རུ་དམ་གངས་ཀྱི་ར་བ་ནི་མདོ་ཁམས་སྡེ་དགེའི་ཡུལ་གྲུ་ལས་རུ་དམ་ལུང་པ་སྟེ་དཀར་མཛེས་བོད་རིགས་རང་སྐྱོང་ཁུལ་སྡེ་དགེ་རྫོང་རྫོགས་ཆེན་ཡུལ་ཤོག་ཏུ་ཆགས་ཡོད་པ་དང་། རྫོང་མི་དམངས་སྲིད་གཞུང་གི་གནས་ཡུལ་དགོན་ཆེན་གྲོང་རྡལ་གྱི་བར་རྒྱང་ཐག་སྤྱི་ལེ་166ཡོད། སའི་ཆགས་རིམ་ལ་ཆ་སྙོམས་མཚོ་འཕགས་སྨི་3940ཙམ་ཡོད། གནས་འདི་ནི་མདོ་ཁམས་ཕྱོགས་ཀྱི་ཕུལ་དུ་བྱུང་བའི་མཛེས་ལྗོངས་ཡིན་ལ། ཉེར་འཁོར་དུ་གསང་སྔགས་རྙིང་མ་པའི་དགོན་ཆེན་དྲུག་གི་ཡ་གྱལ་ཏེ་རུ་དམ་རྫོགས་ཆེན་ཨོ་རྒྱན་བསམ་གཏན་ཆོས་གླིང་དང་། ཞེ་ཆེན་བསྟན་གཉིས་དར་རྒྱས་གླིང་ཆགས་ཡོད། གླིང་གེ་སར་གྱི་འཆམ་སྲོལ་ཐོག་མ་རྫོགས་ཆེན་དགོན་སྡེ་འདི་ནས་དར་རྒྱས་བྱུང་བ་ནས་བཟུང་རིམ་གྱིས་འཕེལ་ཞིང་ད་ལྟའི་བར་གླིང་གེ་སར་རྒྱལ་པོ་ཕུ་ནུ་དང་བཅས་པའི་གར་འཆམ་རྒྱས་པ་གནང་སྲོལ་ཡོད། གནས་འདི་ལ་གནས་ཡིག་རྒྱས་བསྡུས་མང་པོ་ཡོད་པ་ལས་གྲུབ་དབང་བཞི་པ་མི་འགྱུར་ནམ་མཁའི་རྡོ་རྗེའི་རུ་དམ་གནས་ཡིག་ཏུ། མཁའ་སྤྱོད་ས་ལ་འཕོས་པ་བདེ་ཆེན་ཞིང་། །ཕ་ཡུལ་པདྨ་བཀོད་ཀྱི་གནས་བཟང་དེའི། །ཆ་ལག་རུ་དམ་སྐྱིད་ཁྲམ་ལུང་པ་ནི། །རི་དབྱིབས་པདྨ་ཁ་ཕྱེས་ལྟ་བུ་ལ། །རྒྱབ་མདུན་དར་དཀར་ཡོལ་བ་དཀྲིས་པ་འདྲ། །ཤར་ཕྱོགས་ཐང་ལ་རྟ་མཆོག་འདྲ་བའི་བྲག །གུ་རུ་ཐོད་ཕྲེང་སྡེ་ལྔའི་རང་བྱོན་ཡོད། །གནས་དེའི་བྱང་ཤར་ཚེས་བརྒྱད་འདྲ་བའི་བྲག །གནོད་སྦྱིན་འབར་བ་སྤུན་བདུན་ཕོ་བྲང་ཡོད། །མདུན་དུ་རྩི་ཤིང་དམར་པོ་ཡལ་འདབ་ལྡན། །དབྱར་དུས་ཁྲག་གི་རྒྱ་མཚོ་ཅུང་ཟད་འཁྱིལ། །ཀླུ་བཙན་མངོན་དུ་རྒྱུ་བའི་ར་གཞོབ་འཐུལ། །ལྷོ་ངོས་གངས་རི་ལྷུན་ཆགས་ངོས་དཀྱིལ་གྱི། །
