ཝུན་ཁྲོན་རྫོང་གིས་དྲྭ་ཐོག་ཚོང་དོན་སྤེལ་ཚུལ་བཀོད་པ།

      ཉེ་བའི་ལོ་ཤས་རིང་། ཝུན་ཁྲོན་རྫོང་གིས་དྲྭ་སྦྲེལ་+ཡི་གོ་སྐབས་དང་བསྟུན་ནས་དྲྭ་ཐོག་ཚོང་དོན་གྲོང་གསེབ་ཏུ་སྤེལ་བ་དང་དྲྭ་ཐོག་ཚོང་དོན་དབུལ་སྐྱོར་གྱི་འདུ་འགོད་ཤུགས་ཆེན་གྱིས་ལག་ཏུ་བསྟར་ཅིང་། དྲྭ་ཐོག་ཚོང་དོན་དེ་སྐྱེ་ཁམས་དཔལ་འབྱོར་འཕེལ་རྒྱས་དང་དབུལ་སྐྱོར་གནད་འཁེལ་ལག་ལེན་བསྟར་བའི་ལས་དོན་གལ་ཆེན་ཞིག་ཏུ་བརྩིས་ནས། སྟེགས་བུ་སྐྲུན་པ་དང་སྤུས་རྟགས་གཏོད་པ། ཤེས་ལྡན་པ་སྐྱེད་སྲིང་སོགས་ལ་བརྟེན་ནས་དྲྭ་ཐོག་ཚོང་དོན་གྱི་དམངས་ཕྱུག་གི་འཆར་འགོད་གསར་བ་བཀོད་ཡོད།

      ཝུན་ཁྲོན་རྫོང་ལུའེ་ཁུའུ་བཟའ་བཅའ་ཀུང་སིའི་དྲྭ་ཐོག་ཚོང་དོན་གྱི་འགན་ཁུར་བ་ལི་ཁྲང་ལི་ཡིས། ཉེ་ཆར་ཝུན་ཁྲོན་གྱི་སིལ་ཏོག་ལི་སོབ་ཁྲོམ་རར་འདོན་བཞིན་ཡོད་པས། ངེད་ལུའེ་ཁུའུ་བཟའ་བཅའ་ཀུང་སིའི་ལས་བྱེད་པ་རྣམས་ཀྱིས་སིལ་ཏོག་ལི་སོབ་དབྱེ་གསེད་བྱས་པ་དང་སིལ་ཏོག་ལི་སོབ་ལ་ཐུམ་བརྒྱབ་ནས་སྡེབ་སྐྱེལ་བྱས། ཉེ་ཆར་དྲྭ་ཐོག་ནས་སིལ་ཏོག་ལི་སོབ་ཉོ་མཁན་ཧ་ཅང་མང་། ཉིན་རེར་ཆ་སྙོམས་བྱས་ན་སིལ་ཏོག་ལི་སོབ་རྒྱ་མ་སྟོང་ཡར་མར་དབོར་གྱིན་ཡོད་ཅེས་བཤད།

