སྤྱི་ཟླ་9ཚེས་9ཉིན། ཀན་སུའུ་ཡིས་ལྷ་ས་གྲོང་ཁྱེར་ལ་རོགས་སྐྱོར་བྱས་པའི་སྔོ་ཚལ་ཏུན་700བླུགས་པའི་86001ཆེད་གཏོང་མེ་འཁོར་ལྷ་སར་འབྱོར་ཡོད། མེ་འཁོར་དེའི་ནང་དུ་ཞོག་ཁོག་དང་ནན་ཀྭ་སོགས་སྔོ་ཚལ་རིགས་དགུ་ཙམ་བླུགས་ཡོད་པ་དང་། འཁྱགས་སྒམ་35ལས་གྲུབ་ཅིང་། གནས་གཅིག་ནས་གནས་གཞན་དུ་བརྒྱུད་རིམ་ཧྲིལ་པོར་འཁྱགས་འཕྲེང་སྐྱེལ་འདྲེན་བྱས་ཐོག ལེ་དབར་སྟོང་ཕྲག་བརྒལ་ནས་ལྷ་སའི་འབབ་ཚུགས་ནུབ་མར་འབྱོར་བ་དང་ས་གནས་དེ་གར་དངོས་ཟོག་གསབ་སྤྲོད་བྱས་ཡོད།
དུས་ཚོད་ཛ་དྲག་ཅིང་ལས་འགན་ལྕི་བ་དང་། ཚང་མས་བདེ་འཇགས་ལ་ཡིད་གཟབ་གནང་རོགས་ཞེས་སྤྱི་ཟླ་9ཚེས་9ཉིན་གྱི་སྔ་དྲོའི་ཆུ་ཚོད་7པ་ཙམ་ལ། ལྷ་སའི་འབབ་ཚུགས་ནུབ་མའི་དངོས་ཟོག་སྐྱེལ་འདྲེན་ཁུལ་དུ་འདོན་འཇུག་ལས་རེས་པས་ཕྱོགས་གཅིག་ནས་དངོས་ཟོག་འདོན་རྒྱུར་སྒྲིག་འཛུགས་བྱེད་བཞིན་པ་དང་ཕྱོགས་གཞན་ཞིག་ནས་བདེ་འཇགས་ལ་དོ་སྣང་བྱེད་དགོས་པའི་དྲན་སྐུལ་དེ་ལྟར་གནང་བཞིན་མཆིས། ཁོང་ཚོས་ཏུན་700ཡི་འཚོ་བའི་དངོས་ཟོག་དུས་ཐོག་ལ་རྩིས་སྤྲོད་བྱ་རྒྱུ་དང་། གཙོ་གནད་དངོས་ཟོག་འབྱོར་རིམ་བཞིན་འཕྲལ་མར་འདོན་འཇུག་ལ་འགན་ལེན་བྱ་ཆེད་ལྷ་སའི་འཁོར་དོན་ཚོགས་པས་ཏང་ཡོན་གྱི་འཕྲལ་སྒྲུབ་རུ་ཁག་གི་ནུས་པ་འདོན་སྤེལ་བྱེད་པ་དང་། རུ་མི་ཚང་མས་རྡོག་རྩ་གཅིག་སྒྲིལ་གྱིས་གྲང་ངར་ཆེ་བའི་གནམ་གཤིས་དང་མི་སྣ་མི་འདང་བ་སོགས་ཀྱི་དཀའ་ངལ་ཁྱད་དུ་བསད་ཁར། དངོས་ཟོག་ཚང་མ་འདོན་པའི་བརྒྱུད་རིམ་ཧྲིལ་པོ་དུས་ཡུན་ཆུ་ཚོད་3ཙམ་ལས་འགོར་མེད་པ་དང་། རིམས་འགོག་གི་གཙོ་གནད་དངོས་ཟོག་སྐྱེལ་འདྲེན་བྱེད་པའི་ལས་འགན་ལེགས་སྒྲུབ་ཡོང་རྒྱུར་འགན་ལེན་བྱས་ཡོད།
