ད་ལོ་ལོ་25ལ་སླེབས་པའི་བདེ་ཆེན་དབྱངས་མཚོ་ནི་མཚོ་སྔོན་ཞིང་ཆེན་ཡུལ་ཤུལ་བོད་རིགས་རང་སྐྱོང་ཁུལ་ཡུལ་ཤུལ་གྲོང་ཁྱེར་དཔལ་ཐང་ཤང་ཞོམ་གུ་གྲོང་ཚོར་སྐྱེས་ཤིང་། ཁོང་གི་ཕ་ཡུལ་དུ་རང་བྱུང་རྩྭ་ཐང་ཡངས་ཤིང་མུ་མཐའ་བྲལ་བ་ཡོད་པས་གྲོ་མ་དང་། འོ་མ། ཚགས་ཤ་སོགས་མང་པོ་ཐོན་གྱི་ཡོད།

  

བདེ་ཆེན་དབྱངས་མཚོས་མཉམ་ལས་ཁང་དུ་གྲོ་མ་འདེམ་གསེས་བྱེད་བཞིན་པ། 

 

བདེ་ཆེན་དབྱངས་མཚོས་ཞིང་འབྲོག་ཁྱད་ལྡན་ཐོན་རྫས་ཁྱེར་ནས་མཉམ་ལས་ཁང་གི་སྒོ་ཁར་ཐོན་པ།

 

བདེ་ཆེན་དབྱངས་མཚོས་ཚོང་གཉེར་གྱི་བར་གསེང་སྐབས་དཔེ་ཀློག་དང་སློབ་སྦྱོང་བྱེད་བཞིན་པ།

        སྤྱི་ལོ་2019ལོར་སློབ་ཆེན་ཐོན་པའི་བདེ་ཆེན་དབྱངས་མཚོས་ཟླ་རེའི་ཡོང་སྒོ་སྒོར་ཁྲི་ཟིན་པའི་ལས་ཀ་བསྐྱུར་ནས་ཕ་ཡུལ་དུ་ལོག་སྟེ་རང་གི་ཨ་ཕར་མཉམ་ལས་ཁང་གི་ཚོང་ཁང་གཉེར་རོགས་བྱས། ཚོང་ཁང་དེའི་ནང་གཙོ་བོ་ནོར་གནག་གི་འོ་མ་དང་། ཤ་སྐམ་པོ། གྲོ་མ་སོགས་ས་གནས་དེ་གའི་དམིགས་བསལ་ཐོན་རྫས་འཚོང་གི་ཡོད་མོད། འོན་ཀྱང་ཐོན་རྫས་ཕྱིར་ཚོང་བྱེད་དཀའ་བར་བརྟེན་ཚོང་གི་བྲིན་ཁ་རྒྱུག་པོ་མེད་པ་མ་ཟད་ཁེ་སྤོགས་ཀྱང་སྤྱིར་ན་མེད་པའི་གནས་སུ་ལྷུང་། བདེ་ཆེན་དབྱངས་མཚོས་“ངས་རང་ཉིད་ཀྱི་འབད་བརྩོན་ལ་བརྟེན་ནས་ཕ་ཡུལ་གྱི་ཐོན་རྫས་རི་ཁུལ་ནས་ཕྱིར་གཏོང་ཐུབ་པ་བྱ་འདོད་ཡོད”ཅེས་གསུངས། 

 

བདེ་ཆེན་དབྱངས་མཚོས་དྲ་ཐོག་ཐད་གཏོང་བྱས་ནས་ཐོན་རྫས་འཚོང་བཞིན་པ། 

 

བདེ་ཆེན་དབྱངས་མཚོས་ཐོན་རྫས་ཐུམ་སྒྲིལ་རྒྱག་བཞིན་པ།

 

