བྱ་གཞུང་དབང་ཆེན་ཚེ་རིང་གིས་བྲིས།         

        ཐེ་གེ་ནི་རྩེད་ཆས་ཤིག་སྟེ། དེ་ནི་ཕྱུགས་ཟོག་གི་སུག་རུས་ལས་བཏོན་པའི་རུས་ཚིགས་ཐུན་མོང་མ་ཡིན་པ་དེ་ཡིན། རྩེད་ཆས་དེ་ནི་ང་ཚོའི་མེས་པོ་གོང་མ་དག་གིས་རི་དྭགས་བསད་དེ་ཤ་ལ་སྤྱད་པ་ནས་བྱུང་ཞིང་། དེ་ཡང་འབྲོང་ཕོ་མོ་བཏུལ་ནས་ནོར་དང་། རྐྱང་ཕོ་མོ་བཏུལ་ནས་རྟ་དང་བོང་བུ། དགོ་བ་ཕོ་མོ་བཏུལ་ནས་ར་དང་ལུག་ཏུ་བསྒྱུར་བ་ནས་བོད་ཁྱིམ་རེ་རེར་སྒོ་ཟོག་བྱུང་བ་དང་། སྒོ་ཟོག་བྱུང་ཚུན་ནས་ཐེ་གེ་ནི་སྟོད་མངའ་རིས་སྐོར་གསུམ་དང་། བར་དབུས་གཙང་རུ་བཞི། སྨད་མདོ་ཁམས་སྒང་དྲུག་གི་ཡུལ་གྲུ་ཀུན་ཏུ་རྩེ་འགོ་ཚུགས།

        སྤྱིར་བཏང་དུ། ནོར་དང་ཕག་སོགས་ཀྱི་ཐེ་གེ་ཆེ་ལ་ར་ལུག་གི་ཐེ་གེ་ཆུང་ཞིང་རེའུ་ལུག་གི་ཐེ་གེ་དེ་བས་ཀྱང་ཆུང་། མི་རྣམས་དུས་རྒྱུན་གྱི་ཐེ་གེའི་རྩེད་མོའི་ཁྲོད་ནས་ར་ཐེ་དང་ལུག་ཐེ་ལས། ནོར་ཐེ་དང་ཕག་ཐེ། རེའུ་ལུག་གི་ཐེ་གེ་སྤྱོད་པ་ཅུང་ཉུང་ལ། རྟ་ཐེ་དང་བོང་ཐེ་ལ་འཛེམ་ནས་སྤྱོད་པ་ཕར་ཞོག་མིག་གིས་མཐོང་ཡང་དཀོན། དེའི་རྒྱུ་མཚན་ནི་གསལ་བོ་མི་ཤེས་ཀྱང་བཤད་རྒྱུན་ལ་ནོར་ཐེ་དང་ཕག་ཐེ་བོངས་ཆེ་ལ་ལྕི་བས་མཐེབ་མོས་ཕར་འདེད་ཚུར་འདེད་བྱེད་དཀའ་བ་དང་། སྒོས་སུ་རྩེད་མཁན་གྱི་ལག་པ་ཆུང་ཆུང་ནང་དུ་ཐེ་གེ་ཆེ་ཆེ་མི་ཤོང་པས་ཡིན་ལ། རྟ་ཐེ་དང་བོང་ཐེ་ནི་ང་ཚོ་བོད་པ་ཚོས་གནའ་ནས་ད་བར་དུ་ལུག་དང་ར་མ། དགོ་བ། གནའ། གཙོད། ནོར་དང་འབྲོང་སོགས་རྨིག་པ་ཁ་དབྲག་རིགས་ཀྱི་ཤ་ལ་ལོངས་སྤྱོད་པ་ལས། རྟ་དང་བོང་བུ། དྲེད། རྐྱང་སོགས་རྨིག་པ་ཟླུམ་པོའི་རིགས་ཀྱི་ཤ་ལ་འཛེམ་པའི་སྟབས་ཀྱིས་ཡིན། གཞན་ཡང་རེའུ་ལུག་གི་ཐེ་གེ་ནི་ཆུང་དྲགས་པས་ཐེ་གེའི་འབུར་ཀོང་གི་ཆ་མངོན་གསལ་དོད་པོ་ཞིག་མ་ཡིན་པའི་ཐོག་ལ་ཡང་ཤས་ཆེ་བ་ཞིག་འདུག་པས་བྱིས་པ་ལོ་ཆུང་མཛུབ་སྟོབས་ཞན་པ་དག་ལས་གཞན་གྱིས་དགའ་པོ་མི་བྱེད།

