སྲས་ཁྲི་བཙུན་དེ་ན་རེ། ཡ། ཁོ་རེ་ཚེ་ཟད་སྨུག་པོ་སྐྱ། །ཚེ་ཡང་ཟད་ཨ་ཕོའི་གདོང་ལ་བཅར། །མི་ཁྱོད་ལ་ཐར་ས་ཡོད་པ་མིན། །དུས་དེ་རིང་རྟིང་མ་ང་ལ་བབས། །ཟེར་ནས། མདུང་གསོར་ཏེ་གླུ་འདི་འདྲ་བླངས་པར་གདའ་འོ། །
གླུ་ཐ་ལ་ལ་མོ་ཐ་ལ་ལེན། །
གླུ་ཨ་ལ་ལ་མོ་ཨ་ལ་ལེན། །
གླུ་ཡར་མཁྱེན་གནམ་ཐེལ་དཀར་པོ་མཁྱེན། །
བར་མཁྱེན་བར་ཐེལ་ཁྲ་བོ་མཁྱེན། །
མར་མཁྱེན་ས་ཐེལ་ནག་པོ་མཁྱེན། །
ལྕགས་ནག་དམ་པའི་དགུ་སྒྲིག་མཁྱེན། །
རྒྱལ་པོ་དམར་པོའི་གདུང་རྒྱུད་མཁྱེན། །
གཉིད་མེད་ཨ་མཆོད་གུ་རུ་མཁྱེན། །
གཟིམས་མེད་མར་མེ་ཚེ་འབར་མཁྱེན། །
མཁྱེན་གཟིགས་ཨ་ཕོའི་གླུ་སྣ་དྲོངས། །
དུས་དེ་རིང་ཉི་མའི་གདོང་གང་ལ། །
དགྲ་སྙིང་སྦར་གྱིས་འདེབས་པར་ཤོག །
དགྲ་མགོ་རྡོག་པས་གནོན་པར་ཤོག །
ས་འདིའི་ས་ངོ་མ་ཤེས་ན། །
གླིང་ཉིན་ཕྱོགས་རྨ་ཆུའི་འགྱིང་ཁུགས་རེད། །
ཕོ་ང་དང་ང་ངོ་མ་ཤེས་ན། །
ཨ་ཆེན་ཧོར་གྱི་གཞི་དཀྱིལ་ན། །
སེར་མོ་རག་དུག་མཁར་དགུ་ནས། །
མཁར་ཡ་རྩེའི་དཀར་མོ་རྩིབས་སྟོང་ན། །
ཧོར་མི་འགྱུར་གནམ་ལྷ་དཀར་པོ་ལ། །
སྲས་ལྷའུ་སྤུན་གཉིས་འཁྲུངས་པས་ན། །
ང་ཆེ་བ་ཁྲི་བཙུན་རིག་ཡག་ཡིན། །
ཐེའུ་རང་དཀར་པོའི་བུ་སྐལ་ཡིན། །
མཐོ་ནམ་མཁའ་མིན་པ་མི་བསམས་ཏེ། །
ང་ཁྲི་བཙུན་མགོ་འཕང་གནམ་ལས་མཐོ། །
ཡངས་བར་སྣང་མིན་པ་མེད་བསམས་ཏེ། །
ངའི་བྱང་ཁོག་བར་སྣང་ཁམས་ལས་ཡངས། །
ཆེ་ས་གཞི་མིན་པ་མེད་བསམས་ཏེ། །
ང་ལྷ་ཕྲུག་བློ་རྒྱ་ས་ལས་ཆེ། །
བརླིང་རི་རྒྱལ་མིན་པ་མེད་བསམས་ཏེ། །
ང་ཁྲི་བཙུན་གཞི་བརླིང་རི་ལས་ཆེ། །
ཟབ་རྒྱ་མཚོ་མིན་པ་མེད་བསམས་ཏེ། །
ང་ཁྲི་བཙུན་བློ་དཀྱིལ་མཚོ་ལས་ཟབ། །
ང་མ་ཁྲོས་བདུད་རྩི་སྨན་དང་འདྲ། །
ཁྲོས་ན་བཙན་དུག་ནག་པོ་ཡིན། །
ཞེ་དགའ་ན་དུང་ཟླ་དཀར་པོ་འདྲ། །
མ་དགའ་གཟའ་བདུད་ནག་པོ་ཡིན། །
ཧོར་འབུམ་དམག་ཁྲ་མོའི་གཞི་དཀྱིལ་ན། །
ཁྲི་མིང་ཐོགས་པ་གསུམ་ལས་མེད། །
ཕ་ཨ་གནམ་ཁྲི་དཔོན་ཁྲི་མིང་ཐོགས། །
བུ་ཁྲི་བཙུན་ཁྲི་དགའ་ཁྲི་མིང་ཐོགས། །
ཤན་གུང་རྗེ་ཁྲི་ཐུབ་ཁྲི་མིང་ཐོགས། །
ཁྲི་གསུམ་ཐོགས་པའི་མི་གསུམ་ཡིན། །
གནམ་ཨ་སྔོན་གཡང་གི་ར་བ་ན། །
ཉི་ཟླ་སྐར་གསུམ་མིན་པ་མེད། །
ས་དོག་མོ་བཀྲ་ཤིས་འཁྱིལ་བ་ན། །
རྗེ་གུར་དཀར་ཕ་བུ་རྣམ་གསུམ་བཞུགས། །
དེ་རིང་གླིང་ཕྲུག་སྨུག་པོ་སྐྱ། །
ཉོན་ཟེར་ན་དར་ལུང་རྣ་བས་ཉོན། །
