མཚོ་ཁྱ་ཁྲེབ་སྐྱེ་ཁམས་མཛེས་ལྗོངས་ཁུལ་དུ་ཡུལ་ཕྱོགས་སོ་སོ་ནས་འོངས་པའི་ལྗོངས་སྐོར་པ་ཤིན་ཏུ་མང་པོ་སླེབས་འདུག་ལ། ཁོ་ཚོའི་ལག་ཏུ་པར་ཆས་ཆེ་ཆུང་སྣ་ཚོགས་ཐོགས་ཤིང་། གོམ་འགྲོས་ལྷོད་ལ་ཕབ་སྟེ། ཡིད་དུ་འོངས་པའི་ལྗོངས་ཁམས་འདིའི་མཛེས་པར་ལོངས་སུ་སྤྱོད་བཞིན་གདའ།　

       མཚོ་ཁྱ་ཁྲེབ་ནི་མཛོད་དགེ་རྗོང་ནས་ལེ་བར་40ལྷག་སོང་བའི་མཚམས་སུ་ཡོད་ཅིང་། དེ་ནི་མཛོད་དགེའི་བརླན་ས་ཆེན་མོའི་ཆ་ཤས་གལ་ཆེན་དང་། རྒྱལ་ཁབ་ཀྱི་Aབཞི་རིམ་པའི་ལྗོངས་སྐོར་ཁུལ་ཡིན། དེའི་ནང་དུ་ཆུ་ཚོམ་བུ་དང་ན་ཚོམ་བུ་བྱས་ནས་ཡོད་ཅིང་། ཡུལ་འདིའི་མི་རྣམས་ཀྱི་ངག་ནས་ན་ལ་ཁྱོ་ཞེས་འབོད་ལ། རྫ་མགོ་མཐོ་ས་ནས་མར་བལྟས་ཚེ་ཁྲ་ཁྲ་མ་ཁྲར་ཆགས་པས་མཚོ་ཁྱ་ཁྲེབ་ཏུ་ཐོགས་པར་བཞེད།　

 

       མཚོའི་ནང་དུ་ཁྲུང་ཁྲུང་སྐེ་ནག་དང་། ངང་བ། ངུར་བ། རྟ་སྐྱར། བཞད་དཀར། སྐྱར་ཡུག་ཀླད་ནག  འབིགས་ལེན་པྲོག་ཟེ་སོགས་བྱ་རིགས་མང་པོས་འཕུར་ལྡིང་གི་གར་ལ་རྩེན་ཅིང་། དེ་དག་གི་གྲངས་ཀའང་ལོ་བཞིན་ཇེ་མང་དུ་འགྲོ་བཞིན་ཡོད། ལུག་མིག་དང་། སྤང་སྤོས། རམ་བུ་ཆུ་མ། བྱ་རྐང་སྔོན་པོ། རེ་ལྕག་པ། ཐར་ནུ་འབྲས་རྒན། ཟི་ར་ཁོང་སྟོང་སོགས་མེ་ཏོག་སྣ་ཚོགས་བསིལ་རླུང་གི་འགྲོས་དང་བསྡོངས་ཏེ། ཕྱོགས་དང་ཕྱོགས་མཚམས་ཀྱི་ལྗོངས་སྐོར་བར་ཚུར་ཡོང་གི་བསུ་མ་དང་ཕར་འགྲོའི་སྐྱེལ་མ་བྱས།　

       ཧུའུ་ནན་ནས་འོངས་པའི་རུས་ཀྲང་ཅན་གྱི་ལྗོངས་སྐོར་བ་ཞིག་གིས། སྔོན་ཆད་མཚོ་ཁྱ་ཁྲེབ་ནི་བརྙན་འཕྲིན་སོགས་སུ་མཐོང་མྱོང་བ་མ་གཏོགས་དངོས་སུ་འོངས་མྱོང་མེད། ད་རེབ་ཆེད་དུ་འདིར་འོངས་པ་ཡིན་ཏེ། ཚོམ་བུ་ཚོམ་བུར་འཁྱིལ་བའི་མཚོ་མོ་འདི་ཡིད་དུ་འོངས་ཤིང་། མེ་ཏོག་སྣ་ཚོགས་རྣམ་པར་བཞད་པ་ངོ་མཚར་ཆེ། བྱ་རིགས་མང་པོ་མཚེའུ་རུ་ཁྲུས་ལ་རོལ་བ་ནི་སྙིང་དུ་སྡུག་པ་ཞིག་རེད། གང་ལྟར། ཡུལ་འདི་ནས་སྐྱེ་ཁམས་དཔལ་ཡོན་གྱི་མཛེས་པ་སེམས་ཀྱིས་མྱོང་ཐུབ་པས་མནན་ཀྱང་མི་ནོན་པའི་དགའ་བ་ཆེན་པོ་སྐྱེས་བྱུང་། ཞེས་བཤད། 