      རྒྱལ་ཁབ་དྲྭ་ཐོག་ཚོང་དོན་གྲོང་གསེབ་ཏུ་ཁྱབ་གདལ་གཏོང་བའི་ཕྱོགས་བསྡུས་དཔེ་སྟོན་རྫོང་གི་གཞི་རྟེན་ལ་བརྟེན་ནས་ཝུན་ཁྲོན་རྫོང་གིས་དྲྭ་སྦྲེལ་+ཡི་དེང་རབས་ཞིང་ལས་དཔེ་སྟོན་གྱི་ལས་དོན་ཤུགས་ཆེན་སྤེལ་བ་དང་། སི་ཁྲོན་དང་མཚོ་སྔོན། ཀན་སུའུ་བཅས་མཐོ་སྒང་གི་ཟོག་འགྲེམ་ཐོན་ལས་གླིང་ཁུལ་མགྱོགས་མྱུར་ངང་བསྐྲུན་ནས། རྔ་བ་ཁུལ་དྲྭ་ཐོག་ཚོང་དོན་འཕེལ་རྒྱས་ལྟེ་གནས（ཝུན་ཁྲོན）ས་ཚིགས་བསྐྲུན་པ་དང་། དྲྭ་ཐོག་ཚོང་དོན་འཕེལ་རྒྱས་ལྟེ་གནས་དང་ཟོག་འགྲེམ་ཚོང་དོན་བང་མཛོད་སྨི་གྲུ་བཞི་མ་17000བསྐྲུན་པ། འཁྱག་སྦྲེལ་ཟོག་འགྲེམ་སྨི་གྲུ་བཞི་མ་6340བསྐྲུན། རྫོང་དང་ཡུལ་ཚོ། གྲོང་སྡེ་བཅས་རིམ་པ་གསུམ་གྱི་དྲྭ་ཐོག་ཚོང་དོན་གཉེར་སྐྱོང་ཞབས་ཞུའི་དྲ་བ་བཙུགས་པ་དང་། ཞིང་ལས་ཁྱད་ལྡན་ཐོན་རྫས་དང་དྲྭ་སྦྲེལ་མཉམ་འདྲེས་གཏིང་ཟབ་ཡོང་བར་ཕྱོགས་ཡོངས་ནས་སྐུལ་སྤེལ་བཏང་ལ། ཅིང་ཏུང་དང་ཧྲུན་ཧྥེང་ཟོག་འགྲེམས་དང་། པའེ་ཧྲི་མྱུར་སྐྱེལ་སོགས་མྱུར་སྐྱེལ་ཀུང་སི་10ལྷག་ནང་འདྲེན་བྱས་ཡོད།

      ཝེ་ཀྲོའུ་གྲོང་རྡལ་སུའོ་ཆའོ་གྲོང་སྡེའི་སྡེ་མི་ཁྲེན་ཧུང་ལིའི་ཚང་ལ་ལོ་རེར་སིལ་ཏོག་ལི་སོབ་རྒྱ་མ་ཁྲི་2ལྷག་ཡོད་ཅིང་། དྲྭ་ཐོག་ཚོང་དོན་གཉེར་བ་ནས་བཟུང་ཁོ་ཚང་གི་སིལ་ཏོག་ལི་སོབ་ཚང་མ་སྐད་འཕྲིན་བརྒྱུད་ནས་བཙོངས།

      མྱུར་སྐྱེལ་ཟོག་འགྲེམ་ལས་རིགས་འཕེལ་རྒྱས་སུ་སོང་བ་དང་བསྟུན། ཝུན་ཁྲོན་རྫོང་གིས་ཆེད་དོན་མཉམ་ལས་ཁང་དང་ཁྱིམ་ཚང་ཞིང་ར་སོགས་ཞིང་ལས་གཉེར་སྐྱོང་བྱེད་པོ་གསར་བ་ཐའོ་པའོ་དང་ཅིང་ཏུང་སོགས་དྲྭ་ཐོག་ཚོང་དོན་ལས་སྟེགས་སུ་དྲྭ་ཐོག་ཚོང་ཁང་གཉེར། མིག་སྔར་རྫོང་ཡོངས་སུ་དྲྭ་ཐོག་ཚོང་དོན་གྱི་གྲུབ་ཆ་གཙོ་བོ་180ལྷག་དང་། དྲྭ་ཐོག་ཚོང་ཁང་2000ལྷག་ཡོད་པ་དང་། ས་གནས་ཀྱི་དྲྭ་ཐོག་ཚོང་དོན་ཁེ་ལས་19སྐྱེད་སྲིང་དང་འཕེལ་རྒྱས་སུ་བཏང་སྟེ། རྫོང་ཡོངས་སུ་དྲྭ་ཐོག་ཚོང་དོན་བརྒྱ་ཆ་95ཡན་གྱི་གྲོང་སྡེ（སྡེ་ཁུལ）ལ་ཁྱབ་ཡོད།
      ཝུན་ཁྲོན་རྫོང་ཞོན་ཁུའུ་གྲོང་རྡལ་ནུང་ཧུའེ་བྱ་དེ་འཕེལ་རྒྱས་ཚད་ཡོད་ཀུང་སིའི་འགན་ཁུར་བ་ལི་རུང་གིས། ངེད་ནུང་ཧུའེ་བྱ་དེའི་འཕེལ་རྒྱས་ཚད་ཡོད་ཀུང་སིར་དེ་བོ་ཁྲི་15ཡོད་ཅིང་། ཉིན་རེར་སྒོ་ང་ཁྲི་10ལྷག་ཡོད། དེ་ལས་སྒོ་ང་གསུམ་ཆ་གཅིག་དྲྭ་ཐོག་ནས་འཚོང་གིན་ཡོད་ཅེས་བཤད།
      ཝུན་ཁྲོན་རྫོང་དཔལ་འབྱོར་ཚོང་དོན་དང་ཆ་འཕྲིན་ཅུས་ཀྱི་ཅུས་ཀྲང་གཞོན་པ་ཧྥུའུ་ཡིའུ་ཀང་གིས་ངོ་སྤྲད་པ་ལྟར་ན། དྲྭ་ཐོག་ཚོང་དོན་ཁྱབ་ཁོངས་སུ་འཚོལ་ཞིབ་དང་ལག་ལེན་བྱས་པ་བརྒྱུད། ཝུན་ཁྲོན་རྫོང་གིས་སྔ་རྗེས་སུ་ཨ་ལི་དང་འཁྱུག་དབྱངས། ཅིང་ཏུང་། ཧྲུན་ཧྥེང་། ཕིན་ཏུའོ་ཏུའོ་སོགས་དྲྭ་ཐོག་ཚོང་དོན་རིགས་དང་ཟོག་འགྲེམས་རིགས་ཀྱི་ལས་སྟེགས་ཁེ་ལས་བར་དང་གན་རྒྱ་བཞག་ནས་ཝུན་ཁྲོན་གྱི་ཁྱད་ལྡན་ཞིང་ལས་ཐོན་རྫས་བཙོངས།

