ཡ--ད་ནངས་ནམ་ལངས་ཀྱི་མགོ་མ་ཉི་ཤར་གྱི་རྩེ་མོ། །
རྟ་མགྱོགས་པ་གསུམ་ལ་རྨེད་ཐག་བརྒྱབ་ནས། །
མི་བདེ་མོ་གསུམ་ནི་གོང་ལ་བཞོན་ལེ། །
ཆུ་བཙལ་གིན་བཙལ་གིན་ལྷོ་ལ་སོང་ཟིག །
ལྷོ་གཡུ་འབྲུག་སྔོན་མོའི་ཏོག་ཆུ་རྙེད་ཟིག །
ཆུ་དེ་མིན་པས་ནགས་ལ་སོང་ཟིག །
ནགས་ནས་ནགས་ཆུ་ཁམ་པ་རྙེད་ཟིག །
བྱ་ཁུ་བྱུག་སྔོན་མོའི་གཤོག་ཆུ་རྙེད་ཟིག །
རྫ་སེང་དཀར་མོའི་གངས་ཐིགས་རྙེད་ཟིག །
བསྐྱིལ་ས་གངས་རི་འདབས་ལ་བསྐྱིལ་ཟིག །
ཆུ་བསྐྱིལ་གིན་བསྐྱིལ་གིན་མ་ཐུབ་ཟིག །
རྡོ་ཕ་བོང་ཞིག་གིས་ཁ་ལེབ་བརྒྱབ་ཟིག །
ཕྱེ་མ་སྔོན་མོ་ཐུམ་ལོ་བརྒྱབ་ཟིག །
ཙན་དན་དམར་བོས་ལྟག་འཛེར་བརྒྱབ་ཟིག །
ཆུ་ལེན་བུ་མོ་དུང་མོ་མཚོ་ཡིས། །
བར་གྱི་རྫ་ཆུ་བསིལ་མ་བཅུ་གི །
བར་གྱི་རྫ་ཆུ་དྭངས་མ་འདི། །
གསེར་གྱི་ཐོམ་བུ་ནང་དུ་ཤག་སེ་བླུགས་ཟིག །
གསེར་ཐག་ཕྲ་མོ་སྐེད་ལ་བཅིངས་ཏེ། །
པུས་མོ་འཕང་ལོའི་ཚིགས་སུ་བླངས་ཟིག །
གད་པ་གཡུང་དྲུང་སྟེགས་བུར་བཞག་སྟེ། །
སྐེད་པ་རྡོ་རྗེ་གདན་དུ་ཁུར་ཟིག །
ཡ་ཡར་ལ་ག་མ་གོག་ཏུ་ཡོང་ཐལ། །
ཐུར་ལ་ལྡ་མ་ལྡིང་དུ་བབས་ཟིག །
བདེ་ལ་འཇའ་མ་འཇབ་ཀྱིས་ཡོང་ཐལ། །
ཆུ་འཕོ་ལ་འཕྱོ་བ་གཉིས་ཀ་བྱས་ནས། །
གཉེན་ཚང་ཁྱིམ་ལ་ཐོན་དུས་སུ། །
སྒྱེད་པུ་སུམ་བཙུགས་འཁར་ཟངས་ནང་དུ། །
སྔོན་དྭངས་པའི་རྫ་ཆུ་བསིལ་མ་བླུགས་ཐལ། །
ཆུ་མ་མང་མ་ཉུང་ཟོ་གསུམ་བླུགས་ཐལ། །
ཅུང་ཉུང་གི་ཟེར་ནས་ཐོམ་གསུམ་སྣོན་གི །
ཇ་མ་མང་མ་ཉུང་ཟེར་ནས་སྡེར་གསུམ་འདེབས་ཀི །
ཅུང་ཉུང་གི་ཟེར་ནས་སྤར་གསུམ་སྣོན་གི །
