ཞྭ་བཤད་ཀྱི་གླུ་འདི་བླངས་སོ། །
གླུ་ཐ་ལ་ལ་མོ་ཐ་ལ་ལེན། །
གླུ་ཨ་ལ་ལ་མོ་ཨ་ལ་ལེན། །
སྐྱབས་བླ་མ་ཡི་དམ་མཁའ་འགྲོ་ལ། །
བདག་གསོལ་བ་འདེབས་སོ་བྱིན་གྱིས་རློབས། །
ཨེ་མ་རྒྱལ་མོ་སེམས་བཟང་མ། །
ཡིད་མ་ཡེངས་ང་ཡི་གླུ་ལ་ཉོན། །
སྔོན་སྲིད་པ་ཆགས་པའི་ཚུན་ཆད་ལ། །
ཞྭ་འདི་འདྲ་གཏན་ནས་ཡོད་མ་མྱོང་། །
གནམ་སྔོན་པོ་བླ་བྲེས་མན་ཆད་དང་། །
ས་དོག་མོ་གདན་ཁྲ་ཡན་ཆད་ཀྱི། །
རི་གང་གིས་ཞྭ་དཔེ་ཉན་བསམས་ནས། །
ས་རི་ཀླུང་ཀུན་ལ་དཔེ་བཞག་ཚེ། །
ཤར་གླིང་ལྷ་ཡི་དཀྱིལ་འཁོར་དེ། །
གོར་གོར་ཟླ་བ་ཚེས་འདྲ་གདའ། །
དེ་ལ་ཞྭ་དཔེ་མི་ཉན་བསམས། །
ལྷོ་འཛམ་བུའི་གླིང་གི་ས་ཆ་འདི། །
སྔགས་པས་དམར་གཏོར་བཤམས་འདྲ་གདའ། །
དེ་ལ་ཞྭ་དཔེ་མི་ཉན་བསམས། །
ནུབ་གླིང་འོ་མའི་འབྱུང་ཁུངས་དེ། །
ཚེས་བརྒྱད་ཟླ་བ་ཤར་འདྲའི་དཔེ། །
དེ་ལ་ཞྭ་དཔེ་མི་ཉན་བསམས། །
བྱང་གླིང་ནོར་གྱི་གཞི་མ་དེ། །
གྲུ་བཞི་ངོས་བཞི་ཤོ་འདྲ་དགའ། །
དེ་ལ་ཞྭ་དཔེ་མི་ཉན་བསམས། །
དབུས་ཀྱི་རི་རབ་ལྷུན་པོ་དེ། །
ཟུར་བཞི་ལོགས་བརྒྱད་རྩེ་དང་དགུ། །
དེ་ཡང་ཞྭ་དཔེ་མི་ཉན་བསམ། །
དེ་ནས་རྒྱ་གར་ཡུལ་ལ་སོང་། །
རྒྱ་གར་སྤོས་རི་ངད་ལྡན་དེ། །
སེངྒེ་གཡུ་རལ་རྒྱས་འདྲ་གདའ། །
དེ་ལ་ཞྭ་དཔེ་མི་ཉན་བསམས། །
བྱ་རྒོད་ཕུང་བོའི་རི་བོ་དེ། །
འབྲས་དཀར་ཕྱུར་བུར་སྤུངས་འདྲའི་རི། །
དེ་ལ་ཞྭ་དཔེ་མི་ཉན་བསམས། །
དེ་ནས་རྒྱ་ནག་ཡུལ་ལ་སོང་། །
རྒྱ་ནག་རི་བོ་རྩེ་ལྔ་དེ། །
ལྷ་ལ་མཎྜལ་ཕུལ་འདྲ་གདའ། །
དེ་ལ་ཞྭ་དཔེ་མི་ཉན་བསམས། །
རྒྱ་ནག་གླང་ཆེན་འགྱིང་རི་དེ། །
གླང་ཆེན་ཐང་ལ་འགྱིང་འདྲའི་རི། །
དེ་ལ་ཞྭ་དཔེ་མི་ཉན་བསམས། །
རྒྱ་རི་བསམ་པའི་དོན་འགྲུབ་དེ། །
ནོར་བུ་སྤང་ལ་བཞག་འདྲའི་རི། །
དེ་ལ་ཞྭ་དཔེ་མི་ཉན་བསམས། །
རྒྱ་ཡང་དགུ་འདུས་པའི་གསེར་ཟམ་དེ། །
སྨན་བུ་མོས་ཐག་སྣེ་འཐེན་འདྲའི་ཟམ། །
དེ་ལ་ཞྭ་དཔེ་མི་ཉན་བསམས། །
དེ་ནས་སྐུ་རྒྱལ་བོད་ལ་སོང་། །
སྟོད་ཀྱི་གངས་དཀར་ཏི་སེ་དེ། །
ཤེལ་གྱི་མཆོད་རྟེན་བཞེངས་འདྲའི་རི། །
དེ་ལ་ཞྭ་དཔེ་མི་ཉན་བསམས། །
མ་ཕམ་གཡུ་ཡི་མཚོ་མོ་དེ། །
གཡུ་ཡི་མཎྚལ་དྲལ་བཤམས་འདྲའི་མཚོ། །
དེ་ལ་ཞྭ་དཔེ་མི་ཉན་བསམས། །
དོང་ར་བོན་གྱི་གནས་ཆེན་དེ། །
དར་དཀར་དགུང་ལ་ཕྱར་འདྲའི་རི། །
དེ་ལ་ཞྭ་དཔེ་མི་ཉན་བསམས། །
བྱང་སྟོད་ཇོ་བོ་གནམ་རི་དེ། །
མི་ནག་པོ་སོ་ལ་བུད་འདྲའི་རི། །
དེ་ལ་ཞྭ་དཔེ་མི་ཉན་བསམས། །
བྱང་གི་གཉན་ཆེན་ཐང་ལྷ་དེ། །
ལྷ་ལ་ཕྱེ་མར་བཤམས་འདྲའི་རི། །
དེ་ལ་ཞྭ་དཔེ་མི་ཉན་བསམས། །
སྟོད་ཁྲི་བཙན་རྒྱལ་གྱི་སྐུ་སྟོད་དེ། །
གསེར་གཞོང་མར་ཁུས་བཀང་འདྲའི་རི། །
དེ་ལ་ཞྭ་དཔེ་མི་ཉན་བསམས། །
ཤང་བཟང་རྒྱལ་གྱི་དབུ་ཟུར་དེ། །
དམར་གཏོར་ཁྲག་གིས་བྲན་འདྲའི་རི། །
དེ་ལ་ཞྭ་དཔེ་མི་ཉན་བསམས། །
འདན་སྐེད་ཨ་མྱེས་ཁྲི་རྒྱལ་དེ། །
ཆང་རྫ་སྤང་ལ་བཞག་འདྲའི་རི། །
དེ་ལ་ཞྭ་དཔེ་མི་ཉན་བསམས། །
ཡག་ལ་རྒྱལ་གྱི་ཐོད་དཀར་དེ། །
ལྷ་གཡག་གངས་ལ་འགྱིངས་འདྲའི་རི། །
དེ་ལ་ཞྭ་དཔེ་མི་ཉན་བསམས། །
ཡག་མ་རྒྱལ་གྱི་འབྲི་ཁྲིད་དེ། །
