(སྤྱི་ལོ་2021ལོའི་ཟླ་12པའི་ཚེས་31ཉིན།)

ཞི་ཅིན་ཕིང་།

བློ་མཐུན་རྣམ་པ་དང་། གྲོགས་པོ་རྣམ་པ། མཁྱེན་ལྡན་མ་རྣམ་པ། སྐུ་ཞབས་རྣམ་པ།

     ཚང་མ་བཀྲ་ཤིས་བདེ་ལེགས། སྤྱི་ལོ་2022ལོ་འཆར་བའི་སྐབས་འདིར། ངས་པེ་ཅིང་ནས་ཚང་མར་ལོ་གསར་གྱི་བཀྲ་ཤིས་བདེ་ལེགས་ཞུ་རྒྱུ་ཡིན།

     ལོ་འདིར་ཕྱིར་དྲན་བྱེད་པ་ནི་སྤྱིར་བཏང་མ་ཡིན་པའི་དོན་སྙིང་ལྡན་པ་ཞིག་རེད། ང་ཚོས་ཏང་དང་རྒྱལ་ཁབ་ཀྱི་ལོ་རྒྱུས་ཐོག་ལམ་ཚད་རྡོ་རིང་ལྟ་བུའི་དོན་སྙིང་ལྡན་པའི་དོན་ཆེན་དངོས་སུ་བརྒྱུད་ཡོད། ལོ་བརྒྱ་གཉིས་ཀྱི་འབད་འཐབ་དམིགས་ཚད་ཀྱི་ལོ་རྒྱུས་འབྲེལ་མཚམས་སུ། ང་ཚོས་ཁྱོན་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་བྱེད་པའི་རྒྱང་སྐྱོད་གསར་པ་འགོ་ཚུགས་པ་དང་། མགོ་བོ་གཟེངས་སུ་བཏེགས་ཤིང་གོམ་ཞེང་ཆེན་པོས་ཀྲུང་ཧྭ་མི་རིགས་ཀྱི་བསྐྱར་དར་རླབས་པོ་ཆེ་མངོན་འགྱུར་ཡོང་བ་བྱེད་པའི་འགྲོ་ལམ་ཐོག་སྐྱོད་བཞིན་ཡོད།

     ལོ་འགོ་ནས་ལོ་མཇུག་བར། ཞིང་ཁ་དང་། ཁེ་ལས། སྡེ་ཁུལ། སློབ་གྲྭ། སྨན་ཁང་། དམག་སྒར། ཚན་ཞིབ་ལས་ཁུངས་སོགས་ཚང་མར་བྲེལ་འཚུབ་ཀྱི་རྣམ་པས་ཁེངས་པ་དང་། དཀའ་ལས་བརྒྱབ་ཅིང་ལེགས་སྐྱེས་ཕུལ་ཡོད་ལ། གྲུབ་འབྲས་ཀྱང་ཐོབ་ཡོད།  

     ཆུ་མོ་ལྟར་བར་མེད་རྒྱུག་པའི་དུས་ཚོད་ནང་། ང་ཚོས་མཐོང་བ་དང་མྱོང་བའི་ཀྲུང་གོ་ནི་དཀའ་སྤྱད་ཞུམ་མེད་དང་། དར་རྒྱས་ཕུན་སུམ་ཚོགས་པའི་ཀྲུང་གོ་ཞིག་ཡིན། འདིར་གཅེས་པར་འོས་ཤིང་གུས་པར་འོས་པའི་མི་དམངས་ཡོད་པ་དང་། ཉིན་བཞིན་འགྱུར་ལྡོག་འགྲོ་བའི་འཕེལ་རྒྱས་ཀྱི་རྣམ་པ་ཡོད་ལ། གཅིག་རྒྱུན་གཅིག་འཛིན་གྱི་བྱ་གཞག་ཀྱང་ཡོད།

