གླུ་ཐ་ལ་ལ་མོ་ཐ་ལ་ལེན། །
གླུ་ཨ་ལ་ལ་མོ་ཨ་ལ་ལེན། །
གླུ་མཁྱེན་པས་གཟིགས་དང་ཧོར་གྱི་ལྷ། །
ང་ཤན་པའི་ལྕོག་ལྷ་མཚལ་རྩེ་མཁྱེན། །
ཚུར་ཉོན་དང་ཧོར་སྡེ་གནམ་གྱི་བུ། །
གཏམ་ཁ་ཡ་མེད་དེ་དཔོན་གྱི་གཏམ། །
གསུང་ཐོས་པ་སྙན་ཡང་ཆག་ཉེན་ཆེ། །
ཐུགས་བདེན་ནི་བདེན་ཏེ་སྐྱོ་ཞད་ཆེ། །
བུ་བསོས་བསོས་འོ་མས་བསོས་ལེ་དེ། །
དགྲ་བྱུང་ཉིན་མཁོ་སྟེ་སྔོན་ལ་སྡུས། །
གཉེན་ཡི་ཐང་ཆད་ལ་ལ་ཐང་མེད། །
རྟ་འདོ་བ་ཆས་ཀྱིས་བསོས་ལེ་དེ། །
བང་རྒྱུག་ཉིན་མཁོ་སྟེ་སྔ་ན་རྩོག །
རྟ་རྔུལ་ཆུ་འབྱིན་ལ་ལ་ཐང་མེད། །
བྱང་འབྲོང་གཡག་དབྱར་ལ་བུད་ལེ་དེ། །
སྟོན་ཤ་ཚང་མཁོ་སྟེ་སྔ་ན་རྩོག །
ནང་ཤ་འབུས་གང་ལ་ལ་ཐང་མེད། །
ཕྱུགས་ཟལ་དཀར་འབྲི་མོའི་མར་དཀར་དེ། །
ཇ་བསུ་ཉིན་མཁོ་སྟེ་སྔ་ན་རྩོག །
ཞག་ཉ་མིག་གཤར་ལ་ལ་ཐང་མེད། །
ཁྱོད་གུར་དཀར་རྒྱལ་པོའི་གསུང་ལུགས་ལ། །
ང་སྡིག་གཅོད་ཤན་པ་རྨེ་རུ་རྩེ། །
ཐང་ཆེན་ནས་ཆོས་སྐལ་ཆད་དོ་ཟེར། །
ཆོས་བརྟགས་ཤིང་ཞུས་ན་བྱིན་རླབས་ཆེ། །
ཁ་སྒོམ་རྒྱུ་མེད་ཀྱང་ཕུག་ཐག་ཆོད། །
ས་སྐྱ་རེངས་ཁུག་ནས་ཡ་ཐོད་ཤོར། །
རྨ་བྱུང་ཡང་སྲོག་མགོ་ཐོན་ལེ་ཡིན། །
རྐྱེན་ཆག་སྒོ་ཆེ་ཡང་རང་ཚོད་ཤེས། །
སྐུ་ཆེ་ལ་ཁྲི་བཙུན་སྐུ་མཆེད་དང་། །
ངར་མ་བཙན་རྒྱལ་མན་ཡན་ནས། །
ཧོར་ཟམ་སྐྱ་མོའི་ཕར་ཁ་ནས། །
ངར་རྒོད་རྒོད་རྡོ་ལ་གཏུགས་ནས་ཐལ། །
དཔའ་ཞན་ཞན་ཉོབ་བརྡུང་རྩི་ཚོད་མེད། །
ང་ཤན་པ་སྤུན་གསུམ་ཐང་རྩེ་བཞི། །
མགར་ཆོས་དར་མཆོང་ལྷ་སྨུག་པོ་དྲུག །
ཧོར་གུར་ནག་ག་མའི་གེར་བཙན་བརྒྱད། །
ཧོར་ཕྲུག་ག་མ་གཟི་མགོ་དགུ། །
དེ་མིན་པ་ཆག་སྒོ་བཟོས་ནས་ཐལ། །
ལས་དེ་ཚོའི་ཚོད་ལ་འཚམ་པོ་ཡིན། །
སྣ་བཅད་ནས་ཚར་གསོད་ཨེ་ཡིན་བསམས། །
ཁ་བཤགས་ནས་རྣ་རྩར་མ་གཏུགས་ན། །
ཁྲིམས་བཅད་ལེ་ཚོད་ཀྱིས་འཁྱམས་པོ་ཡིན།
ང་ཤན་པའི་སྲོག་དམར་མ་ཤོར་ན། །
ཧོར་གུར་དཀར་བློན་གོ་ཆོད་པས་ན། །
ཧོར་གཞན་གྱི་ཚོ་ལ་ཆེན་པོ་ཡིན། །
དེ་ནས་གནམ་རྗེ་གུར་དཀར་ལུ། །
དགུན་ས་ཆུ་སྦུབས་ལ་ཚུད་ཉིན་མོ། །
མི་དྲན་དགུ་དྲན་ཐན་པ་དྲན། །
གླིང་དཀར་སྟོད་ལ་གྲགས་ནས་ཐལ། །
ཆབ་བཞུ་ལེའི་སྔ་ལྟས་ཚང་ལེ་ཡིན། །
སྟོན་འབྲུ་དྲུག་རྒྱན་ལ་འཁྲུངས་ས་ནས། །
མི་འོང་དགུ་འོང་ཁུ་འཕང་དེ། །
