ནད་དུག་ཅན་གྱི་མཆིན་ཚད་འགོག་བཅོས་བཟང་བོ་བྱ་དགོས་།
རྩོམ་སྒྲིག་པ།ཡོང་ཁུངས། སྤེལ་དུས། 01-19
ནད་དུག་ཅན་གྱི་མཆིན་ཚད་ཅེས་པ་ནི་ནད་དུག་མང་པོ་ཞིག་གིས་བསླངས་པའི་མཆིན་པར་གནོད་པ་ཆེས་ཆེ་བའི་འགོས་ནད་ཅིག་ཡིན། ནད་དུག་ཅན་གྱི་མཆིན་ཚད་ལ་ངོ་བོའི་སྒོ་ནས་དབྱེ་ན་མཆིན་ཚད་ཀ་པ་དང་མཆིན་ཚད་ཁ་པ། མཆིན་ཚད་ག་པ། མཆིན་ཚད་ང་པ། མཆིན་ཚད་ཅ་པ་བཅས་རིགས་ལྔ་ཡོད་པ་ལས། སྔོན་མ་གསུམ་ནི་རྒྱུན་མཐོང་གི་ནད་དུ་གཏོགས་པས། སྔོན་འགོག་བྱེད་པར་མཉམ་འཇོག་བཟང་པོ་བྱ་དགོས་པ་སྟེ།
མཆིན་ཚད་ཀ་པ།
མཆིན་ཚད་ཀ་པ་ནི་མཆིན་ཚད་ཀ་པའི་ནད་དུག་ལས་བྱུང་བའི་བྲེལ་གཤིས་འགོས་ནད་ཅིག་ཡིན། དེ་ནི་འཇུ་ལམ་བརྒྱུད་དེ་འགོས་པའི་ནད་རིགས་ཤིག་ཡིན་པས། མཉམ་དུ་ཟ་མ་བཟའ་བ་དང་ཟས་སྣོད་མཉམ་སྤྱོད་བྱེད་པ་སོགས་འཚོ་བའི་འབྲེལ་འདྲིས་བརྒྱུད་དེ་ཕན་ཚུན་ལ་འགོ་བ་དང་། ནང་སྒོས་སུ་མཆིལ་མ་དང་ལུད་པ། དེ་མིན་ད་རུང་རྒྱུན་སྤྱོད་ཀྱི་དངོས་པོ་སྟེ་སོ་འདྲད་དང་ཁ་སྤུ་བཞར་གྲི་སོགས་ལས་ཀྱང་མཆིན་ཚད་ཀ་པའི་ནད་དུག་འགོ་སྲིད་པས། རྒྱུན་དུ་འབྲེལ་འདྲིས་བྱེད་བཞིན་པའི་མི་ལ་མཆིན་ཚད་ཀ་པའི་ནད་དུག་འགོས་ཡོད་པ་ཤེས་རྗེས། མྱུར་དུ་དཀར་ཡོལ་དང་ཐུར་མ་ཟུར་དུ་བཀར་ཏེ་དུག་སེལ་ཡང་ཡང་བྱས་ནས། ཉེ་འགྲམ་གྱི་མི་ལ་འགོ་བར་སྔོན་འགོག་བྱ་དགོས།
མཆིན་ཚད་ཀ་པའི་ནད་བྱུང་རྗེས་གྲང་ངར་ལ་སྐྲག་པ་དང་ལུས་པོར་ཚ་རྒྱས་པ། ལུས་ལ་ཤུགས་མེད་པ། ཟས་ལ་ཡི་ག་མེད་པ། སྣུམ་ལ་ཞེན་ཁ་ལོག་པ། སྐྱུག་མེར་ལངས་པ། གསུས་པ་ན་བ། མཆིན་པའི་བྱེད་ནུས་རྒྱུན་ལྡན་མིན་པ་སོགས་ཀྱི་ནད་རྟགས་མངོན་ཞིང་། ཚབས་ཆེ་བའི་སྐབས་སུ་མིག་དང་སྐྱི་ལྤགས་སེར་པོར་འགྱུར་བ་རེད།
