ནམ་ཡང་རྒྱལ་བར་སྨོན།
ཀྭ་ཡེ་གསོན་དང་རིགས་གཅིག་སྤུན་ཟླ་ཚོ། །
ཁ་བ་ཅན་གྱི་ཆོས་ཀྱི་ཞིང་ས་རུ། །
ག་ས་ཀུན་ནས་མི་ཚོགས་རྒྱུ་བ་མང་། །
ང་ཚོའི་ཞིང་ལ་ཏོག་དབྱིབས་ནད་དེ་བསླེབས། །
ཅ་ལག་ནོར་རྫས་འཛོམས་པའི་ལྷ་ལྡན་ཞིང་། །
ཆ་ཡོད་ཆ་མེད་མི་ཚོགས་ཀུན་པོ་འདུས། །
ཇ་ཐུན་རེ་ལའང་གཙང་སྦྲ་དུག་སེལ་དང་། །
ཉ་ཉོག་སྲང་ལམ་གྲོང་མདོ་མ་འགྲིམ་དགོས། །
ཏ་ཐཱའི་བསྟན་པ་གནས་དེ་ལྷ་ལྡན་ཞིང་། །
ཐ་མལ་འདི་དུས་ནད་ཡམས་ཞིག་གི་འཚེ། །
ད་ནི་རང་ཁྱིམ་ནང་དུ་རང་རང་འདུག །
ན་ཚ་འདི་རིགས་སྔོན་འགོག་འདི་ཉིད་གཙོ། །
པ་སངས་ཟླ་ལྟར་དཀར་བའི་ལྷ་ལྡན་ཞིང་། །
ཕ་མ་འདྲ་བའི་ང་ཡི་མིང་སྲིང་ཚོ། །
བ་རེ་བོ་རེ་བག་མེད་གང་ས་རུ། །
མ་འགྲོ་མ་རྒྱུ་ཕ་བཟང་མ་བཟང་རྒྱུད། །
ཙ་རི་གནས་རི་མང་བའི་ལྷ་ལྡན་ཞིང་། །
ཚ་གྲང་དཀའ་ཐུབ་རྒྱུ་བའི་གནས་མཇལ་དེ། །
ཛ་དྲག་ཅན་གྱི་གནས་སྐབས་འདི་དུས་ལ། །
ཝྭ་མོ་བཞིན་དུ་ག་སར་གང་མ་རྒྱུ། །
ཞྭ་སེར་རིང་ལུགས་དར་བའི་ལྷ་ལྡན་ཞིང་། །
ཟ་ཟིང་ཁོ་ན་གྱུར་བའི་དུས་ཤིག་གྱུར། །
འ་ཅག་རྣམས་ཀྱིས་རྟག་ཏུ་མ་གཟབ་ན། །
ཝཡ་ངའི་ནད་ཡམས་འདི་ཡིས་རྒོལ་ཉེན་གདའ། །
ཝར་བ་གངས་རིའི་ལྗོངས་ཀྱི་ཡུལ་ལུང་གཙོས། །
ལ་ལུང་ཀུན་ནས་རྒྱུགས་པའི་ནད་ཡམས་འདི། །
ཤ་ཚ་སྙིང་རྗེ་བྲལ་བའི་འཆི་བདག་འདྲ། །
ས་སྟེང་འདི་ནས་འགྲོ་བ་ཀུན་ལ་འཚེ། །
ཧ་ཅང་ཛ་དྲག་ཆེ་བའི་དུས་འདི་ལ། །
ཨ་རོགས་ག་ས་ག་ལ་མ་སྒྱུར་མཛོད། །
ཧ་ལམ་ས་ཕྱོགས་རང་ནས་འབོད་སྐུལ་ཞིག །
ཨ་རོགས་ཁ་བའི་ཞིང་གི་སྤུན་ལ་འབུལ། །
2202 / 8 / 31 / ཉིན / ཉི་མས།