     སྤྱི་ཟླ་བདུན་པའི་ཚེས་གཅིག་ཉིན། ང་ཚོས་ཀྲུང་གོ་གུང་ཁྲན་ཏང་དབུ་བརྙེས་ནས་ལོ་ངོ་བརྒྱ་འཁོར་བར་རྟེན་འབྲེལ་གཟབ་རྒྱས་ཞུས་ཡོད། གནམ་བདེ་སྒོ་མོ་ཆེའི་ཡང་སྟེང་དུ་ལངས་སྐབས་མྱོང་ཚོར་སྣ་ཚོགས་བྱུང་། ལོ་རྒྱུས་ཀྱི་རྒྱང་སྐྱོད་ལམ་བུ་ཡོ་ལང་འགྱུར་ལྡོག་ཆེ་ཞིང་། ཀྲུང་གོ་གུང་ཁྲན་ཏང་མིས་མི་དམངས་དུང་ཕྱུར་མང་པོའི་སྣེ་ཁྲིད་ནས། དཀའ་ཚེགས་ཁྲི་སྟོང་བརྒྱུད་ཀྱང་དཔའ་མི་ཞུམ་པ་དང་། ཉེན་ཁ་སྣ་ཚོགས་བརྒྱུད་ཀྱང་བློ་བརྟན་འགྱུར་བ་མེད་པའི་ཐོག་ནས། ལོ་བརྒྱའི་ཏང་གི་བརྗིད་ཉམས་ལྡན་པའི་ཉམས་བཟང་བཏོད་ཡོད། ཐོག་མའི་བསམ་འདུན་མ་བརྗེད་ན། མཐའ་མའི་རྒྱལ་ཁ་ཐོབ་པར་འགྱུར། ང་ཚོས་འབད་འབུངས་ཆེར་སྐྱེད་དང་བརྩོན་འགྲུས་ལྷོད་མེད་བྱས་ཚེ། གཞི་ནས་ལོ་རྒྱུས་ལ་ངོ་མི་གནོང་བ་དང་། དུས་རབས་ལ་ངོ་མི་གནོང་བ། མི་དམངས་ལ་ངོ་མི་གནོང་བ་བཅས་བྱེད་ཐུབ། 

     ཏང་གི་སྐབས་བཅུ་དགུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་དྲུག་པའི་ཐོག ཏང་གི་ལོ་རྒྱུས་གྲོས་ཆོད་གསུམ་པར་གྲོས་འཆམ་བྱུང་ཡོད། ལོ་བརྒྱའི་གྲུབ་འབྲས་ནི་མི་སེམས་འགུལ་བ་དང་། ལོ་བརྒྱའི་ཉམས་མྱོང་ནི་མི་ཡི་བློ་སྒོ་འབྱེད་ནུས་པ་ཞིག་རེད། ངས་དེ་སྔ་མའོ་ཀྲུའུ་ཞི་དང་སྐུ་ཞབས་ཧོང་ཡན་ཕའེ་ཡི་ས་ཕུག་ནང་གི་གླེང་མོལ་དེའི་སྐོར་བརྗོད་མྱོང་ཡོད། ང་ཚོས་རང་ཉིད་ལ་གསར་བརྗེ་བྱེད་ཕོད་ཚེ་གཞི་ནས་ལོ་རྒྱུས་ཀྱི་རང་འགུལ་དབང་ཆ་བདག་གིར་འཛིན་ཐུབ། ཀྲུང་ཧྭ་མི་རིགས་ཀྱི་བསྐྱར་དར་རླབས་པོ་ཆེ་ནི་ལས་སླ་པོར་འབྱུང་བ་དང་། རྔ་རྡུང་དར་འཕྱར་བྱས་པ་ཙམ་གྱིས་བསྒྲུབ་ཐུབ་པ་ཞིག་མིན་ལ། འགོག་རྐྱེན་མེད་ཅིང་དུས་ཐུང་ནང་མངོན་འགྱུར་ཐུབ་པ་ཞིག་ཀྱང་མིན། ང་ཚོས་བསམ་བློ་རྒྱང་རིང་པོ་གཏོང་བ་དང་། བདེ་སྡོད་ཉེན་བསམ་བྱེད་པ། འཐབ་ཇུས་ཀྱི་བརྟན་ཤུགས་དང་ངང་རིང་རྒྱུན་འཁྱོངས་བྱེད་དགོས། དེ་ནི་རྒྱ་ཆེན་པོར་བསམ་ཞིང་ཞིབ་ཚགས་པོས་སྒྲུབ་ཅེས་པ་ལྟར་ཡིན།