 

       དངོས་གནས་དེ་ལྟར་ལགས་ཏེ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྨ་ཆུའི་འབབ་རྒྱུད་ཀྱི་སྐྱེ་ཁམས་སྲུང་སྐྱོང་དང་སྤུས་ཚད་མཐོ་བའི་འཕེལ་རྒྱས་ཀྱི་ཐབས་ཇུས་བཟང་པོར་བརྟེན་ཏེ། ཡུལ་འདིའི་མི་རྣམས་ཀྱིས་སྐྱེ་ཁམས་སྲུང་སྐྱོང་དང་། ལྗང་མདོག་འཕེལ་རྒྱས་ཀྱི་དགོངས་པ་ལག་བསྟར་ཡང་དག་བྱས་པར་མ་ཟད། ལོ་འདི་གར་གནས་འདིར་འཁོར་བའི་བྱ་རིགས་སྣ་ཚོགས་ཀྱི་གྲངས་ཀའང་ཇེ་མང་དུ་འགྲོ་བཞིན་པ་ཡུལ་འདིའི་མི་དག་གིས་བཤད། 

  

      འདི་ནས་རང་བྱུང་ཁམས་ཆེན་མོའི་འཆམ་མཐུན་སེམས་ཀྱིས་མྱོང་ཐུབ་པར་མ་ཟད། སྐྱེ་དངོས་སྣ་མང་མཉམ་གནས་ཀྱི་ཁོར་ཡུག་བཟང་པོའང་མཐོང་ཐུབ། ཀྲེ་ཅང་གི་བུད་མེད་རུས་ལིན་ཅན་བུ་མོ་ཆུང་ཆུང་ཁྲིད་པ་ཞིག་གིས། ཡུལ་འདིར་འོངས་ཐེངས་གཉིས་པ་ཡིན། ད་རེབ་རང་གི་བུ་མོའང་ཁྲིད་ཡོད་དེ། ཆུང་དུས་ནས་རང་བྱུང་ཁམས་ཀྱི་མཛེས་སྡུག་གི་བག་ཆགས་རྒྱུད་ལ་ཞོག་ཕྱིར་དང་། རང་བྱུང་ཁམས་ཆེན་མོར་གཅེས་སྤྲས་བྱ་བའི་གོམས་གཤིས་བཟང་བོ་ཆུང་དུས་ནས་ཆགས་ཕྱིར་ཡིན། ལྗོངས་ཁམས་འདི་མཛེས་པ་ལ་ཚད་ཅིག་མི་འདུག ཅེས་བཤད། མཛེས་ལྗོངས་ཁུལ་འདིའི་ཁོར་ཡུག་གི་དོ་དམ་ལེགས་ཤིང་། ལྗོངས་ཁུལ་གྱི་ལྟད་མོའི་རིགས་ཕུན་སུམ་ཚོགས་པར་མ་ཟད། ལྗོངས་སྐོར་པ་སྣེ་ལེན་གྱི་ཞབས་ཞུའང་ཤིན་ཏུ་བཟང་། མཚོ་ཁྱ་ཁྲེབ་ལ་བརྟེན་ནས་མི་སྣ་ཇེ་འདུས་དང་འཛད་སྤྱོད་པ་ཇེ་མང་། ཐོན་ལས་གཅིག་འདུས་སོགས་ཏེ། འདི་གའི་འབྲོག་པ་རྣམས་ཐོན་ལས་དང་པོ་ནས་ཐོད་བརྒལ་འོང་བར་ཕན་པ་སྐྲུན་བཞིན་པར་མ་ཟད། དཔལ་འབྱོར་གྱི་ཡོང་སྒོ་ཇེ་མང་དང་། འཚོ་བའི་སྤུས་ཀ་ཇེ་བཟང་དུ་འགྲོ་བར་ཡང་ཕན་པ་སྐྲུན་བཞིན་གདའོ། །