ལྟོས་ཟེར་ན་ཁྲ་ཆུང་མིག་གིས་ལྟོས། །
དཔྱོད་ཟེར་ན་གངས་དཀར་སེམས་ཀྱིས་དཔྱོད། །
ལ་གཞི་གནས་ལུགས་བཤད་པ་ན། །
གླིང་དཀར་པོའི་རྒྱ་ཚ་ཞལ་དཀར་དང་། །
འགོག་མོ་ཇོ་རུ་བུ་སྡུག་གཉིས། །
ལྟས་ངན་སྤུན་གཉིས་གླིང་ལ་སྐྱེས། །
རྒྱ་གར་རྒྱ་ནག་བལ་མོན་ཧོར། །
འགྲན་མ་བཙུགས་ལས་ལ་གཅིག་ཀྱང་མེད། །
ནོམ་འཕྲོག་པ་རྩི་རྩི་གྲངས་མེད་རེད། །
སྐྱིད་ཞོ་ལྟར་ཆགས་པ་ཁྲག་བཞིན་དཀྲུགས། །
ཡང་སྒོས་གུར་དཀར་ཨ་གནམ་ལ། །
བརྙས་བཞག་མ་བྱས་ལས་གཅིག་མེད། །
ཧོར་ཐོ་ཐོག་རྒྱལ་པོ་འུར་རྡོས་བཀྲོངས། །
ཀུན་དགའི་བུ་མོ་ཕྱི་ལ་མངགས། །
ད་ལོ་འབུམ་དམག་ས་ལ་བརྡབས། །
མི་སྲིད་སྲིད་པ་གླིང་རུས་བྱས། །
དེ་སྟེ་གུར་དཀར་མན་ཆད་ནས། །
ཧོར་རྩྭ་མི་ཤིང་མི་ཡན་ཆད་རྣམས། །
ཤི་ན་དུར་ས་གླིང་ལ་འདེབས། །
ཤི་རོགས་མགོ་སྦྲེལ་ཨེ་རྙེད་བལྟ། །
མཐར་ཟད་ཀྱང་འགྱོད་པ་སྐྱེ་རྒྱུ་མེད། །
ཕམ་ཁུར་ནས་ཧོར་འགྲོ་བ་ལས། །
གཅིག་མ་ལུས་གླིང་ནས་ཤི་བ་དགའ། །
དེ་ནས་གླིང་ཕྲུག་སྨུག་པོ་སྐྱ། །
མཁར་དཀར་མོ་རྩིབས་སྟོང་ནང་བཅུད་ལ། །
སྟོབས་ཆེ་བ་གླིང་པོ་ཁྲ་འབར་ཡིན། །
གྲི་ཕུད་ན་སྡིག་གཅོད་ཤན་པ་ཡིན། །
མདའ་རྫོང་ན་ཐང་རྩེ་གཡུ་འབྲུག་ཡིན། །
རྩལ་ཆེ་བ་ནམ་མཁའ་སྦར་འཛིན་ཡིན། །
ཤེད་ཆེན་པོ་རི་བོ་པང་འཁོར་ཡིན། །
མགྱོགས་འགྲན་མེད་རླུང་ནག་རྗེས་གཅོད་ཡིན། །
མདུང་སྐྱ་རིང་ང་ལ་བབས་ལེ་ཡིན། །
ངས་ལག་ན་བཟུང་བའི་སྐྱ་རིང་མདུང་། །
མདུང་ཤིང་ཙནྡན་དཀར་པོས་བཟོས། །
མདུང་སོ་གནམ་ལྕགས་ཞུན་ལ་བརྡུངས། །
མདུང་སྣེ་རྒྱ་མོའི་དར་ལ་བྱས། །
མདུང་རྔ་སེངྒེའི་རལ་པར་བྱས། །
མདུང་རྟིང་གོར་མོ་རྡོ་ལ་བྱས། །
ཐེའུ་རང་དཀར་པོའི་རྟེན་མདུང་ཡིན། །
ཡ་རྩེ་རྒྱལ་པོའི་ཁྱད་ནོར་ཡིན། །
ངས་དེ་རིང་གླིང་ཕྲུག་སྨུག་པོ་སྐྱ། །
དང་པོ་འདོ་བ་སྨུག་གུ་དེ། །
མདུན་རྒྱབ་སྦྲགས་ནས་མདུང་ལ་གཟེར། །
དེ་སྟེང་སྒ་གདན་ཐོག་འཇོག་བྱེད། །
དེ་ནས་གླིང་ཕྲུག་ཁ་སེར་ཁྱོད། །
རྐང་མཐིལ་དཀྱིལ་ནས་གྱེན་ལ་གཟེར། །
སྤྱི་གཙུག་མདུང་སོ་རྒྱང་གིས་འདོན། །
མི་རྟ་གཉིས་ཀ་མཉམ་དུ་བསྒྲིལ། །
ལག་གཡས་པས་བཟུང་ནས་ཧོར་ལ་འཁྱེར། །
དགྲ་མགོ་འཁྱེར་བ་ཀུན་གྱི་ལུགས། །
དགྲ་གཟུགས་འཁྱེར་བ་ཨ་ཕོའི་ལུགས། །
དགའ་དོ་བསམ་མམ་སྡུག་དོ་བསམ། །
གོ་ན་རྣ་བའི་བདུད་རྩི་ལ། །
མ་གོ་གླུ་ཡི་འགྲེལ་བ་ཞུ། །