      དེ་དང་ཆབས་ཅིག གློག་རྡུལ་ཚོང་དོན་འཕེལ་རྒྱས་སུ་གཏོང་ཆེད། ཝུན་ཁྲོན་རྫོང་གིས་ད་དུང་དྲྭ་ཐོག་ཚོང་དོན་དངོས་སྦྱོང་རྟེན་གཞི་བཙུགས་ཤིང་། 《ཇི་ལྟར་དྲྭ་ཐོག་ཚོང་ཁང་འཛུགས་ཚུལ》སོགས་དངོས་སྤྱོད་ལག་དེབ་བཟོས་ནས་པར་འགྲེམ་བྱས་ལ། དྲྭ་ཐོག་ཚོང་དོན་གྱི་གསོ་སྦྱོང་ཐེངས་249སྤེལ་བས་རིམ་རྩིས་བྱས་ནས་མི་ཐེངས་9669གསོ་སྦྱོང་བྱས་པ་དང་། དྲྭ་ཐོག་ཚོང་དོན་གྱི་ལས་གཏོད་གཞོན་ནུ་343གསོ་སྐྱོང་བྱས། ཐའོ་པའོ་དང་འཁྱུག་དབྱངས་སོགས་ཀྱི་ལས་སྟེགས་བརྒྱུད་ཐད་གཏོང་ཐེངས་1000ལྷག་བྱས་པ་དང་དྲྭ་ཐོག་ནསཐོན་རྫས་བཙོངས་ནས་སྒོར་དུང་ཕྱུར་5.57ཐོབ་ཡོད་པ་དང་། དེ་ལས་ཞིང་ལས་ཐོན་རྫས་ཀྱི་སྒོར་ཁྲི་2800ཟིན་ནས་མང་ཚོགས་དབུལ་བོ་མི་རེར་ཆ་སྙོམས་ཀྱི་ཡོང་འབབ་སྒོར་500འཕར་ཡོད། ཝུན་ཁྲོན་རྫོང་གིས་ད་དུང་དྲྭ་ཐོག་ཚོང་དོན་འཕེལ་རྒྱས་ལ་རྒྱབ་སྐྱོར་བྱེད་པའི་ལག་བསྟར་བསམ་འཆར་དང་རོགས་སྐྱོར་སྲིད་ཇུས་བཟོས་པར་མ་ཟད། ཆེད་དོན་འཕེལ་རྒྱས་ཀྱི་མ་དངུལ་དོན་འཁྱོལ་བྱས་ནས་དྲྭ་ཐོག་ཚོང་དོན་སྐྱོན་བྲལ་ངང་འཕེལ་རྒྱས་ཡོང་བར་སྐུལ་མ་བཏང་།