     རྒྱལ་ཁབ་ཆེན་པོ་ལ། རྒྱལ་ཁབ་ཆེན་པོའི་འགན་འཁྲི་ཡོད། བྱ་བ་ཆེ་ཆུང་སྣ་ཚོགས་པ་ནི་མཐར་གཏུག་ནས་བཤད་ན་ཁྱིམ་ཚང་ཁྲི་སྟོང་མང་པོའི་དོན་དག་རེད། ངས་ས་ཁུལ་འགའ་རེར་བརྟག་དཔྱད་བྱེད་སྐབས། གནས་ཚུལ་མི་ཉུང་བ་ཞིག་མཐོང་ཐོས་བྱུང་ལ། དེ་དག་གིས་ང་ཡི་བློ་སྒོ་ཕྱེ་ཞིང་། ཕན་འབྲས་ཆེན་པོ་ཐོབ་བྱུང་། མང་ཚོགས་ཀྱི་ཁྱིམ་དུ་སླེབས་རེ་བཞིན། ད་དུང་དཀའ་ངལ་གང་འདྲ་ཡོད་མེད་སྐོར་འདྲི་བཞིན་ཡོད། ཡུལ་མི་རྣམས་ཀྱི་སྐད་ཆ་ངས་ཡིད་ལ་བརྟན་པོར་ངེས་ཡོད། 

     གང་ཞིག་དམངས་ཀྱིས་སེམས་ཁྲལ་བྱེད་ས་དེ། ང་ཡིས་ཅིས་ཀྱང་ཡིད་ལ་འཇོག་གཞི་ཡིན། གང་ཞིག་དམངས་ཀྱིས་རེ་སྒུག་བྱེད་ས་དེ། ང་ཡིས་ཅིས་ཀྱང་ལེགས་པར་བསྒྲུབ་བྱ་ཡིན། ང་ཡང་གྲོང་གསེབ་ནས་ཡོང་བ་ཡིན་པས། དབུལ་ཕོངས་ལ་མྱོང་བ་ཟབ་མོ་ཡོད། མི་རབས་ནས་མི་རབས་བར་རྒྱུན་མཐུད་འབད་བརྩོན་བྱས་པ་བརྒྱུད། དེ་སྔའི་དབུལ་ཕོངས་ཀྱི་མི་རྣམས་ད་ལྟ་ཟས་ཀྱིས་ལྟོ་བ་རྒྱགས་པ་དང་། གོས་ཀྱིས་ལུས་དྲོད་པ། སློབ་གྲྭར་འགྲོ་རྒྱུ་ཡོད་པ། སྡོད་སའི་ཁང་པ་ཡོད་པ། སྨན་བཅོས་འགན་བཅོལ་ཡོད་པ་བཅས་སུ་གྱུར་ཡོད། ཁྱོན་ཡོངས་འབྱོར་འབྲིང་དུ་འགྱུར་བ་བྱེད་པ་དང་། དབུལ་ཕོངས་ལས་ཐར་བར་བྱེད་པ་ནི་ང་ཚོའི་ཏང་གིས་མི་དམངས་ལ་ཁས་ལེན་བྱས་པའི་ཁ་ཆད་ཡིན་ལ། འཛམ་གླིང་ལ་ཕུལ་བའི་ལེགས་སྐྱེས་ཞིག་ཀྱང་ཡིན། ཚང་མ་འཚོ་བ་དེ་བས་ལེགས་པོ་སྐྱེལ་རྒྱུ་ཡོང་བ་བྱེད་པའི་ཐད། མིག་སྔའི་གྲུབ་འབྲས་ལ་ཡིད་ཚིམ་ནས་སྡོད་རྒྱུ་མེད་པར། ད་དུང་ལམ་ཐག་རིང་པོ་བརྒྱུད་དགོས། 