བདེ་ཆེན་དབྱངས་མཚོས་ཐུམ་སྒྲིལ་དག་རླངས་འཁོར་ནང་འཇོག་པ།

        ཚོང་ཁང་གཉེར་སྐྱོང་བྱས་རྗེས། ཞིང་ཞོར་ཁྱད་ལྡན་ཐོན་རྫས་ཀྱི་ཚོང་ལམ་རྒྱ་ཆེར་གཏོང་ཆེད། བདེ་ཆེན་དབྱངས་མཚོས་ཀུང་སི་ཞིག་གསར་དུ་ཐོ་འགོད་བྱས་ཏེ་བཙུགས་པ་དང་། ས་གནས་དེ་གའི་འབྲོག་དུད་40ལྷག་དང་དེ་བཞིན་མཉམ་ལས་ཁང་དང་ཉོ་ཚོང་གྲོས་ཆོད་བཞག་ནས་བོད་ལྗོངས་དང་། སི་ཁྲོན། ཡུན་ནན་སོགས་ཀྱི་ཞིང་ལས་ཐོན་རྫས་ཚབ་ཚོང་བྱེད་མཁན་30ཙམ་བར་མང་དུ་བཏང་། ལོ་གཉིས་ལྷག་ཙམ་རིང་། བདེ་ཆེན་དབྱངས་མཚོས་ཐད་གཏོང་ཟོག་འདྲེན་དང་། དབང་བཅོལ་ལས་ཚབ། མཉམ་ལས་ཉོ་ཚོང་བྱེད་པ་སོགས་ཐབས་ལམ་སྣ་ཚོགས་བརྒྱུད་མཉམ་ལས་ཁང་དང་ཉེ་འཁོར་གྱི་འབྲོག་པའི་ཞིང་འབྲོག་ཁྱད་ལྡན་ཐོན་རྫས་ཕྱིར་ཚོང་བྱེད་རོགས་བྱས་པས་ཕྱིར་ཚོང་ཡོང་འབབ་དེ་གཉེར་སྐྱོང་བྱེད་པའི་ལོ་དེ་གའི་སྒོར་ཁྲི་9ནས་སྤྱི་ལོ་2021ལོའི་སྒོར་ཁྲི་79བར་མང་དུ་ཕྱིན།

  

 

བདེ་ཆེན་དབྱངས་མཚོས་ས་གནས་དེ་གའི་འབྲོག་པ་དང་ཞིང་འབྲོག་ཁྱད་ལྡན་ཐོན་རྫས་ཉོ་སྒྲུབ་སྐོར་གྲོས་བསྡུར་བྱེད་བཞིན་པ། 

 

བདེ་ཆེན་དབྱངས་མཚོས་རིན་མེད་སྒོ་ནས་ཚབ་འཚོང་བྱེད་པའི་འབྲོག་པའི་ལག་ཤེས་བཟོ་རྩལ་ཐོན་རྫས་འགྲེམ་སྟོན་བྱེད་བཞིན་པ།

 

བདེ་ཆེན་དབྱངས་མཚོས་དྲ་ཐོག་ནས་མངགས་ཐོ་བསྐུར་མཁན་ལ་མྱུར་སྐྱེལ་སྐུར་བཞིན་པ།

        བདེ་ཆེན་དབྱངས་མཚོ་ཕ་ཡུལ་དུ་ལོག་ནས་ལས་གཏོད་བྱས་པ་དེས་ཞིང་འབྲོག་པ་བཅུ་གྲངས་ལ་ལས་ཞུགས་འབབ་འཕར་ཐུབ་པ་བྱུང་། བདེ་ཆེན་དབྱངས་མཚོས་ཡིད་ཆེས་ཀྱིས་ཁེངས་པའི་ངང་“ཚང་མས་འབད་བརྩོན་བྱས་པ་བརྒྱུད་ང་ཚོས་ཕ་ཡུལ་གྱི་ཞིང་འབྲོག་ཁྱད་ལྡན་ཐོན་རྫས་ཕྱིར་བཙོངས་བ་ཡིན། འཛད་སྤྱོད་པས་ཐོན་རྫས་ལ་ཁས་ལེན་ཐོབ་པར་ང་རང་ཧ་ཅང་དགའ་པོ་བྱུང་ལ། ཐོབ་ཚོར་དང་སྐྱིད་ཚོར་ཡང་ལྡབ་ཀྱི་ཆེ་རུ་ཕྱིན་སོང་”ཞེས་གསུངས།