འབྲི་ཟལ་མོས་བེའུ་ཁྲིད་འདྲའི་རི། །
དེ་ལ་ཞྭ་དཔེ་མི་ཉན་བསམས། །
ངང་པ་རྒྱལ་གྱི་ཀླུ་ཕྱུག་དེ། །
ངང་བས་ངང་ཕྲུག་ཁྲིད་འདྲའི་རི། །
དེ་ལ་ཞྭ་དཔེ་མི་ཉན་བསམས། །
སྟག་སྙིང་རྒྱལ་གྱི་ལྷ་བཙན་དེ། །
དཀར་གཏོར་ལྷ་ལ་ཕུལ་འདྲའི་རི། །
དེ་ལ་ཞྭ་དཔེ་མི་ཉན་བསམས། །
གད་པ་རྒྱལ་གྱི་སྟེང་དཀར་དེ། །
མི་རྒོད་དགྲ་ལ་ཁྲོས་འདྲའི་རི། །
དེ་ལ་ཞྭ་དཔེ་མི་ཉན་བསམས། །
སྦར་མོ་རྒྱལ་གྱི་ཕྱུག་རི་དེ། །
རྨོག་དཀར་ཐང་ལ་བཞག་འདྲའི་རི། །
དེ་ལ་ཞྭ་དཔེ་མི་ཉན་བསམས། །
མྱུ་གུ་རྒྱལ་གྱི་རྩེ་རྣོན་དེ། །
མདུང་སོ་གནམ་ལ་བསྟན་འདྲའི་རི། །
དེ་ལ་ཞྭ་དཔེ་མི་ཉན་བསམས། །
བྲག་བཙན་རྒྱལ་གྱི་ཕོ་ལྷ་དེ། །
རྨོག་ལ་དར་འཕྲུ་བཙུགས་འདྲའི་རི། །
དེ་ལ་ཞྭ་དཔེ་མི་ཉན་བསམས། །
གྲོ་བོ་རྒྱལ་གྱི་རྫ་དཀར་དེ། །
ཕོ་རྒྱུ་མེད་ཐུ་བ་བཟེད་འདྲའི་རི། །
དེ་ལ་ཞྭ་དཔེ་མི་ཉན་བསམས། །
བྲེ་གུ་རྒྱལ་གྱི་ལེབ་ལེབ་དེ། །
འཕྱི་བ་ཐང་ལ་བརྒྱུགས་འདྲའི་རི། །
དེ་ལ་ཞྭ་དཔེ་མི་ཉན་བསམས། །
གྲུམ་པ་རྒྱལ་གྱི་སུག་སུག་དེ། །
གྲུམ་པ་ཁུང་ལ་འཛུལ་འདྲའི་རི། །
དེ་ལ་ཞྭ་དཔེ་མི་ཉན་བསམས། །
བྲེ་གུ་རྒྱལ་གྱི་སྟག་ཆེན་དེ། །
མདའ་ལ་དར་དམར་བཏགས་འདྲའི་རི། །
དེ་ལ་ཞྭ་དཔེ་མི་ཞན་བསམས། །
ནུབ་དམ་ཅན་ལྕགས་ཀྱི་བླ་རི་དེ། །
ཁྲོ་ཡི་ཕུར་བ་བཙུགས་འདྲའི་རི། །
དེ་ལ་ཞྭ་དཔེ་མི་ཉན་བསམས། །
བྱང་གི་ཟིལ་དཀར་ལྷ་ལུ་དེ། །
འབྲོང་འབྲིས་བེའུ་ཁྲིད་འདྲའི་རི། །
དེ་ལ་ཞྭ་དཔེ་མི་ཉན་བསམས། །
གཞི་བདག་ཁ་རག་ལྕམ་མོ་དེ། །
རི་མཐོ་དགུང་གི་སོ་པ་འདྲ། །
དེ་ལ་ཞྭ་དཔེ་མི་ཉན་བསམས། །
ཡར་སྟོད་ཡར་ལྷ་ཤམ་པོ་དེ། །
མཁའ་འགྲོ་རིགས་ལྔ་མནན་འདྲའི་རི། །
དེ་ལ་ཞྭ་དཔེ་མི་ཉན་བསམས། །
གཞི་བདག་རྐང་བཙུགས་དེ་མོ་དེ། །
ཤ་ཡུ་མོས་ཕྲུ་གུ་ཁྲིད་འདྲའི་རི། །
དེ་ལ་ཞྭ་དཔེ་མི་ཉན་བསམས། །
བོན་རིང་གནས་ཀྱི་གང་བ་དེ། །
མ་མཁའ་འགྲོ་ཚོགས་འཁོར་བཤམས་འདྲའི་རི། །
དེ་ལ་ཞྭ་དཔེ་མི་ཉན་བསམས། །
གནས་མཆོག་པདྨ་སྤུངས་པ་དེ། །
ཐང་ལ་མེ་ཏོག་སྤུངས་འདྲའི་རི། །
དེ་ལ་ཞྭ་དཔེ་མི་ཉན་བསམས། །
མོན་གྱི་ཁ་ཤ་སྨྱུག་རི་དེ། །
གཡི་དཀར་ཟུར་ནས་བལྟས་འདྲའི་རི། །
དེ་ལ་ཞྭ་དཔེ་མི་ཉན་བསམས། །
བྱང་གི་བྱེ་མ་དཀར་ལུ་དེ། །
ལུག་གཡང་དཀར་དུང་ཕྲེང་བསྟར་འདྲའི་རི། །
དེ་ལ་ཞྭ་དཔེ་མི་ཉན་བསམས། །
ཧོར་གྱི་ལྕོག་ལྷ་མཚལ་རྩེ་དེ། །
བཙན་ལ་དམར་གཏོར་ཕུལ་འདྲའི་རི། །
དེ་ལ་ཞྭ་དཔེ་མི་ཉན་བསམས། །
སོག་གི་གཡག་ལ་སེར་བོ་དེ། །
ཁལ་མ་ཕྱི་བལྟས་བྱས་འདྲའི་རི། །
དེ་ལ་ཞྭ་དཔེ་མི་ཉན་བསམས། །
ཨག་གི་ཚ་ཁུར་མུ་ནེ་དེ། །
ཁྱི་བདའ་ལི་ལང་ཚུགས་བྱེད་འདྲའི་རི། །
དེ་ལ་ཞྭ་དཔེ་མི་ཉན་བསམས། །
བོད་ཀྱི་སྤེན་ནེ་རི་བཀྲ་དེ། །
ལོང་དཀར་དམར་ལ་ཁར་འཐེན་འདྲའི་རི། །
དེ་ལ་ཞྭ་དཔེ་མི་ཉན་བསམས། །
རྟ་ཤོད་བྱེ་མ་རི་བརྒྱད་དེ། །
རྟ་སྒ་མས་སྒ་མ་ཁྲིད་འདྲའི་རི། །
དེ་ལ་ཞྭ་དཔེ་མི་ཉན་བསམས། །
ནག་ཤོད་ནགས་མ་ཛམ་བྷ་དེ། །
ཕ་བླ་མས་དབང་བསྐུར་བྱེད་འདྲའི་རི། །
དེ་ལ་ཞྭ་དཔེ་མི་ཉན་བསམས། །
རྒྱ་ཤོད་རྒྱལ་མོ་རི་ཕྱུག་དེ། །
རྒྱལ་པོ་གདན་ལ་བཞུགས་འདྲའི་རི། །