མཆིན་ཚད་ཀ་པ་སྔོན་འགོག་བྱ་དགོས་ན་དུས་རྒྱུན་གྱི་འཚོ་བའི་ཁྲོད་གཙང་སྦྲར་དོ་སྣང་ལེགས་པོ་བྱས་ཏེ། ནད་རིགས་ཁ་ནས་འཛུལ་བ་སྔོན་འགོག་བྱ་དགོས། ཟས་རིགས་དྲོད་ཚད་མཐོན་པོས་བསྲོ་དགོས་ལ། སྤྱིར་བཏང་གིས་ཏུའུ་100ཡི་ནང་དུ་སྐར་མ་གཅིག་ལ་བསྲོས་ན་མཆིན་ཚད་ཀ་པའི་ནད་དུག་གི་གསོན་ཤུགས་མེད་པར་བཟོ་ཐུབ། གཞན་ད་རུང་རྗེན་ཟས་དང་ཡང་ན་ཚོས་ཡག་མིན་པའི་ཆུ་ཐོན་ཟས་རིགས་གཏན་ནས་བཟའ་མི་རུང་བ་དང་། ངལ་དུབ་འབྱུང་མི་རུང་བ་དང་ཆང་གཏན་ནས་འཐུང་མི་རུང་ལ། མཆིན་པར་གནོད་པའི་སྨན་རྫས་བསྟེན་མི་རུང་།
མཆིན་ཚད་ཁ་པ།
མཆིན་ཚད་ཁ་པ་ནི་མཆིན་ཚད་ཁ་པའི་ནད་དུག་གིས་བསླངས་པའི་འགོས་ནད་ཅིག་ཡིན། མཆིན་ཚད་ཁ་པའི་ནད་དུག་འགོས་རྗེས། དལ་གྱིས་རེད་པའི་རྣམ་པར་གྱུར་ཏེ། མཆིན་པར་བསྟུད་མར་གནོད་འཚེ་ཐེབས་ངེས་པས། ཡུན་གྱིས་མཆིན་པ་སྲ་འགྱུར་དང་མཆིན་པའི་འབྲས་སྐྲན་དུ་འགྱུར་བ་རེད། མཆིན་ཚད་ཁ་པ་དེ་འགོག་སྨན་བརྒྱག་པ་དང་ཡང་ན་བྱེད་ཐབས་གཞན་པ་སྤྱད་དེ་སྔོན་འགོག་བྱས་ཆོག །
མི་མང་ཤོས་ལ་མཆིན་ཚད་ཁ་པའི་ནད་དུག་འགོས་རྗེས། ནད་རྟགས་གང་ཡང་མི་མངོན་པར་གནས་སྲིད་པ་དང་། མི་ཁ་ཤས་ལ་ནད་རྟགས་ཡོད་པ་སྟེ། གཙོ་བོ་ལུས་ལ་ཤུགས་མེད་པ་དང་ཟས་ལ་ཡི་ག་མེད་པ། གསུས་ཁོག་མི་བདེ་བ་བཅས་དང་། ནད་པ་ཉུང་ཤས་ཤིག་ལ་ད་རུང་ཞེ་མེར་བ་དང་སྐྱུག་མེར་ལངས་པ་རེད། མཁྲིས་སེར་མེད་པ་དང་མཁྲིས་སེར་ཡང་མོ་ཡོད་པ་ལ། བརྟག་དཔྱད་བྱེད་སྐབས་མཆིན་པ་སྐྲངས་པའམ་ཡང་ན་མནན་ན་གཟེར་བ། མཚེར་བ་སྐྲངས་པ་དང་། མི་ཉུང་ཤས་ལ་ད་རུང་མཆིན་ཁུག་ན་བ་སོགས་ཀྱི་ནད་རྟགས་འབྱུང་།