མེ་འབར་ཐལ་འབར་ཐལ་ཟེར་བའི་དུས་ན། །
ཤུག་པ་ལྷ་ཤིང་ཡིན་པས་བཤགས་ན་འབར་གི །
ཨོང་བ་ལྷ་རིས་ཡིན་པས་སྤར་ན་འབར་གི །
རིལ་མ་ཐེའུ་རང་ཡིན་པས་དཀྲིགས་ན་འབར་གི །
སྤེན་མ་དགྲ་བོ་ཡིན་པས་དཀྱུས་ན་འབར་གི །
ཚེར་མ་དགྲ་འགོང་ཡིན་པས་བཅག་ན་འབར་གི །
དུ་བ་ལྷོ་སྤྲིན་འཁྲིགས་འཁྲིགས་བྱེད་ཀི །
མེ་ལྕེ་གློག་དམར་འཁྱུག་འཁྱུག་བྱེད་ཀི །
མེ་སྟག་གླ་བོ་ལྡིང་ལྡིང་བྱེད་ཀི །
མེ་སྒྲ་གཡུ་འབྲུག་ལྡིར་ལྡིར་བྱེད་ཀི །
ཐབ་ཀ་གཡག་ཆུང་ངུར་ངུར་བྱེད་ཀི །
ཇ་ཁོལ་ཐལ་ཁོལ་ཐལ་ཟེར་བ་ན། །
ཇ་རླངས་སྨུག་ལོང་འཐིབ་འཐིབ་བྱེད་ཀི །
ཇ་ཞག་རྦ་རླབས་འཕྱུར་འཕྱུར་བྱེད་ཀི།
ཇ་སྡོང་ལུ་གུ་རྩེད་རྩེད་བྱེད་ཀི །
ཇ་ལོ་ཁ་བ་ཡེངས་སེ་གཡེངས་ཀི །
ཇ་རོ་ཞབས་སུ་ཐག་སེ་ཐག་སེ་འབབ་ཀི །
ཇ་དྲི་ཕྱོགས་བཞིར་བསུང་སེ་འཐུལ་གི །
སེང་གེ་དཀར་མོའི་འོ་མས་ཁ་དོག་བསྒྱུར་ནོ་ཡག་གི །
མ་སྲུ་དཔུང་རྩལ་ཅན་གྱིས་ཕྱར་ནོ་ཡག་གི །
ཟངས་ཀྱི་བོད་དེམ་ནང་ལ་བཅུ་ནོ་ཡག་གི །
བུ་མོ་མཛེས་ལྡན་མ་ཡིས་འདྲེན་ནོ་ཡག་གི །
ཇ་འདི་ཡི་འབྱུང་ཁུངས་མི་བཤད་མོད། །
ཇ་འདི་ཡི་འབྱུང་ཁུངས་བཤད་རྒྱུ་ན། །
ཇ་འབུད་ས་རྒྱ་ནག་ཡུལ་ནས་བུད་ཟིག །
ཉིན་ལ་བཏབ་པའི་ཤིང་དཀར་ཇ་ཡིན། །
ཤིང་དཀར་ཇ་ལ་ཁྲུང་ཁྲུང་འབབ་ཀི །
ཇ་ཤིང་དཀར་བོའི་རྩེ་མོ་བཏོགས་ཀི །
སྲིབ་ལ་བཏབ་པའི་ཤིང་ནག་ཇ་རེད། །
ཤིང་ནག་ཇ་ལ་རྨ་བྱ་འབབ་ཀི །
ཇ་ཤིང་ནག་པོའི་གཡུ་ལོ་བཏོགས་ཀི །
ཉིན་སྲིབ་བར་གྱི་ཤིང་སེར་ཇ་རེད། །
ཤིང་སེར་ཇ་ལ་ངང་བ་འབབ་ཀི །
ཇ་ཤིང་སེར་བོ་གཞུང་རྟ་འབྲེག་གི །
འདི་དཔྱིད་ཟླ་གསུམ་ལ་འབུད་དུས་ཡག་གི །