བྲག་ལ་རྗེ་བཙུན་སྒྲོལ་མ་དངོས་སུ་བཞུགས། །མེ་ལྷའི་མཚམས་སུ་འཇམ་དཔལ་གཤིན་རྗེ་ཡི། །ཕོ་བྲང་ངོས་ལ་དེའི་འདབས་འབབ་ཆུའི་རྒྱུན། །གངས་ཆུ་ཤུགས་དྲག་ལྡན་པ་བདུད་རྩིའི་ཆུ། །གཤིན་རྗེའི་དྲག་སྔགས་དུ་ཏྲི་ཕུ་ཏྲི་དང་། །ཡ་མ་རཱ་ཛ་ཡ་མ་རཀྴ་སྒྲོགས། །དྲང་སྲོང་མཉམ་བཞག་ལྟ་བུའི་སྒྲུབ་སྡེ་ཆགས། །འདབས་སུ་སྨན་བཙུན་མཁའ་འགྲོའི་ཕོ་བྲང་ཡོད། །ནུབ་བྱ་རི་བོང་རྣ་བ་སྦྲེལ་འདྲའི་བྲག །སྤྱན་རས་གཟིགས་དང་སྒྲོལ་མ་དཀར་མོའི་སྐུ། །རང་བྱོན་གཟུངས་སྔགས་མ་ཎི་ཡིག་དྲུག་དང་། །ཨཱརྱ་ཏ་རེ་བྲག་གི་སྡེབ་གཉིས་ཡོད། །བྱང་ཕྱོགས་རླུང་ལྷ་གནས་པ་ཕ་བོང་བདུན། །
རྣམ་སྲས་ཛཾ་ལྷའི་ཕོ་བྲང་དངོས་ཡིན་ཡང་། །དམ་ཅན་རྡོར་ལེགས་ཆོས་རྒྱལ་སྐུ་ལྔ་སོགས། །རང་བྱོན་བྲག་གི་ངོ་ལ་གསལ་དོད་ཡོད། །འདབས་སུ་འབབ་ཆུའི་སྒྲ་ལ་བེ་ཤྲཱི་སྒྲོགས། །ཡུལ་དབུས་ཨོ་རྒྱན་བསམ་གཏན་ཆོས་ཀྱི་གླིང་། །སྟེང་ན་རྩ་གསུམ་མཁའ་འགྲོ་སྤྲིན་ལྟར་གཏིབ། །བར་ན་མཆོག་ཐུན་དངོས་གྲུབ་ཆར་ལྟར་འབེབ། །གཤམ་ན་བསྟན་སྲུང་ཐམས་ཅད་གློག་ལྟར་འཁྱུག །མདོ་སྔགས་བཤད་སྒྲུབ་ཆོས་སྒྲའི་གླུ་དབྱངས་ལེན། །དེ་འདྲའི་གནས་ཀྱི་བཀོད་པ་ངོ་མཚར་བ། །
བསམ་མི་ཁྱབ་ཀྱང་མདོར་བསྡུས་ཙམ་ཞིག་བཀོད། །
འདི་ལ་ཕྱག་བསྐོར་བྱས་པའི་ཕན་ཡོན་ནི། །དད་མོས་ཅན་གྱིས་སྟོང་ཕྲག་གཅིག་བསྐོར་བ། །དུང་ཕྱུར་གཅིག་ཏུ་འགྱུར་ཞིང་ལས་སྒྲིབ་དག །དངུལ་དཀར་མེ་ལོང་བག་རྡུལ་ཕྱིས་པ་འདྲ། །ཕྱི་མ་སྐུ་གསུམ་ཞིང་ཁམས་མངོན་སུམ་མཐོང་། །གླིང་བསྐོར་ཕན་ཡོན་དེ་འདྲར་ཤེས་པར་གྱིས། །དུས་བཟང་རྣམས་སུ་མཐའ་བསྐོར་སུམ་བརྒྱ་ལ། །གོང་གི་འགྱུར་ཡོད་དེ་འདྲ་སྙིང་ལ་ཞོགས། །གཙུག་ལག་ཁང་དངོས་འདི་ལ་སྟོང་བསྐོར་གཉིས། །དུང་ཕྱུར་འགྱུར་ཡོད་ཉ་སྟོང་བརྒྱད་གསུམ་དང་། །ཆོ་འཕྲུལ་དུས་ཆེན་ཤར་ཚེ་བརྒྱ་བསྐོར་གསུམ། །དཱེ་བཱི་ཀོ་ཊ་བསྐོར་དང་ཁྱད་པར་མེད། །སྤྱིར་ན་ལྔ་བདོའི་སྡིག་སྒྲིབ་རྐྱེན་གོས་སམ། །ངེས་བསལ་