ཉེ་ཆར་བོད་རང་སྐྱོང་ལྗོངས་གཞིས་ཀ་རྩེ་གྲོང་ཁྱེར་ས་སྐྱ་རྫོང་གཞོང་སྨད་ཞང་བདེ་ལེགས་ཞིང་གློག་ཤུགས་རེ་བའི་སློབ་ཆུང་དུ་རྐང་རྩེད་སྤོ་ལོའི་འགྲན་བསྡུར་ཞིག་སྤེལ་བ་དང་། འགྲན་བསྡུར་ནང་ཞུགས་པའི་ཁོངས་མི་ནི་ལོ་རིམ་གསུམ་པ་ནས་དྲུག་པའི་བར་གྱི་སྤོ་ལོའི་རུ་ཁག5ལས་གྲུབ་ཅིང་། སློབ་གྲྭ་ཡོངས་ཀྱི་དགེ་སློབ་ཚོ་གཅིག་རྗེས་གཉིས་མཐུད་ངང་ཡུལ་དངོས་སུ་ལྟད་མོ་ལྟ་བར་ཡོང་།    

རྐང་རྩེད་སྤོ་ལོའི་འགྲན་བསྡུར་གྱི་འགོ་ཚུགས་མཛད་སྒོའི་ཡུལ་དངོས། 

རྐང་རྩེད་སྤོ་ལོའི་འགྲན་བསྡུར་གྱི་ཡུལ་དངོས། 

          དགུང་ཨ་སྔོན་དབྱིངས་སུ་སྤྲིན་དཀར་གྱི་འདབ་མ་གཡོ་ཞིང་། སྔོ་ལྗང་གི་ར་བའི་ནང་དུ་ལང་ཚོའི་གཟི་ཉམས་མངོན། རྐང་རྩེད་སྤོ་ལོའི་ལུས་རྩལ་པ་ཚོ་སྤོ་ལོའི་ར་བར་བྱ་འཕུར་བ་ལྟར་རྒྱུག་ཅིང་། སྐབས་རེར་སྤོ་ལོ་མཁའ་ལ་འཕངས་ནས་གཞུ་དབྱིབས་ཀྱི་ལམ་ཐིག་ལྟར་སར་ལྷུང་། ཡང་སྐབས་རེར་སྤོ་ལོ་ལུས་རྩལ་པ་ཚོའི་རྐང་འོག་ཏུ་འཁོར་བཞིན་ཡོད། རུ་མི་ཕན་ཚུན་བར་གཞོགས་འདེགས་བྱས་པ་ཧ་ཅང་བཟང་སྟེ། སྤོ་ལོ་ཡག་པོ་རྒྱག་ཐུབ་ཚེ་ཁོང་ཚོས་དགའ་སྤྲོའི་ངང་སྐད་གསང་མཐོན་པོས་དགའ་འབོད་བྱེད་པ་དང་། སྤོ་ལོ་ཉེན་ཁ་ལས་གཡོལ་སྐབས་ཁོ་ཚོས་ཕན་ཚུན་ལ་སྐུལ་མ་བྱེད་ཀྱིན་ཡོད། འགྲན་རར་ཐོད་བརྒལ་གྱི་རྣམ་པ་སྣ་ཚོགས་བྱུང་བ་དང་བསྟུན་ནས། ལྟད་མོ་བས་འབོད་སྒྲ་སྣ་ཚོགས་སྒྲོག་པར་བྱེད་པས། རྐང་རྩེད་སྤོ་ལོའི་འགྲན་བསྡུར་དེས་ལྷིང་འཇགས་སུ་གནས་པའི་སློབ་ར་ཡོངས་གློ་བུར་དུ་ཚ་ཚ་འུར་འུར་དུ་བཏང་། 

རྐང་རྩེད་སྤོ་ལོའི་འགྲན་བསྡུར་གྱི་ཡུལ་དངོས། 

རྐང་རྩེད་སྤོ་ལོའི་འགྲན་བསྡུར་གྱི་ཡུལ་དངོས། 

          གཞོང་སྨད་ཞང་བདེ་ལེགས་ཞིང་གློག་ཤུགས་རེ་བའི་སློབ་ཆུང་གི་སྔོན་ཆད་ཀྱི་མིང་ལ་གཞོང་སྨད་ཞང་ལྟེ་བའི་སློབ་ཆུང་ཟེར། 2017ལོའི་ཟླ6པའི་ཚེས19ཉིན་དངོས་སུ་སྒོ་བྱང་བཀལ་ཞིང་། དེ་ནི་བོད་ལྗོངས་ཀྱི་རེ་བའི་སློབ་ཆུང་ཨང243པ་དེ་རེད། འདི་གའི་ས་བབ་མཐོ་ཚད་སྨི4500ཟིན་པ་དང་། ས་སྐྱ་རྫོང་དང་བར་ཐག་སྤྱི་ལེ52ཡོད། 

