གླུ་ཐ་ལ་ལ་མོ་ཐ་ལ་ལེན། །
   གླུ་ཨ་ལ་ལ་མོ་ཨ་ལ་ལེན། །
   མ་རིགས་ལྔའི་མཁའ་འགྲོ་འབོད་ཐག་ཉེ། །
   རིགས་བཞི་མཁའ་འགྲོ་སྙིང་ཐག་ཉེ། །
   རིགས་ལྔ་བདེ་ཆེན་ཁྲོ་མོ་ལྕམ། །
   ཚོགས་ཟག་མེད་དགའ་སྟོན་འགྱེད་དུ་གསོལ། །
   ས་འདིའི་ས་ངོ་མ་ཤེས་ན། །
   ཤར་ཁྲ་མོ་གླིང་གི་ས་ཆ་ན། །
   འབྲུག་ལྷང་ལྷང་ནོར་བུའི་གདན་སྟེང་ན། །
   གཡུ་སྦྲ་མཐིང་ཤོག་གོང་དགུ་རེད། །
   ཨ་སེར་མོ་ང་ངོ་མ་ཤེས་ན། །
   ང་སྐྱེ་བ་འདི་ཡི་གོང་རོལ་ན། །
   བག་ཆགས་དྲི་མས་མ་གོས་དུས། །
   ཤ་ཁྲག་སྦུབས་སུ་མ་འཁྲུངས་དུས། །
   གཡུ་ལོ་བཀོད་པའི་ཞིང་ཁམས་ན། །
   གསེར་ལོ་འབར་བའི་གཞལ་ཡས་ན། །
   དུང་ལོ་འབར་བའི་ཁྲི་སྟེང་ན། །
   སྒྲོལ་མ་དཀར་མོའི་སྐྱེ་བ་ཡིན། །
   སྐྱེ་བ་འདི་ལ་ཟིན་པ་ནས། །
   ཉ་ཆགས་ཕུ་དྲུག་མདའ་དང་བདུན། །
   དུང་མཚོ་དཀར་མོའི་རླབས་དང་བརྒྱད། །
   སྐྱ་རེངས་གད་པའི་རྔམས་དང་དགུ། །
   ཕོ་བྲང་སྟག་རྩེའི་གཟི་དང་བཅུ། །
   བཅུ་འཛོམ་གཡང་གི་ར་བ་ན། །
   ཕྱུག་སྐྱ་ལོའི་སེང་ལྕམ་འབྲུག་མོ་ཡིན། །
   གླུ་འདི་ཡི་གླུ་ངོ་མ་ཤེས་ན། །
   ཨ་སེར་མོའི་དགུ་སིང་དྲུག་འགྱུར་ཡིན། །
   ང་སེང་ལྕམ་འབྲུག་མོ་ཐོགས་དོན་དེ། །
   དབྱར་ལ་མ་སྐྱེས་དགུན་ལ་སྐྱེས། །
   དགུན་སྟག་ཡོས་གཉིས་ཀྱི་བར་སྒང་དུ། །
   སེར་མོ་སྐུ་དེ་འཁྲུངས་ཞོགས་དེར། །
   ཨ་སྔོན་དགུང་ནས་འབྲུག་གཅིག་གྲགས། །
   དོག་མོ་ས་ནས་ལྕམ་གཅིག་སྐྱེས། །
   དཀར་ཡག་གངས་ལ་སེངྒེ་འགྱིང་། །
   སེང་ལྕམ་འབྲུག་མོ་དེ་ནས་ཐོགས། །
   སྦྲ་ཆོན་ཆེན་མགོ་ལ་ཐང་དཀར་བབས། །
   ཤ་ལོ་དཀར་བ་དེ་ནས་བྱུང་། །
   ཆོན་ཆུང་མགོ་ལ་ཐང་སྨུག་བབས། །
   ཤ་རྩ་སྨུག་དོན་དེ་ནས་བྱུང་། །
   གོང་ཤིང་མགོ་ལ་ནེ་ཙོ་བབས། །
   སྨྲ་བརྗོད་མཁས་དོན་དེ་ནས་བྱུང་། །
