མཆོག་གསུམ་དམ་པའི་ཞབས་ལ་འདུད། །
དག་པའི་དབྱིངས་ནས་ཐུགས་རྗེས་གཟིགས། །
དེ་རིང་ནོར་བུ་དགྲ་འདུལ་ངས། །
དགའ་བའི་སྐྱིད་གླུ་དྲུག་འགྱུར་ལེན། །
འདིར་འཚོགས་གླིང་གི་བསུ་མ་རྣམས། །
མ་ཡེངས་དགའ་སྤྲོས་ཉན་པར་མཛོད། །
ང་ཁྲ་བོ་གླིང་གི་ས་ཆ་ནས། །
ཧོར་སེར་པོར་མ་ཐོན་ཚུན་ཆད་ལ། །
ཧོར་གྱི་སྒོ་སྲུང་བཅུ་གཉིས་གཏོར། །
དངོས་ཡོད་དངོས་མེད་མང་པོ་བཏུལ། །
སེར་པོ་ཧོར་ལ་ཐོན་པ་ན། །
དཀོན་མཆོག་གསུམ་ལ་གསོལ་འདེབས་དང་། །
དགྲ་ལྷ་རྣམས་ལ་གྲོགས་ཞུས་ནས། །
ཐེངས་རེ་བླ་མའི་ཆས་ལ་ཞུགས། །
ཧོར་སེར་རྣམས་ལ་དམུ་གབ་ཕབ། །
ཐེངས་རེ་སྒར་བ་མང་པོར་སྤྲུལ། །
དགྲ་ལ་མགོ་བསྐོར་ཅི་ཐུབ་བྱས། །
བར་དུ་ཐབས་དང་རྫུ་འཕྲུལ་གྱིས། །
ཤན་པ་པཱ་ཐུར་མང་པོ་བཏུལ། །
ཁྱི་ནག་གུར་དཀར་ཆམ་ལ་ཕབ། །
ཐ་མ་ཡ་རྩེ་མཁར་སྟེང་དུ། །
དེ་ནས་སྟོབས་ཆེན་མདའ་ཡིས་གཟིར། །
ཐང་རྩེ་ཤན་པའི་མགོ་འཛུལ་བླངས། །
སྙོམས་ཆུང་སྡེ་འབངས་ཚེ་ཐར་བཏང་། །
དབུ་ནག་འདུག་ཆོས་བདེ་སྐྱིད་བཀོད། །
གུར་དཀར་ནོར་གྱི་བང་མཛོད་ནས། །
ཟངས་དཀར་འོ་མ་བཅུད་འཛིན་བླངས། །
ནོར་གཡང་མ་ཉམས་ལོན་རྟགས་ལ། །
འོ་མའི་ཞུན་ཁུ་ཙེར་རེ་ཡོད། །
རྟགས་བརྒྱད་རི་མོ་ཁྲིགས་སེ་ཡོད། །
ལོང་བཞི་ཨ་ལོང་ཁྲིགས་སེ་ཡོད། །
ད་རུང་དེ་བས་མི་ཚད་པའི། །
ཧོར་ཟོག་ལང་མ་ལིང་དགུ་ལ། །
ཟད་མེད་དུང་གི་འོ་མ་ཡོད། །
ཐེལ་མོའི་དུང་ཤོ་སྤུན་གསུམ་ཡོད། །
ཕྱིང་དཀར་ནམ་མཁའ་ཐོག་ཐུབ་ཡོད། །
ཕྱིང་སྔོན་སྔོན་མོ་ཆུ་ཁེབ་ཡོད། །
རལ་གྲི་དམར་མོ་འདེབས་ཤེས་ཡོད། །
ཕུང་སྟག་བཏུལ་བའི་ལྤགས་པ་ཡོད། །
ཡང་ཟོག་སྲིད་པའི་རབ་དགུ་ལ། །
བླ་ཟངས་ཁྲོ་ཡི་སྤར་བུ་ཡོད། །
གནམ་ལྕགས་ཞུན་མའི་གོ་ཁྲབ་ཡོད། །
བླ་ལྕགས་ཨ་ལོང་ཁྲིགས་སེ་ཡོད། །
དྲུག་དཀར་འོ་མ་ཞུན་ཐིས་ཡོད། །
ཧོར་ཐོག་དངུལ་གྱི་པ་ཏྲ་ཡོད། །
ལག་གོས་མེ་ཏོག་བཅུད་ལེན་ཡོད། །
གསེར་གྱི་སྦལ་བ་ཆ་གསུམ་ཡོད། །
གསེར་འཕྲུ་ཉི་མ་ཁྲི་བརྩེགས་ཡོད། །
དེ་དག་གླིང་དཀར་ནོམ་ལ་བླངས། །
ཚོ་དྲུག་གླིང་དཀར་རྒྱན་ལ་མཛེས། །
སྤང་སྐོར་རིང་མོའི་ཡང་གོང་ནས། །
དགའ་སྐྱིད་འཛོམ་པའི་ལ་ཁ་ལ། །
ཕུ་ནུ་བསུ་བ་ཡོང་བས་དགའ། །
སེང་ཆེན་བྱེས་དོན་གྲུབ་པས་སྐྱིད། །
དེ་ནས་གླིང་གི་ཕུ་ནུ་ཚོས། །
དགའ་བའི་རྟགས་ལ་དཔའ་དར་བརྟེན། །
སྐྱིད་པའི་རྟགས་ལ་གླུ་ཆུང་བླངས། །
གཞིས་བྱེས་གཉིས་འཛོམ་ཉམས་རེ་དགའ། །
ཞེས་གསུངས་ནས་གླུ་དེ་ལྟར་བླངས་སོ།།