     རྨ་ཆུ་དུས་བདེ་ཞོད་འཇགས་ཡོང་བ་བྱ་རྒྱུ་ནི་ཀྲུང་ཧྭའི་བུ་ཕྲུག་གི་ལོ་ངོ་སྟོང་གི་རེ་སྒུག་ཡིན། ཉེ་བའི་ལོ་ཤས་ནང་ང་རང་རྨ་ཆུའི་སྟོད་རྒྱུད་དང་། དབུས་རྒྱུད། སྨད་རྒྱུད་བཅས་ཀྱི་ཞིང་ལྗོངས་དགུ་ལ་ཕྱིན་པ་ཡིན། མ་ཡུམ་ཆུ་བོ་རྨ་ཆུ་དང་འབྲི་ཆུ་ཡིན་ནའང་འདྲ། ཡང་ན་དྭངས་ཤིང་གཙང་བའི་མཚོ་སྔོན་པོ་དང་། རླབས་ཕྲེང་འཕྱུར་བའི་ཡར་ཀླུང་གཙང་པོ་ཡིན་ནའང་འདྲ། ལྷོ་ཆུ་བྱང་འདྲེན་གྱི་དུས་རབས་ཀྱི་ལས་གཞི་དང་། ཡང་ན་སའེ་ཧན་པ་ནགས་རའི་ལྗང་མདོག་གི་ས་ཁྲ་ཡིན་ནའང་འདྲ། ཡུན་ནན་གྱི་གླང་ཆེན་བྱང་བགྲོད་ལྷོ་ལོག་དང་། ཡང་ན་རི་དྭགས་གཙོད་རྒྱུད་སྤེལ་གནས་སྤོ་བྱེད་པ་ཡིན་ནའང་འདྲ། དེ་དག་ཚང་མས་མི་ཡིས་འབྱུང་ཁམས་ལ་གནོད་མ་བསྐྱལ་ན། འབྱུང་ཁམས་ཀྱིས་མི་ལ་གནོད་མི་སྐྱེལ་བའི་གནས་ལུགས་མངོན་གྱི་ཡོད། 

     ལོ་འདིར། ད་དུང་བརྗེད་པར་དཀའ་བའི་ཀྲུང་གོའི་སྐད་སྒྲ་དང་། ཀྲུང་གོའི་སྐད་ཅིག་མ། ཀྲུང་གོའི་གཏམ་རྒྱུད་བཅས་མང་པོ་ཡོད། ཏང་ཐུགས་བློ་བདེ་བར་བཞུགས། རྒྱལ་ཁབ་སྟོབས་འབྱོར་ལྡན་པར་བྱེད་མཁན་ང་ཡོད་ཅེས་པའི་ལང་ཚོའི་དམ་ཚིག་དང་། དྭངས་ཤིང་གཙང་བའི་བརྩེ་བ། ཀྲུང་གོ་ཁོ་ནའི་ཆེད་དུ་ཡིན་ཞེས་པའི་བརྩེ་བ་ཟབ་མོའི་གསལ་བསྒྲགས། ཀྲུའུ་རུང་རྟགས་ཅན་གྱིས་རྒྱུ་སྐར་མིག་དམར་འཚོལ་ཞིབ་བྱེད་པ་དང་། ཞི་ཧོ་རྟགས་ཅན་གྱིས་ཉི་མའི་ཁྱིམ་རྒྱུད་འཚོལ་ཞིབ་བྱེད་པ། ཐན་ཧོ་རྟགས་ཅན་གྱིས་རྒྱུ་སྐར་ལམ་འགྲིམ་པ། ལུས་རྩལ་པས་ངར་ཤུགས་ལྡན་པའི་ཐོག་ནས་ཨང་དང་པོ་བརྩོན་ལེན་བྱེད་པའི་བློ་སྟོབས། རྒྱལ་ཡོངས་གོང་འོག་ཚང་མས་རིམས་ནད་སྔོན་འགོག་ཚོད་འཛིན་ནུས་ལྡན་བྱེད་པ། གནོད་འཚེ་ཕོག་པའི་མང་ཚོགས་ཀྱིས་ཕན་ཚུན་རོགས་རེས་ཀྱིས་ཁྱིམ་གཞིས་བསྐྱར་འཛུགས་བྱེད་པ། མི་དམངས་བཅིངས་འགྲོལ་དམག་གི་བཀོད་འཐབ་པ་དང་། དྲག་ཆས་ཉེན་རྟོག་དཔུང་སྡེའི་དཔོན་དམག་གིས་དམག་དཔུང་སྟོབས་ཆེར་གཏོང་བ་དང་། ཁྱིམ་སྲུང་རྒྱལ་སྲུང་བྱེད་པ་སོགས་སྤྱིར་བཏང་གི་དཔའ་བོ་གྲངས་ལས་འདས་པས་དཀའ་སྤྱད་འབད་འཐབ་བྱས་པ་དང་། དུས་རབས་གསར་པའི་ཀྲུང་གོས་མགྲིན་པ་གཟེངས་སུ་བཏེགས་ནས་མདུན་དུ་བསྐྱོད་པའི་རླབས་རྒྱུན་གྲུབ་ཡོད། 

     མེས་རྒྱལ་གྱིས་ཐོག་མཐའ་བར་གསུམ་དུ་ཤང་ཀང་དང་ཨའོ་མོན་གྱི་དར་རྒྱས་བརྟན་ལྷིང་ལ་སེམས་ཁུར་བྱེད་ཀྱི་ཡོད། ཕྱར་བ་གྲུ་འདེགས་དང་མཉམ་དུ་འབད་བརྩོན་བྱས་ཚེ། རྒྱལ་ཁབ་གཅིག་ལ་ལམ་ལུགས་གཉིས་གཞི་ནས་བརྟན་བགྲོད་རྒྱང་སྐྱོད་ཐུབ་རྒྱུ་དང་། མེས་རྒྱལ་ཡོངས་སུ་གོང་བུ་གཅིག་གྱུར་ཡོང་བ་བྱ་རྒྱུ་ནི་མཚོ་འགག་གཡས་གཡོན་གཉིས་ཀྱི་སྤུན་ཟླའི་ཐུན་མོང་གི་བསམ་འདུན་ཡིན། ཀྲུང་ཧྭའི་བུ་ཕྲུག་ཡོངས་ནས་ལག་གདང་སྦྲེལ་ཏེ་མདུན་སྐྱོད་བྱས་ནས། ཀྲུང་ཧྭ་མི་རིགས་ཀྱི་མཛེས་སྡུག་ལྡན་པའི་མ་འོངས་པ་གཏོད་རྒྱུའི་རེ་བ་སེམས་གཏིང་ནས་བྱེད་ཀྱི་ཡོད། 

     ངས་ཕྱི་རྒྱལ་གྱི་འགོ་ཁྲིད་པ་དང་དེ་བཞིན་རྒྱལ་སྤྱིའི་སྒྲིག་འཛུགས་ཀྱི་འགན་འཁུར་བར་ཞལ་པར་ཐོག་ནས་འབྲེལ་གཏུག་དང་། བརྙན་ལམ་ཐོག་ནས་མཇལ་མོལ་ཞུ་སྐབས། ཁོང་རྣམ་པས་ཀྲུང་གོས་རིམས་འགོག་དང་། གོ་ལ་ཧྲིལ་པོའི་རིམས་ནད་སྔོན་འགོག་ཚོད་འཛིན་ཆེད་ལེགས་སྐྱེས་ཕུལ་བར་བསྔགས་བརྗོད་ཐེངས་མང་གནང་གི་འདུག མིག་སྔའི་བར། ཀྲུང་གོས་ཁྱོན་རྒྱལ་ཁབ་དང་རྒྱལ་སྤྱིའི་སྒྲིག་འཛུགས་120ལྷག་ཙམ་ལ་ཏོག་གསར་གློ་ཚད་ཀྱི་རིམས་འགོག་ཁབ་སྨན་དུང་ཕྱུར་20མཁོ་འདོན་བྱས་ཡོད། འཛམ་གླིང་རྒྱལ་ཁབ་ཁག་གིས་ཕྱར་བ་གྲུ་འདེགས་དང་མཐུན་སྒྲིལ་མཉམ་ལས་བྱས་ཚེ། གཞི་ནས་མིའི་རིགས་ཀྱི་ལས་དབང་གཅིག་མཐུན་མ་ལག་འཛུགས་པའི་ལེའུ་གསར་པ་རྩོམ་ཐུབ།