ཕྱིར་དུ་དམ་སྡོམ་གཙང་མ་ཡིས། །སྨེ་བརྩེགས་རྣམ་འཇོམས་རི་ཁྲུས་ལྷ་བསང་སོགས། །འབད་ན་འཕྲལ་ཕུག་ཡ་མཚན་རིམ་བཞིན་གསལ། །དད་མོས་ཅན་གྱི་དགེ་ལེགས་རེ་སྐོང་ཕྱིར། །ཨོ་རྒྱན་ཆེ་མཆོག་དཔལ་གྱི་རྡོ་རྗེས་བྲིས། །འབྲེལ་ཚད་སྒྲིབ་སྦྱངས་སྐུ་གསུམ་མངོན་གྱུར་ཤོག །མངྒལཾ། །ཞེས་པ་ལྟར་གནས་མཆོག་འདིའི་ཕུ་ན་བརྗིད་ཆགས་གངས་ཀྱི་རི་བོ་རབ་ཏུ་མཛེས་ཤིང་། སྐེད་ན་རྫ་བྲག་དང་ནགས་ཚལ་གྱིས་ཀུན་ནས་ཕྱུག་པ། ཕྱོགས་དང་ཕྱོགས་མཚམས་སུ་མཚོ་དང་མཚེའུ་དུ་མས་བརྒྱན་པ། གནམ་དབྱིབས་འཁོར་ལོ་རྩིབས་བརྒྱད་དང་། ས་དབྱིབས་པདྨ་འདབ་བརྒྱད་ཀྱི་ཚུལ་དུ་ཆགས་ལ། ཤར་ཕྱོགས་ཉི་ཟླའི་འཆར་ལམ་ཡངས་ཤིང་། ལྷོ་ཕྱོགས་ནོར་བུའི་རིན་ཆེན་སྤུངས་པ། ནུབ་རི་དར་གྱི་ཡོལ་བ་བརྒྱབ་ནས་བྲེས་ཤིང་། བྱང་རི་བཙན་པོའི་འགག་སྒོ་བསྡམས་པ། ཕྱོགས་བཞིར་སྲུང་ཆེན་བཞི་དང་བར་མཚམས་བཀྲ་ཤིས་རྟགས་བརྒྱད་ཀྱི་དབྱིབས་སུ་མངོན་པའི་རི་ཕྲན་གྱི་ར་བས་ཀུན་ནས་བསྐོར་བ་བཅས་སའི་དཔྱད་པ་བཟང་པོ་ཐམས་ཅད་ཡོངས་སུ་ཚང་ཤིང་། གནས་འདིར་འོང་པའི་རྒྱལ་ཕྱི་ནང་གི་ཡུལ་བསྐོར་ལྗོངས་རྒྱུ་བ་ཀུན་གྱིས་མཛེས་པའི་ཡུལ་ལྗོངས་ཞེས་མགྲིན་དབྱངས་གཅིག་གྱུར་གྱིས་བསྔགས་བརྗོད་བྱེད་པ་སོགས་མཐུན་སྣང་གི་བཀོད་པ་དང་། གསང་བ་ལྟར་ན་ཨོ་རྒྱན་རིན་པོ་ཆེས་རྫུ་འཕྲུལ་གྱི་ཞབས་ཀྱིས་བཅགས་ཤིང་བྱིན་གྱིས་བརླབས་པའི་གནས་གངས་རི་ཉེར་ལྔ་རུ་གྲགས་པ་ལས་ཡོན་ཏན་གནས་ཀྱི་གཙོ་བོ་འདི་ཉིད་ཡིན་པ་དང་། མཆོག་གྱུར་བདེ་ཆེན་གླིང་པའི་གཏེར་ལུང་གནས་ཡིག་དང་། དཔའ་བོ་ལས་རབ་རྩལ་སྐུ་ཕྲེང་གཉིས་པའི་གཏེར་ལུང་གནས་ཡིག །རྫོགས་སྤྲུལ་བཞི་པ་དང་ལྔ་པའི་ཞལ་གསུང་གནས་ཡིག་སོགས་ལས་ཕྱི་ནང་གསང་བའི་གནས་བཀོད་བསམ་གྱིས་མི་ཁྱབ་པ་གསུངས་པ་འདིར་ཡི་གེ་མང་དུ་དོགས་ནས་མ་བྲིས་སོ། །