དེ་ལ་ཞྭ་དཔེ་མི་ཉན་བསམས། །
ཀིས་ཤོད་ར་མས་རེའུ་ཁྲིད་དེ། །
ར་གྭ་མས་རེའུ་མཚེ་ཁྲིད་འདྲའི་རི། །
དེ་ལ་ཞྭ་དཔེ་མི་ཉན་བསམས། །
ཤི་ཤོད་རྫ་རི་དམར་རྒྱས་དེ། །
བན་དེས་ཆོས་གོས་བཀྲམ་འདྲའི་རི། །
དེ་ལ་ཞྭ་དཔེ་མི་ཉན་བསམས། །
ལྕི་སྟོད་རིན་ཆེན་སྤུངས་འདྲ་དེ། །
རི་ནག་སོག་པོ་ཁྲོས་འདྲའི་རི། །
དེ་ལ་ཞྭ་དཔེ་མི་ཉན་བསམས། །
ལྕི་སྐེད་བཙན་རྒོད་རི་དམར་དེ། །
དཔའ་བོ་དགྲ་ལ་ཆས་འདྲའི་རི། །
དེ་ལ་ཞྭ་དཔེ་མི་ཉན་བསམས། །
ལྕི་སྨད་ར་ཚ་རྫོང་ནག་དེ། །
མགར་བས་སོལ་བ་སྤུངས་འདྲའི་རི། །
དེ་ལ་ཞྭ་དཔེ་མི་ཉན་བསམས། །
བྱང་གླིང་ཇོ་བོ་རྗེ་རྒྱལ་དེ། །
སྟག་ཤར་པས་ཁྲབ་དཀར་གྱོན་འདྲའི་རི། །
དེ་ལ་ཞྭ་དཔེ་མི་ཉན་བསམས། །
ལྷོ་ཡི་རོང་ལྷ་རྒྱལ་མཚན་དེ། །
མི་ཆེན་ཐང་ལ་འགྱིངས་འདྲའི་རི། །
དེ་ལ་ཞྭ་དཔེ་མི་ཉན་བསམས། །
རོང་བཙན་ཁ་བ་དཀར་པོ་དེ། །
རྒྱལ་པོས་དར་ཐོད་བཅིངས་འདྲའི་རི། །
དེ་ལ་ཞྭ་དཔེ་མི་ཉན་བསམས། །
ཇོ་བོ་འོད་དེ་གུང་རྒྱལ་དེ། །
ལྷ་བཤོས་མར་གྱིས་བརྒྱན་འདྲའི་རི། །
དེ་ལ་ཞྭ་དཔེ་མི་ཉན་བསམས། །
གནས་ཆེན་སྒམ་པོ་དཔའ་རི་དེ། །
ལྷ་ཕྲན་གར་རྩེ་བྱེད་འདྲའི་རི། །
དེ་ལ་ཞྭ་དཔེ་མི་ཉན་བསམས། །
མགར་གྱི་རྡོ་རྗེ་བཙན་བྲག་དེ། །
དཔའ་བོ་དགྲ་ལ་ཁྲོས་འདྲའི་རི། །
དེ་ལ་ཞྭ་དཔེ་མི་ཉན་བསམས། །
སྒ་ཡི་སྒྱོགས་ཆེན་གདོང་ར་དེ། །
ཁ་ཊྭཱཾག་རྩེ་གསུམ་བཙུགས་འདྲའི་རི། །
དེ་ལ་ཞྭ་དཔེ་མི་ཉན་བསམས། །
མངར་གྱི་སེ་བོ་ཐོད་དམར་དེ། །
དར་དམར་ཐོད་ལ་བཅིངས་འདྲའི་རི། །
དེ་ལ་ཞྭ་དཔེ་མི་ཉན་བསམས། །
ཤར་གྱི་སྒམ་བུ་རི་རྒྱལ་དེ། །
དར་གྱི་རུ་མཚོན་གཡབ་འདྲའི་རི། །
དེ་ལ་ཞྭ་དཔེ་མི་ཉན་བསམས། །
གནམ་གྱི་ཁུ་སྐྱོང་རྒོད་མགོ་དེ། །
གསེར་ཟོ་གནམ་དུ་གཏད་འདྲའི་རི། །
དེ་ལ་ཞྭ་དཔེ་མི་ཉན་བསམས། །
རོང་གི་རྡོ་རྗེ་དྲིལ་དཀར་དེ། །
རྒོད་ཐང་དཀར་གཤོག་པ་བརྐྱངས་འདའི་རི། །
དེ་ལ་ཞྭ་དཔེ་མི་ཞན་བསམས། །
རོང་གི་རྡོ་རྗེ་དྲིལ་དཀར་དེ། །
རྒོད་ཐང་དཀར་གཤོག་པ་བརྐྱངས་འདྲའི་རི། །
དེ་ལ་ཞྭ་དཔེ་མི་ཉན་བསམས། །
མོན་གྱི་ཇ་ཁུར་སེ་བོ་དེ། །
སྟག་ཤར་པས་གཡུ་ཐུལ་གྱོན་འདྲའི་རི། །
དེ་ལ་ཞྭ་དཔེ་མི་ཉན་བསམས། །
གཙང་རྒྱལ་ཇོ་བོ་དགེ་ཁྲོམ་དེ། །
ལུག་ལ་དར་དཀར་བཏགས་འདྲའི་རི། །
དེ་ལ་ཞྭ་དཔེ་མི་ཉན་བསམས། །
སྒ་ཟི་ཉི་མ་རྫ་རི་དེ། །
རྒོད་ཕྲུག་དཔུང་པ་བརྐྱངས་འདྲའི་རི། །
དེ་ལ་ཞྭ་དཔེ་མི་ཉན་བསམས། །
འབྲུ་ཡི་ལིང་ལ་ཆོས་གོས་དེ། །
བན་ཆོས་པས་ཡི་གེ་ཀློག་འདྲའི་རི། །
དེ་ལ་ཞྭ་དཔེ་མི་ཉན་བསམས། །
རྒྱལ་རོང་དམག་ལྷ་ཁྲོ་བཙན་དེ། །
དྲེད་མོང་རལ་ཁ་གསིག་འདྲའི་རི། །
དེ་ལ་ཞྭ་དཔེ་མི་ཉན་བསམས། །
ཤར་གྱི་རྨ་རྒྱལ་སྤོམ་ར་དེ། །
གངས་ལ་སེངྒེ་འགྱིངས་འདྲའི་རི། །
དེ་ལ་ཞྭ་དཔེ་མི་ཉན་བསམས། །
རྨ་ཡི་བློན་པོ་བོལ་རྒྱལ་དེ། །
རྒད་པོས་འབྲོང་ཐུལ་གྱོན་འདྲའི་རི། །
དེ་ལ་ཞྭ་དཔེ་མི་ཉན་བསམས། །
ཤར་གྱི་གཡག་ར་ལྷ་རྩེ་དེ། །
མཁར་ལ་རྒྱ་ཕིབས་བཀལ་འདྲའི་རི། །
དེ་ལ་ཞྭ་དཔེ་མི་ཉན་བསམས། །
གེར་མཚོའི་རི་དམར་དབང་ཞུ་དེ། །
ཕ་བླ་མས་པད་ཞྭ་མནབས་འདྲ་ལ། །
