སྒྲོལ་མ་མཚོ།
མེ་ཏོག་སྟེང་འཐུང་དཀར་པོ། །
མཚན་ལ་ཟླ་བས་བཏབ་པ། །
ང་རང་མཚན་ལ་བཞད་པའི། །
ཀུ་མུད་ཡིན་ན་བསམས་བྱུང་། །
ཚིམ་བྱེད་ཙན་དན་གོས་སྔོན། །
དྲི་བཟང་ཤིང་གི་རིགས་རེད། །
ཞིམ་པའི་དྲི་བསུང་འཐུལ་བ། །
ཡལ་བ་མེད་ན་བསམས་བྱུང་། །
ང་རང་བདུད་འཇོམས་ཤིང་གི །
ལྕུག་ཕྲན་ཡིན་ན་བསམས་བྱུང་། །
མེ་ཏོག་ཨུ་དུམ་ཝ་ར། །
འཆར་རྒྱུ་བྱུང་ན་བསམས་བྱུང་། །
ཕར་འགྲོ་ཕ་གིར་ཤིག་ཤིག།
ཚུར་འོང་ཡིན་ན་བསམས་བྱུང་། །
དང་པོ་ཚུར་ལ་འདུས་པ། །
འབྲལ་བ་མེད་ན་བསམས་བྱུང་། །
ཉིན་མོ་ཁ་དཀར་ངོ་དཀར། །
ཨ་ཤེ་ཡིན་ན་བསམས་བྱུང་། །
དཀར་པོ་རང་གི་སེམས་པ། །
ནོགས་པ་མེད་ན་བསམས་བྱུང་། །
བྱང་སྟོད་སྐར་མ་སྨིན་དྲུག།
ཆེམ་ཆེམ་གནང་ན་བསམས་བྱུང་། །
འོད་ཀྱི་ཟེགས་མ་རེ་རེས། །
ལམ་སྟོན་གནང་ན་བསམས་བྱུང་། །
ལས་ཀྱི་དར་དཀར་མདུད་པ། །
བསོད་ནམས་ཅན་གྱིས་བཞེས་སོང་། །
རྣམ་དཀར་ཟླ་བའི་འོད་ཀོར། །
གཟིམ་པ་མེད་ན་བསམས་བྱུང་། །
བྲིས་པ་གསེར་རིས་དངུལ་རིས། །
ཡིད་ལ་བསྒོས་པའི་རི་མོ། །
ལག་རིས་ཆུ་དང་ཐིགས་པས། །
འཇིག་པ་མེད་ན་བསམས་བྱུང་། །
གསོམ་ཤུག་ཚང་ཚིང་སྐྱེས་པའི། །
ནགས་ལ་དབྱར་དགུན་མེད་པ། །
ང་རང་ནགས་ཀླུང་དེ་ཡི། །
བྱ་ཞིག་ཡིན་ན་བསམས་བྱུང་། །
ཆུ་དེ་ཆུ་བོ་སྐལ་ལྡན། །
ཤང་ཤང་རྣ་བར་ལྷུང་བ། །
ད་ཆ་རང་གི་སེམས་གཅོང་། །
ཆུ་མོས་འཁྱེར་ན་བསམས་བྱུང་། །