        ཐེ་གེ་ཡི་ཚུགས་ཀ་ནི་བརྐོས་རིས་སྒྱུ་རྩལ་པའི་རུས་བརྐོས་ཀྱི་ཚབ་མཚོན་བརྩམས་ཆོས་ཤིག་དང་འདྲ་བར་ཧ་ཅང་གསོན་ཉམས་ལྡན་པ་ཞིག་ཡིན་ཏེ། ཐེ་གེ་ཡར་འཁོར་མདུན་ཏེ་མདུན་གྱི་ཆ་ནི་ཀོང་ལ། མར་འཁོར་རྒྱབ་ནི་འབུར་བ་དང་། ཡར་འགྲེང་ཐོག་སྟེ་བདེ་ལ། ལྡོག་འགྲེང་འོག་ནི་ཀོང་བའི་ཚུལ་གྱིས་དབྱིབས་དབྱིན་ཡིག་གསལ་བྱེདSབཞིན་དུ་འཁྱིལ་ཡོད། ཐེ་གེ་ཀེག་ལང་སྐེ་སྟེ་ཤོ་ལ། ལྡོག་ལང་འཕོངས་ནི་རྒྱགས་འདུག དེ་ལྟ་བུའི་ངོ་མཚར་བའི་ཁྱད་ཆོས་ལ་གཞིགས་ནས་ང་ཚོའི་ཕ་མེས་བློ་གྲོས་ཅན་དག་གིས་ཐེ་གེའི་ལངས་ཚུལ་དང་འདུག་ཚུལ་ལྟར། ཐེ་གེ་ཡར་འཁོར་ར་དང་མར་འཁོར་ལུག ཡར་འགྲེང་བོང་བུ། ལྡོག་འགྲེང་རྟ། ཀེག་ལངས་རྔ་མོང་དང་། ལྡོག་ལངས་སེང་གེར་ངོས་འཛིན་མཛད་ཡོད།

        ཐེ་གེ་རྩེད་མཁན་ལ་ཕོ་མོ་དང་ལོ་གྲངས། མང་ཉུང་གི་དབྱེ་བ་གང་ཡང་མེད་པར་རྒན་བྱིས་དང་། ཕ་མ་སྤུན་མཆེད། ཁ་ཡ་ན་ཟླ་སོགས་གང་ཞིག་མི་གཉིས་དང་གཉིས་ཀྱི་ཡན་འཛོམས་ཚེ་ཅི་དགར་རྩེ་ཆོག་ལ། རྩེད་ར་སྒོའི་ཕྱི་ནང་དང་། ལྷས་གོང་ཞོལ། གཡུལ་ཁ་དང་ཁང་ཀླད། ཐ་ན་ཚ་ཐབ་སོགས་ཀྱང་རུང་ངོ་། །རྩེད་སྟངས་གོ་རིམ་ལྡན་ལ་སྤྲོ་སྣང་ཆེ་བ་ཞིག་ཡིན་ཏེ། དེ་ཡང་ཐོག་མར་རྩེད་མཁན་དག་ལ་ཆ་སྙོམས་ཀྱིས་ཐེ་གེ་འདང་ཚོད་རེ་བགོས་རྗེས། རང་རང་གི་པང་སྐལ་སར་གཏོར་ནས་སུ་ལ་བབས་པའི་རྟ་ཡི་མང་ཉུང་འགྲན་ནས་རྩེད་མཁན་གྱི་གོ་རིམ་བསྒྲིགས་པ་དང་། དེ་ནས་གོ་རིམ་ལྟར་རང་རང་གི་པང་སྐལ་རྩོད་ལེན་བྱེད་པའི་འགྲན་བསྡུར་དངོས་ལ་འཇུག་དགོས་པ་ཡིན། དེ་ནས་ཐེ་གེ་ཕྱུགས་ཟོག་ཡིན་པས་བཀྲམ་དགོས་ཞེས་ཐེ་གེ་ཤུགས་ཀྱིས་གཏོར་ནས་རྩེད་རར་གཅལ་དུ་བཀྲམས་རྗེས། རྩེད་མཁན་ཕྱུགས་རྫི་ཡིན་པས་བསྡུ་དགོས་ཞེས་ཐེ་གེའི་རིགས་མཐུན་པ་བཙལ་ནས་མཛུབ་མོས་ཕར་རྒྱག་ཚུར་རྒྱག་བྱེད་དགོས། ར་དང་ར་དང་། ལུག་དང་ལུག་ལ་རྡུང་དང་། རྟ་དང་རྟ། བོང་བུ་དང་བོང་བུ་ལ་གཤིབ་ཅེས་ཕན་ཚུན་རྒྱག་དགོས། རིགས་མཐུན་པ་ཏག་ཏག་བྱུང་ན་འབྱུང་དཀའ་བ་ཡིན་པས་འཕྲོག་དགོས་པ་དང་། སེང་གེ་རི་དྭགས་ཀྱི་རྒྱལ་བོ་ཡིན་པ་དང་། རྔ་མོང་སྲོག་ཆགས་མཐོང་དཀོན་པ་ཡིན་ཟེར་ནས་དེ་གཉིས་བྱུང་ནའང་དེ་བཞིན་དུ་འཕྲོག་རེས་བྱེད་དགོས་ཀྱང་། རིགས་མི་མཐུན་པ་བྱུང་ན་མི་མཐུན་སྣ་བཞིའམ་སྣ་གསུམ་ཟེར་ནས་ཕན་ཚུན་རྒྱག་པའི་སྲོལ་མེད། བསྡུས་པའི་ཁ་གྲངས་སུ་མང་འགྲན་དགོས་ཞེས་ཐེ་གེ་གཉིས་རེ་བརྒྱབ་ན་རེ་རེ་བསྡུ་དགོས་པ་དང་། བསྡུས་པའི་ཁ་གྲངས་ཀྱི་མང་ཉུང་འགྲན་ནས། རྒྱལ་ཁ་འཐོབ་མཁན་གྱིས་ཕམ་ཁ་ཉོ་མཁན་གྱི་ཐོད་དཀྱིལ་དུ་རང་གི་པང་སྐལ་ཕུད་པའི་ཐེ་གེ་འཐོབ་གྲངས་མཛུབ་བཀུག་བྱས་ཏེ་ཤུགས་ཀྱིས་གཞུས་ཚེ་རྩེད་ཐེངས་དེ་གཞི་ནས་མཇུག་རྫོགས་པ་ཡིན།།