པད་ཞྭ་དར་གྱིས་བརྒྱན་འདྲའི་རི། །
དེ་ལ་ཞྭ་དཔེ་འཇོག་དགོས་བསམས། །
དེ་ལ་གཡས་བསྐོར་ལན་གསུམ་བྱས། །
དེ་ལ་ཆག་ཚད་ལེན་པར་བྱས། །
བཟོ་བོ་བཞི་པོས་ཡིད་ལ་བཞག །
ད་རུང་བཟོ་ལ་གླིང་ཆ་བྱས། །
བཟོ་བོ་ཁོ་རང་རིག་པས་དཔྱད། །
ཞྭ་བདག་ང་རང་ཁ་བཀོད་བྱས། །
ཉི་ཤུ་དགུ་ལ་བཟོ་ཆ་དྲས། །
སྟེང་ལ་རས་དང་ཕྱི་པ་སྦྱར། །
ཡར་ཚེས་གཅིག་ལ་བཟོ་བོས་བཙེམས། །
ཚེས་པ་གསུམ་ལ་བྱ་སྒྲོས་བརྒྱན། །
ཚེས་པ་བཅུ་ལ་ཞྭ་དར་བཏགས། །
བཅོ་ལྔ་ཨ་འཛོམ་མགོ་ལ་གྱོན། །
ཞྭ་སྟོན་ཉི་མ་བཅུ་གསུམ་བྱས། །
ས་བཅུ་གསུམ་ནོན་པའི་རྟེན་འབྲེལ་འགྲིགས། །
དེ་ནས་ཧོར་གྱི་རྒྱལ་བློན་རྣམས། །
ཞྭ་ངོས་གྲུ་བཞིར་འོང་ལེ་འདི། །
ཚེ་དང་བསོད་ནམས་རྒྱས་པའི་རྟགས། །
ཞྭ་ཟུར་ཟུར་གསུམ་འོང་ལེ་འདི། །
འདྲེ་སྲིན་དྲག་པོ་འདུལ་བའི་རྟགས། །
ཞྭ་འདི་རི་རབ་ལྷུན་པོར་དཔེ། །
ངོས་བཞི་གླིང་ཆེན་བཞི་ལ་དཔེ། །
ཟུར་བཞི་གླིང་ཕྲན་བརྒྱད་ལ་དཔེ། །
བྱ་སྒྲོ་རྣམ་རྒྱལ་ཁང་བཟང་དཔེ། །
རས་བསྐོར་མཐའ་ཡི་རྒྱ་མཚོ་དཔེ། །
ཞྭ་འདིའི་དཔེ་འཇོག་དེ་འདྲ་ཡིན། །
དེ་ནས་ཧོར་གྱི་རྒྱལ་བློན་རྣམས། །
ཞྭ་ལ་སྒང་བཞི་ཡོད་པ་དེ། །
རྔུལ་ཟླ་ཟལ་མོའི་སྒང་དང་གཅིག །
སྤོ་འབོར་སྒང་གི་སྒང་གཉིས་དང་། །
རྨ་རྫ་ཟལ་མོའི་སྒང་དང་གསུམ། །
ཨ་སྐྱིད་ལྷོ་མོན་སྒང་དང་བཞི། །
ཨ་འཛོམ་ཞྭ་ཡི་སྒང་བཞི་ཡིན། །
ཞྭ་ལ་ལོགས་བཞི་ཡོད་པ་དེ། །
མི་ཕམ་རོལ་པའི་མཚོ་བཞི་ཡིན། །
ཤར་གྱི་ཁྲིམས་མཚོ་ཕྱུག་མོ་གཅིག །
ལྷོ་ཡི་ཆོས་མཚོ་ཕྱུག་མོ་གཉིས། །
ནུབ་ཀྱི་གཡུ་མཚོ་ཕྱུག་མོ་གསུམ། །
བྱང་གི་གནམ་མཚོ་ཕྱུག་མོ་བཞི། །
ཨ་འཛོམ་ཞྭ་ཡི་མཚོ་བཞི་ཡིན། །
ཞྭ་གཡས་གཡོན་རྣ་འདབས་སྦྱར་བ་འདི། །
སྨར་ཁམས་སྒང་དང་ཚ་བ་སྒང་། །
ཆུ་བཞི་སྒང་དྲུག་ཆགས་ཚུལ་ཡིན། །
ཞྭ་ལ་བྱ་ཁྱུང་བརྒྱན་པ་འདི། །
ཁམས་གསུམ་དབང་དུ་སྡུད་པའི་རྟགས། །
ཁྱུང་ལ་གཤོག་དྲུག་རྒྱས་པ་འདི། །
སྲིད་གསུམ་ཟིལ་གྱིས་གནོན་པའི་རྟགས། །
ཞྭ་ལ་མེ་ལོང་བཏགས་པ་འདི། །
མངོན་ཤེས་ཐོགས་པ་མེད་པའི་རྟགས། །
རྩེ་ལ་བྱ་སྒྲོས་བརྒྱན་པ་དེ། །
ཕ་བླ་མ་འབྲལ་བ་མེད་པའི་རྟགས། །
དེ་ལ་དར་ཤམ་བཏགས་པ་དེ། །
བྱིན་རླབས་སྤྲིན་ཕུང་འཁྲིགས་པའི་རྟགས། །
ཞྭ་ལ་རྡོ་རྗེས་བརྒྱན་པ་འདི། །
ཡི་དམ་ལུས་ལ་ཤར་བའི་རྟགས། །
དེ་ལ་མགྲོན་ཚོམ་བརྒྱན་པ་འདི། །
དངོས་གྲུབ་ཟད་པ་མེད་པའི་རྟགས། །
ཞྭ་ལ་དུང་ལོང་བརྒྱན་པ་འདི། །
མཁའ་འགྲོ་རང་ལ་འཁོར་བའི་རྟགས། །
དེ་ལ་རྩ་ཐོག་བརྒྱན་པ་འདི། །
རྩ་ཁམས་མཁའ་འགྲོས་བཀང་བའི་རྟགས། །
ལྕགས་ནག་ཟུར་གསུམ་བརྒྱན་པ་འདི། །
ཆོས་སྐྱོང་ལས་ལ་རྦད་པའི་རྟགས། །
དེ་ལ་ཐོག་གིས་བརྒྱན་པ་འདི། །
རྣོ་མྱུར་ཐོག་དང་འདྲ་བའི་རྟགས། །
ཞྭ་ལ་ཕུར་བས་བརྒྱན་པ་འདི། །
མཐུ་རྩལ་ཐོགས་པ་མེད་པའི་རྟགས། །
ཁྲབ་བྱང་མིག་དགུས་བརྒྱན་པ་འདི། །
དགྲ་ལྷ་མཐུ་རྩལ་ཆེ་བའི་རྟགས། །
དེ་ལ་མགྲོན་བུ་བཏགས་པ་འདི། །
ཝེར་མའི་མགོན་སྐྱབས་ཆེ་བའི་རྟགས། །
གཡས་ལ་ལྕགས་མདས་བརྒྱན་པ་འདི། །
སྐུ་སྲོག་བྲག་ལས་སྲ་བའི་རྟགས། །
གཡོན་ལ་ལྕགས་གཞུས་བརྒྱན་པ་འདི། །