གཞོང་སྨད་ཞང་བདེ་ལེགས་ཞིང་གློག་ཤུགས་རེ་བའི་སློབ་ཆུང་གི་ཟུར་ཞིག 

          དེ་གར་སློབ་ཁྲིད་བྱས་ནས་ལོ20འགོར་བའི་དགེ་རྒན་ཟླ་བ་ཕུན་ཚོགས་ཀྱིས་བརྗོད་དོན། “སྔོན་ཆད་སློབ་གྲྭའི་སློབ་ཁྲིད་ཆ་རྐྱེན་ཡག་པོ་མེད་དེ། ཅོག་ཙེ་མི་འདང་བས་དགེ་རྒན་དང་སློབ་མ་ཚང་མ་ཐང་ལ་སྡོད་དགོས། སློབ་སྦྱོང་གི་མཁོ་ཆས་ཀྱང་མི་འདང་བས། སློབ་མས་སྨྱུག་མ་བཀོལ་ནས་ས་ངོས་སུ་ཡི་གེ་སྦྱོང་བ་དང་། སྦྱོང་ཚན་འབྲི་དེབ་བྲིས་ཚར་རྗེས་ཕྱིས་ནས་ཡང་བསྐྱར་བཀོལ་གྱིན་ཡོད། ད་ལྟ་སློབ་གྲྭའི་སློབ་ཁྲིད་ཆ་རྐྱེན་ལེགས་སུ་ཕྱིན་པ་དང་། ལྟ་ན་སྡུག་པའི་སློབ་ཁྲིད་ཐོག་ཁང་བརྒྱབ་ཅིང་། འགྱིག་བཏིང་བའི་རྒྱུག་ལམ་གྱི་རྩལ་སྦྱོང་ར་བ་བསྐྲུན་ཡོད་ལ། དེང་རབས་ཅན་གྱི་སློབ་ཁྲིད་སྒྲིག་ཆས་ཡོད་པ་སོགས་ད་ལྟའི་འགྱུར་ལྡོག་འདི་ལྟ་བུ་སྔོན་ཆད་བསམ་ཡུལ་ལས་འདས་པ་ཞིག་རེད”ཅེས་བཤད། 

ལོ་རིམ་བཞི་པའི་འཛིན་གྲྭ་གཉིས་པའི་ཟླ་བ་ཚེ་རིང་། 

          ཛ་དྲག་གི་འགྲན་བསྡུར་དེ་སློབ་གྲོགས་ཚོའི་དགའ་འབོད་དང་དགོད་སྒྲའི་ཁྲོད་མཇུག་བསྒྲིལ་ཞིང་། སློབ་གྲོགས་ཚོའི་གདོང་ལ་དགའ་བའི་འཛུམ་གྱིས་ཁེངས། “ང་རྐང་རྩེད་སྤོ་ལོ་རྩེ་རྒྱུར་དགའ་པོ་ཡོད་ལ། ངའི་རྐང་རྩེད་སྤོ་ལོའི་གྱོན་ཆས་ལའང་ཧ་ཅང་དགའ་པོ་ཡོད། རྐང་རྩེད་སྤོ་ལོའི་ལུས་རྩལ་ཁྲོད་ནས་དགེ་རྒན་གྱིས་རྒྱུན་དུ་བཤད་པའི་ཚོགས་པའི་སྙིང་སྟོབས་ཏེ་དཔེར་ན་མཛའ་བརྩེ་ཨང་དང་པོ་དང་འགྲན་བསྡུར་གཉིས་པ་ཡིན་པ་སོགས་ངས་ཤེས་རྟོགས་བྱུང་། དགེ་རྒན་གྱིས་ད་དུང་རྟག་ཏུ་ལུས་སྦྱོང་བྱས་ཚེ་ང་ཚོའི་གཟུགས་པོའི་བྱང་ཚད་སྔར་ལས་ཇེ་ལེགས་སུ་འགྲོ་བ་དང་། གཟུགས་པོ་སྔར་ལས་སྟོབས་ཆེར་འགྲོ་བ་རེད་ཅེས་གསུངས”ཞེས་ལོ་རིམ་བཞི་པའི་འཛིན་གྲྭ་གཉིས་པའི་ཟླ་བ་ཚེ་རིང་གིས་དགའ་སྤྲོའི་ངང་དེ་ལྟར་བཤད། 

རྐང་རྩེད་སྤོ་ལོའི་འགྲན་བསྡུར་མཇུག་བསྒྲིལ་མཛད་སྒོའི་ཡུལ་དངོས། 

ཨང་དང་པོ་ཐོབ་པའི་སྤོ་ལོའི་རུ་ཁག 

          སློབ་གཙོ་ལྷག་པ་ཡིས་ངོ་སྤྲོད་བྱས་པར་གཞིགས་ན། ཉེ་བའི་ལོ་ཤས་རིང་གཞོང་སྨད་ཞང་བདེ་ལེགས་ཞིང་གློག་ཤུགས་རེ་བའི་སློབ་ཆུང་དུ་རྐང་རྩེད་སྤོ་ལོའི་བྱེད་སྒོ་མང་པོ་སྤེལ་ཞིང་། ད་ལོ་སློབ་གྲྭས་རྐང་རྩེད་སྤོ་ལོའི་འགྲན་བསྡུར་ཕུད་ད་དུང་ཟླ5པའི་ཟླ་སྨད་དུ་སྐབས་དྲུག་པའི་དབྱར་དུས་ཀྱི་མཆོང་རྒྱུག་འཕེན་གསུམ་གྱི་ལུས་རྩལ་འགྲན་ཚོགས་འཚོག་རྒྱུ་དང་། ཟླ10པའི་ཟླ་དཀྱིལ་དུ་རྒྱང་བསྒྲགས་ལུས་རྩལ་འགྲན་བསྡུར་སོགས་སྤེལ་ནས། ཕྲུ་གུ་ཚོ་བདེ་ཐང་དང་སྤྲོ་སྣང་ཆེ་བའི་ཁོར་ཡུག་ཁྲོད་སློབ་སྦྱོང་དང་འཚར་ལོངས་ཡོང་རྒྱུར་རོགས་རམ་བྱས་ཏེ། ཕུལ་བྱུང་གི་གྲུབ་འབྲས་ཐོག་ནས་ཏང་གི་ཚོགས་ཆེན་ཉི་ཤུ་པ་རྒྱལ་ཁའི་ངང་འཚོག་རྒྱུར་བསུ་བ་ཞུ་ཞེས་བཤད།