དབྱར་ཟླ་གསུམ་ལ་སྐྱེས་དུས་ཡག་གི །
སྟོན་ཟླ་གསུམ་ལ་སྨིན་དུས་ཡག་གི །
རྒྱ་མོ་ཐོར་ཅོག་ཅན་གྱིས་གཞབ་དུས་ཡག་གི །
རྒྱ་རལ་བ་ཅན་གྱིས་འཚོང་དུས་ཡག་གི །
ཇ་བསྙལ་ཐལ་བསྙལ་ཐལ་ཟེར་དུས་སུ། །
ཨ་མའི་གཅེས་ཕྲུག་བསྙལ་བསྙལ་བྱས། །
ཇ་ལངས་ཐལ་ལངས་ཐལ་ཟེར་དུས་ན། །
རྫ་མགོའི་སྨུག་པ་ལངས་འདྲ་རེད། །
དཔར་གྲུ་བཞི་ནང་དུ་དཔར་དུས་ཡག་གི །
ཇ་ཤོག་སེར་བོའི་ན་བཟའ་ཡག་གི །
ཇ་ལྭ་དམར་བོའི་སྐ་རགས་ཡག་གི །
ཇ་འདི་འབུད་ས་རྒྱ་གར་ཡུལ་ནས་བུད་ཟིག
རྒྱ་གར་རྒྱལ་བོའི་ཕྱག་ལ་འཇོག་གི །
རྒྱ་གར་རྒྱལ་བོས་གསེར་ཐེལ་རྒྱག་གི །
ཇ་འབུད་ས་རྒྱ་ནག་ཡུལ་ནས་བུད་ཟིག །
རྒྱ་ནག་གོང་མའི་ཕྱག་ལ་འཇོག་གི །
རྒྱ་ནག་གོང་མས་དངུལ་ཐེལ་རྒྱག་གི །
ཇ་འབུད་ས་སྤུར་རྒྱལ་བོད་ནས་བུད་ཟིག །
བོད་ཀྱི་རྒྱལ་བོའི་ཕྱག་ལ་འཇོག་གི །
བོད་ཀྱི་རྒྱལ་བོས་དུང་ཐེལ་རྒྱག་གི །
ཇ་ཐེལ་སྣ་གསུམ་དེ་ནས་འཛོམས་ཟེར་རྒྱུ་རེད། །
ཡ--ཇ་བཙོང་མཁན་མི་མཐོ་ཉོ་མཁན་མཐོ་གི །
ཁལ་སྒ་ཐ་མ་མཐོ་ལ་འགེལ་ཡག་གི །
ཁལ་ཐག་ལྷ་མ་ལྷོད་ཀྱིས་བཀྱིགས་ཡག་གི །
རྟ་དྲེའུ་ལྡ་མ་ལྡེམ་གྱི་འགྲོ་ཡག་གི །
དོ་བོ་ཡ་མ་ཡོར་གི་དོ་མཉམ་གི །
བུ་ཆུང་ལྡེམ་མྱུར་ཅན་གྱིས་འདེད་ཡག་གི །
གཤོང་ས་མི་གཅིག་བཅུ་གཉིས་བརྒྱུད་ཀི །
ས་རུབ་སྐར་མས་བསུ་བ་བྱེད་ཀི །
ཐང་ཆེན་མང་བོ་བཏུད་ནས་ཡོང་གི །
མཚོ་ཆེན་མཐའ་ནས་བསྐོར་ནས་ཡོང་གི །
ཆུ་ཆེན་གཞུང་ནས་བཅད་ལེ་ཡོང་གི །
རི་ཆེན་སྟེང་ལ་འགོས་ནས་ཡོང་གི །
རི་ཆུང་མགོ་ནས་མཆོང་ནས་ཡོང་གི །
དགུང་ཉི་མ་སེར་བོ་འགྲོགས་ནས་ཡོང་གི །