ཚེ་རིང་ཐུང་འདོམ་ལ་འཇལ་བའི་རྟགས། །
གཞུ་རྒྱུད་ལྕགས་རྒྱུད་བསྒྲིལ་བ་འདི། །
དགྲ་མ་ཐུབ་ཀླད་ནས་འགུགས་པའི་རྟགས། །
ཞྭ་ལ་མེ་ཏོག་བརྒྱན་པ་འདི། །
སྐྱེ་འཆི་རང་དབང་ཐོབ་པའི་རྟགས། །
ཉི་མ་ཟླ་བས་བརྒྱན་པ་འདི། །
མ་རིག་མུན་པ་སེལ་བའི་རྟགས། །
དེ་ལ་ནོར་བུས་བརྒྱན་པ་འདི། །
འདོད་དགུའི་ཆར་བ་འབབ་པའི་རྟགས། །
མེ་ཏོག་པདྨས་བརྒྱན་པ་འདི། །
འཁོར་བར་ཞེན་ཆགས་སྤོང་བའི་རྟགས། །
ཞྭ་ལ་ཟངས་ཁབ་འཛེར་བ་འདི། །
ཕོ་ལྷས་རྟག་ཏུ་སྲུང་བའི་རྟགས། །
དར་མཚོན་སྣ་ལྔས་བརྒྱན་པ་འདི། །
སྐུ་ལྔ་ལྷུན་གྱིས་གྲུབ་པའི་རྟགས། །
ཞྭ་ལ་སྦ་ཐོག་བརྒྱན་པ་འདི། །
རང་རིག་སྦ་ལས་དྲང་བའི་རྟགས། །
རིན་ཆེན་སྣ་ལྔས་བརྒྱན་པ་འདི། །
སྐུ་ལྔ་འདུ་འབྲལ་མེད་པའི་རྟགས། །
ཨ་དཀར་འབྲུ་དྲུག་བརྒྱན་པ་འདི། །
འགྲོ་དྲུག་ཐར་ལམ་འདྲེན་པའི་རྟགས། །
གཡས་ན་དུང་གིས་བརྒྱན་པ་འདི། །
ཞལ་ལུ་དུང་ལས་དཀར་བའི་རྟགས། །
མུ་མེན་ཏོག་པོས་བརྒྱན་པ་འདི། །
ཕོ་རྒྱུད་མཐིང་ལས་བཀྲ་བའི་རྟགས། །
དུང་མིག་བྱུ་རུས་བརྒྱན་པ་འདི། །
དགྲ་མིག་ཁྲག་གིས་གཅར་བའི་རྟགས། །
གཡོན་ན་ཤེལ་གྱིས་བརྒྱན་པ་ནི། །
མོ་རྒྱུད་ཤེལ་ལས་གསལ་བའི་རྟགས། །
གཡུ་ཆུང་དྲུག་དཀར་བརྒྱན་པ་འདི། །
མི་རྒྱུད་གཡུ་ལས་བཟང་བའི་རྟགས། །
དཀར་པོ་ཚོན་སྐུད་བཀྲག་པ་འདི། །
སྡེ་བུ་དྲུག་ཆགས་ཚུལ་ཤེས་པའི་རྟགས། །
ཞྭ་སྐེད་ཁ་ཞེང་ཆེ་བ་དེ། །
སྐྱིད་ཀྱི་ཁ་ཞེང་ཆེ་བའི་རྟགས། །
ཞྭ་སྐེད་འདི་ནས་དགྱེ་བ་ནི། །
འཁོར་བར་ཞེན་པ་ལོག་པའི་རྟགས། །
ཞྭ་རྩེ་ཐུར་ལ་གུག་པ་ནི། །
གཉོམ་ཆུང་ཐབས་ཀྱིས་སྐྱོང་བའི་རྟགས། །
ཞྭ་སྒྲོ་མདུན་ལ་སྤུངས་པ་ནི། །
མདུན་ལམ་འོད་ཟེར་འཕྲོ་བའི་རྟགས། །
ཞྭ་རྩེ་གྱེན་ལ་འགྲེང་བ་ནི། །
དབུ་འཕང་དགུང་ལས་མཐོ་བའི་རྟགས། །
ཞྭ་འདབས་ཐུར་ལ་ཞོམ་པ་འདི། །
ངན་སོང་སྐྱེ་སྒོ་གཅོད་པའི་རྟགས། །
ཞྭ་འདབས་རས་ཀྱིས་བསྐོར་བ་འདི། །
བསྟན་པ་ལྕགས་རིས་བསྐོར་བའི་རྟགས། །
སྐུད་པ་དཀར་ནག་བསྒྲིམས་པ་འདི། །
དགེ་སྡིག་རྒྱུ་འབྲས་འབྱེད་པའི་རྟགས། །
ཞྭ་ཟུར་རས་ཀྱིས་བཏུམས་པ་འདི། །
དགྲ་མགོ་རེ་བས་བཏུམས་པའི་རྟགས། །
ཕྱི་དཀར་བ་མ་ཡིན་སྐྱ་བ་ཡིན། །
དགྲ་སྡེ་ཡི་མུག་སྐྱེ་བའི་རྟགས། །
ནང་ནག་པོ་མ་ཡིན་སྣུམ་པ་ཡིན། །
རང་སྡེ་ཡིད་སྨོན་སྣུམ་པའི་རྟགས། །
ཞྭ་ལུང་དུང་གིས་བརྒྱན་པ་འདི། །
མི་ཚེ་དགེ་ལ་སྐྱེལ་བའི་རྟགས། །
ཟུར་བཞི་ལོགས་བརྒྱད་རྩེ་དང་དགུ། །
ཐེག་པ་རིམ་དགུ་རྫོགས་པའི་རྟགས། །
རྩེ་ལ་རྒོད་སྒྲོ་བཙུགས་པ་ནི། །
ལྟ་བས་ནམ་འཕང་གཅོད་པའི་རྟགས། །
འུག་པའི་སྒྲོ་གཅིག་སྒྲོན་པ་ནི། །
སྒོམ་པས་བཙན་ས་ཟིན་པའི་རྟགས། །
གླག་གི་སྒྲོ་གཅིག་སྒྲོན་པ་ནི། །
སྤྱོད་པ་རྩལ་ཆེན་ཟིན་པའི་རྟགས། །
རྨ་བྱའི་སྒྲོ་གཅིག་སྒྲོན་པ་ནི། །
དུག་ལྔ་ཟས་སུ་ཟ་བའི་རྟགས། །
ཆུ་བྱའི་སྒྲོ་གཅིག་སྒྲོན་པ་ནི། །
འཁོར་བའི་འདམ་ནས་བརྒལ་བའི་རྟགས། །
ཁུ་བྱུག་སྒྲོ་གཅིག་སྒྲོན་པ་ནི། །
དགེ་སྡིག་དབྱེ་བ་འབྱེད་པའི་རྟགས། །
ནེ་ཙོའི་སྒྲོ་གཅིག་སྒྲོན་པ་ནི། །
འབྲས་བུ་སྐུ་གསུམ་ལོན་པའི་རྟགས། །
