ཚེས་30ཉིན། གསར་འགོད་པར་མཚོ་སྔོན་ཞིང་ཆེན་རིག་དངོས་གནའ་རྫས་རྟོག་ཞིབ་ཞིབ་འཇུག་སུའོ་ནས་ཤེས་རྟོགས་བྱུང་གསལ། ཉིན་ཤས་གོང་། སུའོ་དེས་ལོ་གཅིག་ལྷག་གི་དུས་ཚོད་སྤྱད་དེ་སའོ་དེ་ལ་ཉར་ཚགས་ཡོད་པའི་འཁལ་འཐག་དངོས་པོའི་རིག་དངོས་སྲུང་སྐྱོབ་ཉམས་གསོའི་ལས་གཞི་ལག་བསྟར་ལེགས་འགྲུབ་བྱུང་ཞིང་ཞིབ་བཤེར་རྩིས་ལེན་ཡང་བྱས་པ་རེད། ད་ཐེངས་སྲུང་སྐྱོང་ཉམས་གསོ་བྱ་རྒྱུ་ནི་ཐང་རྒྱལ་རབས་ཀྱི་ཐགས་གྲུབ་མ་8དང་ཡོན་རྒྱལ་རབས་ཀྱི་གོས་ཆེན་གྱི་ལྭ་བ་1ཡིན་པ་ཚང་མ་ནི་མཚོ་སྔོན་མཚོ་ནུབ་སོག་རིགས་བོད་རིགས་རང་སྐྱོང་ཁུལ་གྱི་གཙོ་གནད་བང་སོ་ནས་ཐོན་པའི་རྩ་ཆེའི་རིག་དངོས་ཡིན། དེ་དག་ནང་རིམ་པ་དང་པོའི་དངོས་པོ་1དང་། རིམ་པ་གཉིས་པའི་དངོས་པོ་1 རིམ་པ་གསུམ་པའི་དངོས་པོ་7བཅས་ཡོད། 

  

   གསར་འགོད་པས་ཤེས་རྟོགས་བྱས་པར། རྣམ་གྲངས་ལག་བསྟར་བྱེད་རིང་མཚོ་སྔོན་ཞིང་ཆེན་རིག་དངོས་གནའ་རྫས་རྟོག་ཞིབ་ཞིབ་འཇུག་སུའོ་ཡི་ལག་རྩལ་ཚོགས་པས་སྲུང་སྐྱོང་ཉམས་གསོ་དང་ཞིབ་འཇུག་བྱ་གཞིར་ཞིབ་འཇུག་ཡང་ཡང་བྱ་རྒྱུ་མཐའ་འཁྱོངས་བྱས་ནས་དེང་རབས་ཀྱི་ཚན་རྩལ་བྱ་ཐབས་གང་ལེགས་སྤྱད་དེ། ཐགས་གྲུབ་མའི་རྒྱུ་ཆ་དང་། ཚོས་རྫས། འཁེལ་འཐག་བཟོ་རྩལ་སོགས་ལ་ཚན་རིག་དང་མཐུན་པའི་ཞིབ་དཔྱད་ཚད་ལེན་དང་ཞིབ་འཇུག་གཏིང་ཟབ་བྱས་པ་རེད། དེ་དང་ཆབས་ཅིག་རྒྱལ་ཁབ་ཕྱི་ནང་གི་སྔོན་ཐོན་ཉམས་མྱོང་དཔྱད་གཞིར་བཟུང་སྟེ། དངོས་ལུགས་རྡུལ་སེལ་གྱིས་སྲོལ་རྒྱུན་གཙང་འཁྲུ་བྱེད་ཐབས་ཀྱི་ཚབ་བྱས་པས་རིག་དངོས་ཀྱི་རང་བྱུང་ཚོན་མདངས་སྲུང་སྐྱོང་ཐུབ་པ་རེད།  

   ཉེ་བའི་ལོ་ཤས་རིང་མཚོ་སྔོན་ཞིང་ཆེན་རིག་དངོས་གནའ་རྫས་རྟོག་ཞིབ་ཞིབ་འཇུག་སུའོ་ཡིས་མུ་མཐུད་རིག་དངོས་སྲུང་སྐྱོང་གི་ཆེད་དོན་ལས་དོན་སྤེལ་ནས་རྩ་ཆེའི་རིག་དངོས་ཁག་སྲུང་སྐྱོང་བྱ་རྒྱུར་སྐུལ་འདེད་བཏང་སྟེ་གཅེས་ཉར་རྩ་ཆེའི་རིག་དངོས་ལ་ཚན་རིག་དང་མཐུན་པའི་སྲུང་སྐྱོང་དང་ཉར་ཚགས་ཡག་པོ་ཐུབ་པའི་འགན་ལེན་བྱས་པ་རེད།