ཏང་གི་ཚོགས་ཆེན་ཉི་ཤུ་པའི་སྙན་ཞུ་ལ་མུ་མཐུད་དུ་གྲོས་བསྡུར་དང་།
ཀྲུང་དབྱང་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གི་ལས་ཀའི་སྙན་ཞུ་དང་ཏང་གི་
སྒྲིག་ཡིག་དག་བཅོས་འཆར་ཟིན་ལ་གྲོས་བསྡུར་བྱས།
ཀྲང་ཆིང་ལི། ཝང་ཞའོ་ཧུའེ། ཧོང་ཆང་གྲོས་བསྡུར་ལ་ཞུགས།
སྤྱི་ཟླ་10པའི་ཚེས་18ཉིན། ཏང་གི་ཚོགས་ཆེན་ཉི་ཤུ་པའི་སི་ཁྲོན་ཞིང་ཆེན་གྱི་འཐུས་ཚབ་ཚོགས་པས་བཅའ་སྡོད་བྱེད་གནས་སུ་ཚོ་ཆུང་བགོས་ནས་གྲོས་ཚོགས་འཚོགས་ཏེ། མུ་མཐུད་དུ་ཏང་གི་ཚོགས་ཆེན་ཉི་ཤུ་པའི་སྙན་ཞུ་ལ་གྲོས་བསྡུར་དང་ཀྲུང་དབྱང་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གི་ལས་ཀའི་སྙན་ཞུ། ཏང་གི་སྒྲིག་ཡིག་དག་བཅོས་འཆར་ཟིན་ལ་གྲོས་བསྡུར་བྱས། རྒྱལ་ཡོངས་སྲིད་གྲོས་ཀྱི་ཀྲུའུ་ཞི་གཞོན་པ། ཏང་ཙུའུ་ཡི་ཧྲུའུ་ཅི་གཞོན་པ་ཀྲང་ཆིང་ལི་དང་། ཞིང་ཨུའི་ཧྲུའུ་ཅི། འཐུས་ཚབ་ཚོགས་པའི་ཚོགས་གཙོ་ཝང་ཞའོ་ཧུའེ། ཞིང་ཨུའི་ཧྲུའུ་ཅི་གཞོན་པ། ཞིང་དཔོན། ཚོགས་གཙོ་གཞོན་པ་ཧོང་ཆང་བཅས་གྲོས་བསྡུར་ནང་ཞུགས།
ཝང་ཞའོ་ཧུའེ་ཡིས་གཏམ་བཤད་གནང་སྐབས། ཏང་གི་སྒྲིག་ཡིག་བཟོ་བཅོས་འཆར་ཟིན་དང་ཀྲུང་དབྱང་སྒྲིག་ཨུའི་ལས་ཀའི་སྙན་ཞུ་ལ་རྦད་དེ་མོས་མཐུན་ཡོད་ཅེས་གསུངས། ཐེངས་འདིར་ཏང་གི་སྒྲིག་ཡིག་བཟོ་བཅོས་བྱེད་སྐབས། སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་དང་ལོ་བརྒྱ་གཉིས་པའི་འབད་འཐབ་དམིགས་འབེན་མངོན་འགྱུར། ཀྲུང་ཧྭ་མི་རིགས་རླབས་ཆེན་བསྐྱར་དར་ཡོང་བར་ཕྱོགས་ཡོངས་ནས་སྐུལ་སྤེལ་བཅས་བྱ་རྒྱུར་དམིགས་ཏེ། ཏང་གི་ཚོགས་ཆེན་བཅུ་དགུ་པ་འཚོགས་ཚུན་ཏང་གི་རིགས་པའི་གཞུང་ལུགས་གསར་གཏོད་དང་ལག་ལེན་གསར་གཏོད། ལམ་ལུགས་གསར་གཏོད་བཅས་ཏང་གི་སྒྲིག་ཡིག་ནང་བཀོད་པ་དང་། ཏང་གི་ཚོགས་ཆེན་ཉི་ཤུ་པའི་སྙན་ཞུའི་ནང་བཏོན་པའི་དགོངས་པ་གལ་ཆེན་དང་ལྟ་བ་གལ་ཆེན། འཐབ་ཇུས་གལ་ཆེན། བྱེད་ཐབས་གལ་ཆེན་བཅས་འགའ་ཞིག་ཏང་གི་སྒྲིག་ཡིག་ནང་བཀོད་པ་དང་། རྒྱང་སྐྱོད་ལམ་བུ་གསར་པའི་གནས་བབ་ལས་འགན་འཕེལ་རྒྱས་དང་འགྱུར་ལྡོག་ལ་འཚམ་པའི་ཏང་གི་ལས་དོན་དང་ཏང་གི་འཛུགས་སྐྲུན་ཐད་བཏོན་པའི་བླང་བྱ་གསར་བ་རེད། ཏང་གི་སྒྲིག་ཡིག་དག་བཅོས་འཆར་ཟིན་གྱི་མ་ཟིན་ནང་ཏང་ཡོངས་ཀྱི་བློ་གྲོས་གཅིག་ཏུ་བསྡུས་ཡོད་པ་དང་། མི་དམངས་ཀྱི་བསམ་འདུན་མཚོན་ཡོད་པར་མ་ཟད། ཏང་གི་སྐབས་བཅུ་དགུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བདུན་པའི་ཐོག་གྲོས་ཞིབ་བྱས་ནས་གྲོས་འཆམ་བྱུང་བ་ཡིན་པས་ཧ་ཅང་གནད་དུ་སྨིན་ཡོད། དུས་རབས་གསར་པའི་རྒྱང་སྐྱོད་ཀྱི་ལམ་བུའི་ཐོག་སྐྱོད་པར་ང་ཚོས“གཏན་འཁེལ་གཉིས”ཀྱི་ཐག་གཅོད་རང་བཞིན་གྱི་དོན་སྙིང་ལ་གོ་བ་གཏིང་ཟབ་བླངས་ནས་སྔར་ལས་རང་རྟོགས་ངང་སྤྱི་ཁྱབ་ཧྲུའུ་ཅི་ཞི་ཅིན་ཕིང་ཏང་ཀྲུང་དབྱང་གི་སྲོག་ཤིང་དང་ཏང་ཡོངས་ཀྱི་སྲོག་ཤིང་ཡིན་པའི་གནས་བབ་ལ་སྲུང་སྐྱོང་བྱས་ཏེ། ཏང་ཀྲུང་དབྱང་གི་དབང་གྲགས་དང་གཅིག་སྡུད་གཅིག་གྱུར་གྱི་དབུ་ཁྲིད་ལ་སྔར་བས་རང་རྟོགས་ངང་སྲུང་སྐྱོང་བྱས་ནས་བློ་བརྟན་འགྱུར་མེད་ངང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཁྲིད་སྟོན་གནང་བའི་ཁ་ཕྱོགས་སུ་དཔའ་ངར་ཆེན་པོས་མདུན་སྐྱོད་བྱེད་དགོས་ཞེས་གསུངས།
ཝང་ཞའོ་ཧུའེ་ཡིས་ཀྲུང་དབྱང་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གི་ལས་ཀའི་སྙན་ཞུའི་ནང་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་དབུ་ཁྲིད་འོག །ཀྲུང་དབྱང་སྒྲིག་ཁྲིམས་ཞིབ་བཤེར་ཨུ་ལྷན་རྒྱལ་ཁབ་ལྟ་སྐུལ་ཨུ་ལྷན་དང་རིམ་པ་ཁག་གི་སྒྲིག་ཁྲིམས་ཞིབ་བཤེར་ལྟ་ཞིབ་ལས་ཁུངས་ཀྱིས་ཕྱོགས་ཡོངས་ནས་ཏང་ནན་གྱིས་སྐྱོང་རྒྱུར་སྐུལ་འདེད་གཏོང་བའི་ལས་ཀའི་ལག་ལེན་དང་གསར་གཏོད་འཚོལ་ཞིབ་མཚོན་ཡོད་ལ། བསམ་བློའི་རང་བཞིན་དང་མཛུབ་ཁྲིད་རང་བཞིན། ལག་ལེན་རང་བཞིན་བཅས་ཤུགས་ཆེན་ལྡན་པའི་སྙན་ཞུ་བཟང་པོ་ཞིག་རེད། སྙན་ཞུའི་ནང་གྲུབ་འབྲས་ལ་ཕྱོགས་བསྡོམས་བྱས་པ་དེ་ཁྱོན་ཡོངས་དོན་དངོས་ལ་མཐུན་པ་དང་དོན་དངོས་ལ་བརྟེན་ནས་སྐད་ཆ་བཤད་པ། གཞི་གྲངས་ལས་ར་སྤྲོད་བྱས་པ་ཞིག་དང་ཁྱོན་ཡོངས་