རྒྱ་བྱའི་སྒྲོ་གཅིག་སྒྲོན་པ་ནི། །
འགྲོ་དོན་ངོ་མཚར་བྱེད་པའི་རྟགས། །
དེ་ཕོའི་སྒྲོ་གཅིག་སྒྲོན་པ་ནི། །
ཐེག་ཆེན་ས་གཞི་ནོན་པའི་རྟགས། །
ངང་པའི་སྒྲོ་གཅིག་སྒྲོན་པ་ནི། །
བན་ཆོས་བོན་ལ་བཤད་པའི་རྟགས། །
བྱ་ཝང་སྒྲོ་གཅིག་སྒྲོན་པ་ནི། །
བོན་ཆོས་བན་ལ་བསྒྱུར་བའི་རྟགས། །
གོང་མོའི་སྒྲོ་གཅིག་སྒྲོན་པ་ནི། །
མཁའ་འགྲོ་ཞིང་ཁམས་འགྲོ་བའི་རྟགས། །
ཁྲུང་ཁྲུང་སྒྲོ་གཅིག་སྒྲོན་པ་ནི། །
སྡུག་བསྔལ་མཚོ་ལས་བརྒལ་བའི་རྟགས། །
ཕུག་རོན་སྒྲོ་གཅིག་སྒྲོན་པ་ནི། །
གྲུབ་མཐའ་ཕྱོགས་རིས་མེད་པའི་རྟགས། །
བྱ་རོག་སྒྲོ་གཅིག་སྒྲོན་པ་ནི། །
ཆོས་ཉིད་འགྱུར་བ་མེད་པའི་རྟགས། །
ཁྲ་ཡི་སྒྲོ་གཅིག་སྒྲོན་པ་ནི། །
འགྲོ་འདུལ་ནུས་པ་ཆེ་བའི་རྟགས། །
བྱ་སྒྲོ་སྣ་ཚོགས་བརྒྱན་པ་འདི། །
ཆོས་ཉིད་མ་བུ་འདྲེས་པའི་རྟགས། །
ང་འཛོམ་པའི་མགོ་ལ་གྱོན་པ་འདི། །
ས་བཅུ་ཟིལ་གྱིས་གནོན་པའི་རྟགས། །
གླིང་བཞི་དཔེ་ལ་བཞག་པ་འདི། །
འགྲོ་དོན་ཁྱབ་རྒྱ་ཆེ་བའི་རྟགས། །
དེ་ནས་རྒྱལ་བློན་ཞལ་དྲོ་རྣམས། །
ཞྭ་འདི་ལ་ཆགས་ཚུལ་འདི་འདྲ་ཡོད། །
ཞྭ་སོར་ལ་འཇལ་ན་སོར་གང་ཡོད། །
ཞྭ་ལ་སོར་གང་མི་སྲིད་དེ། །
ཞྭ་ཟུར་འདི་ལ་སོར་གང་ཡོད། །
གཉེན་སོར་གང་མན་ལ་ཅི་གཏོང་རྟགས། །
ཚོན་ལ་འཇལ་ན་ཚོད་གང་ཡོད། །
ཞྭ་ལ་མཚོན་གང་མི་སྲིད་དེ། །
ཞྭ་རྩེ་འདི་ལ་ཚོན་གང་ཡོད། །
དགྲ་ཚོན་གང་ཡན་ལ་མི་གཏོང་རྟགས། །
མཛུབ་ལ་འཇལ་ན་མཛུབ་གང་ཡོད། །
ཞྭ་ལ་མཛུབ་གང་མི་སྲིད་དེ། །
ཞྭ་གདོང་འདི་ལ་མཛུབ་གང་ཡོད། །
གདམས་ངག་མཛུབ་ཁྲིད་ཤེས་པའི་རྟགས། །
མཐོ་ལ་འཇལ་ན་མཐོ་གང་ཡོད། །
ཞྭ་ལ་མཐོ་གང་མི་སྲིད་དེ། །
ལེབ་ཞེང་དེ་ལ་མཐོ་གང་ཡོད། །
ལྷ་གོང་མའི་ངོ་སོ་མཐོ་བའི་རྟགས། །
རྐང་ལ་འཇལ་ན་རྐང་གང་ཡོད། །
ཞྭ་ལ་རྐང་གང་མི་སྲིད་དེ། །
ཞྭ་གཟུགས་འདི་ལ་རྐང་གང་ཡོད། །
རྐང་གཉིས་ཆོས་ལ་འགྱུར་བའི་རྟགས། །
ཁྲུ་ལ་འཇལ་ན་ཁྲུ་གང་ཡོད། །
ཞྭ་ལ་ཁྲུ་གང་མི་སྲིད་དེ། །
ཞྭ་ཟུར་འདི་ལ་ཁྲུ་གང་ཡོད། །
གྲུབ་པས་གྲུབ་རྟགས་བཞག་པའི་རྟགས། །
འདོམ་ལ་འཇལ་ན་འདོམ་གང་ཡོད། །
ཞྭ་ལ་འདོམ་གང་མི་སྲིད་དེ།།
ཞྭ་ལུང་དེ་ལ་འདོམ་གང་ཡོད། །
ཚེ་ལ་རང་དབང་ཐོབ་པའི་རྟགས། །
པང་ལ་བཞག་ན་པང་གང་ཡོད། །
ཞྭ་ལ་པང་གང་མི་སྲིད་དེ།།
ཞྭ་འདབས་འདི་ལ་པང་གང་ཡོད། །
མི་དགེ་སྡིག་པ་སྤོང་བའི་རྟགས།།
ཕྲག་ལ་འཇལ་ན་ཕྲག་གང་ཡོད། །
ཞྭ་ལ་ཕྲག་གང་མི་སྲིད་དེ། །
ལེབ་ལ་བཞག་ན་ཕྲག་གང་ཡོད། །
དགེ་བ་དང་དུ་བླངས་པའི་རྟགས། །
དེ་ནས་རྒྱལ་བློན་ཞལ་གྲོ་རྣམས། །
ཞྭ་འདི་མི་འདྲ་གཅིག་ཀྱང་མེད། །
ཞྭ་རྩེ་སྒྲོ་ཡིས་བརྒྱན་པ་འདི། །
གངས་ཏི་སེ་ཤེལ་གྱིས་བསྐོར་བ་འདྲ། །
ཞྭ་ལ་ཟུར་བཞི་བཏོད་པ་འདི། །
འབབ་པའི་ཆུ་བོ་བཞི་དང་འདྲ། །
སིནྡྷུ་སེངྒེའི་ཁ་ནས་འབབ། །
ཤར་གྱི་ཟུར་འདི་དེ་དང་འདྲ། །
གང་གཱ་གླང་ཆེན་ཁ་ནས་འབབ། །
ལྷོ་ཡི་ཟུར་འདི་དེ་དང་འདྲ། །
པཀྵུརྟ་མཆོག་ཁ་ནས་འབབ། ། ནུབ་ཀྱི་ཟུར་འདི་དེ་དང་འདྲ། །
སཱི་ཏཱ་རྨ་བུའི་ཁ་ནས་འབབ། །
བྱང་གི་ཟུར་འདི་དེ་དང་འདྲ། །
ཞྭ་ཟུར་རས་ཀྱིས་བཏུམས་པ་འདི། །