དུང་ཟླ་བ་དཀར་བོ་འདུག་རོགས་བྱེད་ཀི །
བོད་ཡུལ་ཆོལ་ཁ་རྣམ་གསུམ་རྒྱུ་ནས། །
ཇ་ལོ་མི་གཅིག་ལྔ་བརྒྱ་འཁྱེར་ཡོང་། །
ཇ་བཙོང་མཁན་ཚོང་དཔོན་ཉི་མ་ཡིན་ཟེར། །
ཇ་ཉོ་མཁན་ཁ་བ་ཅན་འདི་ཡིན་ཟེར། །
གོང་གཏམ་ཐལ་གཏམ་ཐལ་ཟེར་བ། །
ཕ་ཨ་ཁུས་ཇ་རིན་ལུག་བརྒྱ་སྟེར་དགོས། །
མ་སྲུ་མོས་ཇ་རིན་འབྲི་བརྒྱ་སྟེར་དགོས། །
སྟག་ཤར་བས་ཇ་རིན་རྟ་བརྒྱ་སྟེར་དགོས། །
གོང་བཅད་ཐལ་བཅད་ཐལ་ཟེར་བ་ན། །
རྣོན་པོ་ཚོན་གྱིས་བཅད་འདྲ་རེད། །
སིལ་དི་རེ་སྒོར་མོ་ཕར་ལ་རྩིས་ཀི །
ཤོག་དི་རེ་ཇ་ལེབ་ཚུར་ལ་ལེན་གི །
ཇ་ལན་ཆེན་ཉོས་ནས་རི་རབ་སྤུངས་ཀི །
ཇ་ལན་ཆུང་ཉོས་ནས་རྒྱ་མཁར་བརྩིགས་ཀི །
བོད་ཇ་འདང་ཆེ་བ་དེ་ཡིན་ཟེར་རྒྱུ་རེད། །
ཡ--བུ་ཆུང་ང་ཡི་ལག་པ་གཡས་པའི་ནང་དུ། །
དཀར་ཡོལ་ཁྱུང་གཤོག་འབྲུག་མ་ཡོད། །
ཁ་ན་འཁོར་ལོ་རྩིབས་བརྒྱད་ཡོད། །
སྐེད་ན་བཀྲ་ཤིས་རྟགས་བརྒྱད་ཡོད། །
ཞབས་ན་པད་མ་འདབ་བརྒྱད་ཡོད། །
ནང་ན་རྒྱ་ཇ་དམར་བོ་བླུགས་ཡོད། །
དེའི་སྟེང་ལ་འབྲི་མར་སེར་བོ་འཕངས་ཡོད། །
ཕར་ལ་ཕུ་གསུམ་བཏབ་པས་ན། །
ཆུ་ལ་ཡེར་མོ་འཁྱིལ་འདྲ་རེད། །
ཚུར་ལ་ཧུབ་གསུམ་འཐུངས་ཙ་ན། །
ཝ་དམར་བོ་ཁུང་ལ་འཛུལ་འདྲ་རེད། །
ཡ--ངའི་ལག་པ་གཡོན་པའི་ནང་དུ། །
ཙན་དན་དམར་བོའི་སྡེར་མ་ཡོད་ཀི །
གོ་རེ་བྱ་རྒྱལ་ཁྱུང་ཆེན་བཞུགས་ཀི །
འདི་ཁ་མིག་མེད་རུང་དགོད་ལ་ཁད། །
གཤོག་པ་མེད་རུང་འཕུར་ལ་ཁད། །
ང་གཉེན་ཁྱིམ་གྱི་སྟོན་ཇ་ཡིན། །
འདིར་ཚོགས་ཀྱི་ཁྲོམ་པའི་མི་རྣམས་ཀྱིས། །
ཐུགས་བག་ལ་ཕེབས་ནས་བཞེས་པར་མཛོད་ཅིག །
