སྤྱི་ཟླ9པའི་ཚེས12ཉིན་གྱི་སྔ་དྲོར། འབོ་ཞབས་གྲོང་རྡལ་གངས་དཀར་ལམ་ཆེན་གྱི་བར་རྒྱུད་དུ་གནས་པའི་འབོ་ཞབས་གྲོང་རྡལ་གྱི་གནོད་ཐེབས་རྗེས་ཀྱི་བར་བརྒལ་བཀོད་སྒྲིག་ཁང་སྐྲུན་ཡུལ་དུ་འཕྲུལ་ཆས་ཀྱི་སྐད་སྒྲ་གྲག་པ་དང་མི་རྣམས་ཀྱིས་བྲེལ་འཚུབ་ངང་ལས་ཀ་འགུལ་བཞིན་ཡོད། པང་ལེབ་དང་ཤེལ་སྒོ།སྒོ་དང་སྒེའུ་ཁུང་བཅས་གཅིག་རྗེས་གཉིས་མཐུད་ངང་འཁྱེར་ཡོང་བས།ས་འགུལ་བྱུང་སའི་ལྟེ་གནས་འབོ་ཞབས་གྲོང་རྡལ་དུ་བར་བརྒལ་བཀོད་སྒྲིག་ཁང་ཚ་ཚ་འར་འུར་ངང་སྐྲུན་བཞིན་པའི་སྒང་རེད།

   སྤྱི་ཟླ9པའི་ཚེས10ཉིན་གྱི་ཕྱི་དྲོའི་ཆུ་ཚོད5པར“9·5”ཡི་ལྕགས་ཟམ་རྫོང་ས་འགུལ་གྱི་འགུལ་འགོག་གནོད་སྐྱོབ་བཀོད་འདོམས་པུའུ་ཡི་བརྡ་ཐོ་འབྱོར་ནས་འཕྲལ་མར་བར་བརྒལ་ཁང་པ་བསྐྲུན་འགོ་བཙུགས་པ་རེད། ཕྱི་དྲོའི་ཆུ་ཚོད6པར་ལས་གྲྭ་དངོས་སུ་ལས་འགོ་བཙུགས། ཚེས11ཉིན་གྱི་སྔ་དྲོའི་ཆུ་ཚོད7པར་འཕྲུལ་ཆས་སྣ་ཚོགས་གཅིག་རྗེས་གཉིས་མཐུད་དེ་ཨར་ལས་བྱ་ཡུལ་དུ་སླེབས། དར་མདོ་གཞུང་ལམ་ཡན་ལག་ཅུས་ཀྱི་ཅུས་ཀྲང་བཀྲ་ཤིས་དོན་གྲུབ་ཀྱིས་ང་ཚོས་ཕྱོགས་མང་པོའི་ཐད་ནས་སྐྱེལ་འདྲེན་འཕྲུལ་ཆས6དང་རྐོ་འདྲུའི་འཕྲུལ་འཁོར14དང་། ལམ་གནོན་འཕྲུལ་འཁོར2།རང་འབེབས་རླངས་འཁོར1། སྐྱེལ་འདྲེན་རླངས་འཁོར20བཅས་བསྡུས་ཏེ། ས་འདམ་སྨི་གྲུ་བཞི་ལྷམ་པ9000བླངས་པ་དང་སྨི་གྲུ་བཞི་མ་ལྷམ་པ6900འདྲེན་ནས་ས་ངོས་ཁོད་སྙོམས་ལ་སྤྱད་ཡོད། ཚེས12ཉིན་གྱི་ཆུ་ཚོད11བར་ས་ངོས་ཁོད་སྙོམས་ཁྱོན་ཡོངས་ནས་བསྐྲུན་ཚར་བ་དང་ཨར་ལས་གྱི་དུས་རིམ་རྗེས་མར་སླེབས་ཡོད་ཅེས་ངོ་སྤྲོད་བྱས།

   ཧྭ་ཞི་ཚོགས་པའི་ལས་གཞི་འཛུགས་སྐྲུན་པུའུ་ཡི་འགན་འཁུར་བ་ཀྲན་མིང་ཆིའུ་ཡིས་ངོ་སྤྲོད་བྱས་པར་གཞིགས་ན། དེ་གའི་བར་བརྒལ་བཀོད་སྒྲིག་ཁང་སྨི་གྲུ་བཞི་མ9000ལ་ཟིན་པ་དང་།བཀོད་སྒྲིག་ཁང་གི་སྤྱིའི་རྒྱ་ཁྱོན་སྨི་གྲུ་བཞི་མ3500ལ་ཟིན་པ་རེད། ལས་གཞི་དེས་ཁང་པ170བསྐྲུན་རྒྱུ་དང་།ཁྱོན་བསྡོམས་མི350བཀོད་སྒྲིག་བྱེད་ཆོག།མི་གསུམ་སྡོད་སའི་ཁང་པ་དང་མི་གཉིས་སྡོད་སའི་ཁང་པ།མི་གཅིག་སྡོད་སའི་ཁང་པ་བཅས་དང་དེ་བཞིན་སྤྱི་པའི་ཐང་ཚང་དང་གསང་སྤྱོད་ཁང་།གཟུགས་པོ་འཁྲུད་ས།སྒོ་རྩིས་ཚོང་ཁང་།ལས་རེས་ཁང་སོགས་བཀོད་སྒྲིག་བྱས་ཡོད།ཚེས12ཉིན་གྱི་ཐོ་རེངས་ཆུ་ཚོད1དང་སྐར་མ30ནས་བཟུང་ལས་ཡུལ་དུ་སྨི་གྲུ་བཞི་མ100ལ་ཟིན་པའི་བཀོད་སྒྲིག་ཁང་པའི་རྒྱུ་ཆ་ནང་འདྲེན་བྱས་པ་རེད། ཉིན10ཡི་རྗེས་སུ་པང་ཁང་དངོས་སུ་བསྐྲུན་རྒྱུ་ཡིན་ཞིང་། སྔོན་དཔག་བྱས་ན་སྤྱི་ཟླ9པའི་ཚེས30ཉིན་ཡས་མས་སུ་ལས་མཇུག་འགྲིལ་རྒྱུ་དང་དེ་ནས་རིམ་པར་བེད་སྤྱོད་གཏང་རྒྱུ་ཡིན་པ་རེད།

   གཞན་ཡང་ཤེས་རྟོགས་བྱུང་བར་གཞིགས་ན། གསོམ་ཤིང་གྲོང་སྡེའི་གནོད་འཚེ་ཐེབས་པའི་མང་ཚོགས་ཀྱི་བར་བརྒལ་བཀོད་སྒྲིག་བྱ་ཡུལ་ཡང་དུས་གཅིག་ཏུ་སྐྲུན་འགོ་ཚུགས་པ་རེད།།