ཡ་རྩེ་གཡའ་མས་བསྐོར་བ་འདྲ། །
ཞྭ་འདབས་རས་ཀྱིས་བསྐོར་བ་འདི། །
མཚོ་གླིང་ཆབ་ཀྱིས་བསྐོར་བ་འདྲ། །
སྟོད་མངའ་རིས་སྐོར་གསུམ་ཆགས་ཚུལ་ཡིན། །
ཞྭ་ལ་ལེབ་བཞི་བཏོད་པ་འདི། །
ལེབ་གཉིས་གཡས་རུ་གཡོན་རུ་གཉིས། །
ལེབ་གཉིས་དབུ་རུ་གཡོ་རུ་གཉིས། །
བར་དབུས་གཙང་རུ་བཞིའི་ཆགས་ཚུལ་ཡིན། །
གཡས་ལ་པདྨ་བཏགས་པ་འདི། །
མོན་ཁ་བཀྲ་རྡོ་ཡི་རྣ་ཚར་འདྲ། །
གཡོན་ན་པདྨ་བཏགས་པ་འདི། །
སོག་པོ་བྱང་གི་རྣ་ཚར་འདྲ། །
ཟུར་བཞི་རྣ་གཉིས་བྱས་ལེ་འདི། །
སྒང་ཆེན་བཞི་དང་སྒང་ཆུང་གཉིས། །
སྨད་མདོ་ཁམས་སྒང་དྲུག་ཆགས་ཚུལ་ཡིན། །
ཕྲག་པ་གཡས་ལ་བཞག་པའི་དུས། །
ཤེལ་གྱི་མཆོད་རྟེན་ཁུར་བ་འདྲ། །
ཕྲག་པ་གཡོན་ལ་བཞག་པའི་དུས། །
བན་དེས་གསེར་སྐུ་ཁུར་བ་འདྲ། །
ཕྲག་པ་གཡས་ལ་བཀལ་བའི་དུས། །
དགེ་སློང་ཆོས་གོས་ཁུར་བ་འདྲ། །
ཕྲག་པ་གཡོན་ལ་བཀལ་བའི་དུས། །
ལག་དོས་ཇ་སྒམ་ཁུར་བ་འདྲ། །
ཞྭ་འདི་རྒྱབ་ལ་ཁུར་བའི་དུས། །
བན་ཆོས་པས་ལྷུང་བཟེད་ཁུར་བ་འདྲ། །
གྲུ་མོ་བཀུག་ནས་ཁུར་བའི་དུས། །
སྨན་མཛངས་མས་བུ་གཅེས་པང་བ་འདྲ། །
ཞྭ་ལ་མེ་ལོང་བཏགས་པ་འདི། །
རྒྱལ་པོས་མེ་ལོང་བཏགས་པ་འདྲ། །
ལག་གཡས་ཀྱི་ནང་ལ་བཟུང་བའི་དུས། །
ཕ་བླ་མས་བུམ་པ་བསྣམས་པ་འདྲ། །
ལག་གཡས་པས་གྱེན་ལ་བཟེད་པའི་དུས། །
ལྷ་ལ་གསེར་སྐྱེམས་ཕུལ་བ་འདྲ། །
ལག་གཡོན་པའི་ནང་ལ་བཟུང་བའི་དུས། །
སྒོམ་པས་དམར་གཏོར་བཟུང་བ་འདྲ། །
གཡོན་པས་གྱེན་ལ་བཟེད་པའི་དུས། །
དཔོན་ཆེན་པོས་དཀར་ཡོལ་བཟུང་བ་འདྲ། །
གྱེན་ལ་གཟེང་ནས་གཡུགས་པའི་དུས། །
བོན་པོས་སིལ་སྙན་དཀྲོལ་བ་འདྲ། །
གཡོན་པས་རྩེ་ནས་བཟུང་བའི་དུས། །
བན་དེས་དྲིལ་བུ་དཀྲོལ་བ་འདྲ། །
གཡས་པས་ཐུར་ལ་བཟུང་བའི་དུས། །
སྔགས་པས་ཕུར་བུ་བཟུང་བ་འདྲ། །
གཡས་པས་འཕྲེད་ལ་བཟུང་བའི་དུས། །
མཁའ་འགྲོས་ཊ་རུ་དཀྲོལ་བ་འདྲ། །
ཞྭ་འདིའི་ལྟེབ་ཆག་འབྱེད་པའི་དུས། །
རྒྱལ་པོས་དེབ་ཡིག་ཀློག་པ་འདྲ། །
བྱ་སྒྲོ་གཡས་གཡོན་སྟོན་པའི་དུས། །
ཨ་མཆོད་དཔེ་ཆ་ཀློག་པ་འདྲ། །
མཆན་ཁུང་གཡས་ལ་བཏགས་པའི་ཚེ། །
སྟག་དོང་རི་མོ་བཀྲ་བ་འདྲ། །
མཆན་ཁུང་གཡོན་དུ་བཏགས་པའི་ཚེ། །
གཟིག་ཤུབས་ཐིག་ལེ་མཚར་བ་འདྲ། །
རྐེད་པ་གཡོན་ལ་བཏགས་པའི་ཚེ། །
ཧོར་འདྲས་ཕོར་ཁུག་བཏགས་པ་འདྲ། །
ཞྭ་འདི་སྐེད་ལ་བཅང་བའི་དུས། །
ལྷ་རྗེས་སྨན་ཁུག་བཅང་ས་འདྲ། །
ལག་པ་གཉིས་ཀྱིས་བཟུང་བའི་དུས། །
ལྷ་ལ་ཞལ་ཟས་ཕུལ་བ་འདྲ། །
ཞྭ་འདི་ཐང་ལ་བསྒྲིལ་བའི་དུས། །
སྔགས་པ་གཏོར་མཆོད་བཅའ་བ་འདྲ། །
ཞྭ་རྩེ་ས་ལ་བསྙལ་བའི་དུས། །
མགར་བས་ཁོལ་མོ་འཐེན་པ་འདྲ། །
ཞྭ་རྩེ་ལག་ན་སྔོག་པའི་དུས། །
རྒན་པོས་རྩམ་ཁུག་སྔོག་པ་འདྲ། །
ཞྭ་འདི་ཕྲག་པར་དཀྲུགས་པའི་དུས། །
རྗེ་མོས་འོ་མ་དཀྲུགས་པ་འདྲ། །
ཞྭ་འདི་ལག་པའི་བསྒྲིལ་བའི་དུས། །
རྫི་བོས་མར་སྤུ་ལེན་པ་འདྲ། །
ལག་པས་གྱེན་ལ་བྱུག་པའི་དུས། །
བསང་མཁན་ཕྱེ་མར་བྱུག་པ་འདྲ། །
ལག་པས་ཐུར་ལ་བྱུག་པའི་དུས། །
ཚོགས་ལ་ཞལ་དཀར་བྱུག་པ་འདྲ། །
ཞྭ་འདི་སྤང་ལ་བཞག་པའི་དུས། །
རྒྱལ་པོ་གདན་ལ་བཞུགས་པ་འདྲ། །
ཞྭ་འདི་ཐང་ལ་བཞག་པའི་དུས། །