ཧོར་གུར་དཀར་རྒྱལ་པོས་ཕབ་ནས་ཐལ། །
དགུན་བསེར་བུའི་སྔ་ལྟས་ཚང་ལེ་རེད། །
ཧོར་སེར་པོ་ཉ་བདེ་ཆུ་སྐྱིད་ལ། །
དཔོན་མི་དྲན་དགུ་དྲན་འབྲུག་མོ་དྲན། །
སྨན་ཁྲ་ཟི་བ་འདི་མ་ཐོབ་ནས། །
གྱོད་རི་བོ་ཙམ་འདི་གཡོས་ལེ་རེད། །
སྡུག་ཐང་ཆད་སྔ་ལྟས་ཡོང་ལེ་རེད། །
ང་ཤན་པས་བསམ་དཀར་བྱས་ལམ་ནས། །
ཁྱོད་འཕྱི་ཁུང་ནང་ལ་སྡོད་དུ་བཅུག །
ཤར་གླིང་པའི་འཕྱི་ཁུང་བཙན་ལེ་དེ། །
དཔོན་གུར་དཀར་རྒྱལ་པོ་ཚོད་ཚོད་རེད། །
དེ་སྟེ་མཐོང་བ་ཀུན་སྨོན་ན། །
རྨོག་ཐལ་བ་ཚུབས་ཡེ་གབ་ལེ་དེ། །
རུས་ཧོར་སེར་མིན་པ་ཞིབ་ས་མེད། །
ཧོར་ཟམ་རིང་མོའི་ཁུག་ཟུར་ནས། །
རྗེས་ར་རིལ་ཙམ་ཞིག་བཏོད་ལེ་དེ། །
གླིང་དཔའ་བརྟུལ་མིན་པས་གསལ་ས་མེད། །
ཞལ་དཀར་སྒོ་རྒྱུགས་བྱས་ཉིན་མོ། །
ཁྱི་རྔམ་པ་འབྲུག་གྲགས་སྔ་ཞབས་ནས། །
དཔོན་དར་འབུམ་མིན་པས་ཤེས་ས་མེད། །
དཔའ་རྒྱ་ཚ་སེང་སྟག་འདན་མ་ཚོས། །
བུ་རོང་ཚའི་ཤ་ལན་ལེན་ཉིན་མོ། །
ཧོར་ས་ལ་ཐོག་རྒྱུག་བྱུང་ཉིན་མོ། །
སྐྱབས་ཞུ་ས་ཐང་རྩེ་ངེད་གཉིས་ཡིན། །
བློ་འདྲི་ས་རྟ་རྫི་མགོ་དམར་རེད། །
ཧོར་རྗེ་གནམ་གྱི་རྒྱལ་པོ་ལགས། །
རང་མཚང་བཏོན་ནས་དགོས་པ་མེད། །
གླུ་ལེན་རན་མ་རེད་གསང་རན་རེད། །
ཁྱོད་གུ་ཡང་གནམ་གྱི་རྒྱལ་པོ་ཡིས། །
ཚོད་འཛིན་མིའི་ཁ་ལ་ཉན་འདོད་མེད། །
ཟིན་ཐག་ཆོད་གཅིག་གིས་ཟིན་ལེ་ཡོད། །
ང་ཤན་པ་འཕྱི་ཁུང་འཛུལ་ཀྱང་རུང་། །
ཁུང་དུ་བས་བདུག་ཉེན་ཁྱོད་ལ་འོང་། །
ང་དོགས་པ་ཆེ་བས་བསྡད་ལེ་ཡིན། །
ངས་རྔ་མས་མགོ་ལ་མི་འབྲབ་སྟེ། །
མགོ་གཡོ་རྒྱུ་མེད་ལེ་གཉའ་ཤིང་གཅིག །
ངས་བསམས་ན་གཞན་ནས་འོང་ལེ་གདའ།
སྤྲེལ་ཨ་རྒས་བསྐོར་བའི་བསྐོར་ཐག་གཅིག །
ཁྱེ་ཞེའུ་བསྐོར་པའི་སྐོར་ཐག་གཉིས། །
ར་ཆེན་པོ་བཤའ་བའི་རལ་གྲི་གསུམ། །
གླང་གཉའ་བ་བཅའ་བའི་ཐག་པ་བཞི། །
ངས་བསམས་ན་གཞན་ནས་འོང་ཞིང་གདའ། །
དཔོན་བཀུར་ཆ་ཆེ་བ་ཁྱོད་འདྲ་ཅིག །
གཡོག་རང་ཆེ་བྱེད་པ་ང་འདྲ་གཉིས། །
སྡེ་མགོ་བ་བྱེད་པའི་ཧོར་འདྲ་གསུམ། །
ཕར་བལྟར་ཚུར་གཟིགས་མཚར་ཤུགས་ཡིན། །
ཁྱི་ཞེའུ་ངོ་དེ་ལི་ལིས་བསྲུང་། །
སྡར་མའི་ངོ་དེ་ཁྱི་ཡིས་བསྲུང་། །
ཨ་མཚར་པོ་ཨ་ཆེན་ཧོར་ཡུལ་སྟོད། །
མཚར་ཐག་ཆོད་གུར་དཀར་ར་སྐད་ཁ། །
གླུ་གོ་ན་རྣ་བའི་བུ་རམ་གྱིས། །
མ་གོ་གླུ་ཡི་འགྲེལ་བ་ཞུ། །
