གསར་འགོད་པས་མཚོ་སྔོན་པོ་རྒྱལ་ཁབ་རིམ་པའི་རང་བྱུང་སྲུང་སྐྱོབ་ཁུལ་དོ་དམ་ཅུས་ནས་རྒྱུས་ལོན་བྱུང་བ་ལྟར་ན། མཚོ་སྔོན་པོའི2022ལོའི་དགུན་དུས་སྐོར་སྲུང་གི་ལྟ་ཞིབ་ཚད་ལེན་གྱི་གཞི་གྲངས་སུ། 2022ལོར་མཚོ་སྔོན་པོ་ནས་དགུན་སྐྱེལ་བའི་ཆུ་བྱ་ལ་ཁྱོན་བསྡོམས་རིགས9དང་གྲངས་ཀ11100ལྷག་ཡོད་པ་དང་། 2021ལོ་དང་བསྡུར་ན། ལྡབ3.5ཡིས་ཇེ་མང་དུ་སོང་བ་མངོན་ཡོད།
མཚོ་སྔོན་པོ། པར་རིས་ཞིན་ཧྭ་དྲ་བ་ལས་དྲངས།
རྒྱུས་ལོན་བྱུང་བ་ལྟར་ན། ཐེངས་འདིའི་ལྟ་ཞིབ་ཚད་ལེན་ནི་མཚོ་སྔོན་པོ་རྒྱལ་ཁབ་རིམ་པའི་རང་བྱུང་སྲུང་སྐྱོབ་ཁུལ་དོ་དམ་ཅུས་ཀྱིས་རྩ་འཛུགས་བྱས་ནས་སྤེལ་བ་དང་། ལྟ་ཞིབ་ཚད་ལེན་གྱི་ཁྱབ་ཁོངས་སུ་མཚོ་སྔོནl་པོའི་མཐའ་འཁོར་གྱི་ཆུ་བྱའི་འཚོ་གནས་ལྟ་ཞིབ་ཚད་ལེན་གྱི་གནས24དང་རྒོ་བའི་ལྟ་ཞིབ་ཚད་ལེན་གྱི་མ་དཔེ་ཁུལ15བཅས་ཚུད་ཅིང་། དེ་ནི་མཚོ་སྔོན་པོ་ནས་དགུན་སྐྱེལ་བའི་ཆུ་བྱ་དང་རྒོ་བའི་དགུན་དུས་རྒྱུད་སྤེལ་སྐབས་ཀྱི་རིགས་ཁྱུའི་རྟོག་ཞིབ། རི་སྐྱེས་སྲོག་ཆགས་ཀྱི་རིམས་ཁུངས་རིམས་ནད་སོགས་ལ་ལྟ་ཞིབ་ཚད་ལེན་བྱེད་པ་དང་འབྲེལ་བ་རེད།
མཚོ་སྔོན་པོ། པར་རིས་ཞིན་ཧྭ་དྲ་བ་ལས་དྲངས།
རང་རྒྱལ་གྱི་ཆེས་ཆེ་བའི་སྐམ་སའི་ནང་ལོག་གི་ཚྭ་མེད་མཚེའུ་ཡིན་པའི་ཆ་ནས། མཚོ་སྔོན་པོ་ལ“བྱ་རིགས་ཀྱི་ཞིང་ཁམས”ཞེས་འབོད་བཞིན་ཡོད། གཞི་གྲངས་གསར་ཤོས་སུ་གསལ་བ་ལྟར་ན། མཚོ་སྔོན་པོ་རུ་འཚོ་གནས་བྱེད་པའི་ཆུ་བྱ་ལ་ཁྱོན་བསྡོམས་རིགས98དང་གྲངས་ཀ་ཁྲི60ལྷག་ཡོད་པས། ཀྲུང་གོའི་དུས་བྱའི་རྒྱུད་སྤེལ་གྲངས་ཀ་ཆེས་མང་བ་དང་རིགས་ཁྱུ་ཆེས་འདུས་སྡོད་ཀྱི་རྒྱུད་སྤེལ་བྱེད་ས་ཞིག་ཏུ་གྱུར་ཡོད།
ངང་བ་དཀར་མོ། པར་རིས་ཀྲུང་གོའི་གསར་འགྱུར་དྲ་བ་ལས་དྲངས།