རྗེ་བླ་མས་གུར་དཀར་ཕབ་པ་འདྲ། །
ཞྭ་འདི་མགོ་ལ་གྱོན་པའི་དུས། །
ཤ་ཕོ་ཆེན་རྭ་བཅུ་རྒྱས་པ་འདྲ། །
དེ་ནས་ཞྭ་འདི་ཕུད་པའི་དུས། །
སྐྱ་ཁྲ་ཐང་ལ་འཇུམ་པ་འདྲ། །
པདྨ་གཡས་གཡོན་སྤྲུགས་པའི་དུས། །
རྟ་འདོ་བས་སྒ་སྤྲུགས་བྱས་པ་འདྲ། །
རྣ་བ་ཐད་ཁ་བཤིབས་པའི་ཚེ། །
དྲེལ་སྨུག་ཆུང་ཆུ་བོ་འཐུང་བ་འདྲ། །
རྣ་བ་གཡས་གཡོན་བཤིབས་པའི་དུས། །
སྤྱང་ཐོང་ལུག་ལ་འཇབ་པ་འདྲ། །
རྣ་བ་ཕྱི་ལ་བསྙལ་བའི་དུས། །
རི་བོང་ཐང་ལ་ཉལ་བ་འདྲ། །
རྣ་བ་གཡས་གཡོན་བསྐྲབ་པའི་དུས། །
འབྲོང་བྲེ་སེར་རུ་ཐུར་ངོམ་པ་འདྲ། །
བྱ་སྒྲོ་སྔོན་ལ་བསྙིལ་བའི་དུས། །
དྲེད་མོང་རལ་པ་བསིགས་པ་འདྲ། །
བྱ་སྒྲོ་རྒྱབ་ལ་བསྒྲིལ་བའི་དུས། །
སེངྒེས་གཡུ་རལ་བསིགས་པ་འདྲ། །
བྱ་སྒྲོ་ཐད་ལ་སྤུར་བའི་དུས། །
ལ་ཁར་ལབ་ཙེ་སྟོད་པ་འདྲ། །
ཞྭ་འདི་འཕྲེད་ལ་ཕྱར་བའི་དུས། །
ཐང་དཀར་ནམ་འཕང་གཅོད་པ་འདྲ། །
ཞྭ་འདབས་ལག་པས་སྤྲུགས་པའི་དུས། །
ཐང་སྨུག་སྒྲོ་བསིག་བྱས་པ་འདྲ། །
ཞྭ་རྩེ་ས་ལ་བཙུགས་པའི་དུས། །
གོང་མོ་ལྡུམ་རྩྭ་ཟ་བ་འདྲ། །
ཞྭ་པུས་མོའི་སྟེང་ལ་བསྐོན་པའི་དུས། །
བུ་ཆུང་པང་ལ་བསྙལ་བ་འདྲ། །
ཞྭ་འདི་བང་ནས་བསྐོར་བའི་དུས། །
ངང་བས་མཚོ་མཐའ་བསྐོར་བ་འདྲ། །
པུས་མོའི་སྟེང་ན་སློང་བའི་དུས། །
ཁྲུང་ཁྲུང་སོ་ལ་ཆས་པ་འདྲ། །
གྲུ་མོ་གཡས་ལ་བརྟེན་པའི་དུས། །
བུ་གཅིག་གཅེས་གཅེས་བྱས་པ་འདྲ། །
གྲུ་མོ་གཡོན་ལ་བརྟེན་པའི་དུས། །
འཕྱོར་པོས་སྒྲ་སྙན་བསྒྲགས་པ་འདྲ། །
གྲུ་མོའི་ཁུག་ལ་སློང་བའི་དུས། །
འཕྱོར་མོས་ཆང་སྐྱེམས་ཁུར་བུ་འདྲ། །
ཞྭ་ལུང་ཕྲག་ལ་འཕངས་པའི་དུས། །
མོ་མའི་ཇུ་ཐིག་མདུད་པ་འདྲ། །
གཡས་པས་རྩེ་ནས་བཟུང་བའི་དུས། །
ཚོང་དཔོན་ཇ་ཁུག་བཟུང་བ་འདྲ། །
གཡོན་པའི་གྲུ་ཁུག་བཟུང་བའི་དུས། །
ནེའུ་ལེས་ནོར་བུ་སྐྱུགས་པ་འདྲ། །
ཞྭ་མི་འདྲ་ས་ནི་གཅིག་ཀྱང་མེད། །
འདྲ་ཨེ་བསམ་ཧོར་གྱི་རྒྱལ་བློན་རྣམས། །
ཞྭ་ལ་མ་ཚང་གཅིག་ཀྱང་མེད། །
མདུན་ན་སྟོན་པ་གཙོ་འཁོར་ཡིན། །
བན་ཆོས་པའི་ལྷ་སྐལ་འདི་ལ་ཚང་། །
རྒྱབ་ནས་སློབ་དཔོན་གཙོ་འཁོར་ཡིན། །
སྡེ་དབུ་ནག་ལྷ་སྐལ་འདི་ལ་ཚང་། །
ཟུར་ནས་གཤེན་རབ་གཙོ་འཁོར་ཡིན། །
བོན་སྲུང་ལྷ་སྐལ་འདི་ལ་ཡོད། །
རྩེ་གསུམ་རིགས་གསུམ་མགོན་པོའི་ཚུལ། །
སྐུ་གསུམ་སྟོན་པ་འདི་ལ་ཚང་། །
སྒང་དྲུག་ཐུབ་པ་རིགས་དྲུག་ཡིན། །
འགྲོ་དྲུག་ལྷ་སྐལ་འདི་ལ་ཚང་། །
གཡས་བལྟས་སྒྲོལ་མ་དཀར་མོའི་ཚུལ། །
ཚེ་ཡི་ལྷ་སྐལ་འདི་ལ་ཚང་། །
གཡོན་བལྟས་སྒྲོལ་མ་སྔོན་མོའི་ཚུལ། །
སྐྱོབ་པའི་ལྷ་སྐལ་འདི་ལ་ཚང་། །
རྒྱན་ཆ་སྣ་ཚོགས་བཏགས་པ་འདི། །
སྤྲུལ་སྐུ་དམ་པ་རིགས་བརྒྱའི་ཚུལ། །
ཞི་ཁྲོའི་དཀྱིལ་འཁོར་འདི་ལ་ཚང་། །
ལེབ་བཞི་རྒྱལ་ཆེན་སྡེ་བཞིའི་ཚུལ། །
སྒོ་བཞིའི་སྲུང་མ་འདི་ལ་ཚང་། །
རྩེ་ལྔ་རྒྱལ་བ་རིགས་ལྔའི་ཚུལ། །
ལོངས་སྐུའི་ཞིང་ཁམས་འདི་ལ་ཚང་། །
མ་ཚར་བ་ནི་གཅིག་ཀྱང་མེད། །
ཐམས་ཅད་འཛོམ་ཞྭ་འདི་ལ་འདུས། །
གཅིག་ཏུ་འདུས་པ་ཀུན་ཏུ་བཟང་། །
ཆོས་སྐུའི་དགོངས་པ་འདི་ལ་ཚང་། །
ཚང་ཨེ་བསམ་རྒྱལ་པོ་ཨོག་ཚོམ་ཅན། །