རྣམ་པས་ཚོགས་ཆེན་བཅུ་དགུ་པ་འཚོགས་ཚུན་ཕྱོགས་ཡོངས་ནས་ཏང་ནན་གྱིས་སྐྱོང་བར་ཐོབ་པའི་ལོ་རྒྱུས་རང་བཞིན་དང་གསར་གཏོད་རང་བཞིན་གྱི་གྲུབ་འབྲས་མངོན་པར་བྱས་པ་ཞིག་དང་། ལངས་གཟུགས་རྣམ་པའི་ཐོག་ནས་ཏང་གིས་རང་ཉིད་གསར་བརྗེ་བྱས་ནས་ལོ་རྒྱུས་ཀྱི་དུས་འཁོར་འཁོར་ཚད་ལས་ཐོབ་པའི་གྲུབ་འབྲས་ཀྱི་ལམ་བུ་འཚོལ་ཞིབ་བྱས་པར་ཕྱིར་རྟོག་བྱས་པ་འདི་ནི་ལོ་རྒྱུས་ཀྱི་རེ་བ་སྟོང་ཟད་དུ་མི་གཏོང་བ་དང་། དུས་རབས་ཀྱི་རེ་བ་སྟོང་ཟད་དུ་མི་གཏོང་བ། མི་དམངས་ཀྱི་རེ་བ་ཆུད་ཟོས་སུ་མི་གཏོང་བ་བཅས་ཀྱི་ཕུལ་བྱུང་རྒྱུགས་ཤོག་ཅིག་རེད། ཉམས་ལེན་མཐར་ཕྱིན་བྱས་ཏེ། ཕྱོགས་ཡོངས་ནས་ཏང་ནན་གྱིས་སྐྱོང་བ་དང་ཏང་སྲིད་སྤྱོད་གཙང་། རུལ་སུངས་ལ་རྒོལ་བའི་འཐབ་རྩོད་བཅས་ཀྱི་ཆོས་ཉིད་རང་བཞིན་ལྡན་པའི་ངོས་འཛིན་ཟབ་ཏུ་བཏང་བས། ང་ཚོས་བསམ་བློའི་ངོས་འཛིན་གཅིག་གྱུར་དང་ཆབ་སྲིད་ཀྱི་བརྟན་ཤུགས་རྒྱུན་འཁྱོངས། ཏང་སྲོལ་སྤྱོད་གཙང་དང་རུལ་སུངས་ལ་རྒོལ་བའི་འཐབ་རྩོད་མཐར་ཕྱིན་བཅས་བྱེད་པར་ཕན་ཐོགས་ཡོད། ལས་ཀའི་གཙོ་གནད་མངོན་གསལ་དོད་པའི་སྒོ་ནས་ལས་ཀའི་བརྟན་བརླིང་རང་བཞིན་དང་རྒྱུན་མཐུད་རང་བཞིན་མངོན་པར་མ་ཟད། ལས་ཀའི་ཚད་བརྒལ་རང་བཞིན་དང་གསར་གཏོད་རང་བཞིན་ཡང་མངོན་པ་བྱས་ནས་འགོ་འཛུགས་ས་དེ་བས་མཐོ་བ་དང་། རིམ་པ་དེ་བས་མཐོ་བ། དམིགས་ཚད་དེ་བས་མཐོ་བ་བཅས་ཀྱི་ཐོག་ནས་ཏང་ནན་གྱིས་སྐྱོང་བར་ཕྱོགས་ཡོངས་སྐུལ་འདེད་གཏོང་ཆེད། “ལམ་ཐིག་རི་མོ”གཏན་འཁེལ་བྱས་པ་དང་ “ལས་འགན་ཡི་གེ”ཁ་གསལ་བྱས་ནས། དོན་དངོས་ལས་སྒྲུབ་ཀྱི་སྤྱོད་པ་དང་དུས་བསྟུན་མདུན་སྐྱོད་ཀྱི་གསར་གཏོད་སྙིང་སྟོབས་མངོན་ཡོད།
ཧོང་ཆང་གིས་གཏམ་བཤད་གནང་སྐབས། ཏང་གི་སྒྲིག་ཡིག་བཟོ་བཅོས་འཆར་ཟིན་དང་ཀྲུང་དབྱང་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གི་ལས་དོན་སྙན་ཞུ་ལ་རྦད་དེ་མོས་མཐུན་ཡོད་ཅེས་གསུངས། ཏང་གི་ཚོགས་ཆེན་ཉི་ཤུ་པའི་ཐོག་གནས་བབ་གསར་པ་དང་ལས་འགན་གསར་པར་གཞིགས་ནས་ཏང་གི་སྒྲིག་ཡིག་ལ་བཟོ་བཅོས་འོས་འཚམ་བརྒྱབ་