   འཆར་ཀ་སྟེང་ནས་ཅོ་ག་འགྱུར། །
   དྲུག་འགྱུར་ཐོགས་དོན་དེ་ནས་བྱུང་། །
   ཕུར་ཆེན་སྟེང་ལ་རྨ་བྱ་བབས། །
   གཟི་མདངས་ཆེ་དོན་དེ་ནས་བྱུང་། །
   ཕུར་ཆུང་མགོ་ལ་རྒྱ་བྱ་བབས། །
   གཟི་མདངས་རིང་དོན་དེ་ནས་བྱུང་། །
   ཕུར་ཆུང་མགོ་ལ་རྒྱ་བྱ་བབས། །
   སྐེ་མགུལ་རིང་དོན་དེ་ནས་བྱུང་། །
   ཐབ་ཁུང་ནང་ནས་མེ་སྟག་འཚུབ། །
   མི་ཁ་སྡང་དོན་དེ་ནས་བྱུང་། །
   ཨ་ཅང་རྩེད་མོ་ཀུ་རེ་ཡིན། །
   ལོ་རུས་ལུག་ལ་ཐོབ་ལེ་ཡིན། །
   འབྱུང་བ་ཤིང་ལ་ཐོབ་ལེ་ཡིན། །
   ཀུན་དང་མཐུན་པའི་ཤིང་མོ་ལུག། །
   རང་བསྟོད་མིན་ཏེ་ངོ་མ་ཡིན། །
   ཨ་རོགས་བུ་མོ་རེས་རོགས་གཉིས། །
   ཆུང་ཆུང་ལུ་གུ་འཚོ་རོགས་གཉིས། །
   ཡང་ཆུང་མེ་ཏོག་འཐུ་རོགས་གཉིས། །
   ཁྲ་མོ་གླིང་གི་ས་ཆ་ན། །
   བྱ་ཁྭ་ཏ་ཡེ་ནས་མི་དར་ཏེ། །
   ད་ནང་ཐན་བྱ་འདི་འདྲ་བྱུང་། །
   ཁྭ་ཏའི་གླུ་ལེན་ཨ་གོ་ལགས། །
   སྡུག་ཐན་བྱས་ཟེར་བ་འདི་འདྲ་ཟེར། །
   སྐྱ་ལོ་སེང་ལྕམ་འབྲུག་པོ་ལགས། །
   མི་མ་ཤི་ཡུགས་ས་ལུས་འདུག་ཟེར། །
   ཁྱོད་ཁྲ་མོ་གླིང་ལ་སྡོད་པ་ལས། །
   ང་ཁྭ་ཏའི་རྗེས་ལ་ཨེ་འགྲོ་ཟེར། །
   ཧོར་གུར་དཀར་དཔོན་མོ་ཨེ་བྱེད་ཟེར། །
   ང་ལྷ་འུའི་མ་ཡར་ཨེ་བྱེད་ཟེར། །
   ཧོར་རི་ཐང་བདག་མོ་ཨེ་བྱེད་ཟེར། །
   ཤན་པའི་རྗེ་མོ་ཨེ་བྱེད་ཟེར། །
   གནམ་ས་གཉིས་ཀྱི་བར་ལམ་ན། །
   རྒྱ་བོད་གཉིས་ཀྱི་ས་མཚམས་ན། །
   ས་ཧོར་ལས་སྐྱིད་ཅིག་མེད་དོ་ཟེར། །
   ཁོ་བྱ་ངན་ཁ་ལ་ཐལ་བ་ཐོབ། །
   ང་ཧོར་ལ་འགྲོ་བ་དགྲ་ལ་སྒྱུར། །
   དགྲ་ཡི་ནང་གི་ཧོར་ལ་སྒྱུར། །
   དགྲ་སྒྱུར་བ་གུར་དཀར་སྟེང་དུ་སྒྱུར། །
   ཐན་བྱ་ཁྭ་ཏ་ནག་ཙོག་ཁྱོད། །
   ཉིན་གྱི་རྟགས་ལམ་ངན་པ་བྲུབ། །
   མཚན་གྱི་རྨི་ལམ་ངན་པ་བྲུབ། །
   སྤྱི་རུ་ཆག་སྒོ་ཆེ་བ་བྲུབ། །
   སྒོས་སུ་ཉམ་ང་ཆེ་བ་བྲུབ། །