མཆིན་ཚད་ཁ་པ་ནི་ཁྲག་དང་མ་བུ། འཁྲིག་སྤྱོད་བཅས་རྣམ་པ་གསུམ་བརྒྱུད་དེ་འགོ་བ་རེད། དུས་རྒྱུན་འཚོ་བའི་ཁྲོད་ཀྱི་ཁྲག་མི་འདྲེས་པའི་འབྲེལ་འདྲིས་གཞན་པ་ཡིས་ཕན་ཚུན་ལ་འགོ་མི་སྲིད། མཆིན་ཚད་ཁ་པའི་ནད་དུག་ཡོད་མཁན་གྱིས་བྱ་བ་དང་འཚོ་བ། སློབ་སྦྱོང་། སྤྱི་ཚོགས་བྱ་འགུལ་བཅས་ཀྱི་ཁྲོད་མཐའ་འཁོར་གྱི་མི་དང་ཁོར་ཡུག་ལ་འཇིགས་སྐུལ་གང་ཡང་ཐེབས་མི་སྲིད་པས། རྒྱུན་ལྡན་ལྟར་སློབ་སྦྱོང་དང་ལས་ཞུགས་བྱས་ཏེ་འཚོ་བ་རོལ་ཆོག །
མཆིན་ཚད་ག་པ།
མཆིན་ཚད་ག་པ་ནི་མཆིན་ཚད་ག་པའི་ནད་དུག་ལས་བསླངས་པའི་བྲེལ་གཤིས་དང་དལ་གཤིས་གཉིས་འཛོམས་ཀྱི་འགོས་ནད་ཅིག་ཡིན། མཆིན་ཚད་ག་པའི་ནད་པ་མང་པོ་ཞིག་རིམ་གྱིས་དལ་གཤིས་གཉན་ཚད་དུ་གྱུར་ཏེ་ནད་རྟགས་གང་ཡང་མེད་ལ། མཆིན་པའི་བྱེད་ནུས་ཀྱང་རྒྱུན་ལྡན་ཡིན་མོད། འོན་ཀྱང་ནད་གཞི་སྔར་བཞིན་འཕེལ་ཞིང་སྔར་བཞིན་མཆེད་དེ། རིམ་གྱིས་མཆིན་པ་སྲ་འགྱུར་དང་མཆིན་པའི་འབྲས་སྐྲན་དུ་འགྱུར་བ་རེད།
མཆིན་ཚད་ག་པ་ནི་ཧ་ཅང་འགོ་སླ་བའི་ནད་རིགས་ཤིག་ཡིན་ལ། མིག་སྔར་གོ་ཆོད་པའི་འགོག་སྨན་གཅིག་ཀྱང་མེད། གཙོ་བོ་ཁྲག་རྒྱག་པ་དང་ཁབ་ཀྱིས་གཙག་པ། འཁྲིག་སྤྱོད། མ་བུའི་བར་འགོ་བ་ལས། ཁྲག་དང་མི་འདྲེས་པའི་འབྲེལ་འདྲིས་གཞན་དག་ལས་འགོ་མི་སྲིད།
གལ་ཏེ་ཁྲག་རྒྱག་པ་དང་ཁྲག་བཟོས་དངོས་པོ་རྒྱག་དགོས་པ་བྱུང་ན། ངེས་པར་དུ་ཚད་ལྡན་གྱི་ཁྲག་རྒྱུན་ས་ཚིགས་སུ་སོང་ནས་རྒྱག་པ་དང་། ཐེངས་གཅིག་ཅན་གྱི་སྨན་ཁབ་བདམས་ཏེ་རྒྱག་དགོས་ལ། ཁ་སྦུག་དང་འཇུ་བྱེད་མ་ལག་སོགས་ཀྱི་བརྟག་དཔྱད་བྱེད་སྐབས་ཚད་ལྡན་གྱི་སྨན་ཁང་དུ་འགྲོ་དགོས་པར་མ་ཟད། རྣ་བར་བུ་ག་བཏོད་པ་དང་ལུས་སྟེང་དུ་རི་མོ་འབྲི་བ། སྨིན་མ་གཙག་པ་སོགས་ཀྱི་སྐབས་སུའང་ཚད་ལྡན་གྱི་མཛེས་བཟོ་ཁང་དུ་འགྲོ་དགོས། དེ་ལས་གཞན་ད་རུང་སོ་འདྲད་དང་ཁ་སྤུ་བཞར་གྲི་སོགས་རྒྱུན་སྤྱོད་ཡོ་བྱད་མཉམ་བཀོལ་བྱ་མི་རུང་བ་དང་། དུས་རྒྱུན་དུ་ཆང་མི་འཐུང་བ་དང་དུ་བ་འཐེན་མི་རུང་ལ། ངལ་དུབ་མི་འབྱུང་བར་བྱ་དགོས། །