ཤེས་རྟོགས་བྱུང་བ་ལྟར་ན། ཐེངས་འདིའི་ལྟ་ཞིབ་ཚད་ལེན་གྱི་ནང་དུ། རྒྱལ་ཁབ་ཀྱི་རིམ་པ་གཉིས་པའི་གཙོ་གནད་སྲུང་སྐྱོབ་ཀྱི་རི་སྐྱེས་སྲོག་ཆགས་ཏེ་ངང་བ་དཀར་མོ600ལྷག་དང་ངུར་བ10500ལྷག་ཡོད་པ་རེད། དུས་མཚུངས་སུ། ལྟ་ཞིབ་ཚད་ལེན་མི་སྣ་ཡིས་མཚོ་སྔོན་པོའི་ལྷོ་ངོགས་ཀྱི་འཚོ་གནས་ས་ཆའི་སྐྱེ་ཁམས་ཁོར་ཡུག་ལེགས་པ་དང་ཁ་ཟས་འཛོམས་པ་ལས། ངུར་བ་སྔར་བས་མང་བོ་ཡིས་མཚོ་སྔོན་པོ་ནས“གཏན་སྡོད”བྱ་རྒྱུ་བདམས་ཡོད་པ་ཡང་ཤེས་པ་རེད།
ངུར་བ། པར་རིས་ཞིན་ཧྭ་དྲ་བ་ལས་དྲངས།
“ངུར་བ་སྔར་བས་མང་བོ་དབྱར་ཁའི་དུས་བྱ་ནས་སྡོད་བྱ་ལ་གྱུར་ཡོད་པ་འདི་ཡང2022ལོར་དགུན་སྒྲོལ་ཆུ་བྱའི་གྲངས་ཀ་ཇེ་མང་ལ་མངོན་གསལ་སོང་བའི་རྒྱུ་རྐྱེན་གལ་ཆེན་ཞིག་རེད”ཅེས་མཚོ་སྔོན་པོ་རྒྱལ་ཁབ་རིམ་པའི་རང་བྱུང་སྲུང་སྐྱོབ་ཁུལ་དོ་དམ་ཅུས་ཀྱི་རང་བྱུང་སྲུང་སྐྱོབ་ཚན་ཁག་གི་ཁོ་ཀྲང་སུན་ཅན་ཆིང་གིས་བཤད།
རི་སྐེགས། པར་རིས་ཀྲུང་གོའི་གསར་འགྱུར་དྲ་བ་ལས་དྲངས།
ཉེ་བའི་ལོ་ལ། ས་གནས་དེ་གའི་སྲིད་གཞུང་གིས་ཧུར་ཐག་ངང་བཞུར་ཁོངས་ནང་གི་ལྟ་ཞིབ་ཚད་ལེན་གྱི་མ་ལག་འཐུས་ཚང་དུ་བཏང་ནས་མཚོ་སྔོན་པོའི་བཞུར་ཁོངས་ཀྱི་སྐྱེ་ཁམས་སྲུང་སྐྱོབ་བྱེད་ཤུགས་ཇེ་ཆེ་ལ་བཏང་བ་དང་། ས་གནས་དེ་གའི་རོང་འབྲོག་མང་ཚོགས་ཀྱི་སྐྱེ་ཁམས་ཁོར་ཡུག་སྲུང་སྐྱོབ་ཀྱི་འདུ་ཤེས་ཀྱང་རྒྱུན་ཆད་མེད་པར་ཇེ་མཐོར་སོང་བ་ན། མི་སྔར་བས་མང་བོ་མཚོ་སྔོན་པོའི་སྐྱེ་ཁམས་ཁོར་ཡུག་སྲུང་སྐྱོབ་ཀྱི་རུ་དཔུང་ནང་དུ་ཞུགས་བཞིན་ཡོད། ཕྱོགས་མང་བོ་ནས་སྲུང་སྐྱོབ་བྱས་པ་ལས། མཚོ་སྔོན་པོ་སླར་ཡང་སྔོ་ཞིང་དྭངས་པ་དང་བྱ་རིགས་མང་བོ་འཚོ་སྡོད་ཀྱི་གནས་མཆོག་ཅིག་ཏུ་གྱུར་ཡོད།
སོ་བྱ། པར་རིས་ཀྲུང་གོའི་གསར་འགྱུར་དྲ་བ་ལས་དྲངས།
“ཐེངས་འདིའི་ལྟ་ཞིབ་ཚད་ལེན་བྱ་བར་བརྟེན་ནས། ཞིབ་འཇུག་མི་སྣ་ཡིས་དུས་ཐོག་ཏུ་དགུན་སྐྱེལ་བའི་ཆུ་བྱ་དང་རྒོ་བའི་ཁྱབ་ཚུལ་དང་འགུལ་རྣམ་འགྱུར་ལྡོག་ལ་རྒྱུས་ལོན་བྱུང་སྟེ་མཚོ་སྔོན་པོ་རྒྱལ་ཁབ་སྤྱི་གླིང་གསར་འཛུགས་བྱེད་པ་ལ་རྨང་གཞིའི་གཞི་གྲངས་བརྟན་པོ་གསོག་ཉར་བྱེད་ཐུབ”ཅེས་མཚོ་སྔོན་པོ་རྒྱལ་ཁབ་རིམ་པའི་རང་བྱུང་སྲུང་སྐྱོབ་ཁུལ་དོ་དམ་ཅུས་ཀྱི་ཅུས་ཀྲང་ཧོ་ཡུས་པང་གིས་བཤད།