པ་དེ་ནི་ཏང་གིས་ལོ་རྒྱུས་ཕྱོགས་བསྡོམས་དང་ཉམས་མྱོང་སྲ་བརྟན་དུ་གཏོང་བའི་སྲོལ་རྒྱུན་བཟང་པོ་ཡིན་པ་དང་། ཏང་གིས་དུས་བསྟུན་མདུན་སྐྱོད་ཀྱིས་རིགས་པའི་གཞུང་ལུགས་དང་ལག་ལེན་གསར་གཏོད་བྱེད་པར་སྐུལ་འདེད་གཏོང་བའི་དགོས་ངེས་ཀྱི་བླང་བྱ་ཞིག་ཡིན། ང་ཚོས་ལས་ཀའི་སྙན་ཞུའི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱས་ཏེ་ཞིང་ཨུའི་དབུ་ཁྲིད་འོག་ཕྱོགས་ཡོངས་ནས་ཏང་ནན་གྱིས་སྐྱོང་བའི་ཐབས་ཇུས་བཀོད་སྒྲིག་དོན་འཁྱོལ་མཐའ་གཅིག་ཏུ་བྱེད་པ་དང་། སྲིད་གཞུང་ཁོངས་གཏོགས་ཀྱི་ཏང་སྲིད་གཙང་སྤྱོད་འཛུགས་སྐྱོང་ལ་ཤུགས་སྣོན་ཆེན་པོ་རྒྱག་པ། ཐོག་མཐའ་བར་གསུམ་དུ་ལས་ཀའི་སྤྱོད་ཚུལ་རྒྱུན་འཁྱོངས་ནན་མོ་བཅས་བྱས་ཏེ། གཞི་རིམ་གྱི་ཁུར་པོ་ཡང་དུ་གཏོང་བ་དང་དངོས་འཛིན་དངོས་སྒྲུབ་བྱས་ནས་དོན་འཁྱོལ་ལ་དམ་འཛིན་བྱེད་མཁས་པ་དང་། རིམ་པ་བཞིན་ཞིང་ཆེན་ཡོངས་ཀྱི་སྲིད་གཞུང་ཁོངས་གཏོགས་ཀྱི་སྲོལ་བཟང་དུ་འགྱུར་བར་བྱེད་དགོས།
འཐུས་མི་རྣམས་ཚོ་ཆུང་གཉིས་སུ་བགོས་པ་དང་སྤྲོ་སེམས་འཁོལ་བའི་ངང་གྲོས་བསྡུར་བྱེད་པའི་ཁྲོད་དུ། ཚང་མས་སོ་སོའི་ལས་ཀའི་དོན་དངོས་དང་བསམ་བློའི་དོན་དངོས་ཟུང་འབྲེལ་བྱས་ཏེ། ཕྱོགས་སོ་སོའི་ཐད་ནས་ཏང་གི་ཚོགས་ཆེན་ཉི་ཤུ་པའི་སྙན་ཞུ་དང་། ཀྲུང་དབྱང་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གི་ལས་ཀའི་སྙན་ཞུ། ཏང་གི་སྒྲིག་ཡིག་དག་བཅོས་འཆར་ཟིན་བཅས་ལ་དམིགས་ནས་གྲོས་བསྡུར་དང་གཏམ་བཤད་གནང་སྟེ། ཏང་གི་ཚོགས་ཆེན་ཉི་ཤུ་པའི་སྙན་ཞུ་དང་ཀྲུང་དབྱང་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གི་ལས་ཀའི་སྙན་ཞུ། ཏང་གི་སྒྲིག་ཡིག་དག་བཅོས་འཆར་ཟིན་བཅས་ལ་རྦད་དེ་མོས་མཐུན་དང་། བློ་ཐག་རྦད་བཅད་ཀྱིས་བརྩི་སྲུང་ཞུ་རྒྱུ་ཡིན་པར་མ་ཟད། སྣེ་ཁྲིད་དེ་ཏང་གི་ཚོགས་ཆེན་ཉི་ཤུ་པའི་དགོངས་དོན་སློབ་སྦྱོང་ཡག་པོ་དང་དྲིལ་བསྒྲགས་ཡག་པོ། ལག་བསྟར་ཡག་པོ་བཅས་བྱ་རྒྱུའི་བསམ་ཚུལ་ཡང་བཏོན་པ་རེད། ། (སྒྲོལ་མ་ཚེ་བརྟན་གྱིས་བསྒྱུར།)
