང་མའི་ཁྲོད་གནའ་མིའི་བརྗོད་བྱ་ཆེས་མང་བ་དེ་ཡིན། འོན་ཀྱང་གནས་འདིའི་ཤྭ་བ་ནི་ཚོན་ལྡན་ཡིན་པ་དང་རྣམ་པ་གསོན་ཉམས་ལྡན་པ། སྟབས་བདེ་ཞིང་ཐིག་རས་སྦོམ་པོས་ཤྭ་བའི་ལུས་དབྱིབས་དང་གཟུགས་བཞི། རྭ་ཅོ་སོགས་བྲིས་ཡོད་ལ། གཟུགས་དབྱིབས་ཀྱི་ཁྱད་ཆོས་ལས་རྡོ་ཆས་གསར་པའི་ཤྭ་བ་མཚོན་ཚུལ་དང་ཁྱད་པར་ཆེན་པོ་ཡོད་པ་ཤེས་ཐུབ།ངོས་འཛིན་བྱེད་ཐུབ་པའི་སྲོག་ཆགས་གཞན་ཞིག་གི་གཟུགས་དབྱིབས་ཕག་དང་མཚུངས་ཤིང་།འཛམ་གླིང་བྲག་རིས་ཨུ་ལྷན་གྱི་ལས་འཛིན་ཨུ་ཡོན།ནན་ཅིང་དགེ་འོས་སློབ་ཆེན་གྱི་སྤྱི་ཚོགས་འཕེལ་རྒྱས་སློབ་གླིང་གི་གླིང་གཙོ་གཞོན་པ། རིག་གནས་དང་དངོས་མང་བཤམས་སྟོན་རིག་པའི་ཚན་ཁག་གི་དགེ་རྒན་ཆེན་མོ། འབུམ་རམས་པའི་མཛུབ་སྟོན་པ་ཐང་ཧུའེ་ཧྲེང་གིས་ངོས་འཛིན་གནང་བ་ལྟར་ན། འདི་ནི་ཕལ་ཆེར“མོ་（獏）”ཞེས་པའི་སྲོག་ཆགས་དེ་ཡིན་ཞིང་། གཟུགས་དབྱིབས་ཕག་དང་འདྲ་ལ། ལོ་ངོ་8000སྔོན་ནས་མཚོ་བོད་མཐོ་སྒང་ནས་རྩ་མེད་དུ་གྱུར་ཟིན། སྲོག་ཆགས་འདི་བྲག་རིས་སུ་མངོན་པར་ན།བྲག་རིས་ཀྱི་མ་མཐའི་ལོ་ཚོད་གཏན་འཁེལ་བྱེད་ཆོག་པ་རེད་ཟེར།གནས་འདིའི་ཚོན་ལྡན་བྲག་རིས་ཀྱི་རིས་དབྱིབས་བཟོ་ལྟ་དང་མཚོན་བྱ་ནང་དོན་སོགས་ལ་བལྟས་ན་ལོ་ངོ་8000ཡན་གྱི་ལོ་རྒྱུས་ལྡན་པའི་རྡོ་ཆས་རྙིང་མའི་དུས་ཀྱི་གནའ་ཤུལ་ཞིག་ཡིན་པ་གདོན་མི་ཟ་ཞིང་། བྲག་རིས་ཀྱི་ཁྱད་ཆོས་ལས་འབྲི་ཆུའི་བྲག་རིས་དང་གཅིག་མཚུངས་སུ་མངོན། གནའ་ཤུལ་འདི་མདོ་དབུས་མཐོ་སྒང་གི་ཤར་རྒྱུད་དུ་གསར་རྙེད་བྱུང་བ་ནི། གནའ་རབས་རྡོ་ཆས་རྙིང་མའི་སྐབས་ནས་གནའ་མི་རྣམས་མཐོ་སྒང་གི་མཚོ་འཕགས་མཐོ་བའི་ས་ཁུལ་དུ་འགུལ་སྐྱོད་བྱེད་བཞིན་ཡོད་པའི་བདེན་དཔང་རྡོ་རྗེའི་བྲག་དང་མཚུངས་པ་ཞིག་ཡིན་ནོ། །