དངོས་ཟོག་དུས་ཐོག་ཏུ་རིམས་འགོག་གི་འཐབ་ས་དང་པོར་སྐྱེལ་ཆེད། ལྷ་སའི་འཁོར་དོན་ཚོགས་པས་སྔ་སྣུར་དུ་འདོན་འཇུག་ལས་དོན་སྐོར་གྱི་ཚོགས་འདུ་འཚོགས་པ་དང་། འདོན་འཇུག་བྱེད་པའི་ཇུས་གཞི་དང་། མི་སྣ། རླངས་འཁོར་དུག་སེལ་དང་དེ་བཞིན་ལས་དོན་གྲ་སྒྲིག་བྱེད་པ་བཅས་ཀྱི་ཇུས་གཞི་བཟོས་ཡོད། ལྷ་སའི་འཁོར་དོན་ཚོགས་པས་ཀྱང་ས་གནས་ཁག་གི་རིམས་འགོག་བཀོད་འདོམས་པུའུ་དང་ལྷ་ས་གྲོང་ཁྱེར་ཚོང་དོན་ཅུས་དང་འབྲེལ་བ་བྱ་རྒྱུར་ཤུགས་སྣོན་བརྒྱབ་ཐོག ལས་དོན་སྒྲིག་འཛུགས་བདེ་བླག་ཡོང་རྒྱུར་འགན་ལེན་བྱས་པ་དང་། ལྷ་སའི་འཁོར་དོན་ཚོགས་པས་ད་ཐེངས་ཀྱི་རོགས་སྐྱོར་དངོས་ཟོག་ལ་བདེ་བགྲོད་ལམ་བུ་ཤར་གཏོང་ཐུབ་པ་བྱས་ཡོད།
ལྷ་ས་འཁོར་དོན་ཚོགས་པའི་འགོ་འཛིན་གཞོན་པ་ཡེ་ཆོན་མིང་གིས། ང་ཚོས་ཆེད་དོན་ལས་དོན་ཚོ་ཆུང་བཙུགས་པ་དང་། སྐྱེལ་འདྲེན་གྱི་ཇུས་གཞི་བཏིང་བ། དུག་སེལ་ཇུས་གཞི་བཟོས་པ་བཅས་བྱས་ནས་འཕྲལ་མ་ཉིད་དུ་སྦྲེལ་མཐུད་ཐུབ་པ་དང་འདོན་འཇུག་བྱ་རྒྱུར་འགན་ལེན་བྱས་པ་མ་ཟད་ནུས་ཤུགས་ཡོད་རྒུས་རིམས་འགོག་ལ་རོགས་སྐྱོར་བྱེད་པའི་དངོས་ཟོག་དུས་ཐོག་ཏུ་རྩིས་སྤྲོད་བྱ་རྒྱུར་འགན་ལེན་བྱས་ཡོད་ཅེས་གསུངས་པ་རེད།
ཤེས་རྟོགས་བྱུང་བར་གཞིགས་ན། རོགས་སྐྱོར་དངོས་ཟོག་ཁག་དང་པོ་འབྱོར་རྗེས་རོགས་སྐྱོར་དངོས་ཟོག་ཁག་གཉིས་པ་ཡང་ལྷ་སར་འབྱོར་རྒྱུ་ཡིན་པ་རེད། ལྷ་ས་འཁོར་དོན་ཚོགས་པས་རང་འགུལ་ངང་འགན་འཁྲི་འཁུར་ནས་དངོས་ཟོག་གཏོང་བའི་དུས་ཚོད་སྔ་སྣུར་དུ་འབྲེལ་བ་བྱ་རྒྱུ་དང་། ཛ་དྲག་གནས་ཚུལ་ཛ་དྲག་ངང་སྒྲུབ་གཉེར་བྱེད་པ་དང་། དམིགས་བསལ་གྱི་ལས་དོན་དམིགས་བསལ་སྒོ་ནས་སྒྲུབ་གཉེར་བཅས་བྱས་ནས་ལྕགས་ལམ་ཐོག་གི་མཐུན་སྦྱོར་འབྲེལ་མཐུད་སྒྲིག་གཞི་བཙུགས་ཐོག སྔོན་ལ་སྦྲེལ་མཐུད་བྱེད་པ་དང་། སྔོན་ལ་དངོས་ཟོག་འདོན་པ། སྔོན་ལ་རྩིས་སྤྲོད་བཅས་ཀྱི་ལས་ཀའི་རྩ་དོན་བཟུང་ནས་ནུས་ཤུགས་ཡོད་རྒུས་བོད་ལྗོངས་ལ་རོགས་སྐྱོར་བྱེད་པའི་གཙོ་གནད་དངོས་ཟོག་གི་སྐྱེལ་འདྲེན་ལས་དོན་ཡག་པོ་བསྒྲུབ་རྒྱུ་དང་། ས་མཐོའི་རིམས་འགོག་གི་ཆེད་སྟོབས་ཤུགས་ལེགས་སྐྱེས་སུ་འབུལ་རྒྱུ་ཡིན་པ་རེད།