     ཟླ་བ་གཅིག་གི་རྗེས་སུ། པེ་ཅིང་དགུན་དུས་ཨོ་རྩལ་འགྲན་ཚོགས་དང་། དགུན་དུས་དབང་པོ་སྐྱོན་ཅན་ཨོ་རྩལ་འགྲན་ཚོགས་འགོ་འཛུགས་རྒྱུ་རེད། མི་དེ་བས་མང་བ་གངས་འཁྱག་ལུས་རྩལ་ནང་ཞུགས་ཐུབ་པ་བྱ་རྒྱུ་དེ་ཡང་ཨོ་ལིན་ཕིག་ལས་འགུལ་གྱི་བརྗོད་དོན་ཞིག་ཡིན། ང་ཚོས་བློ་གཅིག་སེམས་གཅིག་གིས་འཛམ་གླིང་ལ་ཨོ་རྩལ་འགྲན་ཚོགས་གྲ་རྒྱས་པོ་ཞིག་སྤྱན་འབུལ་ཞུ་ཐུབ་པ་བྱ་རྒྱུ་ཡིན། འཛམ་གླིང་ནས་ཀྲུང་གོར་རེ་སྒུག་ཞུ་བཞིན་ཡོད་ལ། ཀྲུང་གོས་ཀྱང་གྲ་སྒྲིག་ཡག་པོ་བྱས་ཟིན། 

     ལོ་གསར་པའི་ཅོང་སྒྲ་གྲགས་ལ་ཉེ། ང་ཚོའི་མཁའ་སྐྱོད་པ་གསུམ་མཐའ་ཡས་པའི་བར་སྣང་ཁམས་སུ་ཕྱག་ལས་གནང་བཞིན་ཡོད་པ་དང་། ཕྱི་རྒྱལ་དུ་བཞུགས་པའི་སྤུན་ཟླ་རྣམས་ཀྱིས་སྔར་བཞིན་དཀའ་སྤྱད་འབད་བརྩོན་གནང་བཞིན་ཡོད་པ། གཞུང་ཚབ་ཆེན་མོ་ཁང་དང་དོན་གཅོད་ཁང་། ཀྲུང་གོའི་མ་འཇོག་ཁེ་ལས་སོགས་ཀྱི་ཕྱི་རྒྱལ་དུ་མངགས་སྡོད་བྱས་པའི་མི་སྣ། རྒྱ་ཆེའི་ཕྱི་འགྲིམ་སློབ་མ་སོགས་ནས་སྔར་བཞིན་འབད་འབུངས་བརྟན་སྲུང་བྱེད་པ། ཕུགས་འདུན་རེ་སྙེག་བྱེད་མཁན་གྲངས་ལས་འདས་པས་ད་དུང་འབད་འཐབ་ཀྱིས་ལེགས་སྐྱེས་འབུལ་བཞིན་ཡོད། ཚང་མ་སྐུ་ལས་ཁག་སོང་། ངས་ཚང་མར་ལྷག་བསམ་ཟོལ་མེད་ཀྱིས་ལོ་གསར་པའི་འཚམས་འདྲི་ཞུ་རྒྱུ་ཡིན།

     ང་ཚོ་མཉམ་དུ་མ་འོངས་ཕྱོགས་སུ་བསྐྱོད། རྒྱལ་ཁབ་དར་ཞིང་དམངས་རྣམས་བདེ་བར་སྨོན། །